Hebreos 12:1-29

12  Le yaʼabkach máakoʼobaʼ beyoʼob junpʼéel múuyal baʼpachtikoʼoneʼ; letiʼobeʼ ku jaajkúuntikoʼob* le baʼaxoʼob tsʼoʼok u yuʼubikoʼob yéetel tsʼoʼok u yilkoʼoboʼ. Le oʼolaleʼ koʼoneʼex luʼsik tiʼ toʼon tuláakal baʼaloʼob aaltak bey xan le kʼeban séeb jeʼel u baʼaytikoʼonoʼ, utiaʼal beyoʼ ka chúukpajak k-óol k-áalkabt le bej yaan táanil tiʼ toʼonoʼ.  Le ken k-beeteʼ unaj k-chʼikik k-paakat tiʼ Jesús, le Máax nuʼuktik yéetel utsil chúukaʼankúuntik k-fejoʼ. Letiʼeʼ, tu yoʼolal le kiʼimak óolal tsʼaʼab tu táanoʼ, chúukpaj u yóol muʼyaj le ka tsʼaʼab tu cheʼil le muʼyajoʼ; tsʼoʼoleʼ maʼ tu beetaj u cuentail wa suʼtsil le baʼax beetaʼabtiʼoʼ yéetel bejlaʼeʼ tsʼoʼok u kutal tu x-noʼoj kʼabil u trono Dios.  Utiaʼal túun maʼ a kaʼanaleʼex yéetel maʼ u lúubul u yóol a puksiʼikʼaleʼexeʼ, tuukulneneʼex tiʼ le máax tsʼoʼok u chúukpajal u yóol u muʼyajt le kʼaakʼas baʼaloʼob ku yaʼalik le j-kʼeban máakoʼoboʼ; le baʼaxoʼob ku yaʼalikoʼobaʼ tu yóokʼoloʼob ku kaʼa lúubul.  Kex táan a baʼateleʼex tu contra le kʼebanoʼ, tak bejlaʼeʼ maʼ kʼaʼabéetchajak u weʼekel a kʼiʼikʼeleʼexiʼ,  yéetel tsʼoʼok a jach tuʼubsikeʼex le baʼax ku sen aʼalikteʼex Dios jeʼex u beetik juntúul taatatsileʼ: «In paal, kʼam tubeel le tsolxikin yéetel le castigo ku tsʼáaik Jéeobaoʼ, yéetel maʼ u lúubul u yóol a puksiʼikʼal le ken u tojkíint a beel.  Tumen Jéeobaeʼ ku tsolxikintik yéetel ku castigartik le máax u yaabiltmoʼ; u jaajileʼ, ku jatsʼik tuláakal le máaxoʼob ku kʼamik bey u paalaloʼ».  Teʼexeʼ kʼaʼabéet u chúukpajal a wóoleʼex muʼyaj, tumen leloʼ táakaʼan ichil le kaʼansaj ku tsʼaʼabalteʼexoʼ. Dioseʼ ku yilkeʼex bey u paalaleʼexeʼ. Tumen ¿yaan wa paal maʼ tu tsolxikintaʼal yéetel u castigartaʼal tumen u taata?  Baʼaleʼ wa maʼ u tsʼaʼabal kaʼach tiʼ tuláakleʼex le kaʼansaj beyaʼ, u jaajileʼ maʼ jach u paalaleʼex túuniʼ, baʼaxeʼ chéen u máatan paalaleʼex.  K-taataʼob way Luʼumeʼ suuk kaʼach u tsolkoʼob k-xikin yéetel u castigartikoʼonoʼob, toʼon xaneʼ k-eʼesik tsiikil tiʼob. Le oʼolaleʼ, ¿maʼ wa maas yéetel kiʼimak óolal kʼaʼabéet k-tsʼáaikba yáanal u páajtalil le k-Taata máax yéeyoʼon yéetel u kiliʼich muukʼ, utiaʼal beyoʼ ka páajchajak k-kuxtal? 10  Tumen letiʼobeʼ tu tsoloʼob k-xikin yéetel tu castigartoʼonoʼob ichil junpʼíit kʼiin jeʼex tu tukloʼob maʼalobeʼ, baʼaleʼ Dioseʼ ku beetik utiaʼal k-utsil, utiaʼal beyoʼ ka kiliʼichchajkoʼon jeʼex letiʼeʼ. 11  U jaajileʼ, mix junpʼéel castigo ku kiʼimakkúuntik u yóol máak, baʼaxeʼ ku beetik u yaatal u yóol; baʼaleʼ le máaxoʼob ku kaanbaloʼob tiʼ le castigooʼ, ken tsʼoʼokkeʼ ku yantal jeetsʼelil tiʼob tu yoʼolal le toj kuxtal ku biskoʼoboʼ. 12  Le oʼolaleʼ, tojkíinteʼex le kʼaboʼob tʼoyokbaloʼoboʼ bey xan le píixoʼob luubul u muukʼoʼoboʼ, 13  yéetel seguernak a táaxkuntikeʼex le bejoʼob utiaʼal a wookeʼexoʼ, utiaʼal beyoʼ le máax móochchajaʼanoʼ maʼ u júukʼul u yook, baʼaxeʼ ka tsʼaʼakak. 14  Ilawileʼex ka yanakteʼex jeetsʼelil yéetel tuláakal máak, yéetel ilawil a kiliʼichtaleʼex; tumen máax maʼ kiliʼicheʼ maʼ tu páajtal u yilik Yuumtsil. 15  Jach kanáanteʼex mix máak ka pʼáatak maʼ u kʼamik u nojoch utsil Dios, yéetel jach kanáanteʼex maʼ u jóokʼol mix junpʼéel moots yaan u veneno yéetel ku taasik talamil, beyoʼ maʼ ken u kʼaskúunt mix máak ichileʼex. 16  Ilawileʼex xan maʼ u yantal mix máak ichileʼex ku núupkʼebantal,* mix u yantal mix máak maʼ u yaabiltmaj le baʼaloʼob kiliʼichtakoʼ, jeʼex Esaú le máax tu síiaj u derechoil u yáax paalil chéen tu yoʼolal junpʼéel janaloʼ. 17  Tumen jeʼex a wojlileʼexoʼ, le ka tu yóotaj u kʼam le kiʼikiʼtʼaanoʼ maʼ óotaʼab tsʼaabiltiʼiʼ; tsʼoʼoleʼ kex sen okʼolnaj utiaʼal u yilik u kʼeʼexel le baʼax tsʼoʼok u yáax aʼalaʼaloʼ, maʼ páajchaj u beetkiʼ. 18  Tumen teʼexeʼ mix juntéen a natsʼabaʼex tiʼ junpʼéel baʼal jeʼel u páajtal u tatalkʼabtaʼal tʼabaʼan yéetel kʼáakʼ, mix tiʼ junpʼéel box múuyal, mix tiʼ éeʼjochʼeʼenil, mix tiʼ kʼaʼamkach iikʼ, 19  mix xan ta wuʼuyeʼex u kʼaʼamkach juum trompetaiʼ, mix ta wuʼuyeʼex baʼax aʼalaʼab le ka juumnaj le tʼaanoʼ. Le ka úuch lelaʼ, le máaxoʼob muchʼukbaloʼoboʼ tu kʼáat óoltoʼob ka xuʼuluk u tʼaʼanloʼob. 20  Tumen jach saajkoʼob kaʼach tu yoʼolal le baʼax aʼalaʼabaʼ: «Tak juntúul baʼalcheʼ ka kóojok tiʼ le witsoʼ, kʼaʼabéet u muruxtuntaʼal». 21  Tumen jach sajbeʼentsil le baʼax úuchoʼ, tak Moisés tu yaʼalaj: «Jach táaj saajken yéetel táan in kikilankil». 22  Baʼaleʼ teʼexeʼ tsʼoʼok a náatsʼleʼex tiʼ u Puʼukil Sión yéetel tiʼ le kaʼanilbeʼen Jerusalenoʼ, junpʼéel kaaj tiaʼalintaʼan tumen le kuxaʼan Diosoʼ; tsʼoʼok xan a náatsʼleʼex tiʼ u milesil angeloʼob 23  u láaj muchʼmubaʼob, tiʼ u múuchʼulil u yáax paalal Dios tsʼíibtaʼan u kʼaabaʼob teʼ kaʼanoʼ, tiʼ Dios u Juezil tuláakal máak, tiʼ u kuxtal le máaxoʼob toj u kuxtaloʼob yéeyaʼanoʼob yéetel u kiliʼich muukʼoʼ, 24  tiʼ Jesús u mediadoril* le túumben núuptʼaanoʼ, bey xan tiʼ le kʼiʼikʼ wiʼiwitsʼaʼan ku tʼaan maas maʼalob ke u kʼiʼikʼel Abeloʼ. 25  Ilawileʼex maʼ u xuʼulul a wuʼuyikeʼex u tʼaan le máax ku tʼaanoʼ, tumen wa maʼ púutsʼ le máaxoʼob xuʼul u yuʼubikoʼob u tʼaan le máax aʼalik kaʼach baʼax ken u beet Dios tiʼ le yóokʼol kaaboʼ, ¿bix túun jeʼel k-púutsʼul toʼon wa k-náachtal tiʼ le máax ku tʼaan desde teʼ kaʼanoʼ? 26  Teʼ kʼiin jeʼeloʼ, u juum u tʼaaneʼ tu beetaj u kíilbal le luʼumoʼ, baʼaleʼ beoraaʼ tsʼoʼok u yaʼalik: «Yaan in beetik u kíilbal tu kaʼatéen, baʼaleʼ maʼ chéen le Luʼumoʼ, tak le kaʼanoʼ». 27  Bey túunoʼ, le ken u yaʼal «tu kaʼatéenoʼ», u kʼáat u yaʼaleʼ Dioseʼ yaan u luʼsik le baʼaloʼob tsʼoʼok u yáax péeksaʼaloʼoboʼ, baʼaloʼob maʼ letiʼ beetmiliʼ, utiaʼal beyoʼ ka pʼáatak le baʼaloʼob mix juntéen péeksaʼakoʼoboʼ. 28  Bey tumen yaan k-kʼamik junpʼéel Reino maʼ tu páajtal u péeksaʼaloʼ, yanaktoʼon mantatsʼ le nojoch utsiloʼ, utiaʼal ka páajchajak k-beetik junpʼéel kiliʼich meyaj kʼambeʼen tu táan Dios, yéetel maʼalob saajkilil bey xan yéetel tsiikil. 29  Tumen k-Dios xaneʼ junpʼéel kʼáakʼ ku xuʼulsaj.

Tsolajiloʼob

Wa: «letiʼobeʼ j-jaajkunajoʼob tiʼ».
Gr.: pórnos. Le tʼaanaʼ ku meyaj utiaʼal u yúuchul tʼaan tiʼ le jejeláas núupchitaloʼob ku bin tu contra u ley Diosoʼ. Ilaʼak Tipʼ. 4.
Lelaʼ juntúul máak ku waʼatal chúumuk tiʼ kaʼa jaats máakoʼob utiaʼal u yaʼalik baʼax ku tuklik cada jaats.