1 Corintios 3:1-23

3  Bey túunoʼ, sukuʼuneʼex, maʼ béeychaj in tʼankeʼex jeʼex u tʼaʼanal máakoʼob nuʼuktaʼanoʼob tumen u kiliʼich muukʼ Dioseʼ, baʼaxeʼ jeʼex u tʼaʼanal máakoʼob yaan luʼumkabil tsʼíibolal tiʼobeʼ, bey xan jeʼex u tʼaʼanal máakoʼob beyoʼob mejen paalal tiʼ baʼaloʼob yaan yil yéetel Cristoeʼ.  Teneʼ tin tséenteʼex yéetel leche, maʼ yéetel chichich janaliʼ, tumen maʼ tu páajtal kaʼach a jaachʼeʼex. U jaajileʼ, tak beora maʼ tu páajtal a jachʼkeʼex chichich janalaʼ,  tumen láayliʼ yaanteʼex luʼumkabil tsʼíibolaloʼobeʼ. Tsʼoʼoleʼ tumen yaan tsʼíikilil* yéetel baʼatelil ichileʼexeʼ, leloʼ ¿maʼ wa túun táan u yeʼesik láayliʼ yaanteʼex luʼumkabil tsʼíibolaloʼob, yéetel láayliʼ táan a máaneʼex jeʼex le máakoʼob yaan luʼumkabil tsʼíibolal tiʼoboʼ?  Tumen ken u yaʼal wa máax: «Teneʼ u disipuloen Pablo», yéetel ken aʼalaʼak tumen uláakʼ: «Teneʼ u disipuloen Apolos», ¿maʼ wa táan a beetkabaʼex jeʼex u maasil máakoʼoboʼ?  Tumen ¿máax Apolos? Wa, ¿máax Pablo? Letiʼobeʼ chéen palitsiloʼob, tu yoʼolal máaxoʼob kʼuch a beetabaʼex disipuloil tiʼ Jesús, jeʼex úuchik u tsʼaʼabal u páajtalil tiʼ cada juntúul tiʼ letiʼob tumen Yuumtsil utiaʼal ka u beetoʼobeʼ.  Teen pakʼe, Apolos jóoyabte, baʼaleʼ Dios beet u nojochtal;  bey túunoʼ le máax ku paakʼaloʼ maʼatech u nojbeʼenkúuntaʼal, mix le ku jóoyaboʼ, baʼaxeʼ chéen Dios, tumen letiʼ beetik u nojochtal.  Le máax túun ku paakʼal yéetel le ku jóoyaboʼ, ku múul meyajoʼob, baʼaleʼ cada juntúuleʼ yaan u kʼamik u boʼolil yoʼolal le meyaj tu beetoʼ.  Tumen toʼoneʼ u yéet meyajoʼon Dios. Teʼex le luʼum ku meyajtaʼal tumen Diosoʼ; teʼexeʼ junpʼéel naj tsʼoʼok u líiʼsaʼal tumen Dios. 10  Yoʼolal le u nojoch utsil Dios tsʼaʼabtenoʼ, teneʼ tin tsʼáaj junpʼéel chuunpakʼil jeʼex u beetik juntúul máak yaan u naʼat ku nuʼuktik u líiʼsaʼal junpʼéel najeʼ, baʼaleʼ yaan uláakʼ máax táan u meyaj tu yóokʼol le chuunpakʼaʼ. Cada juntúul túuneʼ unaj u seguer u kanáantik bix u meyaj tu yóokʼol le chuunpakʼaʼ. 11  Tumen mix máak jeʼel u páajtal u tsʼáaik uláakʼ chuunpakʼ utiaʼal u jeelint le yáax tsʼaʼanoʼ, lelaʼ Jesucristo. 12  Baʼaleʼ wa yóokʼol le chuunpakʼ yaan máax ku líiʼsik junpʼéel naj yéetel oro, plata, kiʼichkelem tuunichoʼob, wa yéetel cheʼ, suʼuk, bey xan wa yéetel chʼiliboʼobeʼ, 13  le meyaj ku beetik cada juntúuloʼ yaan u chíikpajal baʼax clase meyajil, tumen ken kʼuchuk le kʼiinoʼ yaan u chíikbesaʼal tu yoʼolal le kʼáakʼoʼ; le kʼáakʼ túunoʼ yaan u yeʼesik baʼax clase najil tu beetaj cada juntúul. 14  Wa maʼ tu yelel le meyaj u beetmaj wa máax yóokʼol le chuunpakʼoʼ, le máakaʼ yaan u kʼamik u boʼolil; 15  baʼaleʼ wa le meyaj u beetmaj wa máax ku láaj eleloʼ, yaan u láaj peʼertik, baʼaleʼ letiʼeʼ yaan u salvarkuba; wa ku yúuchul lelaʼ letiʼeʼ yaan u pʼáatal bey juntúul máak púutsʼ tiʼ le kʼáakʼoʼ. 16  ¿Maʼ wa a wojleʼexeʼ u temploʼex Dios, yéetel tiʼ yaan u kiliʼich muukʼ Dios ichileʼexeʼ? 17  Wa juntúul máak ku xuʼulsik u templo Dioseʼ, Dioseʼ yaan u xuʼulsik tiʼ letiʼ; tumen u templo Dioseʼ kiliʼich, yéetel le temploaʼ teʼex. 18  Mix máak ka u tusuba tu juunal: Wa yaan máax ichileʼex ku tuklik yaan u naʼat tu táan u máakiloʼob le yóokʼol kaabaʼ,* u beetuba j-maʼ naʼatil utiaʼal ka yanak u naʼat. 19  Tumen le naʼat ku taal tiʼ le yóokʼol kaabaʼ, mix baʼal u biilal tu táan Dios; tumen tsʼíibtaʼan: «Le máax yaan u naʼatoʼ ku beetaʼal u lúubul tumen Dios ichil le tuus u beetmaj tiʼ u yéet máakiloʼ». 20  Tsʼoʼoleʼ tsʼíibtaʼan xan: «Jéeobaeʼ u yojel chéen kunel le baʼaxoʼob ku tuklik le máakoʼob yaan u naʼatoʼoboʼ». 21  Le oʼolaleʼ, mix máak ka u nojbaʼalkúuntuba tu yoʼolal le máakoʼoboʼ; tumen tuláakal baʼal yéetel tuláakal máakeʼ a tiaʼaleʼex, 22  wa Pablo, wa Apolos, wa Cefas, wa le yóokʼol kaaboʼ, wa le kuxtaloʼ, wa le kíimiloʼ, wa le baʼaxoʼob yanoʼob bejlaʼoʼ, wa le baʼaxoʼob ku taal u kʼiiniloʼ, tuláakal a tiaʼaleʼex; 23  baʼaleʼ teʼexeʼ u tiaʼaleʼex Cristo, yéetel Cristoeʼ u tiaʼal Dios.

Tsolajiloʼob

Wa: «celos».
Ilaʼak Tipʼ. 16.