2 Tesalonicenses 1:1-12

1  Teneʼ Pabloen; Silvano* yéetel Timoteoeʼ tiʼ yanoʼob tin wéeteleʼ. Le cartaaʼ utiaʼal u múuchʼulil le tesalonicailoʼoboʼ; letiʼobeʼ junmúuchʼ yaniloʼob yéetel Dios le k-Taataoʼ bey xan yéetel Yuumtsil Jesucristo:  Ka yanakteʼex le nojoch utsil yéetel le jeetsʼelil ku taal tiʼ Dios le Taataoʼ, bey xan le ku taal tiʼ Yuumtsil Jesucristooʼ.  Sukuʼuneʼex, mantatsʼ k-ilik kʼaʼabéet k-tsʼáaik gracias tiʼ Dios ta woʼolaleʼex. Lelaʼ jach maʼalob tumen a fejeʼexeʼ táan u bin u maas nojochtal; le yaabilaj xan ka wuʼuyikeʼex cada juntúul tiʼ teʼex ta baatsileʼexoʼ táan u bin u maas nojochtal.  Tu yoʼolal lelaʼ, toʼoneʼ k-nojbaʼalkúuntikba ta woʼolaleʼex ichil u múuchʼuliloʼob Dios ikil u chúukpajal a wóoleʼex yéetel ikil a weʼeskeʼex fe kex táan a sen chʼaʼpachtaʼaleʼex yéetel kex táan a sen muʼyajeʼex.  Lelaʼ ku yeʼesikeʼ Dioseʼ jach toj bix u juzgar ikil u yeʼesik ka náajmatkeʼex u Reino Dios, le baʼax oʼolal jach tu jaajil táan a muʼyajeʼexoʼ.  Lelaʼ ku yeʼesik xaneʼ Dioseʼ maʼalob u yilik ka u boʼot yéetel muʼyaj le máaxoʼob beetik a muʼyajeʼexoʼ.  Baʼaleʼ teʼex táan a máanskeʼex muʼyajileʼ, Dioseʼ yaan u beetik u xuʼulul a muʼyajeʼex junmúuchʼ t-éetel, teʼ kʼiin ken chíikpajak Yuumtsil Jesús desde teʼ kaʼan yéetel u muʼukʼaʼan angeloʼob  ichil junpʼéel kʼáakʼ táan u tóochʼbaloʼ; lelaʼ letiʼe ken taalak u sut u jeel le kʼaas ku beetik tuláakal le máaxoʼob maʼ u kʼaj óoloʼob Diosoʼ bey xan le máaxoʼob maʼ tu tsʼoʼokbeskoʼob le maʼalob péektsil yaan yil yéetel k-Yuumtsil Jesusoʼ.  Le máakoʼobaʼ jach letiʼe máaxoʼob ken u náajmatoʼob u castigartaʼaloʼob yéetel junpʼéel xuʼulsajil utiaʼal mantatsʼ, utiaʼal beyoʼ ka náachkuntaʼakoʼob tu táan u yich Yuumtsil bey xan tiʼ u nojoch páajtalil; 10  lelaʼ yaan u yúuchul teʼ kʼiinoʼob ken taalak Yuumtsil utiaʼal ka nojbeʼenkúuntaʼak junmúuchʼ yéetel u j-kiliʼichoʼoboʼ bey xan utiaʼal ka ilaʼak yéetel jakʼ óolal tumen tuláakal le máaxoʼob u tsʼaamaj u fejoʼob tiʼ letiʼoʼ, tumen ta tsʼáaj a fejeʼex tiʼ le baʼax t-kʼaʼaytajteʼexoʼ. 11  Tu yoʼolal xan leloʼ k-orar mantatsʼ ta woʼolaleʼex, utiaʼal beyoʼ k-Dioseʼ ka u yil ka náajmatkeʼex u tʼankeʼex, tsʼoʼoleʼ yéetel u páajtalileʼ ka u béeykunt tuláakal le baʼaloʼob maʼalobtak uts tu tʼaanoʼ yéetel ka u chúukbes le baʼaxoʼob ka péeksaʼal a beeteʼex tumen a fejeʼexoʼ. 12  Lelaʼ ku yúuchul utiaʼal ka nojbeʼenkúuntaʼak u kʼaabaʼ k-Yuumtsil Jesús ichileʼex yéetel ka nojbeʼenkúuntaʼakeʼex junmúuchʼ tu yéetel, tu yoʼolal u nojoch utsil k-Dios bey xan tu yoʼolal u nojoch utsil Yuumtsil Jesucristo.

Tsolajiloʼob

Wa: «Silas».