Hebreos 11:1-40

11  Fejeʼ letiʼ u kʼubik u yóol máak u páaʼt junpʼéel baʼal jach u yojel yaan u yúuchul, u yeʼesaʼal jach jaaj junpʼéel baʼal kex maʼ tu páajtal u yilaʼal.  Tumen tu yoʼolal fejeʼ, yaʼab tiʼ le máaxoʼob kuxlajoʼob úuchjeakiloʼ* aʼalaʼab toj u kuxtaloʼob tu táan Dios.  Tu yoʼolal fejeʼ, k-tsʼáaik cuentaeʼ le baʼaxoʼob beetaʼanoʼoboʼ* tsʼaʼaboʼob tu tsoolol tu yoʼolal u tʼaan Dios, le oʼolaleʼ le baʼaxoʼob ku yilaʼaloʼ kʼuchoʼob antal tu yoʼolal baʼaloʼob maʼ tu páajtal u yilaʼaloʼob.  Tu yoʼolal fejeʼ, Abeleʼ tu kʼubaj tiʼ Dios junpʼéel kíimsbil siibal maas maʼalob ke le siibal tu kʼubaj Caínoʼ; tu yoʼolal le fe tu yeʼesaʼ, aʼalaʼab toj u kuxtal tumen Dios le ka kʼaʼam le siibaloʼob tu kʼuboʼ. Tsʼoʼoleʼ kex kíimeʼ tak bejlaʼa táan u tʼaan tu yoʼolal le fe yanchajtiʼoʼ.  Tu yoʼolal fejeʼ, Enokeʼ bisaʼab táanxel tuʼux utiaʼal maʼ u yilik le kíimiloʼ, yéetel mix tuʼux kaxtaʼabi, tumen Dios bis táanxel tuʼux; baʼaleʼ táanil tiʼ u bisaʼaleʼ, jaajkúuntaʼab jach ku lúubul utsil tiʼ Dios.  Wa minaʼan u fe máakeʼ maʼ tu páajtal u lúubul utsil tiʼ Dios, tumen le máax ku natsʼkuba tu yiknal Dioseʼ kʼaʼabéet u creertik jach tu jaajil yaan Dios, yéetel ku síik baʼaloʼob maʼalobtak tiʼ le máaxoʼob jach ku tsʼáaik u yóol u kaxtoʼoboʼ.  Tu yoʼolal fejeʼ, Noeeʼ, le ka aʼalaʼabtiʼ tumen Dios yaan u yúuchul baʼaloʼob mix juntéen ilaʼakoʼobeʼ, tu chʼaʼaj saajkilil tiʼ Dioseʼ ka tu beetaj junpʼéel arca utiaʼal u salvarkuba u láakʼtsiloʼob; tu yoʼolal le fe tu yeʼesaʼ tu chíikbesaj jach kʼasaʼan u máakiloʼob le yóokʼol kaaboʼ, yéetel kʼuch u tiaʼalint le toj kuxtal ku yantal tu yoʼolal le fejoʼ.  Tu yoʼolal fejeʼ, Abrahaneʼ, le ka tʼaʼaneʼ tu beetaj le baʼax aʼalaʼabtiʼoʼ ka jóokʼ u binbal tiʼ le kúuchil kun tsʼaabil bey herencia tiʼoʼ; letiʼeʼ jóokʼ u binbal kex maʼ u yojel tuʼuxiʼ.  Tu yoʼolal fejeʼ kuxlaj bey juntúul j-táanxel luʼumil teʼ luʼum aʼalaʼab u tsʼaʼabaltiʼoʼ, bey jeʼex u kajtal máak tiʼ junpʼéel luʼum maʼ utiaʼaleʼ; kajlaj tiʼ najoʼob beetaʼanoʼob yéetel nookʼ junmúuchʼ yéetel Isaak bey xan Jacob, tiʼ máaxoʼob aʼalaʼab xan u tsʼaʼabal le herenciaoʼ. 10  Abrahaneʼ tu beetaj lelaʼ tumen táan kaʼach u páaʼtik le kaaj jach tu jaajil yaan u chuunpakʼiloʼoboʼ, le kaaj tukultaʼan yéetel beetaʼan tumen Diosoʼ. 11  Tu yoʼolal fe xaneʼ, Saraeʼ tsʼaʼab u páajtalil u yantal u paalal, kex tsʼoʼok u máan u kʼiinil u tséenankil, tumen Saraeʼ u yojel chúukaʼan u yóol le máax tsʼáa le promesaoʼ. 12  Tu yoʼolal lelaʼ, chéen tiʼ juntúul máak, máax ku tuklaʼal kaʼach maʼ tu páajtal u yantal u paalaleʼ,* yanchaj yaʼab paalaloʼob jeʼex u yaʼabil u estrellailoʼob kaʼaneʼ, yéetel sen yaʼabchajoʼob jeʼex le arena yaan tu jáal le kʼáaʼnáab mix máak ku páajtal u xokikoʼ. 13  Le ka kʼuch u kʼiinil u kíimil le máakoʼobaʼ láayliʼ yaan u fejoʼobeʼ; tsʼoʼoleʼ kex maʼ tu yiloʼob u béeychajal le baʼaxoʼob aʼalaʼabtiʼoboʼ, tu yiloʼob desde náachileʼ ka kiʼimakchaj u yóoloʼob tu yoʼolal, yéetel tu yaʼaloʼob tu táan tuláakal máakeʼ letiʼobeʼ j-táanxel luʼumiloʼob yéetel chéen uʼulaboʼob teʼ luʼum tuʼux yanoʼoboʼ. 14  Tumen le máaxoʼob ku tʼaanoʼob beyaʼ, ku chíikbeskoʼob jach u tsʼaamaj u yóol u kaxtoʼob junpʼéel kúuchil utiaʼal u pʼáatloʼob kajtaliʼ. 15  Chéen baʼaleʼ wa ka seguernak u kʼaʼajsikoʼob kaʼach le kúuchil tuʼux jóokʼoʼoboʼ, u jaajileʼ jeʼel u páajtal kaʼach u suutoʼobeʼ. 16  Baʼaleʼ beoraaʼ táan u yilik u tiaʼalintikoʼob junpʼéel kúuchil maas maʼalob, junpʼéel kaʼanilbeʼen kúuchil. Le oʼolaleʼ Dioseʼ maʼatech u suʼlaktal tu yoʼolaloʼob ikil u yaʼalikoʼob u Diosoʼob, tumen letiʼeʼ tsʼoʼok u preparartik junpʼéel kaaj u tiaʼaloʼob. 17  Tu yoʼolal fejeʼ, Abrahaneʼ, le ka túuntaʼab u yóoleʼ, jeʼel u páajtal u yaʼalaʼal tu kʼubaj Isaakeʼ. Abrahán le máax tu kʼamaj yéetel kiʼimak óolal le promesaoʼ tu yóotaj u kʼub u juntúuliliʼ paal, 18  kex aʼalaʼan kaʼach tiʼ: «Le máax kun aʼalbil ‹a chʼiʼibaloʼ› tiʼ Isaak kun taal». 19  Baʼaleʼ kʼuch u naʼateʼ Dioseʼ jeʼel u páajtal kaʼach u líiʼsik ichil le kimenoʼoboʼ. Tsʼoʼoleʼ jeʼel u páajtal u yaʼalaʼaleʼ bey líiʼsbil beetaʼabik u paal ichil le kimenoʼoboʼ; lelaʼ meyajnaj bey junpʼéel kettʼaaneʼ. 20  Tu yoʼolal fe xaneʼ, Isaakeʼ tu kiʼikiʼtʼantaj Jacob yéetel Esaú tu yoʼolal baʼaloʼob maʼ kʼuchuk u kʼiinil u yúuchloʼobiʼ. 21  Tu yoʼolal fejeʼ, Jacobeʼ, le taʼaytak u kíimiloʼ tu kiʼikiʼtʼantaj cada juntúul tiʼ u paalal José, yéetel xolaj adorar táan u jetsʼik u muukʼ yóokʼol u xóolteʼ. 22  Tu yoʼolal fejeʼ, Joseeʼ, le taʼaytak u xuʼulul u kʼiinil u kuxtaloʼ tʼaanaj tiʼ u jóokʼbal u paalal Israel tiʼ u luʼumil Egipto; tsʼoʼoleʼ tu yaʼalaj xan baʼax u kʼáat ka beetaʼak yéetel u baakeloʼob. 23  Tu yoʼolal fejeʼ, Moiseseʼ, desde ka síijeʼ taʼakaʼab tumen u taataʼob tu yáamil óoxpʼéel mes, tumen tu yiloʼob jach kiʼichkelem le chan xiʼipaloʼ, yéetel maʼ tu chʼaʼajoʼob saajkil tiʼ baʼax u yaʼalmaj le reyoʼ. 24  Tu yoʼolal fejeʼ, Moiseseʼ, le tsʼoʼok u nojochtaloʼ maʼ tu yóotaj ka aʼalaʼak wa u paal u hija Faraoniʼ, 25  baʼaxeʼ maas tu yóotaj ka maltratartaʼak paʼteʼ yéetel u kaajal Dios ke ka u kiʼimakkúunt u yóol junsúutuk yéetel le kʼebanoʼ, 26  tumen tu yilaj maas maʼalob ka muʼyajnak jeʼex juntúul Máax yéeyaʼaneʼ* ke ka yanaktiʼ u ayikʼaliloʼob Egipto; tumen letiʼeʼ tu chʼikaj u paakat tiʼ le boʼol kun tsʼaabiltiʼoʼ. 27  Tu yoʼolal fejeʼ tu pʼataj Egipto, yéetel maʼ tu chʼaʼaj saajkil tiʼ le reyoʼ, tumen letiʼeʼ pʼáat jeetsʼel tiʼ u fe bey táan u yilik le Máax maʼ tu páajtal u yilaʼaloʼ. 28  Tu yoʼolal fejeʼ tu kʼiinbesaj le Pascuaoʼ yéetel tu wiʼiwitsʼaj le kʼiʼikʼoʼ, utiaʼal beyoʼ le máax ku xuʼulsajoʼ maʼ u kíimsik u yáax paalal le israelitaʼoboʼ. 29  Tu yoʼolal fejeʼ tu kʼáatmáansoʼob le Chak Kʼáaʼnáab jeʼex u máan máak yóokʼol tikin luʼumoʼ, baʼaleʼ le egipcioʼoboʼ láaj búuloʼob le ka tu yóotoʼob kʼáatmáanoʼ. 30  Tu yoʼolal fejeʼ, u baʼpakʼiloʼob Jericoeʼ láaj níikoʼob le ka tsʼoʼok u marchar le israelitaʼob ichil siete kʼiinoʼob tu baʼpachoʼ. 31  Tu yoʼolal fejeʼ, Rahab, le koʼolel chéen bey u máanoʼ, maʼ kíim paʼteʼ yéetel le máakoʼob maʼ tu yuʼuboʼob tʼaanoʼ, tumen letiʼeʼ tu kʼamaj yéetel jeetsʼelil le máaxoʼob binoʼob chʼúuktik le kaajoʼ. 32  ¿Baʼax uláakʼ jeʼel in waʼalikeʼ? Tumen jeʼel u bineltikten tiempo wa ka tʼaanaken tiʼ Gedeón, Barak, Sansón, Jefté, David bey xan tiʼ Samuel yéetel le u maasil profetaʼoboʼ. 33  Tu yoʼolal fejeʼ tu tsʼáanchaʼatoʼob reyoʼob, tu beetoʼob baʼax toj, yaan baʼax aʼalaʼab u tsʼaʼabaltiʼob tumen Dios, tu nupʼoʼob u chiʼ leonoʼob, 34  tu luʼsoʼob u muukʼ le kʼáakʼoʼ, púutsʼoʼob tiʼ u yej espada, kex minaʼan u muukʼoʼobeʼ tsʼaʼab u muukʼoʼob, jach yanchaj páajtalil tiʼob utiaʼal baʼateʼel, tu yáalkabaansoʼob le soldadoʼob taaljaʼanoʼob kaʼach baʼateloʼ. 35  Yanchaj koʼoleloʼob kaʼa kuxkíintaʼab u láakʼtsiloʼob kimenoʼob; baʼaleʼ uláakʼ máakoʼobeʼ beetaʼab u sen muʼyajoʼob tumen maʼ tu yóotoʼob ka jáalkʼabtaʼakoʼob tu yoʼolal junpʼéel boʼoliʼ, lelaʼ tu beetoʼob utiaʼal ka líiʼsaʼakoʼob ichil le kimenoʼob junpʼéel bix maas maʼaloboʼ. 36  Uláakʼoʼob xaneʼ túuntaʼab u yóoloʼob úuchik u pʼaʼastaʼaloʼob yéetel u jaʼajatsʼaʼaloʼob, baʼaleʼ maʼ chéen leloʼ, kʼaʼaxoʼob yéetel cadenaʼob yéetel oksaʼaboʼob cárcel; 37  muruxtuntaʼaboʼob, túuntaʼab u yóoloʼob, jóoʼsaʼab kaʼabúuj tiʼob, kíimsaʼaboʼob yéetel espada; uláakʼoʼobeʼ máanoʼob jejeláas tuʼux u búukintmoʼob u kʼéewelil taman, u kʼéewelil chivo, táan u máanskoʼob óotsilil, muʼyajil, yéetel táan u maltratartaʼaloʼob; 38  le yóokʼol kaabaʼ maʼ u náajaltmaj kaʼach ka yanak máakoʼob bey ichilaʼ. Le máakoʼobaʼ máanoʼob tiʼ desiertoʼob, tiʼ witsoʼob, yéetel tu taʼakajubaʼob tiʼ sajkaboʼob bey xan tiʼ áaktunoʼob. 39  Baʼaleʼ tuláakal le máakoʼobaʼ kex aʼalaʼab toj u kuxtaloʼob tu yoʼolal u fejoʼobeʼ, maʼ tu yiloʼob u béeychajal le promesaoʼ, 40  utiaʼal beyoʼ maʼ u yutsil chúukaʼankúuntaʼaloʼob chéen letiʼob wa maʼ tak toʼoneʼexiʼ, tumen Dioseʼ u tukultmaj kaʼach junpʼéel baʼax maas maʼalob k-tiaʼal.

Tsolajiloʼob

Wa: «k-úuchben láakʼtsiloʼob».
Ilaʼak Tipʼ. 16, Yóokʼol kaab.
Lit.: «kimen».
Lit.: «Cristo».