Apocalipsis 14:1-20

14  Tsʼoʼoleʼ paakatnajeneʼ, yéetel, ¡ileʼex!, le Tamanoʼ waʼalakbal tu Puʼukil Sión; tu yéeteleʼ yaan ciento cuarenticuatro mil máakoʼobiʼ; tu táanpoolal le máakoʼobaʼ tsʼíibtaʼan u kʼaabaʼ le Tamanoʼ, bey xan u kʼaabaʼ u Taata.  Ka tin wuʼuyaj u juum junpʼéel baʼal teʼ kaʼanoʼ, jeʼex u juum yaʼab jaʼeʼ yéetel jeʼex u juum u kíilbal cháakeʼ; le baʼax tin wuʼuyoʼ bey jeʼex u juum u kʼaay máakoʼob táan u paxik u arpaʼobeʼ.  Le baʼax ku kʼaykoʼob tu táan le trono, tu táan le kantúul querubinoʼob, bey xan tu táan le ancianoʼoboʼ bey junpʼéel túumben kʼaayeʼ; le kʼaayaʼ mix máak páajchaj u kanik, chéen le ciento cuarenticuatro mil máakoʼob maʼanoʼob tiʼ le Luʼumaʼ.  Letiʼobeʼ maʼ tu yéekʼkuntaj u kuxtaloʼob yéetel koʼoleloʼobiʼ; u jaajileʼ mix juntéen yanchaj baʼal u yiloʼob yéetel koʼolel. Ku binoʼob tu paach le Taman jeʼel tuʼuxak ka xiʼikoʼ. Yéetel maʼanoʼob ichil le wíinikoʼob utiaʼal ka kʼuʼubkoʼob tiʼ Dios yéetel tiʼ le Taman bey le yáax ich ku tsʼáaik le paakʼaloʼoboʼ;  tu chiʼob xaneʼ maʼ uʼuyaʼab mix junpʼéel tuusiʼ; letiʼobeʼ minaʼan u siʼipiloʼob.  Ka tin wilaj uláakʼ juntúul ángel táan u xikʼnal chúumuk tiʼ le kaʼanoʼ; tiʼ letiʼeʼ kʼubéentaʼan maʼalob péektsil minaʼan u xuul utiaʼal u kʼaʼayt tiʼ u kajnáaliloʼob Luʼum, tiʼ tuláakal luʼumoʼob, chʼiʼibaloʼob, tʼaanoʼob yéetel kaajoʼob.  Le angelaʼ táan kaʼach u kʼaʼam aʼalik: «Chʼaʼex saajkil tiʼ Dios, yéetel nojbeʼenkúunteʼex, tumen tsʼoʼok u kʼuchul u kʼiinil le juicio ken u beetoʼ; le oʼolaleʼ, adorarteʼex le Máax beet kaʼan, Luʼum, kʼáaʼnáab, bey xan u sayabiloʼob le jaʼoʼ».  Tsʼoʼoleʼ tin wilaj u taal uláakʼ juntúul ángel, u kaʼatúul, táan u yaʼalik: «¡Tsʼoʼok u lúubul! ¡Tsʼoʼok u lúubul le Nojoch Babiloniaoʼ, le máax tsʼáa tiʼ tuláakal luʼumiloʼob u vinoil u kʼaakʼas tsʼíibolaloʼ,* u vinoil u núupkʼeban!».*  Tu paacheʼ taal uláakʼ juntúul ángel, u yóoxtúul, táan u kʼaʼam aʼalik: «Le máax ku adorartik le tsʼíitsʼik baʼalcheʼ yéetel u estatuailoʼ, yéetel ku chaʼik u marcartaʼal tu táanpoolal wa tu kʼabeʼ, 10  yaan u beetaʼal u yukʼik xan u vinoil u pʼujaʼanil Dios, le vino maʼ júuljaʼataʼan tsʼoʼok u láalaʼal tu copail u pʼujaʼanil Diosoʼ, yéetel yaan u beetaʼal u muʼyaj yéetel kʼáakʼ bey xan yéetel azufre tu táan le kiliʼich angeloʼob yéetel tu táan le Tamanoʼ. 11  Le máaxoʼob adorartik le tsʼíitsʼik baʼalcheʼ yéetel u estatuailoʼ, bey xan tuláakal máax ku chaʼik u marcartaʼal yéetel u kʼaabaʼ le tsʼíitsʼik baʼalcheʼoʼ, yaan u naʼakal u buutsʼil u muʼyajoʼob utiaʼal kʼiinoʼob minaʼan u xuul; bul kʼiin yéetel bul áakʼab kun muʼyajoʼob. 12  Tiʼ túun ku kʼaʼabéettal u chúukpajal u yóol le j-kiliʼichoʼob u tsʼoʼokbesoʼob u tʼaan Dios yéetel u tsʼáaik u fejoʼob tiʼ Jesusoʼ». 13  Ka túun tin wuʼuyaj junpʼéel tʼaan teʼ kaʼan táan u yaʼalik: «Tsʼíibte: Desde bejlaʼeʼ, kiʼimak u yóol le máaxoʼob ku kíimloʼob junmúuchʼ yéetel Yuumtsiloʼ. Jach beyoʼ —ku yaʼalik le kiliʼich muukʼoʼ—, ka jeʼelkoʼob tiʼ u meyajoʼob, tumen le baʼaxoʼob tu beetoʼoboʼ yaan u binoʼob tu yéeteloʼob». 14  Tsʼoʼoleʼ paakatnajeneʼ, yéetel, ¡ileʼex!, junpʼéel sak múuyal; le máax kulukbal yóokʼol le múuyaloʼ chíikaʼan tiʼ u paal máak; tu pooleʼ yaan junpʼéel corona de oro, yéetel tu kʼabeʼ yaan junpʼéel lóobcheʼ* jach jóoʼsaʼan u yej. 15  Uláakʼ juntúul ángel túuneʼ jóokʼ tu kiliʼich kúuchilil le templo táan u kʼaʼam aʼalik tiʼ le máax kulukbal yóokʼol le múuyaloʼ: «Jup a lóobcheʼeʼ ka joochnakech, tumen tsʼoʼok u kʼuchul u kʼiinil le joochoʼ; u joochil le luʼumoʼ tsʼoʼok u kʼantal». 16  Le máax kulukbal túun yóokʼol le múuyaloʼ, tu jupaj u lóobcheʼeʼ ka tu jochaj u yich le luʼumoʼ. 17  Uláakʼ juntúul angeleʼ jóokʼ xan tiʼ u kiliʼich kúuchilil le templo yaan kaʼanoʼ, u machmaj xan junpʼéel lóobcheʼ jach jóoʼsaʼan u yej. 18  Uláakʼ juntúul ángel túuneʼ jóokʼ tiʼ le altaroʼ; tiʼ letiʼeʼ tsʼaʼan páajtalil yóokʼol le kʼáakʼoʼ. Ka tu kʼaʼam aʼalaj tiʼ le ángel machmil le lóobcheʼ jach jóoʼsaʼan u yejoʼ: «Jup a lóobcheʼ jach yaan u yejoʼ, ka a xotʼ u pʼóopʼochal u yich le luʼumoʼ, tumen u yich le uvaoʼ tsʼoʼok u kʼantal». 19  Le ángel túunoʼ tu jupaj u lóobcheʼeʼ ka tu xotʼaj u pʼóopʼochal u uvail le luʼumoʼ; ka túun tu láalaj tu pilail u pʼujaʼanil Dios. 20  Bey túunoʼ, u yich le uvaoʼ pupuʼchaʼataʼab paachil tiʼ le kaajoʼ, ka jóokʼ kʼiʼikʼ tiʼ le pila tak ka kʼuch tu kaʼanlil u jokʼniʼ le tsíiminoʼoboʼ. Le kʼiʼikʼoʼ tu bulaj kex 300 kilómetros* luʼum.

Tsolajiloʼob

Lit.: «pʼuʼujul».
Gr.: pornéya. Le tʼaanaʼ ku meyaj utiaʼal u yúuchul tʼaan tiʼ le jejeláas núupchitaloʼob ku bin tu contra u ley Diosoʼ. Ilaʼak Tipʼ. 4.
Wa: «hoz».
Lit.: «1,600 estadios».