1 Corintios 2:1-16

2  Bey túunoʼ, sukuʼuneʼex, le ka binen ta wiknaleʼexeʼ maʼ tin tʼaneʼex yéetel tʼaanoʼob jelaʼantakiʼ mix tin taasinba bey jach yaan in naʼat le ka tin tsolajteʼex le kiliʼich baʼal taʼakaʼan tumen Diosoʼ.  Tumen le tiaʼanen ta wiknaleʼexeʼ tin chʼaʼtuklaj in beetik bey mix baʼal in wojleʼ, chéen baʼax kaʼach in wojleʼ in kʼaj óol Jesucristo yéetel baʼaj tiʼ cheʼ.  Ka binen ta wiknaleʼexeʼ minaʼan in muukʼ, saajken yéetel táan in sen kikilankil;  tsʼoʼoleʼ le ka tʼaanajen yéetel le ka tin kʼaʼaytajteʼex le maʼalob péektsiloʼ, maʼ tin beetaj yéetel le tʼaanoʼob ku meyaj tiʼ le máakoʼob kaʼanchajaʼan u xookoʼob utiaʼal ka in woks ta pooleʼexoʼ, baʼaxeʼ tin beetaj utiaʼal in chíikbesikteʼex u kiliʼich muukʼ yéetel u páajtalil Dios,  utiaʼal beyoʼ maʼ a tsʼáaik a fejeʼex tiʼ u naʼat chéen wíinik, baʼaxeʼ tiʼ u páajtalil Dios.  Toʼoneʼ, ichil le máaxoʼob yiijchajaʼan u tuukuloʼoboʼ, k-tʼaan tiʼ baʼaloʼob yaan yil yéetel le naʼatoʼ, baʼaleʼ le naʼataʼ maʼ letiʼe yaan tiʼ le yóokʼol kaabaʼ* mix tiʼ u jalaʼachiloʼob le yóokʼol kaabaʼ, tumen letiʼobeʼ yaan u xuʼulsaʼaloʼob.  Baʼaxeʼ k-tʼaan tiʼ le naʼat ku taal tiʼ Dios ku chíikpajal tiʼ junpʼéel kiliʼich baʼal taʼakaʼanoʼ, lelaʼ letiʼe naʼat taʼakaʼanoʼ, le baʼax u yaʼalmiliʼ Dios táanil tiʼ u beetaʼal tuláakal baʼal utiaʼal k-nojbeʼeniloʼ.  Mix juntúul tiʼ u jalaʼachiloʼob le yóokʼol kaab kʼuch u kʼaj óoltoʼob le naʼataʼ, tumen wa ka u kʼaj óoltoʼob kaʼacheʼ bejlaʼa maʼ táan u bajkoʼob tiʼ cheʼ le Yuumtsil yaan nojbeʼenil tiʼoʼ.  Baʼaleʼ jeʼex tsʼíibtaʼanilaʼ: «Icheʼ maʼ u yil mix baʼaliʼ, xikineʼ maʼ u yuʼub mix baʼaliʼ, yéetel wíinikeʼ maʼ u tukult ichil u puksiʼikʼal le baʼaloʼob u beetmaj Dios utiaʼal u tsʼáaik tiʼ le máaxoʼob yaabiltmiloʼ». 10  Tumen lelaʼ tiʼ toʼon tsʼoʼok u tsʼaʼabal k-ojéelt tumen Dios tu yoʼolal u kiliʼich muukʼ, tumen le kiliʼich muukʼoʼ ku xakʼaltik tuláakal baʼal, tak le taamtam baʼaloʼob ku taal tiʼ Diosoʼ. 11  Mix máak u yojel baʼax ku tuklik uláakʼ máak. Tumen chéen cada juntúul máak u yojel baʼax yaan ichil u puksiʼikʼal.* Bey túun xanoʼ mix máak kʼuchuk u kʼaj óolt le baʼaxoʼob ku taal tiʼ Diosoʼ, baʼaxeʼ chéen u kiliʼich muukʼ Dios. 12  Baʼaleʼ toʼoneʼ maʼ t-kʼamaj le tuukul ku taal tiʼ le yóokʼol kaabaʼ, baʼaxeʼ t-kʼamaj u kiliʼich muukʼ Dios, utiaʼal beyoʼ ka k-kʼaj óolt le baʼaxoʼob tu tsʼáajtoʼon Dios tu yoʼolal u yutsiloʼ. 13  Toʼoneʼ le baʼaloʼobaʼ k-tsolik, maʼ yéetel le tʼaanoʼob ku kaʼansik le wíinikoʼob yaan u naʼatoʼoboʼ, baʼaxeʼ yéetel le tʼaanoʼob ku kaʼansik le kiliʼich muukʼoʼ; lelaʼ k-beetik ken meyajnaktoʼon le tʼaanoʼob ku taal tiʼ le kiliʼich muukʼ utiaʼal k-tsolik* le baʼaloʼob yaan yil yéetel Diosoʼ. 14  Baʼaleʼ le luʼumkabil máakoʼ maʼ tu kʼamik le baʼaloʼob ku taal tiʼ u kiliʼich muukʼ Diosoʼ, tumen utiaʼal letiʼeʼ mix baʼal u biilaloʼob; yéetel maʼ tu páajtal u kʼuchul u naʼate, tumen le baʼaloʼobaʼ chéen ku páajtal u xakʼaltaʼal yéetel u yáantaj le kiliʼich muukʼoʼ. 15  Chéen baʼaleʼ le máax ku chaʼik u nuʼuktaʼal tumen u kiliʼich muukʼ Dioseʼ ku xakʼaltik bix yanil tuláakal baʼal, baʼaleʼ letiʼeʼ mix máak xakʼaltik u tuukul. 16  Tumen «¿máax jeʼel u páajtal u kʼaj óoltik u tuukul Jéeobaeʼ? ¿Máax jeʼel u kaʼansik wa baʼax tiʼeʼ?». Baʼaleʼ toʼoneʼ jach tu jaajil yaantoʼon u tuukul Cristo.

Tsolajiloʼob

Ilaʼak Tipʼ. 16.
Gr.: néuma. Ilaʼak Tipʼ. 7B.
Wa: «k-nupik».