Apocalipsis 11:1-19

11  Ka túun tsʼaʼabten junpʼéel chowak cheʼ bey junpʼéel pʼisib cheʼeʼ ka aʼalaʼabten: «Líikʼen ka a pʼis u kiliʼich kúuchilil u templo Dios, le altaroʼ, bey xan le máaxoʼob ku adoraroʼob teʼeloʼ.  Baʼaleʼ u táankabil u kiliʼich kúuchilil le templooʼ, xúumpʼatte, maʼ a pʼisik, tumen tsʼoʼok u kʼuʼubul tu kʼab le j-táanxel luʼumiloʼoboʼ; letiʼobeʼ yaan u pepeʼchaʼatikoʼob le kiliʼich kaaj tu yáamil cuarentidós mesesoʼ.  Tsʼoʼoleʼ yaan in túuxtik kaʼatúul in j-jaajkunajoʼob utiaʼal u profetizaroʼob tu yáamil mil doscientos sesenta kʼiinoʼob u búukintmoʼob u nookʼil yaayaj óolal».  Leloʼobaʼ ku keʼeteloʼob yéetel le kaʼakúul olivoʼoboʼ bey xan yéetel le kaʼapʼéel candelabroʼoboʼ, yéetel tiʼ waʼalakbaloʼob tu táan u Yuumtsilil le Luʼumoʼ.  Tsʼoʼoleʼ wa yaan máax u kʼáat u beet loob tiʼobeʼ, ku jóokʼol kʼáakʼ tu chiʼobeʼ, ku tóokik le máaxoʼob pʼekmiloʼoboʼ. Bey kun kíimsbil jeʼel máaxak ka u yóot u beet loob tiʼoboʼ.  Tiʼ le kaʼatúul j-jaajkunajoʼobaʼ, tsʼaʼan u páajtalil u kʼalikoʼob kaʼan utiaʼal maʼ u kʼáaxal jaʼ teʼ kʼiinoʼob táan u profetizaroʼoboʼ, yéetel tsʼaʼan u páajtalil u sutkoʼob kʼiʼikʼil le jaʼoʼ, bey xan utiaʼal ka u loobiltoʼob le Luʼum yéetel jeʼel baʼalak noj yajil jeʼel jaytéen u kʼáatoʼobeʼ.  Le ken tsʼoʼokok u jaajkúuntikoʼob le baʼax aʼalaʼantiʼoboʼ, le tsʼíitsʼik baʼalcheʼ ku jóokʼol tiʼ le taamkach chʼeʼenoʼ yaan u baʼateʼel tu contraʼob, yaan u tsʼáanchaʼatikoʼob yéetel yaan u kíimskoʼob.  U kimen wíinkliloʼob túuneʼ yaan u pʼáatal pektal tu noj bejil le nojoch kaaj tuʼux chʼuykíintaʼab tiʼ cheʼ u Yuumtsiloʼoboʼ, le kaaj ku keʼetel yéetel Sodoma bey xan yéetel Egiptooʼ.  Le máakoʼob tiʼ jejeláas kaajoʼob, chʼiʼibaloʼob, tʼaanoʼob, bey xan le j-táanxel luʼumiloʼoboʼ, yaan u chaʼantikoʼob u kimen wíinklil le kaʼatúul j-jaajkunajoʼob ichil óoxpʼéel kʼiinoʼob yéetel táanchumukoʼ; yéetel maʼ ken u chaʼob u tsʼaʼabaloʼob tiʼ junpʼéel muknal. 10  U kajnáaliloʼob le Luʼumoʼ yaan u kiʼimaktal u yóoloʼob yéetel yaan u kʼiinbesajoʼob tu yoʼolal le baʼax úuchoʼ, yéetel yaan u túuxtikoʼob siibaloʼob tu baatsiloʼob, tumen jach beetaʼab u muʼyaj u kajnáaliloʼob Luʼum tumen le kaʼatúul profetaʼobaʼ. 11  Ka tsʼoʼok le óoxpʼéel kʼiin yéetel táanchumukoʼ, le u muukʼil kuxtal ku taal tiʼ Diosoʼ ook tu wíinkliloʼobeʼ, ka líikʼoʼob; le máaxoʼob túun iloʼoboʼ jach sajakchajoʼob. 12  Tsʼoʼoleʼ tu yuʼuboʼob junpʼéel kʼaʼam tʼaan ku taal teʼ kaʼan táan u yaʼaliktiʼob: «Naʼakeneʼex wayeʼ». Ka naʼakoʼob teʼ kaʼan ichil le múuyaloʼ, ka ilaʼaboʼob tumen le máaxoʼob pʼekmiloʼoboʼ. 13  Teʼ hora jeʼeloʼ yanchaj junpʼéel nojoch kíilbal luʼum, ka jutkʼaj junpʼéel u diez jaatsil le kaajoʼ. Siete mil máakoʼob kíimoʼob tu yoʼolal le kíilbal luʼumoʼ, yéetel u maasileʼ jach sajakchajoʼobeʼ ka tu nojbeʼenkúuntoʼob u Diosil kaʼan. 14  Le u kaʼapʼéel yajiloʼ tsʼoʼok u máan. ¡Ileʼex! Le u yóoxpʼéel yajiloʼ táan u taal tu séebaʼanil. 15  Le u siete ángel xanoʼ tu yustaj u trompeta. Ka uʼuyaʼab u juum jejeláas tʼaanoʼob teʼ kaʼan táan u yaʼalikoʼob: «U Reinoil yóokʼol kaabeʼ tsʼoʼok u tiaʼalintaʼal tumen k-Yuumtsil yéetel u Cristo; Letiʼeʼ yaan u reinar utiaʼal kʼiinoʼob minaʼan u xuul». 16  Le veinticuatro ancianoʼob kulukbaloʼob tu tronoʼob tu táan Diosoʼ, tu xóolkʼabtubaʼobeʼ ka tu adorartoʼob Dios, 17  yéetel tu yaʼaloʼob: «K-tsʼáaiktech gracias, Jéeoba Dios, u Yuumil tuláakal páajtalil, le Máax yaan yéetel yaniliʼoʼ, tumen tsʼoʼok a chʼaʼik a nojoch páajtalil yéetel tsʼoʼok u káajal a reinar. 18  Baʼaleʼ u kajnáaliloʼob le luʼumoʼoboʼ pʼuʼujoʼob, ka ta weʼesaj xan a pʼujaʼanil, ka kʼuch u kʼiinil u juzgartaʼal le kimenoʼoboʼ bey xan u kʼiinil u tsʼaʼabal baʼax u náajaltmaj le profetaʼob meyajtikechoʼ, le j-kiliʼichoʼoboʼ, bey xan tuláakal le máaxoʼob chʼaʼik saajkil tiʼ a kʼaabaʼ, le mejentakoʼoboʼ bey xan le nuuktakoʼoboʼ; kʼuch xan u kʼiinil a xuʼulsik tiʼ le máaxoʼob táan u kʼaskúuntikoʼob le Luʼumoʼ». 19  Ka jeʼekʼabtaʼab le u kiliʼich kúuchilil u templo Dios yaan teʼ kaʼanoʼ. Ichil u kiliʼich kúuchilil le templo túunoʼ chíikpaj u cofreil le núuptʼaan u beetmaj Diosoʼ. Ka joʼopʼ u léembal cháak, u yuʼubaʼal tʼaanoʼob, u kíilbal cháak, u kíilbal luʼum, bey xan u sen kʼáaxal bat.

Tsolajiloʼob