Hebreos 2:1-18

2  Le oʼolal kʼaʼabéet k-maas chʼenxikintik le baʼaloʼob tsʼoʼok k-uʼuyikoʼ, utiaʼal beyoʼ mix bikʼin ka náachkuntaʼakoʼon tiʼ le fejoʼ.  Tumen wa béeychaj le baʼax aʼalaʼan yéetel u chiʼ le angeloʼoboʼ, bey xan wa castigartaʼab, jeʼex u yaʼalik le justicia, tuláakal le máaxoʼob tu beetaj u kʼasaʼaniloʼob yéetel u j-maʼ uʼuyajtʼaaniloʼobeʼ,  toʼoneʼ ¿bix jeʼel k-púutsʼul wa tsʼoʼok k-pʼatik juntséelil le jach nojoch salvación káaj u tsikbaltaʼal tumen k-Yuumtsil, yéetel jaajkúuntaʼabtoʼon tumen le máaxoʼob uʼuyoʼ?  Lelaʼ tak Dios jaajkúunt úuchik u tsʼáaik chíikulaloʼob, milagroʼob, u jejeláasil nukuch baʼaloʼob, bey xan úuchik u tʼoxik le kiliʼich muukʼ jeʼex tu tuklaj maʼalobeʼ.  Tumen le yóokʼol kaab táan k-tsikbaltik kun taaloʼ, maʼ yáanal u páajtalil angeloʼob tu tsʼáajiʼ.  Baʼaleʼ yaan juntúul j-jaajkunaj tsʼoʼok u yeʼesik jach jaaj lelaʼ, tumen yaan tuʼux tu yaʼalaj: «¿Baʼax le máak utiaʼal ka a chʼaʼ en cuentaoʼ? ¿Baʼax u paal máak utiaʼal ka a kanáante?  Ta chichankúuntaj junpʼíit tu tséel le angeloʼoboʼ; ta tsʼáaj junpʼéel kiʼichkelem yéetel tsikbeʼen corona tiʼ, yéetel ta tsʼáaj yáanal u páajtalil tuláakal baʼax a beetmaj yéetel a kʼaboʼob.  Ta tsʼáaj tuláakal baʼal tu yáanal u yook». Le ka tu beetaj lelaʼ, Dioseʼ mix baʼal tu pʼataj wa maʼ u tsʼáaik yáanal u páajtalil u Paal. Baʼaleʼ tak beoraaʼ maʼ k-il wa tiʼ yaan tuláakal baʼal yáanal u páajtalil u Paaleʼ.  Baʼax k-ilkeʼ, Jesús le máax chichankúuntaʼab junpʼíit tu tséel le angeloʼoboʼ, úuchik u muʼyajtik le kíimiloʼ, beoraaʼ táan u tsʼaʼabal junpʼéel kiʼichkelem yéetel tsikbeʼen corona tiʼ. Bey túunoʼ, tu yoʼolal u nojoch utsil Dioseʼ, letiʼeʼ tu yojéeltaj baʼax le kíimiloʼ utiaʼal u yutsil tuláakal máak. 10  Tumen Dios, le máax táan u bisik yaʼab u paalaloʼob teʼ nojbeʼeniloʼ, tu yilaj maʼalob ka utsil chúukaʼanchajak yéetel muʼyajiloʼob le Máax yéeyaʼan utiaʼal u salvartikoʼoboʼ; lelaʼ letiʼe máax oʼolal yanchaj yéetel beetaʼab tuláakal baʼaloʼ. 11  Tumen le máax kiliʼichkúuntkoʼob bey xan le máaxoʼob ku kiliʼichkúuntaʼaloʼoboʼ, chéen tiʼ juntúuliliʼ máax u taaloʼob, le oʼolal Jesuseʼ maʼ tu chʼaʼik suʼtal u yaʼalik u «sukuʼunoʼob»; 12  letiʼeʼ ku yaʼalik: «Yaan in tsʼáaik kʼaj óoltbil a kʼaabaʼ tiʼ in sukuʼunoʼob; chúumuk tiʼ le múuchʼuliloʼ yaan in kiʼikiʼtʼantkech yéetel kʼaay». 13  Ku yaʼalik xan: «Yaan in kʼubik in wóol tiʼ». Tsʼoʼoleʼ ku yaʼalik xan: «¡Ileʼex! Teen yéetel le mejen paalal tu tsʼáajten Jéeobaoʼ».* 14  Baʼaleʼ tumen de bakʼ yéetel kʼiʼikʼ «le mejen paalaloʼoboʼ», letiʼ xaneʼ tu beetuba de bakʼ yéetel kʼiʼikʼ, beyoʼ yéetel u kíimileʼ ka páajchajak u xuʼulsik tiʼ le máax yaan u páajtalil tiʼ utiaʼal u kíimsik máakoʼ, lelaʼ letiʼe Kʼaasilbaʼaloʼ;* 15  utiaʼal xan ka u jáalkʼabt tuláakal le máaxoʼob palitsiltaʼaboʼob ichil tuláakal u kʼiiniloʼob u kuxtaloʼob tu yoʼolal u saajkiloʼob tiʼ le kíimiloʼ. 16  Tumen u jaajileʼ, letiʼeʼ maʼ táan u yáantik angeloʼobiʼ, baʼaxeʼ táan u yáantik u chʼiʼibal Abrahán. 17  Le oʼolaleʼ, tiʼ tuláakal baʼaleʼ kʼaʼabéetchaj u beetkuba jeʼex u «sukuʼunoʼobeʼ» utiaʼal ka kʼuchuk u beetuba juntúul maas nojoch sacerdote ku chʼaʼik óotsilil, yéetel chúukaʼan u yóol tiʼ baʼaxoʼob yaan yil yéetel Dios, yéetel beyoʼ ka u kʼub u kuxtal utiaʼal ka páajchajak u perdonartaʼal u kʼeban le máakoʼoboʼ. 18  Letiʼeʼ, úuchik u muʼyaj le ka túuntaʼab u yóoloʼ, beoraaʼ jeʼel u páajtal xan u bin u yáant le máaxoʼob táan u túuntaʼal u yóoloʼoboʼ.

Tsolajiloʼob

Ilaʼak Tipʼ. 2.
Lit.: «Diablo», u kʼáat u yaʼaleʼ j-líiʼsaj tʼaan.