Hechos 20:1-38

20  Le ka tsʼoʼok túun u jéetsʼel le woʼochʼlantáambaloʼ, Pabloeʼ tu túuxtaj tʼanbil le disipuloʼoboʼ; le ka tsʼoʼok u líiʼsik u yóoloʼob bey xan u despedirkuba tiʼobeʼ, jóokʼ u binbal Macedonia.  Ka tsʼoʼok u máan tu kaajiloʼob Macedonia bey xan u líiʼsik u yóol le disipuloʼob yéetel yaʼabkach tʼaanoʼoboʼ, ook tu luʼumil Grecia.  Pabloeʼ óoxpʼéel meses tu máansaj teʼeloʼ, baʼaleʼ le jach taʼaytak u chʼaʼik junpʼéel barco utiaʼal u bin tu luʼumil Siriaoʼ le judíoʼoboʼ líikʼoʼob tu contra utiaʼal ka u kíimsoʼob, le oʼolaleʼ tu chʼaʼtuklaj u suut Macedonia.  Pabloeʼ láakʼintaʼan kaʼach tumen Sópater u paal Pirro máax sijnáal Berea, Aristarco yéetel Segundo máaxoʼob sijnáaloʼob Tesalónica, Gayo máax sijnáal Derbe, yéetel Timoteo, bey xan Tíquico yéetel Trófimo máaxoʼob tiʼ u luʼumil Asia u taaloʼob.  Letiʼob túuneʼ yáax binoʼobeʼ, ka pʼáat u páaʼtoʼonoʼob tu kaajil Troas;  baʼaleʼ toʼoneʼ ka tsʼoʼok u kʼiinbesajil le waajoʼob x-maʼ levadurailoʼ, t-chʼaʼaj junpʼéel barco tu kaajil Filipos, ka tsʼoʼok túun u máan cinco kʼiinoʼobeʼ kʼuchoʼon tu yiknaloʼob teʼ tu kaajil Troasoʼ; teʼ túunoʼ pʼáatoʼon siete kʼiinoʼobiʼ.  Tu yáax kʼiinil túun le semanaoʼ le muchʼukbaloʼon utiaʼal k-jaanloʼ, Pabloeʼ tu máansaj junpʼéel tsoltʼaan tiʼ le máaxoʼob muchʼukbaloʼoboʼ tumen tuláakʼ kʼiinoʼ yaan kaʼach u bin; u tsoltʼaan túuneʼ xáanchaj tak chúumuk áakʼab.  Le oʼolaleʼ teʼ cuarto yaan kaʼanal tuʼux muchʼukbaloʼon kaʼachoʼ yaan yaʼab lamparaʼobiʼ.  Juntúul táankelem xiʼipal túun ku kʼaabaʼtik Eutico kulukbal kaʼach teʼ ventanaoʼ, weeni, yéetel tumen jach tʼúub u wenel le táan u tʼaan Pablooʼ, lúub desde tu yóoxpʼéel pisoil le najoʼ; ka túun líiʼsaʼabeʼ kimen. 10  Baʼaleʼ Pabloeʼ éemeʼ ka chilaj tu yóokʼol, tu méekʼeʼ ka tu yaʼalaj: «Xuʼuluk a wawat tʼaaneʼex, tumen tsʼoʼok u kaʼa suut u kuxtal».* 11  Ka naʼak Pablo tu kaʼatéeneʼ káaj le janaloʼ, ka túun jaani. Letiʼeʼ xáanchaj táan u tsikbal tak ka sáaschaji, ka tsʼoʼok túuneʼ bini. 12  Letiʼob túuneʼ jach kiʼimakchaj u yóoloʼob tumen kuxaʼan le xiʼipal le ka tu bisoʼoboʼ. 13  Toʼon túuneʼ binoʼon chʼaʼ le barcooʼ ka binoʼon Asón, teʼeloʼ tiʼ ken k-chʼaʼ kaʼach Pabloiʼ, tumen ka tsʼoʼok u yaʼaliktoʼon ka k-beet beyoʼ, letiʼeʼ bin xíimbalil teʼ kaaj jeʼex u chʼaʼtukultmil kaʼachoʼ. 14  Le oʼolaleʼ ka tu chukpachtoʼon tu kaajil Asoneʼ naʼak teʼ barcooʼ ka binoʼon tu kaajil Mitilene; 15  ka sáaschaj tuláakʼ kʼiineʼ t-chʼaʼaj junpʼéel barco teʼeloʼ ka kʼuchoʼon aktáan tiʼ u islail Quíos, baʼaleʼ ka sáaschaj tuláakʼ kʼiineʼ pʼáatoʼon junsúutuk Samos, tuláakʼ kʼiin túuneʼ kʼuchoʼon tu kaajil Mileto. 16  Tumen Pabloeʼ u chʼaʼtukultmaj kaʼach maʼ u máan Éfeso utiaʼal maʼ u xáantal tu luʼumil Asia; tumen táan kaʼach u yilik u séeb kʼuchul Jerusalén tu kʼiinbesajil le Pentecostés, wa ka páatakoʼ. 17  Baʼaleʼ le tiaʼan kaʼach tu kaajil Miletooʼ, tu túuxtaj tʼanbil le ancianoʼob* yanoʼob tu múuchʼulil Éfesooʼ. 18  Le ka kʼuch le ancianoʼob tu yiknaloʼ, letiʼeʼ tu yaʼalajtiʼob: «Teʼexeʼ jach a wojleʼex bix kuxlajiken ta wiknaleʼex desde teʼ yáax kʼiin ka kʼuchen tu luʼumil Asia 19  le táan in meyajtik Yuumtsil jeʼex u beetik juntúul palitsiloʼ; lelaʼ tin beetaj yéetel nojoch kabal óolal, yéetel u jaʼil in wich bey xan yéetel le túuntaj óolaloʼob taal tin wóokʼol úuchik u líikʼil le judíoʼob tin contraoʼ; 20  kex beyoʼ teneʼ maʼ pʼáat maʼ in waʼalikteʼex le baʼaxoʼob jeʼel u taasikteʼex utsiloʼ, yéetel maʼ pʼáat maʼ in kaʼanskeʼex tu táan le máakoʼob yéetel joonaj joonajiloʼ. 21  Baʼaxeʼ tiʼ le judíoʼob bey xan tiʼ le griegoʼoboʼ tin tsolaj tubeel* kʼaʼabéet u kʼexik u tuukuloʼob utiaʼal ka u natsʼubaʼob tu yiknal Dios yéetel ka u tsʼáa u fejoʼob tiʼ k-Yuumtsil Jesús. 22  Beora túunaʼ, ¡ileʼex!, le kiliʼich muukʼoʼ táan u beetik in bin Jerusalén, kex maʼ in wojel baʼaxoʼob kun úuchulten teʼeloʼ; 23  chéen baʼax in wojleʼ, kajalkaajeʼ le kiliʼich muukʼoʼ láalaj hora táan u yaʼalikten yaan in kʼaʼalal cárcel yéetel yaan u sen beetaʼal in muʼyaj. 24  Baʼaleʼ maʼatech in wilik in kuxtal bey jach nojoch baʼaleʼ, utiaʼal ka páajchajak in kʼuchul tu xuul le bej tsʼaʼan in wáalkabtoʼ yéetel in tsʼoʼokbesik le meyaj tu tsʼáajten Yuumtsil Jesusoʼ: in chúukaʼan kʼaʼaytik u maʼalob péektsilil u nojoch utsil Dios. 25  »Beora túunaʼ, ¡ileʼex!, in wojleʼ mix juntúul tiʼ teʼex ken a kaʼa ileneʼex, teʼex máaxeʼex ta wuʼuyeʼex in kʼaʼaytik le Reinooʼ. 26  Le oʼolal tin waʼalaj ka taalakeʼex teʼ kʼiinaʼ utiaʼal ka a jaajkúunteʼexeʼ minaʼanten culpa yoʼolal u kʼiʼikʼel mix máak, 27  tumen maʼ pʼáatak maʼ in waʼalikteʼex tuláakal u tsolnuʼukoʼob Diosiʼ. 28  Kanáantabaʼex yéetel kanáanteʼex le tamanoʼoboʼ; ichiloʼobeʼ teʼexeʼ yéeyaʼabeʼex tumen le kiliʼich muukʼ utiaʼal ka a nuʼukteʼex u múuchʼulil Dios yéetel utiaʼal ka a kanáanteʼex jeʼex u kanáantaʼal tamanoʼoboʼ. Le múuchʼulilaʼ Dios man yéetel u kʼiʼikʼel u Paal. 29  Teneʼ in wojleʼ le ken pʼáatak minaʼanen wayeʼ, yaan u yokol ichileʼex kʼasaʼan máakoʼob beyoʼob loboeʼ* yéetel maʼ ken u kanáantoʼob yéetel yaabilaj le múuchʼuliloʼ; 30  ichileʼex xaneʼ yaan u líikʼil xiiboʼob ken u kaʼansoʼob baʼaloʼob maʼ pataliʼ, utiaʼal ka u jíilt le disipuloʼob tu paachoʼoboʼ. 31  »Le oʼolaleʼ maʼ a weenleʼex, yéetel kʼaʼajseʼexeʼ ichil óoxpʼéel jaʼaboʼobeʼ, bul kʼiin yéetel bul áakʼab maʼ xuʼul in tsolnuʼuktik cada juntúul tiʼ teʼex yéetel u jaʼil in wichiʼ. 32  Beora túunaʼ kin kʼubéentkeʼex tu kʼab Dios bey xan tiʼ le baʼax tu yaʼalaj yoʼolal u nojoch utsiloʼ, lelaʼ jeʼel u líiʼsik a wóoleʼexeʼ yéetel jeʼel u tsʼáaikteʼex le herencia aʼalaʼan u tsʼaʼabal tiʼ le máaxoʼob kiliʼichoʼoboʼ. 33  Teneʼ maʼ in tsʼíibolt le plata, le oro wa le nookʼ yaan tiʼ wa máaxoʼ. 34  Teʼexeʼ a wojleʼexeʼ meyajnajen yéetel in kʼaboʼob utiaʼal ka yanakten le baʼaxoʼob kʼaʼabéettenoʼ bey xan tiʼ le máaxoʼob ku máanoʼob tin wéeteloʼ. 35  Tiʼ tuláakal baʼaleʼ tsʼoʼok in weʼesikteʼexeʼ, ikil a meyajeʼex beyaʼ, unaj a wáantkeʼex le máaxoʼob kʼaʼabéet áantaj tiʼoboʼ, yéetel unaj u kʼaʼajalteʼex u tʼaanoʼob Yuumtsil Jesús le ka tu yaʼalaj: ‹Maas ku taasik kiʼimak óolal u tsʼaʼabal wa baʼax ke u kʼaʼamal wa baʼax›». 36  Le ka tsʼoʼok túun u yaʼalik tuláakal le baʼaloʼobaʼ xolaj tu yéeteloʼobeʼ ka tu beetaj junpʼéel oración. 37  U jaajileʼ joʼopʼ u sen ookʼloʼobeʼ ka tu méekʼoʼob Pablo, yéetel tu tsʼuʼutsʼoʼob yéetel yaabilaj, 38  tumen baʼax maas beet u yaatal u yóoloʼobeʼ letiʼe úuchik u yaʼalaʼaltiʼob tumen Pablo maʼ ken u kaʼa iloʼoboʼ. Ka tsʼoʼok túuneʼ tu láakʼintoʼob tak teʼ tuʼux yaan le barcooʼ.

Tsolajiloʼob

Wa: «alma». Gr.: sikjé. Ilaʼak Tipʼ. 7A.
Ilaʼak Tipʼ. 16.
Wa: «chúukaʼan kʼaʼaytaj».
Lelaʼ juntúul tsʼíitsʼik baʼalcheʼ ku kíimsik u yéet baʼalcheʼil; chíikaʼan tiʼ juntúul tsʼíitsʼik peekʼ.