1 Timoteo 6:1-21

6  Le máaxoʼob táan u meyajoʼob bey palitsiloʼobeʼ, maʼ u xuʼulul u yeʼeskoʼob nojoch tsiikil tiʼ u tsʼuuliloʼob, utiaʼal maʼ u tʼaan mix máak tu contra u kʼaabaʼ Dios mix tu contra le baʼaxoʼob ku kaʼansikoʼ.  Tsʼoʼoleʼ le máaxoʼob yaan u tsʼuuliloʼob ku creertikoʼob Cristooʼ, maʼ unaj u xuʼulul u yeʼeskoʼob tsiikil tiʼob chéen tumen sukuʼunoʼobiʼ. Baʼaxeʼ maas unaj u tsʼáaik u yóoloʼob meyaj, tumen u yojloʼobeʼ le máaxoʼob kʼamik u yutsil le maʼalob meyaj ku beetkoʼoboʼ u yéet sukuʼuniloʼob yéetel u yaabiltmoʼob. Seguernak a kaʼansik yéetel a sen aʼalik ka beetaʼak le baʼaloʼobaʼ.  Wa yaan máax táan u kaʼansik yaanal baʼax, yéetel lelaʼ ku bin tu contra le maʼalob kaʼansaj ku taal tiʼ k-Yuumtsil Jesucristo bey xan tu contra le kaʼansaj ku yaʼalik kʼaʼabéet u tsʼáaik u yóol máak u meyajt Diosoʼ,  chéen táan u nojbaʼalkúuntkuba yéetel maʼ tu naʼatik mix baʼal. Chéen chʼiikil u tuukul tiʼ baʼateltʼaanoʼob yéetel tiʼ sakachtʼaanoʼob tu yoʼolal jeʼel baʼaxak tʼaaniloʼobeʼ. Le baʼaloʼobaʼ ku beetik u pʼektik máak u yéet máakil, u kʼaakʼastʼaan máak, u tuklaʼal baʼal kʼaas yéetel baʼal maʼ jaaj tu yoʼolal wa máaxiʼ,  u baʼateltʼaan máak mantatsʼ yoʼolal baʼaloʼob maʼ kʼaʼanaʼantakoʼobiʼ; lelaʼ ku taal tiʼ máakoʼob kʼaschajaʼan u tuukuloʼob minaʼan u jaajil tiʼob, ku tuklikoʼobeʼ u jach kʼubik u yóol máak u meyajt Dioseʼ ku taasik yaʼab náajalil.  U jaajileʼ wa k-kʼubik k-óol k-meyajt Dioseʼ, yaʼab utsil jeʼel u taasiktoʼoneʼ, baʼaleʼ chéen wa kiʼimak k-óol yéetel le baʼaxoʼob yaantoʼonoʼ.  Tumen mix baʼal t-taasaj way yóokʼol kaabeʼ yéetel mix baʼal xan jeʼel u páajtal k-biskeʼ.  Le oʼolaleʼ wa yaan baʼal k-jaante, yaan k-nookʼ bey xan tuʼux k-antaleʼ, yaan u kiʼimaktal k-óol yéetel le baʼaloʼobaʼ.  Baʼaleʼ le máaxoʼob u chʼaʼtukultmaj u ayikʼaltaloʼoboʼ, ku túuntaʼal u yóoloʼob yéetel ku lúubloʼob tiʼ junpʼéel léech bey xan tiʼ kʼaakʼas tsʼíibolaloʼob chéen kuneloʼob ku biskoʼob máak tiʼ kʼaskúunajil yéetel xuʼulsajil. 10  Tumen u yaabiltaʼal le taakʼinoʼ u moots tuláakal u jejeláasil baʼaloʼob kʼaastak; yaan máakoʼobeʼ tumen ku sen tsʼíiboltkoʼob u yantaltiʼob taakʼineʼ, tsʼoʼok u náachkuntaʼaloʼob tiʼ le fejoʼ yéetel tsʼoʼok u chupik u kuxtaloʼob yéetel yaayaj óolal. 11  Baʼaleʼ teech táan a meyajtik Dioseʼ, púutsʼen tiʼ le baʼaloʼobaʼ. Xeen tu paach le justiciaoʼ, ilawil a tsʼáaik a wóol a meyajt Dios, xeen tu paach le fejoʼ, le yaabilajoʼ, le chúukaʼan óolaloʼ yéetel ilawil maʼ a séeb kʼuuxil. 12  Baʼateʼelnen tu yoʼolal le fejoʼ, chich machaba tiʼ le kuxtal minaʼan u xuuloʼ, le baʼax oʼolal tʼaʼanechoʼ yéetel le baʼax ta jaajkúuntaj tu táan yaʼab máakoʼoboʼ. 13  Tu táan Dios le máax ku tsʼáaik kuxtal tiʼ tuláakal baʼal, bey xan tu táan Cristo Jesús le máax tʼaanaj maʼalob bey juntúul j-jaajkunaj tu táan Poncio Pilatoeʼ, kin waʼaliktech 14  ka a tsʼoʼokbes le baʼax tsʼoʼok u yaʼalaʼaltechoʼ; ken a beeteʼ ilawil maʼ u yantal a siʼipil yéetel maʼ u yantal baʼax oʼolal a kʼeʼeyel tak le kʼiin ken chíikpajak k-Yuumtsil Jesucristooʼ. 15  Le ken kʼuchuk u kʼiinileʼ, yaan u chíikbeskuba Jesucristo, le Máax kiʼimak u yóoloʼ, le juntúuliliʼ Máax yaan páajtalil tiʼoʼ, u Rey le máaxoʼob ku reinaroʼoboʼ, u Yuumtsil le jalaʼachoʼob ku gobernaroʼoboʼ, 16  le juntúuliliʼ máak maʼ tu páajtal u kíimil yéetel kajaʼan tiʼ junpʼéel kúuchil jach táaj sáasil tuʼux mix máak jeʼel u páajtal u náatsʼleʼ; letiʼeʼ mix máak ilmil yéetel maʼ tu páajtal u yilaʼal. Tiʼ letiʼ túun ka tsʼaʼabak tsiikil yéetel tiʼ letiʼ ka yanak páajtalil utiaʼal mantatsʼ. Amén. 17  Tiʼ le máaxoʼob ayikʼaloʼob teʼ yóokʼol kaabaʼ* aʼaltiʼob maʼ unaj u kaʼantal u yichoʼobiʼ yéetel maʼ unaj u kʼubik u yóoloʼob tiʼ le ayikʼaliloʼob ku xuʼululoʼoboʼ, baʼaxeʼ tiʼ Dios le máax tsʼáaiktoʼon tu chúukaʼanil tuláakal le baʼaxoʼob taasiktoʼon kiʼimak óolaloʼ. 18  Aʼaltiʼob ka u beetoʼob baʼax uts, ka yaʼabchajak le baʼaloʼob maʼalobtak ku beetkoʼoboʼ, mantatsʼ ka u síiʼob baʼaloʼob tiʼ u maasil yéetel ka u beetoʼob jeʼex u síijil tu puksiʼikʼaloʼobeʼ, 19  utiaʼal beyoʼ ka yanaktiʼob le ayikʼalil ku suut bey junpʼéel maʼalob chuunpakʼ utiaʼal le kʼiinoʼob kun taaloʼoboʼ, utiaʼal xan ka páajchajak u chich machkubaʼob tiʼ le kuxtal jach tu jaajil kuxtaloʼ. 20  Timoteo, in paal, kanáant le baʼax tsʼoʼok u kʼubéentaʼaltechoʼ; utiaʼal a beetik lelaʼ náachkuntaba tiʼ le tʼaanoʼob chéen kuneltak yéetel ku binoʼob tu contra le baʼaloʼob kiliʼichtakoʼoboʼ, bey xan tiʼ le baʼaxoʼob ku yaʼalaʼal jach jaaj «kʼaj óolaloʼ» baʼaleʼ ku bin tu contra le baʼax jaajoʼ. 21  Yaan máakoʼobeʼ ikil u yaʼalikoʼob yaantiʼob le kʼaj óolalil jeʼeloʼ, tsʼoʼok u náachtaloʼob tiʼ le fejoʼ. U nojoch utsil Dios ka yanak ta wéeteleʼex.

Tsolajiloʼob

Ilaʼak Tipʼ. 16.