Lucas 2:1-52

2  Teʼ kʼiinoʼob jeʼeloʼ César Augustoeʼ tu yaʼalaj ka tsʼíibtaʼak u kʼaabaʼ tuláakal máak  (le yáax censoaʼ beetaʼab tu kʼiiniloʼob táan u gobernar Quirinio tu luʼumil Siria);  tuláakal máak túuneʼ bin u tsʼíibt u kʼaabaʼ teʼ kaaj tuʼux síijoʼ.  José xaneʼ lukʼ tu kaajil Nazaret tiʼ u luʼumil Galileaeʼ ka bin Belén, u kaajal David yaan tu luʼumil Judea, tumen tiʼ u chʼiʼibal yéetel tiʼ u familia David u taal.  Bin utiaʼal u tsʼíibtik u kʼaabaʼ yéetel María, le máax yéetel tsʼokaʼan u beeloʼ; teʼ kʼiinoʼob jeʼeloʼ jach taʼaytak u yóolintkuba María.  Le tiaʼanoʼob Belenoʼ, Maríaeʼ kʼuch u kʼiinil u síijil u chaambal.  Ka tu síijsaj u paal, u yáax paal, ka tu báatsʼtepʼtaj yéetel nookʼ ka tu chikúuntaj teʼ tuʼux ku tsʼaʼabal u yoʼoch le baʼalcheʼoboʼ, tumen minaʼan kaʼach tuʼux u pʼáatloʼob teʼ najoʼob utiaʼal uʼulaboʼoboʼ.  Maʼ sen náach tiʼ le kaaj jeʼeloʼ yaan kaʼach j-kanan tamanoʼob kajaʼanoʼob ich kʼáax yéetel bul áakʼab kaʼach u kanáantkoʼob u tamanoʼobiʼ.  Chéen ka téek chíikpaj u ángel Jéeoba waʼalakbal tu yiknaloʼob, yéetel u nojbeʼenil Jéeobaeʼ léembalnaj tu baʼpachoʼob, ka jach sajakchajoʼob. 10  Baʼaleʼ le angeloʼ tu yaʼalajtiʼob: «Maʼ a chʼaʼikeʼex saajkil, tumen ¡ileʼex!, táan in taasikteʼex u maʼalob péektsilil junpʼéel nojoch kiʼimak óolal kun yantal tiʼ tuláakal le kaajoʼ, 11  tumen bejlaʼeʼ, tu kaajal Davideʼ, tsʼoʼok u síijil juntúul a Salvadoreʼex, Cristo le Yuumtsiloʼ. 12  Lelaʼ letiʼe chíikulal kun meyajteʼexaʼ: Yaan a wilkeʼex juntúul chaambal báatsʼtepʼtaʼan yéetel nookʼ, chikúuntaʼan teʼ tuʼux ku tsʼaʼabal u yoʼoch le baʼalcheʼoboʼ». 13  Tu tséel le ángel túunoʼ téek muchʼlaj yaʼabkach angeloʼobiʼ ka joʼopʼ u kiʼikiʼtʼantkoʼob Dios yéetel le tʼaanoʼobaʼ: 14  «Nojbeʼenkúuntaʼak Dios teʼ kaʼanoʼ, yéetel teʼ Luʼumaʼ yanak jeetsʼelil ichil le máakoʼob ku lúubloʼob utsil tiʼ Diosoʼ». 15  Le ka lukʼ le angeloʼob tu yiknaloʼob utiaʼal u suutoʼob teʼ kaʼanoʼ, le j-kanan tamanoʼoboʼ káaj u yaʼalikoʼob tu baatsiloʼob: «Koʼoneʼex túun tak tu kaajil Belén, ka k-il le baʼax tsʼoʼok u yúuchloʼ, le baʼax tsʼaʼab k-ojéelt tumen Jéeobaoʼ». 16  Binoʼob túun tu séebaʼanileʼ ka tu yiloʼob María yéetel José, bey xan le chaambal chikúuntaʼan teʼ tuʼux ku tsʼaʼabal u yoʼoch le baʼalcheʼoboʼ. 17  Le ka tu yiloʼobeʼ, tu tsʼáajoʼob ojéeltbil le baʼax aʼalaʼabtiʼob tu yoʼolal le chan xiʼipaloʼ. 18  Tuláakal le máaxoʼob chʼenxikint le baʼax tu yaʼalaj le j-kanan tamanoʼoboʼ jach jaʼakʼ u yóoloʼob, 19  baʼaleʼ Maríaeʼ káaj u tsʼáaik ichil u puksiʼikʼal le baʼaloʼobaʼ bey xan u tuukul tiʼ baʼax u kʼáat u yaʼaloʼob. 20  Le j-kanan tamanoʼoboʼ binoʼob táan u nojbeʼenkúuntkoʼob yéetel táan u kiʼikiʼtʼantkoʼob Dios yoʼolal tuláakal le baʼaxoʼob tu yiloʼob yéetel tu yuʼuboʼob, jach jeʼex úuchik u yaʼalaʼaltiʼoboʼ. 21  Le ka tu tsʼáaj ocho kʼiinoʼob tiʼ le chaambaloʼ, le ka kʼuch u kʼiinil u súutkʼuptaʼaloʼ* tsʼaʼab u kʼaabaʼt Jesús, le kʼaabaʼ tsʼaʼabtiʼ tumen le ángel táanil tiʼ u yantal tu jobnel Maríaoʼ. 22  Le ka kʼuch u kʼiinil u limpiokíintkubaʼob jeʼex u yaʼalik u Ley Moiseseʼ, le chaambaloʼ bisaʼab Jerusalén utiaʼal u yeʼesaʼal tu táan Jéeoba, 23  jeʼex tsʼíibtaʼanil tu Ley Jéeobaaʼ: «Tuláakal yáax xibil paal ku síijileʼ unaj u junpáaykuntaʼal bey kiliʼich utiaʼal Jéeobaeʼ». 24  Letiʼobeʼ tu kʼuboʼob xan u siibal jeʼex u yaʼalik u Ley Jéeobaaʼ: «kaʼatúul mukuy wa kaʼatúul mejen palomaʼob». 25  Tu kaajil Jerusaleneʼ yaan kaʼach juntúul máak ku kʼaabaʼtik Simeón; letiʼeʼ juntúul máak uts yéetel u chʼaʼamaj saajkilil tiʼ Dios, táan kaʼach u páaʼtik u kʼuchul u kʼiinil u kiʼimakkúuntaʼal u yóol Israel; yaan xan kiliʼich muukʼ* tu yóokʼol. 26  Tsʼoʼoleʼ tiʼ letiʼeʼ tsʼaʼan kaʼach u yojéelt tumen u kiliʼich muukʼ Dioseʼ, maʼ kun kíimil táanil tiʼ u yilik le Máax yéeyaʼan tumen Jéeobaoʼ. 27  Le kiliʼich muukʼoʼ tu tsʼáaj tu tuukul Simeón ka okok teʼ templooʼ; le ka taasaʼab chan Jesús tumen u taataʼob utiaʼal ka u beetoʼob tu yoʼolal le baʼax ku yaʼalik le Leyoʼ, 28  Simeoneʼ tu méekʼaj le chaambaloʼ, ka tu kiʼikiʼtʼantaj Dios táan u yaʼalik: 29  «Nojoch Jalaʼach, beoraaʼ táan a chaʼik in kíimil ich jeetsʼelil jeʼex ta waʼalajtenoʼ; 30  tumen in wicheʼ tsʼoʼok u yilik le máax kun meyajtech utiaʼal a salvartik wíinikoʼ, 31  le máax tsʼoʼok a tsʼáaik tu táan tuláakal kaajoʼob 32  bey junpʼéel sáasil utiaʼal u luʼsik u yéeʼjochʼeʼenil le kaajoʼoboʼ, letiʼeʼ u nojbeʼenil u kaajil Israel». 33  José yéetel Maríaeʼ jaʼakʼ u yóoloʼob tu yoʼolal le baʼaxoʼob ku yaʼalaʼal tu yoʼolal le chaambaloʼ. 34  Simeón xaneʼ tu kiʼikiʼtʼantoʼob, ka tu yaʼalaj tiʼ María, u maama le chan xiʼipaloʼ: «¡Ile! Le chaambalaʼ tsʼaʼan utiaʼal ka lúubuk yaʼab máakoʼob tu kaajil Israel bey xan utiaʼal u kaʼa líikʼil yaʼabiʼ; letiʼeʼ junpʼéel chíikulal kun pʼekbil tumen le máakoʼoboʼ, 35  utiaʼal ka kʼaj óoltaʼak baʼax ku tuklik yaʼab máakoʼob ichil u puksiʼikʼaloʼob; teech xaneʼ junpʼéel chowak espada ken u táatsʼmáans a puksiʼikʼal».* 36  Yaan kaʼach juntúul koʼolel ku profetizar, u kʼaabaʼeʼ Ana, u hija Fanuel, tiʼ u chʼiʼibal Aser u taal. (Le koʼolelaʼ tsʼoʼok u yantal u jaʼabil, yéetel siete jaʼaboʼob kajlaj yéetel u yíicham desde ka tsʼoʼok u beeloʼob,* 37  baʼaleʼ beoraaʼ ochenticuatro jaʼaboʼob yaantiʼ yéetel úuch kíimik u yíicham.) Letiʼeʼ maʼatech u pʼáatal maʼ u bin teʼ templooʼ, yéetel kʼiin bey xan yéetel áakʼab táan u adorartik Dios, táan u ayunar* yéetel táan u kʼáat óolal. 38  Teʼ súutuk jeʼeloʼ, náatsʼeʼ ka joʼopʼ u tsʼáaik gracias tiʼ Dios yéetel u tʼaan tu yoʼolal le chan paal tu táan tuláakal le máaxoʼob táan u páaʼtkoʼob u salvartaʼal Jerusalenoʼ. 39  Ka tsʼoʼok u beetkoʼob tuláakal le baʼaloʼob jeʼex u kʼáatik u Ley Jéeobaeʼ, suunajoʼob Nazaret, u kaajaloʼob yaan tu luʼumil Galilea. 40  Le chan xiʼipaloʼ seguernaj u nojochtal, u muʼukʼaʼantal, u sen yantal u naʼat bey xan u lúubul utsil tiʼ Dios. 41  U taataʼobeʼ suukaʼan kaʼach u binoʼob láalaj jaʼab tu kaajil Jerusalén utiaʼal u kʼiinbesajil le Pascuaoʼ. 42  Le ka tu tsʼáaj doce jaʼaboʼob tiʼ Jesuseʼ, jeʼex suukileʼ, binoʼob teʼ kʼiinbesajoʼ. 43  Ka tsʼoʼok túun u kʼiiniloʼob le kʼiinbesajoʼ, le táan u suutoʼoboʼ, Jesús le chan xiʼipaloʼ pʼáat Jerusalén, chéen baʼaleʼ u taataʼobeʼ maʼ tu tsʼáajoʼob cuentaiʼ. 44  Letiʼobeʼ tu tukloʼob tiʼ yaan ichil u maasil máakoʼob ku viajaroʼob tu yéeteloʼoboʼ, le oʼolaleʼ tu xíimbaltoʼob le bukaʼaj náachil ku páajtal u xíimbaltaʼal ichil junpʼéel kʼiineʼ, tsʼoʼoleʼ ka joʼopʼ u kaxtikoʼob ichil u láakʼtsiloʼob bey xan ichil le máaxoʼob u kʼaj óoloʼoboʼ. 45  Baʼaleʼ tumen maʼ tu yiloʼobeʼ, suunajoʼob Jerusaleneʼ, ka joʼopʼ u sen máan u kaxtoʼob. 46  Ka tsʼoʼok túun u máan óoxpʼéel kʼiineʼ, tu yiloʼobeʼ tiʼ yaan teʼ templooʼ, kulukbal chúumuk tiʼ le j-kaʼansajoʼob táan u chʼenxikintikoʼob yéetel táan u beetik kʼáatchiʼ tiʼob. 47  Baʼaleʼ tuláakal le máaxoʼob chʼenxikintik kaʼachoʼ ku jaʼakʼal u yóoloʼob tu yoʼolal le naʼat yaantiʼoʼ bey xan tu yoʼolal bix u núukik le kʼáatchiʼob ku beetaʼaltiʼoʼ. 48  U taataʼobeʼ jaʼakʼ u yóoloʼob ka tu yiloʼob; u maamaeʼ tu yaʼalajtiʼ: «In paal, ¿baʼaxten ta beetajtoʼon lelaʼ? ¿Maʼ wa ta wilik teen yéetel a taataeʼ táan k-sen máan kaxtech yéetel táan k-sen tuklik tuʼux tsʼoʼokech?». 49  Baʼaleʼ letiʼeʼ tu yaʼalajtiʼob: «¿Baʼaxten táan a sen máan a kaxteneʼex? ¿Maʼ wa a wojleʼex tu yotoch in Taata kʼaʼabéet in wantaliʼ?». 50  Baʼaleʼ letiʼobeʼ maʼ tu naʼatoʼob baʼax u kʼáat u yaʼaliʼ. 51  Jesús túuneʼ jóokʼeʼ ka suunaj Nazaret tu yéeteloʼob, yéetel seguernaj u yuʼubik u tʼaan u taataʼob. U maama xaneʼ mantatsʼ ku líiʼsik ichil u puksiʼikʼal tuláakal le baʼaloʼob ku yúuchloʼobaʼ. 52  Jesús túuneʼ seguernaj u sen yantal u naʼat, u nojochtal bey xan u lúubul utsil tiʼ Dios yéetel tiʼ le máakoʼoboʼ.

Tsolajiloʼob

Ilaʼak Tipʼ. 16.
Wa: «espíritu santo». Ilaʼak Tipʼ. 16.
Wa: «alma». Gr.: sikjé. Ilaʼak Tipʼ. 7A.
Wa: «desde tu x-lóoʼbayanil».
Ilaʼak Tipʼ. 16.