1 Corintios 8:1-13

8  Bey túunoʼ, tuláakloʼoneʼ yaantoʼon kʼaj óolalil tiʼ baʼaloʼob yaan yil yéetel le janaloʼob kʼubaʼanoʼob tiʼ beetbil diosoʼoboʼ. Le kʼaj óolaliloʼ ku beetik u nojbaʼalkúuntkuba máak, baʼaleʼ le yaabilajoʼ ku muʼukʼaʼankúuntik u fe máak.  Kex wa yaan máax ku tuklik u kʼaj óol wa baʼaxeʼ, u jaajileʼ maʼ kʼuchuk u kʼaj óolt tubeel jach jeʼex unaj u kʼaj óoltikoʼ.  Baʼaleʼ wa yaan máax u yaabiltmaj Dioseʼ, Dioseʼ u kʼaj óol xan le máakaʼ.  Beora túunaʼ tiʼ baʼax yaan yil yéetel u jaantaʼal baʼaloʼob kʼubaʼanoʼob tiʼ beetbil diosoʼobeʼ, toʼoneʼ k-ojleʼ juntúul beetbil dioseʼ mix baʼal u biilal teʼ yóokʼol kaabaʼ, tsʼoʼoleʼ k-ojel xaneʼ chéen juntúuliliʼ Dios yaan.  Tumen kex yaan le ku yaʼalaʼaltiʼob «diosoʼob» teʼ kaʼan wa teʼ Luʼumaʼ, yéetel kex yaʼab «diosoʼob» yéetel yaʼab «yuumtsiloʼob» yaneʼ,  u jaajileʼ k-tiaʼal toʼoneʼ chéen juntúuliliʼ Dios yaan, le Taataoʼ, tiʼ máax ku taal tuláakal baʼal, yéetel tu yoʼolal máax kuxaʼanoʼon. Chéen xan juntúuliliʼ Yuumtsil yaan, lelaʼ Jesucristo le máax oʼolal beetaʼab tuláakal baʼaloʼ, yéetel tu yoʼolal xan letiʼeʼ yanoʼon.  Chéen baʼaleʼ, maʼ tiʼ tuláakal máak yaan le kʼaj óolalil jeʼelaʼ; baʼaxeʼ jujuntúuloʼobeʼ, tu yoʼolal le baʼaloʼob suukaʼan kaʼach u beetkoʼoboʼ, baʼaloʼob yaan yil yéetel u adorartaʼal le beetbil diosoʼoboʼ, ken u jaantoʼob wa baʼaxeʼ ku yilkoʼob bey kʼubaʼan tiʼ le beetbil diosoʼoboʼ; u concienciaʼob túuneʼ, tumen maʼ muʼukʼaʼaneʼ, ku yéekʼtal.  Baʼaleʼ le janaloʼ maʼ tu maas natsʼkoʼon tiʼ Dios; wa maʼ k-jaanleʼ mix baʼal ku bineltiktoʼon, yéetel wa k-jaanleʼ mix baʼal xan k-náajaltik.  Chéen baʼaleʼ, tu yoʼolal bix u meyajteʼex le derecho yaanteʼex utiaʼal a chʼaʼtuklik a beetkeʼex wa baʼaxoʼ, seguernak a kanáantkeʼex maʼ a beetkeʼex u tʼóochpajal le máaxoʼob maʼ muʼukʼaʼan yaniloʼoboʼ. 10  Tumen wa ka ilaʼakech tumen wa máax, teech máax yaantech kʼaj óolalil kulukbalech janal teʼ templo tuʼux ku adorartaʼal beetbil diosoʼoboʼ, ¿maʼ wa le máax maʼ muʼukʼaʼan yaniloʼ jeʼel u túulchʼintaʼal tumen u conciencia ka tak u jaant baʼaloʼob kʼubaʼan tiʼ beetbil diosoʼobeʼ? 11  U jaajileʼ, yoʼolal le kʼaj óolalil yaantechoʼ, le máak maʼ muʼukʼaʼan yaniloʼ ku kʼastal u fe, le a sukuʼun tu yoʼolal máax kíim Cristooʼ. 12  Bey túunoʼ, ken kʼebanchajkeʼex tu contra a sukuʼuneʼexoʼoboʼ, yéetel le ken a túulchʼinteʼexoʼob u beetoʼob baʼaloʼob ku binoʼob tu contra u concienciaʼob maʼ muʼukʼaʼanoʼ, teʼexeʼ táan a kʼebantaleʼex tu contra Cristo. 13  Le oʼolaleʼ wa le baʼax kin jaantik ku beetik u tʼóochpajal in sukuʼuneʼ, junpuliʼ maʼ ken in kaʼa jaant bakʼ, utiaʼal maʼ in beetik u tʼóochpajal in sukuʼun.

Tsolajiloʼob