1 Timoteo 5:1-25

5  Maʼ a kʼeyik juntúul máak tsʼoʼok u yantal u jaʼabil, baʼaxeʼ tʼan jeʼex a tʼanik a taataeʼ. Le táankelmoʼoboʼ tʼanoʼob jeʼex a tʼanik a sukuʼunoʼobeʼ;  le koʼoleloʼob maas yaan u jaʼabiloʼoboʼ tʼanoʼob jeʼex a tʼanik a maamaeʼ; le koʼoleloʼob maas x-lóoʼbayanoʼoboʼ tʼanoʼob yéetel utsul puksiʼikʼal jeʼex a tʼanik a kiikoʼobeʼ.  Kanáant le viudaʼob jach tu jaajil minaʼan máax áantkoʼoboʼ.  Baʼaleʼ wa juntúul viuda yaan u paalaloʼob wa u yáabiloʼobeʼ, leloʼobaʼ táanil tu yotochoʼob unaj u kanik u yeʼesoʼob jach u kʼubmaj u yóoloʼob u meyajtoʼob Dios, yéetel unaj u boʼotkoʼob tiʼ u taataʼob bey xan tiʼ u abueloʼob le baʼax u pʼaxmoʼobtiʼoboʼ, tumen lelaʼ kʼambeʼen tu táan Dios.  Baʼaleʼ le viuda minaʼan máax áantik yéetel mix baʼal yaantiʼoʼ, ku kʼubik u yóol tiʼ Dios, tsʼoʼoleʼ bul kʼiin yéetel bul áakʼab táan u kʼáat óolal yéetel táan u orar.  Baʼaleʼ le viuda chʼiikil u béeykunt u tsʼíibolal u bakʼeleʼ, kex kuxaʼaneʼ kimen tu táan Dios.  Le oʼolaleʼ seguernak a waʼaliktiʼob ka u beetoʼob le baʼaxoʼob tsʼoʼok in waʼalikaʼ, utiaʼal maʼ u yantal baʼax oʼolal u kʼeʼeyloʼob.  U jaajileʼ wa yaan máax maʼ tu tsʼáaik baʼax kʼaʼabéet tiʼ u láakʼtsiloʼobeʼ, maases tiʼ le yanoʼob tu yotochoʼ, tsʼoʼok u mixbaʼalkúuntik le fejoʼ yéetel maas kʼaas yanil ke juntúul máak minaʼan u fe.  Juntúul viudaeʼ jeʼel u páajtal u tsʼíibtaʼal u kʼaabaʼ utiaʼal ka áantaʼakeʼ, baʼaleʼ chéen wa tsʼoʼok maas tiʼ sesenta jaʼaboʼob tiʼ, yéetel wa chéen juntúul u yíicham yanji, 10  bey xan wa ku yúuchul maʼalob tʼaan tiʼ letiʼ tu yoʼolal le baʼaloʼob maʼalobtak tu beetaʼ: úuchik u líiʼsik tubeel u paalal, úuchik u utsul kʼamik u yuʼulaboʼob, úuchik u pʼoʼik u yook le máaxoʼob kiliʼichoʼoboʼ, úuchik u yáantik le máaxoʼob yaachajaʼan u yóoloʼoboʼ, bey xan úuchik u jach tsʼáaik u yóol u beet tuláakal baʼax maʼalob. 11  Baʼaleʼ le viudaʼob x-lóoʼbayanoʼoboʼ maʼ a tsʼíibtik u kʼaabaʼob utiaʼal ka áantaʼakoʼob, tumen ken u sen tsʼíiboltoʼob u núupchitaloʼobeʼ ku taaktal u tsʼoʼokol u beeloʼob, bey túunoʼ ku pʼatkoʼob Cristo. 12  Letiʼobeʼ ku náajmatkoʼob ka juzgartaʼakoʼob, tumen tsʼoʼok u pʼatkoʼob le baʼax u yáax aʼalmaj u beetkoʼoboʼ.* 13  Letiʼob xaneʼ ku kankoʼob maʼakʼóolil ikil u chéen máanoʼob xíinximbal. Tsʼoʼoleʼ maʼ chéen ku kankoʼob maʼakʼóoliliʼ, baʼaxeʼ ku kankoʼob xan x-mukul tʼaan tiʼ u maasil, ku yoksikubaʼob ichil u kuxtal yaanal máak yéetel ku tsikbaltikoʼob baʼaloʼob maʼ unajiʼ. 14  Le oʼolal in kʼáat ka tsʼoʼokok u beel le viudaʼob x-lóoʼbayanoʼoboʼ, ka yanak u paalaloʼob, ka u kanáant u yotochoʼob, yéetel maʼ u tsʼáaikoʼob tuʼux u tʼaan kʼaas le máax pʼekmiloʼonoʼ. 15  U jaajileʼ jujuntúul tiʼ letiʼobeʼ tsʼoʼok u pʼatkoʼob le maʼalob bejoʼ yéetel tsʼoʼok tak u tsaypachtikoʼob Satanás. 16  Wa juntúul koʼolel ku meyajtik Dios yaan u láakʼtsiloʼob viudaʼobeʼ, unaj u yáantkoʼob utiaʼal maʼ u sen aaltal u kuuch le múuchʼuliloʼ. Bey túunoʼ le múuchʼuliloʼ jeʼel u páajtal u yáantik le viudaʼob jach tu jaajil kʼaʼabéet áantaj tiʼoboʼ. 17  Le ancianoʼob maʼalob u meyajoʼob teʼ múuchʼuliloʼ, ilaʼakoʼob bey máaxoʼob ku náajmatkoʼob ka tsʼaʼabak kaʼamáal tsiikil tiʼobeʼ, maases le jach ku tsʼáaik u yóoloʼob u tsikbaltoʼob yéetel u kaʼansoʼob u tʼaan Diosoʼ. 18  Tumen le Kiliʼich Tsʼíiboʼ ku yaʼalik: «Maʼ unaj a jokʼik u niʼ le wakax le táan u tsʼatsʼaʼchaʼatik* le trigooʼ»; ku yaʼalik xan: «Juntúul máax ku meyajeʼ ku náajmatik u boʼotaʼal». 19  Maʼ a creertik le baʼax ku yaʼalaʼal tu contra juntúul ancianooʼ, chéen jaʼaliʼ wa yaan kaʼatúul wa óoxtúul máakoʼob jaajkúuntikeʼ. 20  Tu táan tuláakal le máaxoʼob yanoʼoboʼ, aʼal u nuʼuk tiʼ le máaxoʼob táan u kʼebantaloʼoboʼ, beyoʼ u maasileʼ yaan xan u kanáantkoʼob maʼ u kʼebantaloʼob. 21  Kin kʼubéentiktech tu táan Dios, tu táan Cristo yéetel tu táan le angeloʼob yéeyaʼanoʼoboʼ ka a tsʼoʼokbes le baʼaxoʼob kin waʼaliktechaʼ; kanáant maʼ a beetik wa baʼax tu yoʼolal juntúul máak chéen yoʼolal bix u yilaʼal, yéetel ilawil a tratartik tuláakal jeʼex unajeʼ. 22  Mix juntéen unaj a séeb tsʼáaik a kʼab tu yóokʼol wa máax;* mix a táakpajal ichil u kʼeban yaanal máak; kanáant maʼ u yéekʼtal a kuxtal. 23  Maʼ a wukʼik chéen jaʼ, baʼaxeʼ ukʼ junpʼíit vino tu yoʼolal a nakʼ bey xan tu yoʼolal maʼ u seguer a sen kʼojaʼantal. 24  U kʼeban jujuntúul máakoʼobeʼ chíikaʼan u yilaʼal tumen tuláakal máak, yéetel lelaʼ juntaatsʼ u beetik u juzgartaʼaloʼob. Baʼaleʼ u kʼeban uláakʼ máakoʼobeʼ, ku chíikpajal tak ken máanak kʼiin. 25  Bey túun xanoʼ, le baʼaloʼob maʼalobtak ku beetaʼaloʼ ku yojéeltaʼal tumen tuláakal máak; le baʼaloʼob xan kʼaastak ku beetaʼaloʼ maʼ tu páajtal u taʼakaʼaloʼob mantatsʼ.

Tsolajiloʼob

Lit.: «le yáax fejoʼ».
Lelaʼ letiʼe baʼax ku beetaʼal tiʼ le trigo wa uláakʼ neekʼ utiaʼal u luʼsaʼal u sojliloʼ; yaan kʼiin xaneʼ utiaʼal u beetaʼal lelaʼ ku meyaj nuʼukuloʼob jíiltaʼan tumen baʼalcheʼob.
Lelaʼ u kʼáat u yaʼaleʼ maʼ u séeb yéeyik mix máak.