Apocalipsis 5:1-14

5  Tu x-noʼoj kʼab le Máax kulukbal teʼ tronooʼ, tin wilaj junpʼéel rollo tsʼíibtaʼan tu kaʼatséelil yéetel jach sellartaʼan tubeel yéetel siete selloʼob.  Ka tin wilaj xan juntúul muʼukʼaʼan ángel táan u kʼaʼam aʼalik: «¿Máax ku náajmatik u jeʼekʼabtik le rollo yéetel u luʼsik u selloiloʼoboʼ?».  Baʼaleʼ mix kaʼan, mix Luʼum, mix tu yáanal luʼum yanchaj máax jeʼel u páajtal u jeʼekʼabtik le rollooʼ, mix u yilik baʼax tsʼíibtaʼan ichil.  Ka joʼopʼ in sen okʼol tumen maʼ yanchaj mix máak ku náajmatik u jeʼekʼabtik le rollooʼ, mix u yilik baʼax tsʼíibtaʼan ichiliʼ.  Baʼaleʼ juntúul tiʼ le ancianoʼoboʼ tu yaʼalajten: «Maʼ a wokʼol. ¡Ile! Le León taal tiʼ u chʼiʼibal Judá, bey xan ichil u paalaloʼob* Davidoʼ, tsʼoʼok u tsʼáanchaakʼ utiaʼal u jeʼekʼabtik le rollooʼ bey xan u siete selloiloʼob».  Chúumuk tiʼ le trono, tiʼ le kantúul querubinoʼob yéetel tiʼ le ancianoʼoboʼ, tin wilaj waʼalakbal juntúul taman, bey xotʼaʼan u yúuleʼ; yaan siete u baakoʼob yéetel siete u yichoʼob. U yichoʼobeʼ ku chíikbesik le u siete muukʼoʼob* Dios túuxtaʼanoʼob tiʼ tuláakal yóokʼol kaaboʼ.  Le taman túunoʼ náatsʼeʼ ka tu séeb chʼaʼaj le rollo tu x-noʼoj kʼab le Máax kulukbal teʼ tronooʼ.  Le ka tu chʼaʼaj le rollooʼ, le kantúul querubinoʼob yéetel le veinticuatro ancianoʼoboʼ xolajoʼob tu táan le Tamanoʼ; tiʼ cada juntúuleʼ yaan junpʼéel arpa, yéetel yaan xan tiʼob nukuch tazaʼob de oro chuupoʼob yéetel incienso. (Le inciensooʼ ku chíikbesik le oracionoʼob ku beetik le j-kiliʼichoʼoboʼ.)  Letiʼobeʼ ku kʼaykoʼob junpʼéel túumben kʼaay, yéetel ku yaʼalikoʼob: «Techeʼ ka náajmatik a chʼaʼik le rollo yéetel a luʼsik u selloiloʼoboʼ, tumen xoʼotʼ a yúul; tsʼoʼoleʼ yéetel a kʼiʼikʼeleʼ ta manaj máakoʼob tiʼ tuláakal chʼiʼibal, kaajil, tʼaanil yéetel luʼumil, utiaʼal a kʼubkoʼob tiʼ Dios, 10  ka túun ta beetoʼob reyil yéetel sacerdoteil utiaʼal Dios; letiʼobeʼ yaan u reinaroʼob tu yóokʼol le Luʼumoʼ». 11  Tu baʼpach le trono, le querubinoʼob yéetel le ancianoʼoboʼ, tin wilaj yéetel tin wuʼuyaj u tʼaan yaʼabkach angeloʼobiʼ —le angeloʼobaʼ yaʼab u téenel diez mil por diez mil, yéetel yaʼab u téenel mil por mil u túulaloʼob—; 12  letiʼobeʼ táan u kʼaʼam aʼalikoʼob: «Le Taman xotʼaʼan u yúuloʼ ku náajmatik u kʼamik páajtalil, ayikʼalil, naʼatil, muukʼil, tsiikil, nojbeʼenil yéetel kiʼikiʼtʼaan». 13  Tuláakal baʼal kuxaʼan kaʼan, Luʼum, tu yáanal luʼum, teʼ kʼáaʼnáaboʼ, bey xan tuláakal le baʼaloʼob yanoʼoboʼ, tin wuʼuyaj u yaʼalikoʼob: «Tiʼ le Máax kulukbal teʼ trono bey xan tiʼ le Tamanoʼ, tsʼaʼabak kiʼikiʼtʼaan, tsiikil, nojbeʼenil yéetel páajtalil utiaʼal kʼiinoʼob minaʼan u xuul». 14  Le kantúul querubinoʼoboʼ táan kaʼach u yaʼalikoʼob: «¡Amén!», ka xolaj túun le ancianoʼoboʼ ka joʼopʼ u adorartikoʼob Dios.

Tsolajiloʼob

Lit.: «u moots».
Gr.: néumata. Ilaʼak Tipʼ. 7B.