1 Juan 4:1-21

4  In yaabilaj sukuʼuneʼex, jeʼel baʼalak kʼuben tʼaanil ku yaʼalaʼal tiʼ Dios u taaleʼ, maʼ a creertikeʼex, baʼaxeʼ ilawileʼex wa jach tu jaajil tiʼ Dios u taal le kʼuben tʼaanoʼoboʼ, tumen yaʼab maʼ jaajil profetaʼob tsʼoʼok u chíikpajloʼob teʼ yóokʼol kaabaʼ.  Lelaʼ letiʼe bix jeʼel a wojéeltikeʼex wa tiʼ Dios u taal junpʼéel kʼuben tʼaanoʼ: Jeʼel baʼalak kʼuben tʼaanil ku yaʼalik de ke Jesucristo taal bey wíinikeʼ, tiʼ Dios u taal.  Baʼaleʼ jeʼel baʼalak kʼuben tʼaanil maʼ tu kʼamik Jesuseʼ, maʼ tiʼ Dios u taaliʼ. U jaajileʼ leloʼ letiʼe kʼuben tʼaan aʼalaʼabteʼex kun taasbil tumen le anticristooʼ,* yéetel beoraaʼ tiʼ yaan teʼ yóokʼol kaabaʼ.  In mejen paalaleʼex, teʼexeʼ tiʼ Dios a taaleʼex yéetel tsʼoʼok a tsʼáanchaʼatikeʼex le máakoʼobaʼ, tumen le máax yaan ta wéeteleʼexoʼ maas nojoch tiʼ le máax yaan yéetel le yóokʼol kaaboʼ.  Letiʼobeʼ tiʼ le yóokʼol kaab u taaloʼoboʼ; le oʼolal ku tʼaanoʼob tiʼ le baʼaloʼob yaan teʼ yóokʼol kaaboʼ yéetel ku yuʼubaʼal u tʼaanoʼob tumen le yóokʼol kaaboʼ.  Toʼoneʼ tiʼ Dios k-taal. Le máax ku kʼuchul u kʼaj óolt Dioseʼ ku yuʼubik baʼax k-aʼalik. Le máax maʼ tiʼ Dios u taaleʼ maʼ tu yuʼubik baʼax k-aʼalik. Tu yoʼolal leloʼ ku páajtal k-kʼaj óoltik máakalmáak u kʼuben tʼaanil le jaajoʼ yéetel máakalmáak u kʼuben tʼaanil le tuusoʼ.  In yaabilaj sukuʼuneʼex, maʼ u xuʼulul k-paklan yaabiltikbaʼex t-baatsil, tumen le yaabilajoʼ utiaʼal Dios. Tuláakal máax ku yeʼesik yaabilajeʼ, tiʼ Dios síiji yéetel u kʼaj óol Dios.  Jeʼel máaxak minaʼan u yaabilajeʼ maʼ kʼuchuk u kʼaj óolt Diosiʼ, tumen Dioseʼ yaabilaj.  Tu yoʼolal lelaʼ eʼesaʼabtoʼon u yaabilaj Dios, tumen Dioseʼ tu túuxtaj u juntúuliliʼ Paal teʼ yóokʼol kaabaʼ, utiaʼal beyoʼ ka yanaktoʼon kuxtal tu yoʼolal letiʼ. 10  Lelaʼ letiʼe baʼax u kʼáat u yaʼal le yaabilajoʼ, maʼ tumen wa toʼon yaabilt Diosiʼ, baʼaxeʼ letiʼ yaabiltoʼon úuchik u túuxtik u Paal kíimil t-oʼolal utiaʼal u tsʼáaik tuʼux u perdonartaʼal k-kʼebanoʼob. 11  In yaabilaj sukuʼuneʼex, wa bey úuchik u yaabiltikoʼon Diosoʼ, toʼon túuneʼ ku páaʼtaʼal ka k-paklan yaabiltbaʼex t-baatsil. 12  Mix juntéen ilaʼak Dios tumen mix máak. Wa maʼ tu xuʼulul k-paklan yaabiltikbaʼexeʼ, Dioseʼ yaan u pʼáatal junmúuchʼ t-éetel, yéetel u yaabilajeʼ yaan u yutsil chúukaʼanchajal tiʼ toʼon. 13  K-ojel láayliʼ junmúuchʼ yaniloʼon tu yéeteleʼ, letiʼ xaneʼ junmúuchʼ yanil t-éetel, tumen u tsʼaamajtoʼon u kiliʼich muukʼ. 14  Toʼon xaneʼ tsʼoʼok k-ilik yéetel táan k-jaajkúuntikeʼ le Taataoʼ tsʼoʼok u túuxtik u Paal utiaʼal u salvartik le yóokʼol kaaboʼ. 15  Jeʼel máaxak ku kʼamik Jesucristo bey u Paal Dioseʼ, Dioseʼ ku pʼáatal junmúuchʼ tu yéetel, letiʼ xaneʼ ku pʼáatal junmúuchʼ yéetel Dios. 16  Toʼoneʼ tsʼoʼok k-ilik bix le yaabilaj ku yuʼubik Dios t-oʼolaloʼ yéetel tsʼoʼok k-creertik. Dioseʼ yaabilaj; le máax ku pʼáatal tiʼ le yaabilajoʼ ku pʼáatal junmúuchʼ yéetel Dios, Dios xaneʼ ku pʼáatal junmúuchʼ yéetel le máakaʼ. 17  Bey úuchik u yutsil chúukaʼankúuntaʼal le yaabilaj tiʼ toʼonoʼ, utiaʼal beyoʼ ka tʼaanakoʼon yéetel u jaajil k-óol tu kʼiinil le juiciooʼ, tumen teʼ yóokʼol kaabaʼ beyoʼon jeʼex Jesucristoeʼ. 18  Ichil le yaabilajoʼ minaʼan saajkilil, baʼaxeʼ le yaabilaj chúukaʼankúuntaʼanoʼ ku luʼsik le saajkiloʼ, tumen le saajkiloʼ ku kʼatik k-beel. U jaajileʼ, le máax ku chʼaʼik saajkileʼ maʼ utsil chúukaʼankúuntaʼak u yaabilajiʼ. 19  Toʼoneʼ k-eʼesik yaabilaj tumen Dios yáax yaabiltoʼon. 20  Wa yaan máax ku yaʼalik: «Teneʼ in yaabiltmaj Dios», baʼaleʼ táan u pʼektik u sukuʼuneʼ, chéen táan u tuus. Tumen le máax maʼ tu yaabiltik u sukuʼun kex táan u yilkeʼ, maʼ tu páajtal u yaabiltik Dios máax maʼ u yiliʼ. 21  Lelaʼ láayliʼ letiʼe baʼax u kʼubéentmajtoʼon ka k-beetaʼ: Le máax u yaabiltmaj Dioseʼ kʼaʼabéet u yaabiltik xan u sukuʼun.

Tsolajiloʼob

Wa: «le máax yaan tu contra Cristooʼ».