Colosenses 2:1-23

2  Tumen in kʼáat ka a wileʼex bukaʼaj nojchil le baʼateʼel yaanten utiaʼal a wutsileʼexoʼ, utiaʼal u yutsil le máaxoʼob yanoʼob Laodiceaoʼ, bey xan utiaʼal u yutsil le máaxoʼob maʼ u yilmenoʼoboʼ.  Lelaʼ kin beetik utiaʼal ka líiʼsaʼak u yóol u puksiʼikʼaloʼob, utiaʼal ka múuchʼ pʼáatkoʼob ich yaabilaj, yéetel utiaʼal ka sen ayikʼalchajkoʼob tumen u yojloʼob chúukaʼan le naʼat yaantiʼoboʼ, utiaʼal beyoʼ ka u chúukaʼan kʼaj óoltoʼob u kiliʼich taʼakbil baʼal Dios; lelaʼ Cristo.  Ichil letiʼeʼ taʼakaʼan tubeel tuláakal u ayikʼalil le naʼatil yéetel le kʼaj óolaliloʼ.  Kin waʼalik lelaʼ, utiaʼal beyoʼ mix máak ka u tuseʼex yéetel tʼaanoʼob jeʼel u beetik u kʼexpajal a tuukuleʼexeʼ.  U jaajileʼ minaʼanen ta wiknaleʼex, baʼaleʼ in puksiʼikʼaleʼ tiʼ yaan ta wéeteleʼexeʼ, tsʼoʼoleʼ ku kiʼimaktal in wóol tumen táan a beetkeʼex tuláakal baʼal tu nuʼuk, yéetel muʼukʼaʼan a fejeʼex tiʼ Cristo.  Le oʼolaleʼ, bey tsʼoʼok a kʼamkeʼex Cristo Jesús le Yuumtsiloʼ, maʼ u xuʼulul xan a máaneʼex junmúuchʼ tu yéetel.  Taamchajak a mootseʼex, líiʼsaʼakeʼex tu yóokʼol Cristo, jeetsʼel pʼáatkeʼex tiʼ le fe jeʼex kaʼansaʼanteʼexoʼ, yéetel sen yaʼabchajak a fejeʼex ken a tsʼáaʼex gracias.  Kanáantabaʼex utiaʼal beyoʼ mix máak ka u táabseʼex yéetel u kaʼansaj chéen máakoʼob, wa yéetel le chéen kunel tʼaanoʼob suuk u beetaʼal tumen le úuchben láakʼtsiloʼoboʼ; leloʼobaʼ baʼaloʼob kʼaʼanaʼantak utiaʼal le yóokʼol kaabaʼ, maʼ utiaʼal Cristoiʼ.  Tumen Cristo eʼesik tu chúukaʼanil tuláakal u jatsʼuts modos Dios. 10  Tu yoʼolal letiʼ túuneʼ, teʼexeʼ yaanteʼex tuláakal baʼal; letiʼ u poolil tuláakal jalaʼachil yéetel autoridad. 11  Tumen ka biskabaʼex tu yéeteleʼ, teʼexeʼ súutkʼuptaʼabeʼex,* maʼ yéetel le súutkʼuptajil ku beetaʼal tumen le máakoʼoboʼ, baʼaxeʼ úuchik u luʼsaʼal le kʼeban yaan kaʼach ta wíinklileʼexoʼ. Bey túunoʼ súutkʼuptaʼabeʼex yéetel le súutkʼuptajil ku taal tiʼ Cristooʼ. 12  Teʼexeʼ muʼukeʼex yéetel Cristo úuchik a wokjaʼex jeʼex okjaʼanajik letiʼoʼ; tu yoʼolal xan letiʼeʼ líiʼsaʼabeʼex junmúuchʼ tu yéetel úuchik a tsʼáaik a fejeʼex tiʼ u nojoch meyaj Dios, le máax líiʼs Cristo ichil le kimenoʼoboʼ. 13  Tsʼoʼoleʼ kex kimeneʼex kaʼach tu yoʼolal a siʼipileʼex bey xan tu yoʼolal maʼ súutkʼuptaʼaneʼexeʼ, Dioseʼ tu kuxkíinteʼex junmúuchʼ yéetel Cristo. Tu yoʼolal xan u yutsileʼ tu perdonartaj tuláakal k-siʼipiloʼob, 14  yéetel tu láaj tupaj le Ley tuʼux tsʼíibtaʼan le baʼaxoʼob unaj u beetaʼaloʼ; le Leyaʼ t-contra kaʼach yaan. Le oʼolal Dioseʼ tu luʼsaj yóoʼ bej úuchik u bajik tu cheʼil le muʼyajoʼ. 15  Tu yoʼolal u cheʼil le muʼyajoʼ, letiʼeʼ tsʼoʼok u pʼatik chaknuulil le jalaʼachoʼob yéetel le autoridadoʼoboʼ; tsʼoʼok xan u jóoʼskoʼob tu táan le máakoʼob utiaʼal ka ilaʼak tsʼoʼok u perderoʼoboʼ, yéetel tsʼoʼok u biskoʼob tiʼ junpʼéel procesión utiaʼal u yeʼesik tsʼoʼok u ganartikoʼob. 16  Le oʼolaleʼ maʼ a chaʼikeʼex a juzgartaʼaleʼex tumen mix máak tu yoʼolal baʼax ka jaantkeʼex yéetel ka wukʼikeʼex, wa tu yoʼolal wa baʼax kʼiinbesajil, wa tu yoʼolal u kʼiinbesaʼal túumben luna, wa tu yoʼolal junpʼéel u kʼiinil Sábado. 17  Le baʼaloʼobaʼ chéen u yoochel le baʼaxoʼob kun taaloʼoboʼ, baʼaleʼ le oochelaʼ u yoochel Cristo. 18  Maʼ u beetaʼal a peʼertikeʼex le siibal tumen le máaxoʼob chéen ku taaskubaʼob bey kabal u yóoloʼob yéetel ku táakpajloʼob tiʼ u adoración le angeloʼoboʼ. Le máakoʼobaʼ ku chʼíikiloʼob tʼaan chéen tiʼ le baʼaxoʼob tsʼoʼok u yilkoʼoboʼ, tsʼoʼoleʼ tumen ku chaʼik u bisaʼaloʼob tumen u luʼumkabil tsʼíibolaloʼobeʼ ku nojbaʼalkúuntkubaʼob tu yoʼolal mix baʼal. 19  Letiʼobeʼ maʼ jeetsʼel pʼaatloʼob tiʼ le pooloʼ, le tuʼux u taal tuláakal baʼax kʼaʼabéet tiʼ le wíinkliloʼ; le poolaʼ letiʼ nupik tubeel le wíinklil tu yoʼolal u baakeloʼob bey xan tu yoʼolal u xiichʼeloʼoboʼ, tsʼoʼoleʼ letiʼ beetik u nojochtal jeʼex u tukultmil Dioseʼ. 20  Wa teʼex kíimeʼex junmúuchʼ yéetel Cristo tiʼ le baʼaloʼob kʼaʼanaʼantak utiaʼal le yóokʼol kaabaʼ, ¿baʼaxten túun kuxaʼaneʼex jeʼex u kajnáaliloʼob yóokʼol kaab ikil a tsʼoʼokbeskeʼex le leyoʼob jeʼex 21  «maʼ a machik leloʼ, maʼ a túuntik leloʼ, maʼ a péetsʼkʼabtik leloʼ»? 22  Tumen le baʼaloʼobaʼ aʼalaʼan yaan u láaj kʼastaloʼob ikil u meyajoʼob tiʼ máak; tsʼoʼoleʼ le leyoʼobaʼ chéen u leyoʼob yéetel u kaʼansajoʼob wíinik. 23  Chéen ku yaʼalaʼaloʼob utiaʼal ka úuchuk adorar jeʼex uts tu tʼaan wíinikeʼ, bey xan utiaʼal ka páajchajak u yilaʼal bey jach tu jaajil kabal u yóol máakeʼ; tsʼoʼoleʼ le leyoʼobaʼ ku taasik muʼyajil tu wíinklil máak. Kex bey yéetel naʼatil ku yaʼalaʼaloʼobeʼ, maʼ tu meyaj tiʼ máak utiaʼal u tselik u tsʼíibolal u kʼeban wíinklil.

Tsolajiloʼob

Ilaʼak Tipʼ. 16.