1 Corintios 15:1-58

15  Beora túunaʼ, sukuʼuneʼex, kin kʼaʼajsikteʼex le maʼalob péektsil tin kʼaʼaytajteʼex yéetel ta kʼameʼexoʼ; teʼexeʼ láayliʼ a tsʼaamaj a wóoleʼex tiʼeʼ.  Wa ku seguer a jach kʼubik a wóoleʼex tiʼ le maʼalob péektsil tin kʼaʼaytajteʼexoʼ, teʼexeʼ táan xan a salvartaʼaleʼex; jaʼaliʼ wa chéen kunel úuchik a creertikeʼex Cristoeʼ.  Tumen ichil le yáax baʼaloʼob tin kʼaʼaytajteʼexoʼ tiʼ yaan xan le baʼax kaʼansaʼabtenaʼ: Cristoeʼ kíim tu yoʼolal k-kʼebanoʼob, jeʼex u yaʼalik le Kiliʼich Tsʼíiboʼoboʼ,  muʼuki yéetel líiʼsaʼab tu yóoxpʼéel kʼiin jeʼex u yaʼalik le Kiliʼich Tsʼíiboʼoboʼ,  tu chíikbesuba tiʼ Cefas, ka tsʼoʼokeʼ tiʼ tu doceiloʼob.  Tu chíikbesuba xan tiʼ maas tiʼ quinientos sukuʼunoʼob muchʼukbaloʼob; óoliʼ tuláakloʼobeʼ tak bejlaʼa pʼaatloʼob t-éeteleʼ, chéen wa jaytúul tsʼoʼok u kíimiliʼ.*  Ku tsʼoʼokoleʼ tu chíikbesuba tiʼ Santiago, tsʼoʼoleʼ tiʼ tuláakal le apostoloʼoboʼ;  tu tsʼookeʼ tu chíikbesuba tiʼ teen, kex teneʼ beyen juntúul máax maʼ kʼuchaʼan u kʼiinil ka síijeʼ.  Tumen teen u maas chichnil tiʼ le apostoloʼoboʼ; tsʼoʼoleʼ maʼ tin náajmatik ka aʼalaʼakten apóstol, tumen tin chʼaʼpachtaj u múuchʼulil Dios. 10  Baʼaleʼ tu yoʼolal u nojoch utsil Dioseʼ yaanten le meyajaʼ. Tsʼoʼoleʼ maʼ chéen kunel úuchik u yeʼesikten u nojoch utsiliʼ, tumen teneʼ maas yaʼab úuchik in meyaj ke le uláakʼ apostoloʼoboʼ. Baʼaleʼ maʼ teen meyajnajeniʼ, baʼaxeʼ letiʼe u nojoch utsil Dios ku yeʼesikten tak bejlaʼoʼ. 11  Jeʼel bixakeʼ, wa teen wa le uláakʼ apostoloʼoboʼ, lelaʼ letiʼe baʼax t-kʼaʼaytajteʼexoʼ, teʼex túuneʼ kʼucheʼex a creerteʼex Cristo. 12  Baʼaleʼ wa táan u kʼaʼaytaʼal tsʼoʼok u líiʼsaʼal Cristo ichil le kimenoʼoboʼ, ¿baʼaxten túun jujuntúul tiʼ teʼexeʼ táan u yaʼalik maʼ kun kaʼa kuxkíintbil le kimenoʼoboʼ? 13  Jeʼeloʼ, wa maʼ kun kaʼa kuxkíintbil le kimenoʼoboʼ, mix Cristo túun kaʼa kuxkíintaʼak. 14  Baʼaleʼ wa maʼ kaʼa kuxkíintaʼak Cristoeʼ, u jaajileʼ chéen kunel le baʼax k-kʼaʼaytikoʼ yéetel k-fejeʼ mix baʼal u biilal. 15  Tsʼoʼoleʼ jeʼel tak u yaʼalaʼal táan k-aʼalik baʼaloʼob maʼ jaajtak tu contra Dioseʼ, tumen tsʼoʼok k-aʼalik letiʼ kaʼa kuxkíint Cristo, le máax maʼ u kaʼa kuxkíint wa jach tu jaajil maʼ kun kaʼa kuxkíintbil le kimenoʼoboʼ. 16  Tumen wa maʼ kun kaʼa kuxkíintbil le kimenoʼoboʼ, u kʼáat u yaʼaleʼ mix Cristo kaʼa kuxkíintaʼak. 17  Tsʼoʼoleʼ wa maʼ kaʼa kuxkíintaʼak Cristoeʼ a fejeʼexeʼ mix baʼal u biilal, yéetel a kʼebaneʼexeʼ maʼ perdonartaʼakiʼ. 18  Tak le máaxoʼob kíimoʼob* bey u disipuloʼob Cristoeʼ, tsʼokaʼantiʼob beyoʼ. 19  Tumen wa le esperanza yaantoʼon tiʼ Cristo chéen utiaʼal le kuxtalaʼ, tiʼ tuláakal le máakoʼoboʼ tiʼ toʼon unaj u maas chʼaʼabal óotsilil. 20  Baʼaleʼ jach u jaajileʼ Cristoeʼ tsʼoʼok u líiʼsaʼal ichil le kimenoʼoboʼ; Cristoeʼ letiʼe yáax máak* kaʼa kuxkíintaʼab ichil le máaxoʼob kimenoʼoboʼ.* 21  Jeʼex le kíimil kʼuch antal tu yoʼolal juntúul máakoʼ, le u kaʼa kuxkíintaʼal le kimenoʼoboʼ ku béeytal xan tu yoʼolal juntúul máak. 22  Tumen jeʼex tu yoʼolal Adán tuláakal máak táan u kíimileʼ, tu yoʼolal Cristo xaneʼ tiʼ tuláakal máak kun tsʼaabil kuxtal. 23  Baʼaleʼ tu tsoolol kun tsʼaabil kuxtal tiʼ cada juntúul: yáaxeʼ tiʼ Cristo, tsʼoʼoleʼ tiʼ le máaxoʼob u tiaʼaloʼob Cristo tu yáamil le kʼiinoʼob way yanoʼ.* 24  Tu tsʼookeʼ tu séebaʼanil ken u kʼub le Reino tiʼ u Dios yéetel u Taataoʼ; lelaʼ yaan u beetik ken tsʼoʼokok u xuʼulsik tiʼ tuláakal gobierno, tiʼ tuláakal autoridad bey xan tiʼ tuláakal páajtalil. 25  Tumen Cristoeʼ yaan u reinar tak ken tsʼaʼabak tuláakal u enemigoʼob tu yáanal u yook tumen Dios. 26  Le kíimiloʼ letiʼe u tsʼook enemigo kun xuʼulsbiloʼ. 27  Tumen Dioseʼ «tu tsʼáaj tuláakal baʼal tu yáanal u yook Cristo». Baʼaleʼ ken aʼalaʼak ‹tsʼoʼok u tsʼaʼabal tuláakal baʼaleʼ›, maʼ u kʼáat u yaʼal wa tak Dios tu tsʼáajuba yáanal u páajtalil Cristo paʼteʼ yéetel u maasil baʼaloʼob tu tsʼáajtiʼoʼ. 28  Lelaʼ maʼ bey u yúuchul yéetel le Paaloʼ, tumen letiʼeʼ ken u kʼub tiʼ Dios tuláakal le baʼaloʼoboʼ, yaan xan u tsʼáaikuba yáanal u páajtalil Dios, le Máax kʼub tuláakal le baʼaloʼob tiʼoʼ, utiaʼal beyoʼ Dioseʼ ka u beetuba tuláakal baʼal utiaʼal tuláakal máak. 29  Tsʼoʼoleʼ wa maʼ kun kaʼa kuxkíintbil le kimenoʼoboʼ, ¿baʼax túun ken u beet le máaxoʼob ku yokjaʼob utiaʼal kíimiloʼ? ¿Baʼaxten ku yokjaʼob xan utiaʼal ka táakpajkoʼob ichil le máaxoʼob kimenoʼoboʼ? 30  ¿Baʼaxten túun láalaj hora xan tiʼ yanoʼon tu chiʼ kíimileʼ? 31  Teneʼ sáamsamal in baʼateʼel yéetel le kíimiloʼ. Lelaʼ jach jaaj sukuʼuneʼex, jeʼex jaaj xan sáamsamal ku kiʼimaktal in wóol ta woʼolaleʼex tu yoʼolal Yuumtsil Jesucristoeʼ. 32  Wa tsʼoʼok in baʼateʼel yéetel tsʼíitsʼik baʼalcheʼob tu kaajil Éfeso jeʼex tsʼoʼok u beetik uláakʼ máakoʼobeʼ, ¿baʼax utsil túun jeʼel u taasikteneʼ? Wa maʼ kun kaʼa kuxkíintbil le kimenoʼoboʼ, «koʼoneʼex túun janal yéetel ukʼul, tumen sáamaleʼ yaan k-kíimil». 33  Maʼ a tuskabaʼex. U biskuba máak yéetel máaxoʼob kʼasaʼanoʼobeʼ ku kʼaskúuntik u maʼalob modos máak. 34  Suunakeʼex ta wóoleʼex jeʼex unajeʼ, yéetel maʼ a kʼebantaleʼex, tumen yaan jujuntúul ichileʼexeʼ maʼ u kʼaj óoloʼob Diosiʼ. Lelaʼ táan in waʼalikteʼex utiaʼal ka suʼlakchajkeʼex. 35  Baʼaleʼ maʼ xaaneʼ yaan máax jeʼel u yaʼalikeʼ: «¿Bix kun kaʼa kuxkíintbil le kimenoʼoboʼ? Tsʼoʼoleʼ, ¿baʼax claseil wíinklil kun yantaltiʼob ken líiʼsaʼakoʼob?». 36  ¡J-maʼ naʼat! Le baʼax ka pakʼikoʼ táanil kʼaʼabéet u kíimil utiaʼal ka kuxlak; 37  tsʼoʼoleʼ le baʼax ka pakʼik yéetel ku nojochtaloʼ maʼ letiʼe cheʼoʼ,* baʼaxeʼ chéen junpʼéel semilla minaʼan u sóol, maʼ xaaneʼ trigo wa uláakʼ clase semilla. 38  Baʼaleʼ Dioseʼ tiʼ le semillaoʼ ku beetik u yantal u cheʼil jeʼex uts tu tʼaaneʼ, tiʼ cada semillaeʼ ku beetik u yantal u wíinklil jeʼex unajeʼ. 39  Maʼ juntakáaliliʼ u wíinklil le baʼaloʼob yanoʼoboʼ; yaanal bix u wíinklil wíinik, yaanal bix u wíinklil wakax, yaanal bix u wíinklil le chʼíichʼoʼoboʼ yéetel yaanal bix u wíinklil le kayoʼoboʼ. 40  Yaan kaʼanilbeʼen wíinkliloʼob yéetel yaan luʼumkabil wíinkliloʼob; baʼaleʼ u kiʼichkelmil le kaʼanilbeʼen wíinkliloʼoboʼ yaanal bixi, yéetel u kiʼichkelmil le luʼumkabil wíinkliloʼoboʼ yaanal xan bixi. 41  U kiʼichkelmil le Kʼiinoʼ yaanal bixi yéetel u kiʼichkelmil le Lunaoʼ yaanal bixi, le estrellaʼob xanoʼ yaanal bix u kiʼichkelmiloʼob; tsʼoʼoleʼ cada estrellaeʼ jelaʼan u kiʼichkelmil tiʼ u maasil estrellaʼoboʼ. 42  Lelaʼ bey xan u yúuchul yéetel u kaʼa kuxkíintaʼal le kimenoʼoboʼ. Le wíinkliloʼ bey junpʼéel semilla ku kíimil ken paʼakʼakeʼ, baʼaleʼ ku kuxkíintaʼal yéetel junpʼéel wíinklil maʼatech u kʼastal. 43  Ku paʼakʼal ich suʼtsilil, ku líiʼsaʼal ich nojbeʼenil. Minaʼan u muukʼ ken paʼakʼak, yaan u muukʼ ken líiʼsaʼak. 44  Ku muʼukul junpʼéel luʼumkabil wíinklil, ku líiʼsaʼal junpʼéel kaʼanilbeʼen* wíinklil. Wa yaan luʼumkabil wíinklileʼ, yaan xan kaʼanilbeʼen wíinklil. 45  Bey xan u yaʼalik le Kiliʼich Tsʼíiboʼ: «Adán, le yáax wíinikoʼ, suunaj juntúul kuxaʼan máak».* Le u tsʼook Adanoʼ kʼuch u beetuba juntúul kaʼanilbeʼen máak ku tsʼáaik kuxtal. 46  Baʼaleʼ maʼ letiʼe kaʼanilbeʼen* wíinklil ku yantal táaniloʼ. Yáax táanil ku yantal le luʼumkabil wíinkliloʼ, yéetel ken tsʼoʼokkeʼ ku yantal le kaʼanilbeʼen wíinkliloʼ. 47  Le yáax wíinikoʼ tiʼ luʼum u taal, tumen yéetel luʼum beetaʼabi; le uláakʼ juntúuloʼ teʼ kaʼan taaloʼ. 48  Le luʼumkabil máakoʼoboʼ beyoʼob jeʼex le máak beetaʼab yéetel luʼumoʼ; le kaʼanilbeʼen máakoʼob xanoʼ beyoʼob jeʼex le máax teʼ kaʼan u taaloʼ. 49  Jeʼex chíikaʼaniloʼon tiʼ le máax beetaʼab yéetel luʼumoʼ, bey xan bíin chíikpajkoʼon tiʼ le máax kaʼan u taaloʼ. 50  Baʼaleʼ, sukuʼuneʼex, letiʼe baʼax kin waʼalikaʼ: bakʼ yéetel kʼiʼikʼeʼ maʼ tu páajtal u tiaʼalintikoʼob u Reino Dios, junpʼéel wíinklil ku kʼastaleʼ maʼ tu páajtal xan u pʼáatal jeʼex le wíinklil maʼatech u kʼastaloʼ. 51  Uʼuyeʼex le kiliʼich taʼakbil baʼal ken in waʼalteʼexaʼ: Maʼ tuláakloʼon ken k-kíimiliʼ,* baʼaleʼ tuláakloʼon yaan k-jelbesaʼal 52  tu séebaʼanil, chéen bey ka u mutsʼ yéetel ka u pʼil u yich máakeʼ; lelaʼ yaan u yúuchul le táan u paʼaxal le u tsʼook trompetaoʼ. Tumen le ken juumnak le trompetaoʼ le kimenoʼoboʼ yaan u kaʼa kuxkíintaʼaloʼob yéetel junpʼéel wíinklil maʼatech u kʼastal, toʼon túuneʼ yaan k-jelbesaʼal. 53  Tumen tiʼ le máax ku kʼastal u wíinklilaʼ yaan u tsʼaʼabal junpʼéel wíinklil maʼatech u kʼastal, yéetel le máax ku kíimilaʼ yaan u tsʼaʼabaltiʼ u páajtalil maʼ u kíimil. 54  Baʼaleʼ ken tsʼaʼabak junpʼéel wíinklil maʼatech u kʼastal tiʼ le máax ku kʼastal u wíinklilaʼ, yéetel ken tsʼaʼabak u páajtalil maʼ u kíimil tiʼ le máax ku kíimilaʼ, letiʼ túun ken béeychajak le baʼax ku yaʼalik le Kiliʼich Tsʼíibaʼ: «Le kíimiloʼ yaan u túutsʼlukʼtaʼal utiaʼal mix bikʼin». 55  «Kíimil, ¿tuʼux yaan a páajtalil utiaʼal a tsʼáanchaʼatikoʼon? Kíimil, ¿tuʼux tsʼoʼok a yaach?» 56  Le yaach ku kíimsik máakoʼ letiʼe kʼebanoʼ, le kʼeban xanoʼ ku chʼaʼik u muukʼ tiʼ le Leyoʼ. 57  ¡Baʼaleʼ gracias tiʼ Dios ku tsʼáaiktoʼon u páajtalil k-tsʼáanchaʼatik le kíimil tu yoʼolal k-Yuumtsil Jesucristooʼ! 58  Le oʼolaleʼ, in sukuʼuneʼex, jeetsʼel pʼáateneʼex, maʼ u péek a wóoleʼex, mantatsʼ yanak yaʼab baʼal a beeteʼex tiʼ u meeyjil Yuumtsil, tumen a wojleʼexeʼ maʼ chéen kunel le baʼaxoʼob ka beetkeʼex ikil a meyajtikeʼex Yuumtsiloʼ.

Tsolajiloʼob

Lit.: «máaxoʼob táan u weenloʼob».
Lit.: «máaxoʼob táan u weenloʼob».
Lit.: «yáax ichoʼob».
Lit.: «máaxoʼob táan u weenloʼob».
Gr.: parousía. Ilaʼak Tipʼ. 5.
Lit.: «wíinklil».
Gr.: neumatikós. Ilaʼak Tipʼ. 7B.
Wa: «juntúul alma». Gr.: sikjé. Ilaʼak Tipʼ. 7A.
Gr.: neumatikós. Ilaʼak Tipʼ. 7B.
Lit.: «ken k-weenliʼ».