Apocalipsis 2:1-29

2  »Tiʼ u angelil le múuchʼulil yaan Éfesooʼ, tsʼíibt lelaʼ: Lelaʼ letiʼe baʼaxoʼob ku yaʼalik le máax yaan siete estrellaʼob tu x-noʼoj kʼaboʼ, le máax ku máan chúumuk tiʼ le siete candelabroʼob de orooʼ:  ‹In wojel baʼaxoʼob ka beetik, ka tsʼáaik a wóol meyaj, chúukaʼan a wóol, yéetel in wojel a pʼeek baʼax ku beetik le kʼasaʼan máakoʼoboʼ; ta túuntaj u yóol le máaxoʼob ku yaʼalikubaʼob apostoloʼoboʼ, baʼaleʼ maʼ jaajiʼ, ka ta wilaj chéen táan u tuusoʼob.  Táan xan a weʼesik chúukaʼan a wóol, yéetel yaʼab baʼaloʼob tsʼoʼok a muʼyajtik tu yoʼolal in kʼaabaʼ, yéetel maʼ kaʼankechiʼ.  Baʼaleʼ yaanten junpʼéel baʼal ta contra: tsʼoʼok u xuʼulul a weʼesik le yaabilaj yanchajtech tu káajbaloʼ.  »›Le oʼolaleʼ, kʼaʼajaktech tuʼux tsʼoʼok a lúubul, kʼex a tuukul yéetel beet le baʼaxoʼob ka beetik kaʼach tu káajbaloʼ. Wa maʼ ta beetkeʼ, yaan in taal ta wiknal yéetel yaan in luʼsik a candelabro tu kúuchil; jaʼaliʼ ka a kʼex a tuukuleʼ.  Baʼaleʼ yaan junpʼéel baʼax maʼalob ka beetik: A pʼeek le baʼaxoʼob ku beetik u secta Nicolasoʼ; teen xaneʼ in pʼekmaj.  Le máax yaan u xikineʼ, u yuʼub baʼax ku yaʼalik le kiliʼich muukʼ tiʼ le múuchʼuliloʼoboʼ: Tiʼ le máax kun tsʼáanchaakʼ teʼ baʼateloʼ yaan in tsʼáaik u páajtalil u jaantik u yich u cheʼil le kuxtal yaan tu paraíso Diosoʼ›.  »Tiʼ u angelil le múuchʼulil yaan Esmirnaoʼ, tsʼíibt lelaʼ: Lelaʼ letiʼe baʼaxoʼob ku yaʼalik ‹le Yáaxoʼ yéetel le u Tsʼookoʼ›, le máax kíim yéetel kaʼa kuxlajoʼ:  ‹In wojel bix a muʼyaj yéetel in wojel óotsilech —baʼaleʼ ayikʼalech—; in wojel xan bix u kʼaakʼastʼaan le máaxoʼob ku yaʼalikubaʼob judíoʼoboʼ, baʼaleʼ maʼ beyiʼ, baʼaxeʼ u sinagogaʼob Satanás. 10  Maʼ a sajaktal tiʼ le baʼaxoʼob ku taal u kʼiin a muʼyajtikoʼ. ¡Ile! Le Kʼaasilbaʼaloʼ* yaan u seguer u beetik u kʼaʼalal cárcel jujuntúul tiʼ teʼex utiaʼal ka túuntaʼak a wóoleʼex tu chúukaʼanil, yéetel utiaʼal ka muʼyajnakeʼex tu yáamil diez kʼiinoʼob. Chúukpajak a wóol kex ka kʼaʼabéetchajak a kíimil; teen túuneʼ yaan in tsʼáaiktech u coronail le kuxtaloʼ. 11  Le máax yaan u xikineʼ, u yuʼub baʼax ku yaʼalik le kiliʼich muukʼ tiʼ le múuchʼuliloʼoboʼ: Le máax kun tsʼáanchaakʼ teʼ baʼateloʼ junpuliʼ maʼ kun beetbil loob tiʼ tumen le kaʼa kíimiloʼ›. 12  »Tiʼ u angelil le múuchʼulil yaan Pérgamooʼ, tsʼíibt lelaʼ: Lelaʼ letiʼe baʼaxoʼob ku yaʼalik le máax yaantiʼ junpʼéel chowak espada kaʼamat u yej yéetel jach puputsʼkiloʼ:* 13  ‹In wojel tuʼux kajaʼanech, teʼ tuʼux yaan u trono Satanasoʼ; kex beyoʼ, láayliʼ chúukaʼan a wóol tiʼ in kʼaabaʼeʼ yéetel maʼ xuʼuluk a tsʼáaik a fe tiʼ teniʼ, mix tu kʼiiniloʼob Antipas, le in j-jaajkunaj chúukpaj u yóoloʼ, le máax kíimsaʼab teʼ tuʼux yaneʼexoʼ, teʼ tuʼux kajaʼan Satanasoʼ. 14  »›Baʼaleʼ yaanten jujunpʼéel baʼaloʼob ta contra: ta wiknaleʼ tiʼ yaan le máaxoʼob chʼiikiloʼob tiʼ u kaʼansaj Balaam, le máax kaʼans tiʼ Balak bix jeʼel u beetik u lúubul u paalal Israel, bix jeʼel u beetik u jaantkoʼob le baʼaloʼob kʼubaʼanoʼob tiʼ beetbil diosoʼoboʼ, yéetel bix jeʼel u beetik u núupkʼebantaloʼobeʼ.* 15  Bey túun xanoʼ, ta wiknaleʼ tiʼ yaan xan le máaxoʼob chʼiikiloʼob tiʼ baʼaxoʼob ku kaʼansik u secta Nicolasoʼ. 16  Le oʼolaleʼ, kʼex a tuukul. Wa maʼ ta beetkeʼ, yaan in taal ta wiknal tu séebaʼanil, yéetel yaan in baʼateʼel tu contraʼob yéetel le chowak espada ku jóokʼol tin chiʼoʼ. 17  »›Le máax yaan u xikineʼ u yuʼub baʼax ku yaʼalik le kiliʼich muukʼ tiʼ le múuchʼuliloʼoboʼ: Le máax kun tsʼáanchaakʼ teʼ baʼateloʼ yaan in tsʼáaiktiʼ le maná líiʼsaʼanoʼ, yéetel yaan in tsʼáaik junpʼéel chan sak tuunich tiʼ; tu yóokʼol le chan tuunichaʼ tsʼíibtaʼan junpʼéel túumben kʼaabaʼ mix máak u yojel, chéen le máax tiʼ ku tsʼaʼabaloʼ›. 18  »Tiʼ u angelil le múuchʼulil yaan Tiatiraoʼ, tsʼíibt lelaʼ: Lelaʼ letiʼe baʼaxoʼob ku yaʼalik u Paal Dios, le máax ku tóochʼbal u yich jeʼex u tóochʼbal kʼáakʼeʼ, yéetel u yookoʼobeʼ beyoʼob tsʼúuk cobreeʼ: 19  ‹In wojel baʼaxoʼob ka beetik, in wojel yaan a yaabilaj, yaan a fe, ka meyajtik Dios yéetel chúukaʼan óolal, yéetel in wojel maas yaʼab le baʼaxoʼob ka beetik bejlaʼoʼ ke le bukaʼaj ka beetik kaʼachoʼ. 20  »›Baʼaleʼ yaanten junpʼéel baʼal ta contra: Techeʼ chéen táan a wilik baʼax ku beetik le x-Jezabeloʼ; le koʼolelaʼ ku yaʼalikuba x-profetail, ku kaʼansik yéetel ku tusik in palitsiloʼob utiaʼal ka núupkʼebanchajkoʼob, bey xan utiaʼal ka u jaantoʼob baʼaloʼob kʼubaʼan tiʼ beetbil diosoʼob. 21  Tin tsʼáaj tiempo tiʼ utiaʼal u kʼexik u tuukul, baʼaleʼ maʼ u kʼáat u kʼex u tuukuliʼ; láayliʼ táan u núupkʼebantaleʼ. 22  ¡Ile! Nikaʼaj in beet u kʼojaʼantal utiaʼal ka pʼáatak chʼuytal tu kʼaan. Tiʼ le máaxoʼob xan ku núupkʼebantaloʼob tu yéeteloʼ yaan in beetik u jach muʼyajoʼob; jaʼaliʼ ka u kʼex u tuukuloʼob yéetel ka xuʼuluk u beetkoʼob jeʼex le koʼolelaʼ. 23  U paalal le koʼolelaʼ, yaan in kíimskoʼob yéetel junpʼéel kʼaakʼas kʼojaʼanil; bey túunoʼ tuláakal le múuchʼuliloʼoboʼ yaan u yojéeltikoʼob teen xakʼaltik u riñones yéetel u puksiʼikʼal máak. Tiʼ cada juntúul tiʼ teʼex xaneʼ, yaan in tsʼáaik baʼax u náajaltmaj tu yoʼolal baʼaxoʼob u beetmaj. 24  »›Baʼaleʼ, tiʼ teʼex yaneʼex Tiatira, tiʼ tuláakleʼex le maʼ ta bineʼex tu paach le kaʼansajaʼ, máaxoʼob maʼ kʼuch u kʼaj óoltoʼob le baʼaxoʼob ku yaʼalaʼal «taʼakbil baʼaloʼob» ku taaloʼob tiʼ Satanasoʼ, kin waʼalik: Maʼ táan in tsʼáaikteʼex uláakʼ kuuch. 25  Baʼaleʼ, kanáanteʼex maʼ a pʼatkeʼex le baʼaxoʼob yaanteʼex tak ken taalakenoʼ. 26  Le máax kun tsʼáanchaakʼ teʼ baʼateʼel, yéetel ku tsʼoʼokbesik tak tu xuul le baʼaxoʼob tin waʼalaj ka beetaʼakoʼ, yaan in tsʼáaik páajtalil tiʼ tu yóokʼol le kaajoʼoboʼ, 27  utiaʼal u nuʼuktik le máakoʼob yéetel junpʼéel xóolteʼ de hierrooʼ. Le máakoʼob túunoʼ yaan u xeʼexetʼaʼaloʼob jeʼex u xeʼexetʼaʼal pʼúuloʼobeʼ, jeʼel bix tsʼoʼok u tsʼaʼabalten xan u páajtalil in beetik tumen in Taataoʼ. 28  Tsʼoʼoleʼ, yaan xan in tsʼáaiktiʼ u estrellail jaʼatskab kʼiin. 29  Le máax yaan u xikineʼ, u yuʼub baʼax ku yaʼalik le kiliʼich muukʼ tiʼ le múuchʼuliloʼoboʼ›.

Tsolajiloʼob

Lit.: «Diablo», u kʼáat u yaʼaleʼ j-líiʼsaj tʼaan.
Wa: «jach yaan u yej».
Gr.: pornéwo. Ilaʼak Tipʼ. 4.