Filipenses 2:1-30

2  Bey túunoʼ, wa tu yoʼolal Cristo ku páajtal a líiʼskeʼex u yóol uláakʼoʼob, wa a kiʼimakkúuntkeʼex u yóoloʼob yéetel yaabilaj, wa a weʼeskeʼex ka tuukuleʼex tu yoʼolaloʼob, wa a weʼeskeʼextiʼob yaabilaj ku jóokʼol tu tsʼuʼ a puksiʼikʼaleʼex, bey xan a chʼaʼikeʼex óotsilil tiʼobeʼ,  chúukbeseʼex in kiʼimak óolal ikil u yantalteʼex junpʼéeliliʼ tuukul, junpʼéeliliʼ yaabilaj, ikil a wantaleʼex junmúuchʼ bey junpʼéeliliʼ wíinklileʼ yéetel ikil u yantalteʼex junpʼéeliliʼ puksiʼikʼal.  Maʼ a beetkeʼex mix baʼal chéen utiaʼal a kaxtikeʼex baʼateʼel, mix tu yoʼolal kaʼanal ichil, baʼaxeʼ yéetel kabal óolaleʼ ileʼex u maasil bey maas kʼaʼanaʼanoʼob ke teʼexeʼ.  Cada juntúul tiʼ teʼexeʼ maʼ u kaxtik chéen u yutsil, baʼaxeʼ u kaxt xan u yutsil u maasil.  Mantatsʼ tuukulneneʼex jeʼex tuukulnajik Cristo Jesuseʼ;  tumen letiʼeʼ kex kuxaʼan kaʼach bey Dioseʼ, maʼ tu tuklaj u tokik u puesto Diosiʼ, wa u ketkuba tu yéeteliʼ.  Maʼ; baʼaxeʼ tu xúumpʼattaj tuláakal baʼax yaantiʼ, tu beetuba bey juntúul palitsileʼ ka kʼuch u beetuba wíinikil.  Tsʼoʼoleʼ maʼ chéen leloʼ, baʼaxeʼ le ka tu beetuba wíinikileʼ, tu mixbaʼalkúuntubaeʼ ka tu yuʼubaj tʼaan kex yanchaj tak u kíimil tiʼ junpʼéel u cheʼil muʼyaj.  Tu yoʼolal xan lelaʼ, Dioseʼ tu tsʼáaj tiʼ Cristo junpʼéel puesto maas nojoch, yéetel ichil u yutsileʼ tu tsʼáajtiʼ le kʼaabaʼ maas nojoch tiʼ tuláakal le uláakʼ kʼaabaʼoboʼ, 10  utiaʼal beyoʼ, tu kʼaabaʼ Jesuseʼ ka xolak tuláakal máak —le máaxoʼob yanoʼob teʼ kaʼanoʼ, teʼ Luʼumaʼ bey xan le yanoʼob yáanal luʼumoʼ—, 11  yéetel ka u yaʼal tu táan tuláakaleʼ Jesucristoeʼ Yuumtsil utiaʼal u nojbeʼenil Dios, le Taataoʼ. 12  Le oʼolaleʼ, in sukuʼuneʼex, jeʼex suukil a wuʼuyikeʼex tʼaan le tiaʼanen* ta wiknaleʼexoʼ, beora minaʼanen ta wiknaleʼexaʼ, ilawileʼex a maas uʼuyikeʼex tʼaan. Seguernak a kaxtik a salvacioneʼex yéetel saajkilil bey xan yéetel kikilankil. 13  Tumen Dioseʼ letiʼ muʼukʼaʼankúuntikeʼex ikil u tsʼáaikteʼex u tsʼíibolalil yéetel u páajtalil a beetkeʼex wa baʼax; letiʼeʼ bey uts tu tʼaan u beetkoʼ. 14  Seguernak a beetkeʼex tuláakal baʼal x-maʼ tutukchiʼil mix yéetel baʼateltʼaanil, 15  utiaʼal maʼ u yantal a siʼipileʼex mix a kʼasaʼanileʼex, baʼaleʼ ka ilaʼakeʼex u paalaleʼex Dios mix baʼal kʼaas paʼapakʼaʼanteʼex kex tiʼ yaneʼex ichil junpʼéel generación kʼaschajaʼan u tuukul yéetel loʼoloʼoch u kuxtaleʼ; ichileʼ teʼexeʼ táan a léembaleʼex jeʼex sáasiloʼob teʼ yóokʼol kaabaʼ. 16  Macheʼex tubeel u tʼaanil le kuxtaloʼ, utiaʼal ka yanak baʼax oʼolal u kiʼimaktal in wóol tu kʼiinil Cristo, tumen beyoʼ yaan in wojéeltik maʼ chéen kunel úuchik in wáalkabiʼ mix xan chéen kunel úuchik in kíimskinba meyajiʼ. 17  Tsʼoʼoleʼ, kex ka béeyaken jeʼex le ukʼul ku láalaʼal yóokʼol le siibal ka kʼubkeʼex bey xan yóokʼol le meyaj ka beetkeʼex yoʼolal le fe yaanteʼexoʼ, teneʼ yaan u sen kiʼimaktal in wóol ta wéeteleʼex. 18  Teʼexeʼ bey xan unaj u kiʼimaktal a wóoleʼex tin wéeteloʼ. 19  Baʼaleʼ kin páaʼtik tiʼ Yuumtsil Jesús ka páajchajak in séeb túuxtik Timoteo ta wiknaleʼex, utiaʼal ka líikʼik in wóol ken in wojéelt bix u bin tiʼ teʼex. 20  Tumen minaʼanten uláakʼ máak jach jeʼex Timoteoeʼ, ka u kanáant tubeel le baʼaxoʼob yaan yil ta wéeteleʼexoʼ. 21  Tumen tuláakal le u maasil máakoʼoboʼ chéen u yutsiloʼob ku kaxtikoʼob, maʼ le baʼaloʼob yaan yil yéetel Cristo Jesusoʼ. 22  Baʼaleʼ teʼexeʼ a wojleʼex baʼax tsʼoʼok u yeʼesik Timoteo yéetel u kuxtal, tumen jeʼex u beetik juntúul hijotsil yéetel u taataeʼ, letiʼeʼ múul meyajnaj tin wéetel bey palitsil utiaʼal u maas kʼaʼaytaʼal le maʼalob péektsiloʼ. 23  Le oʼolaleʼ letiʼ le máax in tukultmaj in túuxtik ta wiknaleʼex chéen pʼelak in wilik baʼax kun úuchul tin wéeteloʼ. 24  U jaajileʼ kin kʼubik in wóol tiʼ Yuumtsil, maʼ kun xáantaleʼ tak teen bíin xiʼiken ta wiknaleʼex. 25  Baʼaleʼ beoraaʼ kin tuklik kʼaʼabéet in túuxtik ta wiknaleʼex Epafrodito in sukuʼun, máax in wéet meyaj yéetel in wéet soldadoil, le máax xan ta túuxteʼex utiaʼal ka u yáanten tiʼ baʼax kʼaʼabéettenoʼ, 26  tumen letiʼeʼ taak u láaj ilkeʼex, yéetel jach lubaʼan u yóol tumen ta wojéelteʼex kʼojaʼanchaji. 27  U jaajileʼ, jach óolak kíimik le ka kʼojaʼanchajoʼ, baʼaleʼ Dioseʼ tu chʼaʼaj óotsilil tiʼ letiʼ, bey xan tiʼ teen, utiaʼal maʼ u maas yaʼabtal baʼaxoʼob beetik u yaatal in wóol. 28  Le oʼolaleʼ táan in túuxtik tu séebaʼanil utiaʼal u kaʼa kiʼimaktal a wóoleʼex ken a wileʼex, yéetel teneʼ ka xuʼuluk in sen chiʼichnaktal. 29  Le beetkeʼ kʼameʼex yéetel kiʼimak óolal tu kʼaabaʼ Yuumtsil jeʼex suukileʼ; maʼ u xuʼulul a weʼeskeʼex yaabilaj tiʼ máakoʼob jeʼex letiʼeʼ, 30  tumen tu yoʼolal u meeyjil Yuumtsileʼ óolak kíimik; tu tsʼáaj u kuxtal* tu chiʼ kíimil utiaʼal u yáantken tiʼ le baʼaxoʼob kʼaʼabéetchajten le ka pʼáat minaʼaneʼex tin wiknaloʼ.

Tsolajiloʼob

Gr.: parousía. Ilaʼak Tipʼ. 5.
Wa: «alma». Gr.: sikjé. Ilaʼak Tipʼ. 7A.