Hechos 17:1-34

17  Letiʼob túuneʼ máanoʼob tu kaajil Anfípolis yéetel tu kaajil Apolonia, ka túun kʼuchoʼob Tesalónica; teʼelaʼ yaan kaʼach junpʼéel u sinagoga le judíoʼoboʼ.  Jeʼex suuk kaʼach u beetik Pabloeʼ ook teʼ tuʼux yaan le máakoʼoboʼ; ichil óoxpʼéel Sabadoʼob túuneʼ tsikbalnaj tu yéeteloʼob tiʼ le baʼax ku yaʼalik le Kiliʼich Tsʼíiboʼoboʼ,  táan u tsolik yéetel táan u yeʼesik yaniliʼ u muʼyaj le Cristooʼ yéetel yaniliʼ u líiʼsaʼal ichil le kimenoʼoboʼ; letiʼeʼ táan kaʼach u yaʼalik: «Lelaʼ letiʼe Cristooʼ, le Jesús kin kʼaʼaytikteʼexaʼ».  Yoʼolal lelaʼ jujuntúul tiʼ le máakoʼoboʼ tu beetubaʼob disipuloil tiʼ Cristo, ka túun joʼopʼ u máanoʼob yéetel Pablo bey xan yéetel Silas; bey xan tu beetil yaʼab tiʼ le griegoʼob ku adorartikoʼob Diosoʼ bey xan yaʼab tiʼ le koʼoleloʼob jach kʼaj óolaʼanoʼoboʼ.  Baʼaleʼ le judíoʼoboʼ tumen yaachaj tu yóoloʼobeʼ,* máan u chʼaʼob jujuntúul tiʼ le maʼakʼóol yéetel kʼasaʼan máakoʼob yanoʼob teʼ kʼíiwikoʼ ka tu muchʼkíintoʼob yéetel tu beetoʼob u pʼuʼujul tuláakal le kaajoʼ. Ka túun tu yóotoʼob u paʼob u joonajil u yotoch Jasón, tumen u kʼáatoʼob kaʼach ka jóoʼsaʼak Pablo yéetel Silas chúumuk tiʼ le kʼasaʼan máakoʼoboʼ.  Baʼaleʼ tumen maʼ tu yiloʼob tuʼux tsʼoʼokoʼobeʼ, tu jíiltaj u bisoʼob Jasón bey xan jujuntúul sukuʼunoʼob tu táan u gobernanteiloʼob le kaajoʼ, ka tu kʼaʼam aʼaloʼob: «Le máakoʼob ku kʼaskúuntikoʼob u tuukul u kajnáaliloʼob tuláakal le Luʼumoʼ, tsʼoʼok xan u kʼuchloʼob wayeʼ,  tsʼoʼoleʼ Jasoneʼ tsʼoʼok u kʼamkoʼob bey uʼulaboʼob tu yotocheʼ. Le baʼaxoʼob ku beetik tuláakal le máakoʼobaʼ ku bin tu contra u ley César, tumen ku yaʼalikoʼobeʼ yaan uláakʼ juntúul rey, leloʼ Jesús bin».  Le ka tu yaʼaloʼob lelaʼ jach kʼuuxilnaj le yaʼabkach máakoʼoboʼ bey xan u gobernanteiloʼob le kaajoʼ;  ka tsʼoʼok túun u beetkoʼob u boʼotaʼal yaʼab taakʼin tiʼob tumen Jasón bey xan tumen u maasiloʼoboʼ, tu chaʼajoʼob u binoʼob. 10  Chéen pʼelak áakʼabchajkeʼ, le sukuʼunoʼoboʼ tu túuxtoʼob Pablo yéetel Silas tu kaajil Berea. Le ka kʼuchoʼobeʼ ookoʼob tu sinagogail le judíoʼoboʼ. 11  Baʼaleʼ le máakoʼobaʼ maas uts u puksiʼikʼaloʼob ke le máaxoʼob kajaʼanoʼob Tesalónicaoʼ, tumen tu séebaʼanil tu kʼamoʼob yéetel kiʼimak óolal u tʼaan Dios, yéetel sáamsamal kaʼach ku xakʼalxoktikoʼob tubeel le Kiliʼich Tsʼíiboʼob utiaʼal u yilkoʼob wa jaaj le baʼaxoʼob ku kaʼansaʼaltiʼoboʼ. 12  Le oʼolaleʼ yaʼab tiʼ letiʼobeʼ tu beetubaʼob disipuloil tiʼ Jesús, bey xan tu beetil yaʼab tiʼ le koʼoleloʼob griegaʼob ku yúuchul maʼalob tʼaan tu yoʼolaloʼoboʼ, bey xan yaʼab tiʼ le xiiboʼoboʼ. 13  Le ka tu yojéeltaj le judíoʼob táan xan u kʼaʼaytaʼal u tʼaan Dios tu kaajil Berea tumen Pablooʼ, binoʼob xaneʼ ka tu pʼuʼujsoʼob le máakoʼob utiaʼal ka líikʼkoʼob tu contraoʼ. 14  Le sukuʼunoʼob túunoʼ tu séebaʼanil tu túuxtoʼob Pablo utiaʼal ka xiʼik tak teʼ kʼáaʼnáaboʼ; baʼaleʼ Silas yéetel Timoteoeʼ, pʼáatoʼob teʼ kaajoʼ. 15  Chéen baʼaleʼ le máaxoʼob bisik kaʼach Pablooʼ tu bisoʼob tak Atenas, ka tsʼoʼok túun u yaʼalaʼaltiʼob tumen Pablo unaj u taal Silas yéetel Timoteo tu yiknal u maas séebaʼanil ku páajtaleʼ, le máakoʼoboʼ lukʼoʼobiʼ. 16  Pabloeʼ, le táan u páaʼtik Silas yéetel Timoteo tu kaajil Atenasoʼ, jach kʼuuxilnaj le ka tu yilaj chuup le kaaj yéetel beetbil diosoʼoboʼ. 17  Ka túun káaj u tsikbal yéetel le judíoʼob teʼ sinagogaoʼ bey xan yéetel uláakʼ máakoʼob ku adorartikoʼob Dios, tsʼoʼoleʼ sáamsamal xan ku tsikbal kaʼach yéetel le máaxoʼob ku yilik teʼ kʼíiwikoʼ. 18  Baʼaleʼ jujuntúul epicureoʼob* yéetel estoicoʼob,* máakoʼob kaʼanchajaʼan u xookoʼobeʼ, ku baʼateltʼaanoʼob kaʼach tu yéetel; yaan tiʼ letiʼobeʼ ku yaʼalikoʼob: «¿Baʼax u kʼáat u tsikbalt le máak chéen táan u máan u tʼantʼanpoolaʼ?». Uláakʼoʼobeʼ ku yaʼalikoʼob: «Míin juntúul máak ku kʼaʼaytik u diosoʼob le j-táanxel luʼumiloʼoboʼ». Lelaʼ bey tu yaʼaliloʼoboʼ tumen Pabloeʼ ku kʼaʼaytik u maʼalob péektsilil Jesús bey xan u kaʼa kuxtal le kimenoʼoboʼ. 19  Ka túun tu machoʼobeʼ ka tu bisoʼob teʼ Areópagooʼ,* ka tu yaʼaloʼobtiʼ: «¿Jeʼel wa u páajtal k-ojéeltik baʼax le túumben kaʼansaj ka tsikbaltikaʼ? 20  Tumen táan a tsikbaltik jujunpʼéel baʼaloʼob mix juntéen k-uʼuymaj u yaʼalaʼal. Le oʼolaleʼ k-kʼáat ojéelt baʼax le baʼaloʼobaʼ». 21  U jaajileʼ, tuláakal le atenasiloʼoboʼ bey xan le j-táanxel luʼumiloʼob chéen jáan taaljaʼanoʼob teʼeloʼ, maʼ tu beetkoʼob uláakʼ baʼal wa maʼ chéen u yuʼubikoʼob wa u yaʼalikoʼob baʼaloʼob túumbentak teʼ súutukil táan u jeʼeleloʼoboʼ. 22  Pablo túuneʼ waʼalaj chúumuk tiʼ le Areópagooʼ ka tu yaʼalaj: «Xiibeʼex tiʼ u kaajil Atenas, kin tsʼáaik cuentaeʼ tiʼ tuláakal baʼax ka beetkeʼexeʼ, teʼexeʼ maas a chʼaʼameʼex saajkil tiʼ le diosoʼoboʼ ke le uláakʼ máakoʼoboʼ. 23  Le táan in máan ichil le kaajoʼ tin jach ilaj le baʼaloʼob ku meyajteʼex utiaʼal a adorareʼexoʼ, tin wilaj xan junpʼéel altar tuʼux tsʼíibtaʼan: ‹Utiaʼal juntúul Dios Maʼ Kʼaj Óolaʼaniʼ›. Le baʼax túun a kʼubmaj a wóol a adorarteʼex kex maʼ a kʼaj óoleʼexoʼ tiʼ letiʼ kin tʼaan. 24  Le Dios beet yóokʼol kaab yéetel tuláakal le baʼaxoʼob yanoʼoboʼ, tumen Letiʼ u Yuumtsilil kaʼan yéetel Luʼumeʼ, maʼatech u kajtal tiʼ temploʼob beetaʼan tumen u kʼab wíinikoʼob, 25  maʼ kʼaʼabéet xan u yáantaʼal tumen u kʼaboʼob wíinikiʼ tumen mix baʼal ku bineltiktiʼ, tumen letiʼ tsʼáaik kuxtal, iikʼ yéetel tuláakal baʼal tiʼ máak. 26  Tsʼoʼoleʼ chéen yéetel juntúul wíinikeʼ tu beetaj tuláakal u kaajiloʼob wíinik utiaʼal ka kajlakoʼob yóokʼol tuláakal le Luʼumaʼ, yéetel tu tsʼáaj u kʼiiniloʼob u yúuchul wa baʼax, bey xan u xuul tuʼux kun kajtal wíinik, 27  utiaʼal ka u kaxtoʼob Dios, tumen wa ka u kaxtoʼob tatalkʼabileʼ jeʼel u yilkoʼob tuʼux yaneʼ, tumen u jaajileʼ letiʼeʼ maʼ náach yanil tiʼ cada juntúul tiʼ toʼoneʼexiʼ. 28  Tumen tu yoʼolal letiʼeʼ kuxaʼanoʼon, k-péek yéetel yanoʼon, jeʼex u yaʼalmil jujuntúul poetaʼob ichileʼexeʼ: ‹Tumen toʼoneʼ u chʼiʼibaloʼon xan›. 29  »Bey tumen u chʼiʼibaloʼon Diosoʼ maʼ unaj k-tuklik wa le Diosoʼ bey jeʼex oro, plata, tuunich wa uláakʼ baʼaloʼob patjoʼoltaʼan yéetel beetaʼan tumen wíinikeʼ. 30  U jaajileʼ, Dioseʼ maʼ tu chʼaʼaj en cuenta le kʼiinoʼob maʼ u yojel kaʼach máak baʼax ku beetkoʼ; baʼaleʼ bejlaʼeʼ táan u yaʼalik tiʼ tuláakal wíinik tiʼ tuláakal tuʼux ka u kʼex u tuukul. 31  Tumen tsʼoʼok u yéeyik junpʼéel kʼiin utiaʼal u juzgartik u kajnáaliloʼob Luʼum yéetel justicia tu kʼab juntúul xiib u yéeymaj; Dios xaneʼ tsʼoʼok u yeʼesik tiʼ tuláakal máak jach tu jaajil yaan u beetik, tumen tsʼoʼok u kaʼa kuxkíintik le xiib ichil le kimenoʼoboʼ». 32  Le ka tsʼoʼok túun u yuʼubikoʼob u tʼaan tiʼ u kaʼa kuxkíintaʼal le kimenoʼoboʼ, jujuntúul tiʼ letiʼobeʼ káaj u pʼaʼastikoʼob yéetel uláakʼoʼobeʼ tu yaʼaloʼob: «Jeʼel k-uʼuyik tuláakʼ kʼiin le baʼax ka tsikbaltikaʼ». 33  Pablo túuneʼ lukʼ chúumuk tiʼ letiʼob, 34  baʼaleʼ jujuntúul xiiboʼobeʼ tu muchʼubaʼob tu yéetel ka tu beetubaʼob disipuloil tiʼ Jesús. Ichiloʼobeʼ tiʼ yaan kaʼach Dionisio juntúul tiʼ u jueziloʼob le Areópagooʼ, juntúul koʼolel ku kʼaabaʼtik Dámaris, bey xan uláakʼ máakoʼob.

Tsolajiloʼob

Wa: «celosochajoʼobeʼ».
Junmúuchʼ máakoʼob ku tsaypachtikoʼob le filósofo Epicurooʼ; ku yaʼalikoʼobeʼ máakeʼ unaj u yilik u sen kiʼimaktal u yóol le bukaʼaj ku páajtal ichil u kuxtaloʼ.
Junmúuchʼ máakoʼob ku tsaypachtikoʼob le filósofo Zenón, yéetel ku yaʼalikoʼobeʼ máakeʼ unaj u kuxtal chéen le bix u tuklik maʼaloboʼ, yéetel baʼax u kʼáajtiʼ wa táan u muʼyaj bey xan wa kiʼimak u yóol.
Junpʼéel puʼuk yaan teʼ úuchben Atenasoʼ, teʼ tuʼux ku muchʼkuba xan u nukuch jueziloʼob le kaajoʼ.