1 Juan 1:1-10

1  Le baʼax yaan desde tu káajbaloʼ, le baʼax tsʼoʼok k-uʼuyikoʼ, le baʼax tsʼoʼok k-ilik yéetel k-ichoʼ, le baʼax tsʼoʼok k-paktikoʼ, le baʼax tsʼoʼok k-machik yéetel k-kʼaboʼ, lelaʼ letiʼ le u tʼaanil le kuxtaloʼ  (beyoʼ, tsʼoʼok u chíikbesaʼal le kuxtaloʼ, tsʼoʼok k-ilik, táan k-jaajkúuntik yéetel táan k-tsikbaltikteʼex le kuxtal minaʼan u xuul ku taal tiʼ le Taata yéetel tsʼoʼok u chíikbesaʼaltoʼonoʼ),  le baʼax tsʼoʼok k-ilik yéetel tsʼoʼok k-uʼuyikoʼ, letiʼe baʼax xan táan k-tsʼáaik a wojéelteʼexoʼ, utiaʼal beyoʼ ka táakpajkeʼex t-éetel ikil k-bisikba yéetel le Taataoʼ bey xan yéetel Jesucristo u Paal.  Bey túunoʼ, táan k-tsʼíibtikteʼex le baʼaloʼobaʼ utiaʼal ka chúukpajak le kiʼimak óolal yaantoʼoneʼexoʼ.  Lelaʼ letiʼe tʼaan t-uʼuyaj u yaʼalik Cristo yéetel táan k-tsʼáaik a wojéelteʼexaʼ: Dioseʼ sáasil, yéetel minaʼan mix junpʼíit éeʼjochʼeʼenil tu yiknal.  Wa k-aʼalik: «Táan k-bisikba tu yéetel», baʼaleʼ láayliʼ táan k-máan ich éeʼjochʼeʼenileʼ, chéen táan k-tuus yéetel maʼ táan k-tsʼoʼokbesik le jaajoʼ.  Chéen baʼaleʼ, wa táan k-máan ich sáasil jeʼex Dios kuxaʼan ich sáasileʼ, u kʼáat u yaʼaleʼ jach tu jaajil táan k-múul bisikbaʼex; tsʼoʼoleʼ u kʼiʼikʼel Jesús, le u Paaloʼ, táan u pʼoʼik tuláakal k-kʼeban.  Wa k-aʼalik: «Minaʼan k-kʼeban», chéen t-juunal k-tusikba yéetel minaʼantoʼon u jaajil.  Wa k-confesartik k-kʼebanoʼobeʼ, Dioseʼ jeʼel u perdonartikoʼoneʼ yéetel jeʼel u pʼoʼik tuláakal k-kʼasaʼanileʼ, tumen letiʼeʼ chúukaʼan u yóol yéetel toj baʼax ku beetik. 10  Wa k-aʼalik: «Maʼ kʼebanchajaʼanoʼoniʼ», táan k-taasik Dios bey juntúul máax ku tuuseʼ, yéetel minaʼan u tʼaan ichil k-puksiʼikʼal.

Tsolajiloʼob