Hebreos 9:1-28

9  Le ka beetaʼab le yáax núuptʼaanoʼ tsʼaʼab leyoʼob utiaʼal u beetaʼal le kiliʼich meyajoʼ, yéetel u kiliʼich kúuchileʼ way Luʼum yaan kaʼacheʼ,  tumen ichil u yáax cuartoil le tabernáculo* beetaʼaboʼ, tiʼ yaan kaʼach le candelabrooʼ* bey xan le mesa tuʼux tsʼaʼan kaʼach le waajoʼoboʼ; le yáax cuartoaʼ ku kʼaabaʼtik kaʼach «Kiliʼich Kúuchil».  Baʼaleʼ paachil tiʼ le u kaʼapʼéel cortinaoʼ tiʼ yaan kaʼach le cuarto ku kʼaabaʼtik «Sen Kiliʼich Kúuchiloʼ».  Ichil le cuartoaʼ tiʼ yaan kaʼach junpʼéel incensario beetaʼan yéetel oro bey xan u cofreil le núuptʼaan yibaʼan oro ichil yéetel tu paachoʼ; ichil le cofreaʼ tiʼ yaan kaʼach junpʼéel pichel de oro tuʼux líiʼsaʼan le manaoʼ, tiʼ yaan xan le u xóolteʼ Aarón kʼuʼukʼnajeʼ bey xan le jaajay tuunichoʼob tuʼux tsʼíibtaʼan le núuptʼaanoʼ.  Tu yóokʼoleʼ tiʼ yaan kaʼach le kiʼichkelem querubinoʼoboʼ, yéetel u pixmoʼob kaʼach u maak* le cofre yéetel u yoocheloʼoboʼ. Baʼaleʼ beoraaʼ maʼ u súutukil utiaʼal k-maas tsolik le baʼaloʼobaʼ.  Ka tsʼoʼok u beetaʼal le baʼaloʼob beyaʼ, le sacerdoteʼoboʼ sáamsamal u yookloʼob kaʼach tu yáax cuartoil le naj de nookʼ utiaʼal u beetkoʼob u kiliʼich meyajoʼoboʼ.  Baʼaleʼ u nojchil le sacerdoteʼoboʼ juntéen cada jaʼab ku yokol kaʼach tu juunal teʼ tu kaʼapʼéel cuartoiloʼ; le ken okok kaʼacheʼ mantatsʼ ku bisik kʼiʼikʼ utiaʼal u kʼub tu yoʼolal letiʼ, bey xan tu yoʼolal le máakoʼob maʼ u yóoliliʼob úuchik u kʼebantaloʼoboʼ.  Yéetel lelaʼ, le kiliʼich muukʼoʼ ku tsʼáaik naʼatbileʼ maʼ eʼesaʼak máakalmáak u bejil le kiliʼich kúuchil mientras táan u meyaj kaʼach le yáax naj de nookʼoʼ.  Le najaʼ tu chíikbesaj le baʼaxoʼob ku yúuchul teʼ kʼiinoʼobaʼ; tsʼoʼoleʼ jeʼex nuʼukbesaʼanil kaʼachoʼ, bey u kʼuʼubul xan siibaloʼob yéetel kíimsbil baʼalcheʼob bejlaʼeʼ, kex beyoʼ le baʼaloʼobaʼ maʼ tu páajtal u jach pʼatkoʼob limpioil u conciencia máak ikil u beetaʼal kiliʼich meyaj. 10  Le baʼaloʼobaʼ chéen yaan yil yéetel janaloʼob, ukʼuloʼob, bey xan yéetel jejeláas okjaʼob. Tsʼíibtaʼaboʼob xan teʼ leyoʼob yaan yil yéetel le wíinkliloʼ yéetel tsʼaʼaboʼob utiaʼal ka tsʼoʼokbesaʼakoʼob tak ken kʼuchuk u kʼiinil u tojkíintaʼal le baʼaloʼobaʼ. 11  Baʼaleʼ le ka taal Cristo u maas nojoch sacerdoteil le baʼaloʼob maʼalobtak tsʼoʼok u béeytaloʼoboʼ, ook ichil le maas nojoch yéetel maas maʼalob naj de nookʼ maʼ u kʼab wíinik beetmiliʼ, yéetel minaʼan ichil le baʼaloʼob beetaʼan way Luʼumeʼ. 12  Le ka ook teʼ kiliʼich kúuchiloʼ maʼ tu bisaj u kʼiʼikʼel chivoʼob mix u kʼiʼikʼel táankelem wakaxoʼobiʼ, baʼaxeʼ u kʼiʼikʼel letiʼ tu bisaj; lelaʼ chéen juntéeniliʼ tu beetaj, ka túun tu jáalkʼabtoʼon utiaʼal mantatsʼ. 13  Tumen wa le u kʼiʼikʼel chivoʼob, u kʼiʼikʼel xibil wakaxoʼob bey xan le u taʼanil x-chʼupul wakax ku toʼosol tu yóokʼol le máaxoʼob u yéekʼkuntmubaʼob ku páajtal u kiliʼichkúuntik máak utiaʼal ka pʼáatak limpioil u wíinkliloʼ, 14  ¿maʼ wa túun maas jeʼel u pʼoʼik k-conciencia u kʼiʼikʼel Cristo tiʼ le chéen kunel baʼaloʼob utiaʼal ka béeyak k-beetik kiliʼich meyaj tu táan le kuxaʼan Diosoʼ? Tumen Cristoeʼ tu chaʼaj u nuʼuktaʼal tumen le kiliʼich muukʼ minaʼan u xuuloʼ, ka tu kʼububa tiʼ Dios bey junpʼéel siibal minaʼan u kʼasaʼanileʼ. 15  Le oʼolal letiʼ u mediadoril* junpʼéel túumben núuptʼaan, utiaʼal beyoʼ le máaxoʼob tsʼoʼok u tʼaʼanloʼob tumen Diosoʼ ka u kʼamoʼob u promesail le kuxtal minaʼan u xuul, tu yoʼolal le kuxtal kʼuʼub utiaʼal u jáalkʼabtaʼaloʼob tiʼ le baʼaloʼob kʼaastak tu beetoʼob yáanal le úuchben núuptʼaanoʼ. 16  Tumen ken beetaʼak junpʼéel núuptʼaaneʼ kʼaʼabéet u kíimil le wíinik beetik le núuptʼaanoʼ. 17  Tumen le núuptʼaanoʼ chéen ku yantal u biilal ken kʼuʼubuk junpʼéel kuxtal, baʼaleʼ minaʼan u biilal ichil tuláakal le kʼiinoʼob láayliʼ kuxaʼan le wíinik beetmil le núuptʼaanoʼ. 18  Le beetkeʼ tak tu yoʼolal le yáax núuptʼaanoʼ kʼaʼabéetchaj u weʼekel kʼiʼikʼ utiaʼal u káajal u meyaj. 19  Tumen le ka tsʼoʼok u láaj tsolik Moisés le baʼax ku yaʼalik le Ley tiʼ tuláakal le kaajoʼ, tu chʼaʼaj u kʼiʼikʼel táankelem wakaxoʼob yéetel u kʼiʼikʼel chivoʼobeʼ ka tu xaʼakʼtaj yéetel jaʼ; tsʼoʼoleʼ ka tu chʼaʼaj junpʼéel u chan cheʼil hisopo tuʼux kʼaxaʼan u chak tsoʼotsel tamaneʼ ka tu wiʼiwitsʼaj le kʼiʼikʼ tu yóokʼol le librooʼ bey xan tu yóokʼol tuláakal le máakoʼoboʼ, 20  ka tu yaʼalaj: «Lelaʼ letiʼe kʼiʼikʼ jetsʼkúuntik le núuptʼaan tu yaʼalaj Dios kʼaʼabéet a tsʼoʼokbeskeʼexoʼ». 21  Bey úuchik xan u wiʼiwitsʼik kʼiʼikʼ tu yóokʼol le naj de nookʼoʼ bey xan tu yóokʼol tuláakal le nuʼukuloʼob ku meyaj utiaʼal u beetaʼal le kiliʼich meyaj tu yoʼolal le kaajoʼ. 22  Jach beyoʼ, jeʼex u yaʼalik le Leyoʼ óoliʼ tuláakal baʼal ku limpiokíintaʼal yéetel kʼiʼikʼ; wa maʼ tu weʼekel kʼiʼikʼeʼ mix junpʼéel kʼeban ku páajtal u perdonartaʼal. 23  Le oʼolaleʼ, le baʼaloʼob yanoʼob way Luʼum chíikbesik le baʼaloʼob yanoʼob teʼ kaʼanoʼ, kʼaʼabéetchaj u limpiokíintaʼaloʼob yéetel le baʼaloʼob tsʼoʼok k-aʼalikoʼ, baʼaleʼ le baʼaloʼob yanoʼob teʼ kaʼanoʼ kʼaʼabéet u limpiokíintaʼaloʼob yéetel kíimsbil siibaloʼob maas maʼalobtak. 24  Tumen Cristoeʼ maʼ ook tiʼ junpʼéel kiliʼich kúuchil beetaʼan tumen u kʼab wíinikoʼob ku chíikbesik le jach kiliʼich kúuchiloʼ, baʼaxeʼ ook teʼ kaʼanoʼ, yéetel bejlaʼeʼ jeʼel u páajtal u tʼaan t-oʼolal tu táan Dioseʼ. 25  Lelaʼ maʼ tu beetaj utiaʼal ka u kʼububa yaʼab u téenel bey junpʼéel siibaleʼ, jeʼex ken okok kaʼach cada jaʼab le nojoch sacerdote teʼ kiliʼich kúuchil táan u bisik u kʼiʼikʼel le baʼalcheʼoboʼ. 26  Tumen wa beyoʼ Cristoeʼ yaan u kʼaʼabéetchajal kaʼach u muʼyaj yaʼab u téenel desde ka káaj u síijil wíinik* way yóokʼol kaabeʼ. Baʼaleʼ teʼ tu tsʼook kʼiiniloʼob le yóokʼol kaabaʼ,* letiʼeʼ chéen juntéeniliʼ kʼaʼabéetchaj u chíikbeskuba, utiaʼal u luʼsik le kʼeban yéetel le u kuxtal tu kʼubaj bey siibaloʼ. 27  Bey jeʼex chéen juntéeniliʼ yaan u kíimil máak baʼaleʼ ken tsʼoʼokkeʼ ku juzgartaʼaleʼ, 28  Cristo xaneʼ chéen juntéeniliʼ tu kʼububa utiaʼal u kuchik u kʼeban yaʼab máakoʼob; le ken chíikpajak tu kaʼatéeneʼ maʼ utiaʼal u luʼsik kʼebaniʼ, baʼaxeʼ utiaʼal u salvartik le máaxoʼob jach u tsʼaamaj u yóol u páaʼtoʼoboʼ.

Tsolajiloʼob

Ilaʼak Tipʼ. 16.
Ilaʼak Tipʼ. 16.
Le tʼaan griego ku suʼutul «maakoʼ» jeʼel u tsʼáaik naʼatbil xan junpʼéel siibal ku kʼuʼubul utiaʼal u boʼotik u siʼipil máakeʼ, utiaʼal beyoʼ ka pʼáatak maʼalobil tu táan Dios.
Lelaʼ juntúul máak ku waʼatal chúumuk tiʼ kaʼa jaats máakoʼob utiaʼal u yaʼalik baʼax ku tuklik cada jaats.
Teʼelaʼ táan u yúuchul tʼaan tiʼ u paalal Adán yéetel Eva.
Ilaʼak Tipʼ. 16.