1 Pedro 5:1-14

5  Le oʼolaleʼ, in wéet ancianoileʼex, tumen tin wilaj le muʼyajiloʼob tu máansaj Cristo, bey xan tumen yaan in táakpajal tiʼ le nojbeʼenil kun tsʼaabiloʼ, kin kʼubéentik tiʼ le máaxoʼob ancianoʼob ichileʼexoʼ:  Kanáanteʼex le u tamanoʼob Dios u kʼubéentmajteʼexoʼ, baʼaleʼ maʼ a beetkeʼex bey táan a obligartaʼaleʼexeʼ, baʼaxeʼ yéetel kiʼimak óolal; maʼ a beetkeʼex xan tumen a kʼáat a náajalteʼex taakʼin chéen beyoʼ, baʼaxeʼ tsʼáa a wóoleʼex meyaj;  mix xan a beetkeʼex utiaʼal a nojbaʼalkúuntkabaʼex tu yóokʼol le máaxoʼob u tiaʼaloʼob Diosoʼ, baʼaxeʼ eʼeseʼex maʼalob bej tiʼ le tamanoʼoboʼ.  Le ken chíikbesaʼak túun le maas nojoch j-kanan tamanoʼ, teʼexeʼ yaan a kʼamkeʼex le u coronail nojbeʼenil maʼatech u kʼastaloʼ.  Teʼex xaneʼ, táankelem máakeʼex, tsʼáabaʼex yáanal u páajtalil le máaxoʼob maas yaan u jaʼabiloʼoboʼ. Chéen baʼaleʼ, búukbesabaʼex tuláakleʼex yéetel kabal óolal ta baatsileʼex, tumen Dioseʼ tiʼ yaan tu contra le máaxoʼob kaʼanal u yichoʼoboʼ, baʼaleʼ ku yeʼesik u nojoch utsil tiʼ le máaxoʼob kabal u yóoloʼoboʼ.  Le oʼolaleʼ tsʼáabaʼex yáanal u páajtalil u kʼab Dios, utiaʼal ka u nojbaʼalkúunteʼex ken kʼuchuk u kʼiinil;  le táan a beetkeʼex lelaʼ pʼateʼex tu kʼab tuláakal le kuuch chiʼichnakkúuntikeʼexoʼ, tumen letiʼeʼ jach u tsʼaamaj u yóol u yáanteʼex.  Ilawileʼex maʼ u náayal a wóoleʼex yéetel pʼil a wicheʼex. A enemigoʼex le Kʼaasilbaʼaloʼ,* táan u máan ta baʼpacheʼex bey jeʼex juntúul león ku yáakam táan u kaxtik máax u lukʼeʼ.  Baʼaleʼ tsʼáabaʼex tu contra, yéetel muʼukʼaʼanchajak a fejeʼex, tumen a wojleʼexeʼ le baʼax ka muʼyajtikeʼexoʼ láayliʼ letiʼe baʼax ku muʼyajtik tuláakal k-sukuʼunoʼob yanoʼob yóokʼol kaaboʼ. 10  Baʼaleʼ le ken tsʼoʼokok a muʼyajeʼex ichil junpʼíit kʼiineʼ, le Dios ku yeʼesik nojoch utsiloʼ, le máax tʼanoʼon tu yoʼolal Cristo utiaʼal ka yanaktoʼon junpʼéel nojbeʼenil minaʼan u xuuloʼ, letiʼ kun beetik a noʼojaʼantaleʼex tu chúukaʼanil; letiʼ kun beetik u muʼukʼaʼantal a wóoleʼex, letiʼ kun tsʼáaik a muukʼeʼex. 11  Tiʼ letiʼ ka yanak tuláakal páajtalil utiaʼal mantatsʼ. Amén. 12  Tu yoʼolal Silvano,* máax in yaabiltmaj jeʼex juntúul sukuʼun chúukaʼan u yóoleʼ, tsʼoʼok u páajtal in tsʼíibtik tiʼ teʼex le junpʼíit tʼaanoʼobaʼ, utiaʼal in líiʼsik a wóoleʼex bey xan utiaʼal in waʼalikteʼexeʼ, le baʼax tsʼoʼok a kʼamkeʼexoʼ jach tu jaajil letiʼ le u nojoch utsil Diosoʼ. Chʼuyabaʼex tiʼ le nojoch utsilaʼ. 13  Le koʼolel* yaan Babilonia, yéeyaʼan jeʼex teʼexoʼ, ku túuxtikteʼex saludos, bey xan in hijo Marcos. 14  Saludartabaʼex ta baatsileʼex yéetel junpʼéel tsʼuʼutsʼ utiaʼal a weʼeskeʼex a yaabiltmabaʼex. Ka yanak jeetsʼelil tiʼ tuláakleʼex, teʼex máaxeʼex yaneʼex junmúuchʼ yéetel Cristo.

Tsolajiloʼob

Lit.: «Diablo», u kʼáat u yaʼaleʼ j-líiʼsaj tʼaan.
Wa: «Silas».
Teʼelaʼ ich griegoeʼ tsʼaʼan junpʼéel pronombre utiaʼal x-chʼuup; lelaʼ meyajnaj utiaʼal u keʼetel u múuchʼulil Babilonia yéetel juntúul koʼolel.