Apocalipsis 9:1-21

9  Le u cinco ángel xanoʼ tu yustaj u trompeta. Ka tin wilaj junpʼéel u estrellail kaʼan lubaʼan Luʼum, ka túun tsʼaʼab u llaveil u jool le taamkach chʼeʼen tiʼoʼ.  Le estrella túunoʼ tu jeʼekʼabtaj u jool le taamkach chʼeʼenoʼ, ka líikʼ junpʼéel buutsʼ jeʼex u buutsʼil junpʼéel nojoch hornoeʼ, ka éeʼjochʼeʼenchaj le Kʼiin bey xan le iikʼ tu yoʼolal le buutsʼ líikʼ teʼ jooloʼ.  Tiʼ le buutsʼoʼ jóokʼ sáakʼoʼob utiaʼal báanal yóokʼol le Luʼumoʼ; ka túun tsʼaʼab páajtalil tiʼob jeʼex le páajtalil yaan tiʼ le síinaʼanoʼob tu yóokʼol le Luʼumoʼ.  Aʼalaʼabtiʼobeʼ maʼ unaj u kʼaskúuntikoʼob u kʼáaxiloʼob le Luʼumoʼ, mix le suʼukoʼ, mix junkúul cheʼ, baʼaxeʼ chéen unaj u loobiltikoʼob le máaxoʼob minaʼan u sello Dios tu táanpoolaloʼoboʼ.  Baʼaleʼ le páajtalil tsʼaʼab tiʼ le sáakʼoʼoboʼ, maʼ utiaʼal u kíimskoʼob le máakoʼoboʼ, baʼaxeʼ utiaʼal ka u beetoʼob u muʼyajoʼob ichil cinco meses, jeʼex u muʼyaj máak ken chiʼibik tumen juntúul síinaʼaneʼ.  Teʼ kʼiinoʼob jeʼeloʼ le máakoʼoboʼ yaan u yilik u kaxtikoʼob bix jeʼel u kíimloʼobeʼ, baʼaleʼ junpuliʼ maʼ ken u kaxtoʼob; yaan u tsʼíiboltik u kíimloʼob, baʼaleʼ le kíimiloʼ yaan u púutsʼul tiʼ letiʼob.  U wíinklil le sáakʼoʼoboʼ bey jeʼex u wíinklil tsíiminoʼob listokíintaʼanoʼob utiaʼal baʼateleʼ; tu yóokʼol u pooloʼobeʼ yaan baʼaloʼob bey coronaʼob de oroeʼ, yéetel u táan u yichoʼobeʼ bey u yich wíinikeʼ,  baʼaleʼ u tsoʼotsel u pooloʼobeʼ bey u tsoʼotsel u pool koʼoleleʼ. U kojoʼob xaneʼ bey u koj leoneʼ;  u piixil u tseemoʼobeʼ bey jeʼex junpʼéel u piixil tseem de hierroeʼ. U juum u xiikʼoʼobeʼ bey jeʼex u juum carretaʼob ku jíiltaʼaloʼob tumen tsíiminoʼob táan u yáalkaboʼob utiaʼal baʼateleʼ. 10  Tsʼoʼoleʼ yaan u nejoʼob yéetel u yaachoʼob bey jeʼex le síinaʼanoʼoboʼ; tu nejoʼob yaan u páajtalil u loobiltikoʼob le máakoʼob ichil cinco mesesoʼ. 11  Yaan juntúul rey nuʼuktikoʼob, u angelil le taamkach chʼeʼenoʼ. Ich hebreoeʼ u kʼaabaʼeʼ Abadón,* baʼaleʼ ich griegoeʼ u kʼaabaʼeʼ Apolión.* 12  Le yáax yajiloʼ tsʼoʼok u máan. ¡Ileʼex! Ken tsʼoʼokok le baʼaloʼobaʼ yaan u taal uláakʼ kaʼapʼéel yajil. 13  Le u seis ángel xanoʼ tu yustaj u trompeta. Ka tin wuʼuyaj junpʼéel tʼaan jóokʼ tiʼ u baakoʼob le altar de oro yaan tu táan u trono Diosoʼ; 14  le tʼaanaʼ tu yaʼalaj tiʼ le u seis ángel u machmaj le trompetaoʼ: «Wachʼ le kantúul angeloʼob kʼaxaʼanoʼob tu jáal le nojoch áalkab jaʼ ku kʼaabaʼtik Éufratesoʼ». 15  Ka túun waʼachʼ le kantúul angeloʼob utiaʼal u kíimskoʼob junpʼéel u yóoxjaatsil le máakoʼoboʼ; le angeloʼobaʼ u prepararmubaʼob utiaʼal le horaoʼ, le kʼiinoʼ, le mesoʼ yéetel le jaʼab aʼalaʼanoʼ. 16  Tuláakal le máaxoʼob u natʼmoʼob tsíiminoʼob utiaʼal baʼateloʼ, doscientos millones* u túulaloʼob. Teen uʼuy jaytúuloʼob. 17  Bey úuchik in wilik le tsíiminoʼob ichil le náayoʼ, bey xan le máaxoʼob natʼmiloʼoboʼ: u piixil u tseemoʼobeʼ chak jeʼex kʼáakʼeʼ, azul jeʼex jacintoeʼ* yéetel kʼaankʼan jeʼex azufreeʼ; u pool le tsíiminoʼob xanoʼ bey jeʼex u pool leoneʼ, yéetel tu chiʼobeʼ ku jóokʼol kʼáakʼ, buutsʼ, yéetel azufre. 18  Junpʼéel u yóoxjaatsil le máakoʼoboʼ kíimsaʼaboʼob yéetel le óoxpʼéel baʼaloʼob ku jóokʼol tu chiʼ le tsíiminoʼoboʼ: kʼáakʼ, buutsʼ yéetel azufre. 19  Tumen u páajtalil le tsíiminoʼoboʼ tiʼ yaan tu chiʼob yéetel tu nejoʼobeʼ; tumen u nejoʼobeʼ beyoʼob kaanoʼob yaan u pooloʼobeʼ, tsʼoʼoleʼ tu yéeteloʼobeʼ ku beetkoʼob loob tiʼ máak. 20  Baʼaleʼ le u maasil máakoʼob maʼ kíimsaʼaboʼob yéetel le baʼaloʼobaʼ, maʼ tu kʼexaj u tuukuloʼob utiaʼal u pʼatkoʼob le baʼaxoʼob ku beetkoʼoboʼ; maʼ xuʼul u adorartikoʼob demonioʼobiʼ mix beetbil diosoʼob de oro, de plata, de cobre, de tuunich yéetel de cheʼiʼ; le beetbil diosoʼobaʼ maʼ tu páajtal u paakatoʼob, mix u yuʼubikoʼob wa baʼax, mix u xíimbaloʼob. 21  Tsʼoʼoleʼ maʼ tu kʼexaj xan u tuukuloʼob utiaʼal u xuʼulul u kíimskoʼob máak, u beetik u j-meeniloʼob,* u núupkʼebantaloʼob* yéetel u yookoloʼobiʼ.

Tsolajiloʼob

U kʼáat u yaʼaleʼ «xuʼulsajil».
U kʼáat u yaʼaleʼ «j-xuʼulsaj».
Wa: «veinte mil u téenel diez mil».
Ilaʼak Tipʼ. 16, Jatsʼuts tuunichoʼob.
Wa: «espiritistailoʼob».
Gr.: pornéya. Ilaʼak Tipʼ. 4.