1 Corintios 6:1-20

6  Jeʼel máaxak ichileʼex ka yanak junpʼéel baʼateʼel tiʼ tu contra uláakʼ sukuʼuneʼ, ¿ku táabal wa bin teʼ tu kúuchil juzgar tu táan kʼasaʼan máakoʼob, baʼaleʼ maʼ tu bin tu táan le j-kiliʼichoʼoboʼ?  ¿Maʼ wa a wojleʼexeʼ le j-kiliʼichoʼoboʼ yaan u juzgartikoʼob le yóokʼol kaaboʼ? Wa yaan a juzgartikeʼex le yóokʼol kaaboʼ, ¿maʼ wa túun tu páajtal a juzgartikeʼex le baʼaloʼob mejentak ku yantal ichileʼexoʼ?  ¿Maʼ wa a wojleʼex yaan k-juzgartik angeloʼobiʼ? Jeʼeloʼ, ¿baʼaxten túun maʼ táan k-juzgartik u baʼalubaʼob le kuxtalaʼ?  Le oʼolaleʼ, wa kʼaʼabéet u juzgartaʼal jujunpʼéel baʼaloʼob yaan yil yéetel le kuxtalaʼ, ¿ka bineʼex wa túun tu táan le máaxoʼob ka tsʼáaikeʼex bey juezoʼob kex maʼ maʼalob yaniloʼob tu táan le múuchʼuliloʼ?  Táan in tʼaan utiaʼal in suʼlakkúuntkeʼex. ¿Minaʼan wa ichileʼex juntúul máak yaan u naʼat utiaʼal ka páajchajak u beetik u juezil ichil a sukuʼuneʼex?  ¡Baʼax ku yúuchleʼ juntúul sukuʼuneʼ ku bisik u sukuʼun tu táan le juezoʼoboʼ, kex le juezoʼoboʼ maʼatech u creertikoʼob Dios!  U jaajileʼ tsʼoʼok a tsʼáanchaʼataʼaleʼex le ken baʼatelnakeʼex ta baatsileʼex tu táan le juezoʼoboʼ. ¿Baʼaxten túun maʼ táan u chúukpajal a wóoleʼex a muʼyajteʼex le baʼaloʼob kʼaastak ku beetaʼalteʼexoʼ? ¿Baʼaxten maʼ táan u chúukpajal a wóoleʼex muʼyaj le ken luʼsaʼakteʼex le baʼaxoʼob yaanteʼexoʼ?  Tu lugar a beetkeʼex lelaʼ, ka beetkeʼex baʼaloʼob kʼaastak tiʼ a sukuʼuneʼex yéetel ka tuskeʼexoʼob.  ¿Maʼ wa a wojleʼexeʼ le máaxoʼob ku beetkoʼob baʼaloʼob kʼaastakoʼ maʼ ken u tiaʼalintoʼob u Reino Dios? Maʼ a tuskabaʼex. Tumen le máaxoʼob ku núupkʼebanoʼoboʼ,* le ku adorartikoʼob beetbil diosoʼoboʼ, le ku lúubloʼob tiʼ adulteriooʼ,* le xibil chʼuupoʼoboʼ bey xan le xiiboʼob ku núupchitaloʼob yéetel u yéet xiibiloʼoboʼ, 10  le ku yookoloʼoboʼ, le ku píitmáan u tsʼíiboltkoʼob wa baʼaxoʼ, le ku káaltaloʼoboʼ, le ku poochʼiloʼoboʼ, bey xan le máaxoʼob ku tokikoʼob le baʼax yaan tiʼ uláakʼ máakoʼ, mix juntúul tiʼ letiʼob ken u tiaʼalintoʼob u Reino Diosiʼ. 11  Baʼaleʼ jujuntúul tiʼ teʼexeʼ beyeʼex kaʼachoʼ. Chéen baʼaleʼ tsʼoʼok a pʼoʼobleʼex, tsʼoʼok a kiliʼichkúuntaʼaleʼex, tsʼoʼok u yaʼalaʼal toj a kuxtaleʼex tu kʼaabaʼ k-Yuumtsil Jesucristo bey xan tu yoʼolal u kiliʼich muukʼ k-Diosoʼ. 12  Tuláakal baʼal ku chaʼabal in beetik tumen le leyoʼ; baʼaleʼ maʼ tuláakal baʼal ku taasik utsiliʼ. Tuláakal baʼal ku chaʼabal in beetik tumen le leyoʼ; baʼaleʼ maʼ ken in chaʼa ka tsʼaʼabaken yáanal u páajtalil mix baʼal. 13  Le janaloʼ utiaʼal le nakʼoʼ, yéetel le nakʼoʼ utiaʼal le janaloʼ; kex beyoʼ Dioseʼ tu kaʼapʼéelal ken u xuʼulse, tiʼ le nakʼoʼ bey xan tiʼ le janaloʼ. Baʼaleʼ le wíinkliloʼ maʼ utiaʼal u núupkʼebantal máakiʼ, baʼaxeʼ utiaʼal Yuumtsil, yéetel Yuumtsileʼ utiaʼal le wíinkliloʼ. 14  Tsʼoʼoleʼ jeʼex Dios tu líiʼsaj Yuumtsileʼ, Dioseʼ yaan xan u líiʼskoʼon tiʼ le kíimil tu yoʼolal u páajtaliloʼ. 15  ¿Maʼ wa a wojleʼexeʼ teʼex u xéexetʼal u wíinklil Cristo? ¿Yaan wa túun in luʼsik u xéexetʼal u wíinklil Cristo utiaʼal ka in nupoʼob tiʼ u wíinklil juntúul koʼolel chéen bey u máanoʼ? ¡Maʼ! ¡Mix bikʼin ka úuchuk leloʼ! 16  ¿Maʼ wa a wojleʼexeʼ le máax ku nupkuba yéetel juntúul koʼolel chéen bey u máanoʼ ku suut bey junpʼéeliliʼ wíinklil tu yéeteleʼ? Tumen Dioseʼ ku yaʼalik: «Tu kaʼatúulaloʼobeʼ yaan u suutoʼob junpʼéeliliʼ wíinklil».* 17  Baʼaleʼ le máax ku nupkuba tiʼ Yuumtsileʼ ku yantaltiʼ junpʼéeliliʼ tuukul tu yéetel. 18  Púutsʼeneʼex tiʼ le núupkʼebanoʼ. Tuláakal u maasil kʼeban ku beetik máakeʼ minaʼan mix baʼal u yil yéetel le wíinkliloʼ, baʼaleʼ le máax maʼ tu xuʼulul u núupkʼebantaleʼ ku kʼebantal tu contra u wíinklil. 19  ¿Maʼ wa a wojleʼexeʼ le a wíinklileʼexoʼ letiʼ u templo le kiliʼich muukʼ* tsʼaʼanteʼex tumen Diosoʼ? Tsʼoʼoleʼ teʼexeʼ yaan a yuumileʼex, 20  tumen koʼoj úuchik a maʼanleʼex. Bey túunoʼ, nojbeʼenkúunteʼex Dios yéetel a wíinklileʼex.

Tsolajiloʼob

Gr.: pórnos. Le tʼaanaʼ ku meyaj utiaʼal u yúuchul tʼaan tiʼ le jejeláas núupchitaloʼob ku bin tu contra u ley Diosoʼ. Ilaʼak Tipʼ. 4.
Lelaʼ letiʼ ken núupkʼebanchajak juntúul xiib wa juntúul koʼolel tsʼokaʼan u beel.
Lit.: «junpʼéeliliʼ bakʼ».
Wa: «espíritu santo». Ilaʼak Tipʼ. 16.