Gálatas 5:1-26

5  Cristoeʼ tu jáalkʼabtoʼon utiaʼal ka yanaktoʼon le jáalkʼabil yaan tiʼ le koʼolel jeʼeloʼ. Le oʼolaleʼ pʼáatkeʼex beyoʼ, yéetel maʼ a chaʼik a palitsiltaʼaleʼex tu kaʼatéen.  ¡Ilawileʼex! Teen Pabloeʼ táan in waʼalikteʼexeʼ, wa ka súutkʼuptikabaʼexeʼ* mix junpʼéel utsil ken u taasteʼex le baʼax tu beetaj Cristooʼ.  Tsʼoʼoleʼ, tiʼ tuláakal máax ku súutkʼuptikubaeʼ, kin kaʼa aʼaliktiʼeʼ kʼaʼabéet xan u tsʼoʼokbesik tuláakal le baʼax ku yaʼalik le Leyoʼ.  Jeʼel máaxak ichileʼex ka u yaʼal toj u kuxtal tumen táan u tsʼoʼokbesik le Leyoʼ, tsʼoʼok u náachtal tiʼ Cristo yéetel maʼ ken u kʼam u nojoch utsil.  Baʼaleʼ toʼoneʼ tumen táan u nuʼuktikoʼon le kiliʼich muukʼoʼ, k-jach tsʼíiboltik u kʼuchul u kʼiinil u yaʼalaʼal toj k-kuxtal tu yoʼolal le fe yaantoʼonoʼ.  Tumen utiaʼal le máaxoʼob junmúuchʼ yaniloʼob yéetel Cristo Jesusoʼ mix baʼal u biilal u súutkʼuptaʼal máak bey xan wa maʼ u súutkʼuptaʼal máak, baʼax yaan u biilaleʼ letiʼe fe ku meyaj yoʼolal le yaabilajoʼ.  Teʼexeʼ maʼalob baʼax ka beetkeʼex kaʼachi. ¿Máax beet u xuʼulul a tsʼoʼokbeskeʼex le baʼax maʼalob kaʼansaʼabteʼexoʼ?  Le baʼax ku yoksaʼal ta tuukuleʼexaʼ maʼ tu taal tiʼ le Máax tʼankeʼexoʼ.  Junpʼíit levaduraeʼ ku beetik u líikʼil tuláakal le u juuchʼil harinaoʼ. 10  Teneʼ jach in wojleʼ, teʼex junmúuchʼ yanileʼex yéetel Yuumtsileʼ maʼ kun kʼexpajal a tuukuleʼex; baʼaleʼ le máax táan u taasikteʼex talamiloʼoboʼ, jeʼel máaxakeʼ, yaan u tsʼaʼabaltiʼ le castigo ku náajmatikoʼ. 11  Sukuʼuneʼex, wa teen láayliʼ táan in kʼaʼaytik le súutkʼuptajiloʼ, ¿baʼaxten túun láayliʼ táan in chʼaʼpachtaʼaleʼ? Wa letiʼe súutkʼuptajil kin kʼaʼaytikoʼ, u kʼáat túun u yaʼaleʼ le u cheʼil u muʼyaj* Cristo beetik u tʼóochpajloʼoboʼ, tsʼoʼok u luʼsaʼal. 12  Le máaxoʼob táan u yilik u yoksikoʼob yaanal baʼal ta tuukuleʼexoʼ maas maʼalob ka tak u kúulxotʼtoʼob u xiibiloʼob. 13  Sukuʼuneʼex, teʼexeʼ tʼaʼaneʼex utiaʼal jáalkʼabil, baʼaleʼ maʼ unaj a tuklikeʼex tumen jáalkʼabtaʼaneʼexeʼ jeʼel u páajtal a beetkeʼex le baʼax ku tsʼíiboltik a kʼeban wíinklileʼexoʼ; baʼaxeʼ yoʼolal le yaabilaj yaanteʼexoʼ paklan meyajtabaʼex bey palitsileʼexeʼ. 14  Tumen tuláakal le baʼax ku yaʼalik le Leyoʼ ku tsʼoʼokbesaʼal ken beetaʼak lelaʼ: «Kʼaʼabéet a yaabiltik a wéet máakil jeʼel bix a yaabiltikabaeʼ». 15  Baʼaleʼ wa ku seguer a chiʼikabaʼex yéetel a paklan jaantkabaʼexeʼ, kanáantabaʼex tumen jeʼel u kʼuchul u kʼiinil a paklan xuʼulskabaʼexeʼ. 16  Chéen baʼaleʼ kin waʼalik: Maʼ u xuʼulul a nuʼuktikabaʼex yéetel le kiliʼich muukʼoʼ, beyoʼ maʼ táan a lúubleʼex tiʼ mix junpʼéel u tsʼíibolal a kʼeban wíinklileʼex. 17  Tumen u tsʼíibolal le kʼeban wíinkliloʼ tiʼ yaan tu contra le kiliʼich muukʼoʼ, yéetel le kiliʼich muukʼoʼ tiʼ yaan tu contra u tsʼíibolal le kʼeban wíinkliloʼ; le baʼaloʼobaʼ maʼ tu biskubaʼob, le oʼolal maʼ ta beetkeʼex xan le baʼaxoʼob a kʼáat a beeteʼexoʼ. 18  Tsʼoʼoleʼ wa táan a nuʼuktaʼaleʼex tumen le kiliʼich muukʼoʼ, maʼ yáanal ley yaneʼexiʼ. 19  Le baʼaxoʼob ku túulchʼintaʼal u beet máak tumen u kʼeban wíinkliloʼ jach chíikaʼan u yilaʼaloʼob, yéetel letiʼe jeʼeloʼobaʼ: núupkʼeban,* éekʼ kuxtal, kuxtal x-maʼ suʼtalil, 20  u adorartaʼal beetbil diosoʼob, meenil,* pʼekbail, baʼatelil, tsʼíikilil,* séeb pʼuʼujul, baʼateltʼaanoʼob, jatslantáambail, sectaʼob, 21  u tsʼíiboltaʼal baʼal utiaʼal yaanal, káaltalil, kʼiinbesajoʼob tuʼux mix baʼal ku tsʼaʼabal u pʼiis, bey xan uláakʼ baʼaloʼob jeʼex leloʼobaʼ. Teneʼ kin waʼalikteʼex jeʼex tsʼoʼok in yáax aʼalikteʼexoʼ, le máaxoʼob beetik le baʼaloʼobaʼ maʼ ken u tiaʼalintoʼob u Reino Dios. 22  Baʼaleʼ u yich le kiliʼich muukʼoʼ letiʼ lelaʼ: yaabilaj, kiʼimak óolal, jeetsʼelil, chúukaʼan óolal,* maʼalob bisajbail, utsil, fe, 23  maʼ u séeb kʼuuxil máak, u controlarkuba máak. Tu contra le baʼaloʼobaʼ minaʼan ley. 24  Tsʼoʼoleʼ le máaxoʼob u tiaʼaloʼob Cristo Jesusoʼ, tsʼoʼok u bajkoʼob tiʼ cheʼ u luʼumkabil wíinkliloʼob paʼteʼ yéetel le baʼaxoʼob ku yaayamtik yéetel ku tsʼíiboltik u wíinkliloʼoboʼ. 25  Wa táan k-nuʼuktik k-kuxtal yéetel kiliʼich muukʼeʼ, maʼ u xuʼulul xan k-beetik tubeel le baʼax ku yaʼalik le kiliʼich muukʼoʼ. 26  Maʼ k-taasikbaʼex nojbaʼalil utiaʼal k-ilik máax maas maʼalob tiʼ uláakʼ mix xan utiaʼal k-tsʼíiboltik baʼax yaan tiʼ uláakʼ.

Tsolajiloʼob

Ilaʼak Tipʼ. 16.
Ilaʼak Tipʼ. 6.
Gr.: pornéya. Le tʼaanaʼ ku meyaj utiaʼal u yúuchul tʼaan tiʼ le jejeláas núupchitaloʼob ku bin tu contra u ley Diosoʼ. Ilaʼak Tipʼ. 4.
Wa: «espiritismo». Ilaʼak Tipʼ. 16.
Wa: «celos».
Wa: «chowak óolal».