Lucas 6:1-49

6  Tiʼ junpʼéel u kʼiinil Sábado le táan u máan Jesús teʼ tuʼux pakʼaʼan trigooʼ, u disipuloʼobeʼ káaj u tʼokikoʼob u yiʼij yéetel u jaxaltikoʼob utiaʼal ka u jaantoʼob u neekʼoʼob.  Le oʼolaleʼ jujuntúul fariseoʼobeʼ tu yaʼaloʼob: «¿Baʼaxten ka beetkeʼex baʼax maʼ uts u beetaʼal tu kʼiinil Sabadoiʼ?».  Baʼaleʼ Jesuseʼ tu núukajtiʼob: «¿Mix juntéen wa a xokmeʼex le baʼax tu beetaj David yéetel le máaxoʼob ku máanoʼob tu yéetel le ka wiʼijchajoʼoboʼ?  ¿Maʼ wa ook tu najil Dios yéetel tsʼaʼabtiʼ le waaj kʼubaʼanoʼ? ¿Maʼ wa tu chʼaʼaj u jaant yéetel tu tsʼáaj xan junjaats tiʼ le u yéet máanoʼob kex maʼ uts u jaantaʼal kaʼach tumen mix máak, baʼaxeʼ chéen tumen le sacerdoteʼoboʼ?».  Letiʼeʼ tu yaʼalaj xan tiʼob: «U Paal máakeʼ letiʼ u Yuumtsilil le Sabadooʼ».  Tiʼ uláakʼ u kʼiinil Sabadoeʼ Jesuseʼ ook teʼ sinagogaoʼ ka joʼopʼ u kaʼansaj. Teʼeloʼ tiʼ yaan juntúul máak tikin u x-noʼoj kʼabiʼ.  Le escribaʼob yéetel le fariseoʼob túunoʼ káaj u jach ilkoʼob wa Jesuseʼ yaan u tsʼakik wa máax tu kʼiinil Sábado, utiaʼal beyoʼ u kaxtikoʼob bix jeʼel u takikoʼob u pooleʼ.  Baʼaleʼ Jesuseʼ u yojel baʼax táan kaʼach u tuklikoʼob, le oʼolaleʼ tu yaʼalaj tiʼ le máak tikin u kʼaboʼ: «Líikʼen ka waʼalakech chúumuk». Letiʼeʼ líikʼeʼ ka waʼalaji.  Jesús túuneʼ tu yaʼalajtiʼob: «Kin kʼáatikteʼex: Tu kʼiinil Sabadoeʼ, ¿uts wa u beetaʼal junpʼéel baʼal maʼalob, wa u beetaʼal junpʼéel baʼal kʼaas?, ¿u salvartaʼal junpʼéel kuxtal,* wa u xuʼulsaʼal?». 10  Jesuseʼ ka tsʼoʼok u paktik le máaxoʼob yanoʼob tu baʼpachoʼ, tu yaʼalaj tiʼ le máakoʼ: «Tichʼ a kʼab». Letiʼeʼ tu tichʼeʼ ka túun utschaj u kʼaboʼ. 11  Letiʼobeʼ sen pʼuʼujoʼobeʼ ka joʼopʼ u tsikbaltikoʼob tu baatsiloʼob baʼax jeʼel u beetkoʼob tiʼ Jesuseʼ. 12  Teʼ kʼiinoʼob jeʼeloʼ, Jesuseʼ naʼak teʼ wits utiaʼal u oraroʼ, ka máan bul áakʼab táan u orar tiʼ Dios. 13  Baʼaleʼ le ka sáaschajeʼ, letiʼeʼ tu tʼanaj u disipuloʼobeʼ ka tu yéeyaj doce u túulal ichiloʼobiʼ; leloʼobaʼ tu tsʼáaj xan u kʼaabaʼtoʼob apostoloʼob: 14  Simón, tiʼ máax xan tu tsʼáaj u kʼaabaʼt Pedro, yéetel Andrés u yíitsʼin, Santiago, Juan, Felipe, Bartolomé, 15  Mateo, Tomás, Santiago u paal Alfeo, Simón, tiʼ máax ku yaʼalaʼal jach u tsʼaamaj u yóol, 16  Judas u paal Santiago yéetel Judas Iscariote, le máax kʼuch u traicionart Jesusoʼ. 17  Letiʼ túuneʼ éem yéetel u apostoloʼob tiʼ junpʼéel táax luʼum, teʼeloʼ tiʼ yaan kaʼach yaʼab tiʼ u disipuloʼobiʼ, bey xan yaʼabkach máakoʼob taaljaʼanoʼob tiʼ u kaajiloʼob Judea, Jerusalén bey xan tiʼ Tiro yéetel Sidón, le kaajoʼob yaan tu jáal le kʼáaʼnáaboʼ; letiʼobeʼ taaloʼob u chʼenxikintoʼob Jesús bey xan utiaʼal ka tsʼaʼakakoʼob. 18  Tak le máaxoʼob ku beetaʼal u sen chiʼichnaktaloʼob tumen le demonioʼoboʼ tsʼaʼakoʼob. 19  Tuláakal le yaʼabkach máakoʼob túunoʼ u kʼáat kaʼach u tsʼáalkʼabtoʼob Jesús, tumen tiʼ letiʼeʼ ku jóokʼol páajtalil; tuláakal le máakoʼob túunoʼ ku yutstaloʼob. 20  Jesuseʼ tu paktaj u disipuloʼobeʼ ka tu yaʼalajtiʼob: «Teʼex máax óotsileʼexeʼ, kiʼimak a wóoleʼex, tumen a tiaʼaleʼex u Reino Dios. 21  »Teʼex máax wiʼijeʼex bejlaʼeʼ, kiʼimak a wóoleʼex, tumen yaan a naʼajkúuntaʼaleʼex. »Teʼex máax ka wokʼoleʼex bejlaʼeʼ, kiʼimak a wóoleʼex, tumen yaan a cheʼejeʼex. 22  »Kiʼimakchajak a wóoleʼex ken pʼektaʼakeʼex tumen le máakoʼoboʼ, ken u jóoʼseʼexoʼob ichiloʼob, ken u poʼopochʼeʼexoʼob yéetel ken u yaʼaloʼob kʼasaʼan máakeʼex tu yoʼolal u Paal máak. 23  Teʼ kʼiin jeʼeloʼ, kiʼimakchajak a wóoleʼex yéetel síitʼneneʼex tumen, ¡ileʼex!, nojoch le siibal ken a kʼameʼex teʼ kaʼanoʼ, tumen le baʼaloʼobaʼ láayliʼ letiʼe baʼax beetaʼab tiʼ le profetaʼob tumen u úuchben láakʼtsiloʼob le máakoʼobaʼ. 24  »Baʼaleʼ ¡óotsileʼex ayikʼal máakeʼex, tumen le baʼaxoʼob yaanteʼexoʼ chéen le jaaj kun antalteʼexoʼ! 25  »¡Óotsileʼex teʼex le naʼajeʼex bejlaʼeʼ, tumen yaan a wiʼijtaleʼex! »¡Óotsileʼex teʼex le ka cheʼejeʼex bejlaʼeʼ, tumen yaan u yaatal a wóoleʼex yéetel yaan a wokʼoleʼex! 26  »¡Óotsileʼex le ken tʼaanak maʼalob tuláakal le máakoʼob ta woʼolaleʼexoʼ, tumen le baʼaloʼobaʼ láayliʼ letiʼe baʼax beetaʼab tiʼ le maʼ jaajil profetaʼob tumen u úuchben láakʼtsiloʼob le máakoʼobaʼ! 27  »Baʼaleʼ tiʼ teʼex ka wuʼuyikeneʼexeʼ, kin waʼalik: Maʼ u xuʼulul a yaabiltikeʼex a enemigoʼex, a beetkeʼex uts tiʼ le máaxoʼob pʼekmileʼexoʼ, 28  a bendecirtikeʼex le máaxoʼob maldecirtikeʼexoʼ, yéetel a orareʼex tu yoʼolal le máaxoʼob pochʼkeʼexoʼ. 29  Le máax ku loxik junpʼéel a pʼuʼukeʼ sut xan le uláakʼ junpʼéel a pʼuʼuk tiʼoʼ; le máax ku luʼsiktech u yáal a nookʼeʼ, chaʼa xan u bisik le uláakʼ u yáaloʼ. 30  Jeʼel máaxak ka u kʼáattech wa baʼaxeʼ, tsʼáatiʼ; le máax xan ku luʼsiktech baʼax a tiaʼaleʼ, maʼ a kʼáatik ka u suttech. 31  »Tsʼoʼoleʼ, jeʼex a kʼáateʼex ka beetaʼakteʼex tumen le máakoʼoboʼ, teʼex xaneʼ bey kʼaʼabéet a beetkeʼextiʼoboʼ. 32  »Wa teʼex ka yaabiltikeʼex le máaxoʼob yaabiltikeʼexoʼ, ¿baʼax utsil ken a kʼameʼex? Tumen tak le j-kʼeban máakoʼoboʼ ku yaabiltikoʼob le máaxoʼob yaabiltmiloʼoboʼ. 33  Tsʼoʼoleʼ wa ka beetkeʼex uts tiʼ le máaxoʼob beetikteʼex utsoʼ, ¿baʼax jach maʼalob baʼal ka beetkeʼex? Tak le j-kʼeban máakoʼoboʼ bey u beetkoʼoboʼ. 34  Wa ka tsʼáaikeʼex xan wa baʼax majáantbil* tiʼ le máaxoʼob jeʼel u páajtal u sutkoʼobteʼex u jeeleʼ, ¿baʼax utsil ka beetkeʼex? Tak le j-kʼeban máakoʼoboʼ ku tsʼáaikoʼob baʼaloʼob majáantbil tiʼ uláakʼ j-kʼeban máakoʼob jeʼel u páajtal u sutkoʼob u jeel tiʼobeʼ. 35  Baʼaxeʼ seguernak a yaabiltikeʼex a enemigoʼex, a beetkeʼex uts, a tsʼáaikeʼex baʼal majáantbil, yéetel maʼ a páaʼtkeʼex u suʼutulteʼex mix baʼal; beyoʼ nojoch baʼax kun tsʼaabilteʼex, yéetel yaan a beetkabaʼex u paalal le j-Sen Kaʼanaloʼ, tumen letiʼeʼ jach uts tiʼ le kʼasaʼan máakoʼoboʼ bey xan tiʼ le máakoʼob maʼ tu tsʼáaikoʼob u diosboʼotikiloʼ. 36  Maʼ u xuʼulul a chʼaʼikeʼex óotsilil jeʼex a Taataʼex ku chʼaʼik óotsililoʼ. 37  »Tsʼoʼoleʼ xuʼuluk a juzgareʼex, beyoʼ junpuliʼ maʼ kan juzgartbileʼex; xuʼuluk xan a waʼalikeʼex unaj u castigartaʼal wa máax, beyoʼ junpuliʼ maʼ kun aʼalbil wa yaan a castigartaʼaleʼex. Maʼ u xuʼulul a perdonareʼex utiaʼal ka perdonartaʼakeʼex.* 38  Maʼ u xuʼulul a tsʼáaikeʼex wa baʼax tiʼ u maasil utiaʼal xan ka tsʼaʼabakteʼex wa baʼax. Letiʼobeʼ yaan u láalikoʼob ta púujeʼex yaʼab maʼalob baʼal, kokojki, chíiktaʼan, yéetel yíiʼchuup. Tumen jeʼel bix a pʼiiseʼexeʼ bey xan kan pʼisbileʼexoʼ». 39  Tsʼoʼoleʼ tu yaʼalaj xan tiʼob le kettʼaanaʼ: «¿Máasaʼ juntúul máak chʼóopeʼ maʼ tu páajtal u nuʼuktik uláakʼ juntúul máak chʼóop? Tumen tu kaʼatúulal jeʼel u lúubloʼob tiʼ junpʼéel jooleʼ, ¿máasaʼ? 40  Le máax ku kaʼansaʼaloʼ maʼ maas nojoch tiʼ le máax kaʼansikoʼ, baʼaleʼ tuláakal máax ku kaʼansaʼal tubeeleʼ yaan u kʼuchul u beetuba jeʼex le máax kaʼansikoʼ. 41  ¿Baʼaxten túun ka wilik le sojol yaan tu yich a sukuʼunoʼ, baʼaleʼ maʼ ta wilik le nuxiʼ cheʼ kʼatakbal ta wichoʼ? 42  ¿Bix u páajtal a waʼalik tiʼ a sukuʼun: ‹Sukuʼun, chaʼa in jóoʼsik le sojol yaan ta wichoʼ›, baʼaleʼ techeʼ maʼ ta wilik le nuxiʼ cheʼ kʼatakbal ta wichoʼ? ¡J-kaʼapʼéel ich! Yáaxeʼ jóoʼs le nuxiʼ cheʼ kʼatakbal ta wichoʼ, utiaʼal ka páatak a wilik tubeel bix jeʼel a jóoʼsik le sojol yaan tu yich a sukuʼunoʼ. 43  »Tumen mix junpʼéel maʼalob cheʼ ku tsʼáaik ichoʼob tuʼuchajaʼanoʼob; yéetel junpʼéel cheʼ maʼ pataleʼ maʼ tu páajtal u tsʼáaik maʼalob ich. 44  Tumen cada cheʼeʼ ku kʼaj óoltaʼal yoʼolal u yichoʼob. Jeʼex tiʼ le kʼiʼixoʼoboʼ maʼatech u tʼoʼokol higoʼob, mix tech u tʼoʼokol uvaʼob tiʼ junkúul cheʼ yaan u kʼiʼixel. 45  Juntúul máak utseʼ ku yeʼesik le maʼalob baʼaloʼob u taʼakmaj ichil u puksiʼikʼaloʼ; baʼaleʼ juntúul máak kʼasaʼaneʼ ku yeʼesik le kʼaakʼas baʼaloʼob u taʼakmaj ichil u puksiʼikʼaloʼ, tumen tu chiʼ máak ku jóokʼol tuláakal baʼax chupmil u puksiʼikʼal. 46  »¿Baʼaxten túun ka waʼalikeʼexten ¡Yuumtsil! ¡Yuumtsil! baʼaleʼ maʼ ta beetkeʼex le baʼaxoʼob kin waʼalikoʼ? 47  Tuláakal máax ku taal tin wiknal, ku yuʼubik baʼax kin waʼalik yéetel ku beetkeʼ, nikaʼaj in weʼesteʼex tiʼ máax chíikaʼan: 48  Chíikaʼan tiʼ juntúul xiib le ka tu beetaj junpʼéel najeʼ, tu páanaj jach taam le luʼumoʼ ka tu tsʼáaj u chuunpakʼil yóoʼ cháaltun. Le oʼolal ka kaʼanchaj u jaʼil le áalkab jaʼoʼ tu xíikjatsʼtuba teʼ najoʼ, baʼaleʼ maʼ chúukpaj u muukʼil tiʼ utiaʼal u péeksikiʼ, tumen jach maʼalob beetaʼanik. 49  Baʼaleʼ le máax ku yuʼubik baʼax kin waʼalik, tsʼoʼoleʼ maʼ tu beetkeʼ chíikaʼan tiʼ juntúul xiib tu beetaj junpʼéel naj chéen yóoʼ luʼum yéetel maʼ tu tsʼáaj u chuunpakʼiliʼ. Le áalkab jaʼoʼ tu xíikjatsʼtuba teʼ najoʼ, ka séeb júuti, bey túun xiixchajik le najoʼ».

Tsolajiloʼob

Wa: «alma». Gr.: sikjé. Ilaʼak Tipʼ. 7A.
Leloʼ u kʼáat u yaʼaleʼ x-maʼ interesil.
Lit.: «Maʼ u xuʼulul a jáalkʼabtajeʼex, yéetel yaan a jáalkʼabtaʼaleʼex».