2 Corintios 12:1-21

12  Yaan in nojbaʼalkúuntkinba. In wojel maʼ ken u taas mix junpʼéel utsil, baʼaleʼ nikaʼaj tʼaan tiʼ náayoʼob yéetel tiʼ baʼaloʼob tsʼoʼok u tsʼaʼabal kʼaj óoltbil tumen Yuumtsil.  In kʼaj óol juntúul máak junmúuchʼ yanil yéetel Cristo; le máakaʼ walajki catorce jaʼaboʼobaʼ —maʼ in wojel wa yéetel u luʼumkabil wíinkliliʼ wa maʼ yéeteliʼ, lelaʼ Dios u yojel— téek bisaʼab tak tu yóoxpʼéel kaʼan.  Jach tu jaajil in kʼaj óol le máakaʼ —maʼ in wojel wa yéetel u luʼumkabil wíinkliliʼ wa maʼ yéeteliʼ, lelaʼ Dios u yojel—;  letiʼeʼ téek bisaʼab teʼ paraísooʼ ka tu yuʼubaj tʼaanoʼob maʼ tu páajtal u yaʼalaʼaloʼob yéetel maʼ uts u yaʼalaʼal tumen wíinikiʼ.  Teneʼ yaan in nojbaʼalkúuntkinba tu yoʼolal le máakaʼ, baʼaleʼ maʼ ken in nojbaʼalkúuntinba tin woʼolal, baʼaxeʼ chéen yoʼolal le baʼaxoʼob ku yeʼesik lubaʼan in muukʼoʼ.  Tumen kex ka taakak in nojbaʼalkúuntkinbaeʼ maʼ u kʼáat u yaʼal wa minaʼan in naʼatiʼ, tumen yaan in waʼalik u jaajil. Baʼaleʼ maʼ ken in nojbaʼalkúuntinba, beyoʼ mix máak kun tuklik u maasil tin woʼolal tu yoʼolal le baʼax ku yilik yéetel ku yuʼubik tiʼ tenoʼ  chéen tumen ku yuʼubik yaan nukuch baʼaloʼob tsʼoʼok u tsʼaʼabal in wojéelte. Utiaʼal túun maʼ in sen uʼuyikinba nojbaʼalileʼ, beetaʼab u chʼíikil junpʼéel kʼiʼix tin bakʼel, bey juntúul u ángel Satanás maʼ tu xuʼulul u laʼalajken utiaʼal maʼ u píitmáan in nojbaʼalkúuntkinbaeʼ.  Le oʼolaleʼ óoxtéen tin kʼáat óoltaj tiʼ Yuumtsil ka u luʼsten le kʼiʼixoʼ.  Baʼaleʼ letiʼeʼ tu yaʼalajten: «Yaan yéetel le in nojoch utsil kin weʼesiktechoʼ; tumen le nojoch páajtalil kin tsʼáaiktechoʼ, utsil chúukaʼan utiaʼal le baʼax beetik u lúubul a muukʼoʼ». Le oʼolaleʼ maas maʼalob in wilik in nojbaʼalkúuntkinba tu yoʼolal le baʼaxoʼob beetik u lúubul in muukʼoʼ, utiaʼal beyoʼ ka pʼáatak u páajtalil Cristo bey junpʼéel naj de nookʼ tsʼaʼan tin wóokʼoleʼ. 10  Le beetik ku kiʼimaktal in wóol ikil u pʼáatal minaʼan in muukʼ, ikil in poʼochʼol, ikil in máansik óotsilil, ikil in chʼaʼpachtaʼal yéetel ikil in máansik talamiloʼob tu yoʼolal Cristo. Tumen ken pʼáatak lubaʼan in muukʼeʼ maas muʼukʼaʼan in wuʼuyikinba. 11  Tsʼoʼok in beetkinba j-maʼ naʼatil. Teʼex túulchʼinten in beetinba beyoʼ, tumen teʼex unaj kaʼach a tʼaaneʼex maʼalob tin woʼolal. Tumen kex teen mix baʼaleneʼ, mix baʼal eʼes wa maas chichnen tiʼ le máaxoʼob ku taaskubaʼob nukuch apostoloʼob ichileʼexoʼ. 12  U jaajileʼ, teʼexeʼ tsʼoʼok a wilkeʼex jach tu jaajil juntúul apostolen; lelaʼ chíikpaj úuchik in weʼesik chúukaʼan óolal, úuchik in beetik chíikulaloʼob, milagroʼob bey xan uláakʼ baʼaloʼob ku beetik u jaʼakʼal u yóol máak. 13  Teʼexeʼ maʼ beyeʼex jeʼex u maasil múuchʼuliloʼoboʼ, tumen teneʼ maʼ chʼuylajen tiʼ teʼexiʼ. ¿Kʼaas wa túun úuchik u pʼáatal maʼ in chʼuytal tiʼ teʼex? Wa beyoʼ, beeteʼex uts a perdonartikeneʼex. 14  ¡Ileʼex! Beoraaʼ u yóoxtéen in líiʼskinba utiaʼal in bin ta wiknaleʼex, kex beyoʼ láayliʼ maʼ tin chʼuytal tiʼ teʼexeʼ. Tumen maʼ táan in taal in kaxt le baʼaxoʼob yaanteʼexoʼ, baʼaxeʼ teʼex kin taal in kaxteʼex. Tumen letiʼe taatatsiloʼob ku páaʼtaʼal ka u líiʼsoʼob taakʼin utiaʼal u paalaloʼoboʼ, maʼ le paalaloʼob utiaʼal u taataʼoboʼ. 15  Teneʼ yéetel kiʼimak óolal ken in xup ta woʼolaleʼex le baʼaxoʼob yaantenoʼ yéetel yaan xan in jach xupkinba ta woʼolaleʼex.* Wa teen in jach yaabiltmeʼexeʼ, ¿baʼaxten túun chéen junpʼíit yaabilaj ka weʼeskeʼexten? 16  Jeʼel bixakeʼ mix juntéen tin tsʼáaj a kuucheʼex. Baʼaleʼ teʼexeʼ ka waʼalikeʼexeʼ jach yaan in «naʼat utiaʼal in beet baʼax kʼaas» yéetel tsʼoʼok bin in táabskeʼex «yéetel tuusoʼob». 17  Le ka tin túuxtaj jujuntúul máakoʼob ta wiknaleʼexeʼ, ¿máasaʼ maʼ tin wóotsilkunteʼex yéetel u kʼab mix juntúul tiʼ letiʼobiʼ? 18  Teneʼ tin sen aʼalaj tiʼ Tito ka xiʼik ta wiknaleʼex, tsʼoʼoleʼ tin túuxtaj xan juntúul sukuʼun utiaʼal ka xiʼik tu yéetel. ¿Máasaʼ Titoeʼ maʼ tu yóotsilkunteʼex xaniʼ? ¿Máasaʼ máanoʼon yéetel junpʼéeliliʼ tuukul? ¿Máasaʼ junpʼéeliliʼ bej t-bisaj? 19  ¿Ka tuklikeʼex wa le baʼaxoʼob kin tsʼíibtikteʼexaʼ táan in tsʼíibtik utiaʼal k-defendertikba ta táaneʼex? Toʼoneʼ táan k-aʼalik u jaajil tu táan Dios tu kʼaabaʼ Cristo. Baʼaleʼ, in sukuʼuneʼex, tuláakal baʼax k-beetkeʼ k-beetik utiaʼal k-muʼukʼaʼankúuntik a wóoleʼex. 20  Tumen saajken wa ken kʼuchkeneʼ maʼ in wilkeʼex jeʼex in kʼáat in wileʼexoʼ, yéetel maʼ a wilkeneʼex jeʼex a kʼáateʼexoʼ. Saajken ka yanak baʼatelil, pʼekbail,* kʼuuxilil, jatslantáambail, líiʼsaj tʼaan, jóoʼsaj tsikbal, máaxoʼob nojbaʼal u taaskubaʼob, yéetel saajken xan wa maʼ tu tsoolol yanil le baʼaloʼoboʼ. 21  Maʼ xaaneʼ, ken kaʼa xiʼiken ta wiknaleʼexeʼ, in Dioseʼ yaan u kabalkúuntik in wóol, yéetel teneʼ yaan u yaatal in wóol tu yoʼolal le máaxoʼob kʼebanchajoʼob yéetel maʼ tu kʼexaj u tuukuloʼob utiaʼal ka xuʼuluk u beetkoʼob baʼaloʼob éekʼtak, ka xuʼuluk u núupkʼebantaloʼob,* yéetel ka xuʼuluk u biskoʼob junpʼéel kuxtal ich x-maʼ suʼtalil.

Tsolajiloʼob

Lit.: «tu yoʼolal a almaʼex». Ilaʼak Tipʼ. 7A.
Wa: «celos».
Gr.: pornéya. Le tʼaanaʼ ku meyaj utiaʼal u yúuchul tʼaan tiʼ le jejeláas núupchitaloʼob ku bin tu contra u ley Diosoʼ. Ilaʼak Tipʼ. 4.