1 Corintios 13:1-13

13  Wa kin tʼaan ichil le tʼaan ku beetik le máakoʼoboʼ bey xan ichil le tʼaan ku beetik le angeloʼoboʼ, baʼaleʼ minaʼan in yaabilajeʼ, kin suut bey junpʼéel nuʼukul de bronce ku yáambal u juumeʼ wa bey junpʼéel címbalo* chʼeʼej u juumeʼ.  Wa síiʼanten u páajtalil in profetizar yéetel in wojel tuláakal le kiliʼich baʼaloʼob taʼakaʼanoʼ bey xan tuláakal le baʼax unaj u yojéeltaʼaloʼ, yéetel yaanten le bukaʼaj fe kʼaʼabéet utiaʼal in péeksik puʼukoʼoboʼ, baʼaleʼ minaʼan in yaabilajeʼ mix baʼalen.  Wa kin tsʼáaik tuláakal baʼax yaanten utiaʼal ka tséentaʼak u maasil yéetel kin kʼubik in wíinklil utiaʼal kíimil chéen utiaʼal in nojbaʼalkúuntkinba, baʼaleʼ minaʼan in yaabilajeʼ, leloʼ mix junpʼéel utsil ku taasikten.  Le máax yaan u yaabilajeʼ chúukaʼan u yóol, yéetel ku yeʼesik u yutsil. Le máax yaan u yaabilajeʼ maʼ tu yaatal u yóol yoʼolal baʼax yaan tiʼ u maasil,* maʼ tu nojbaʼalkúuntkuba mix tu kaʼantal u yich,  maʼ tu beetik baʼaloʼob suʼtsiltak, maʼ tu kaxtik chéen u yutsil, maʼ tu séeb kʼuuxil, maʼ tu kʼaʼajsik le baʼax kʼaas ku beetaʼaltiʼoʼ,  maʼ tu kiʼimaktal u yóol yéetel le baʼaloʼob kʼaastakoʼ, baʼaxeʼ ku kiʼimaktal u yóol yéetel le jaajoʼ.  Tuláakal baʼal ku muʼyajtik, tuláakal baʼal ku creertik, tuláakal baʼal ku páaʼtik, tuláakal baʼal ku chúukpajal u yóol u muʼyajte.  Le yaabilajoʼ mix bikʼin kun xuʼulul.* Baʼaleʼ wa yaan u páajtalil u yúuchul profetizareʼ, yaan u xuʼulul; wa yaan u páajtalil u yúuchul tʼaan ich jejeláas tʼaanoʼobeʼ, yaan u xuʼulul; wa yaan ojéelaleʼ, yaan u xuʼulul.  Tumen bejlaʼeʼ maʼ chúukaʼan le baʼaxoʼob k-ojloʼ yéetel maʼ chúukaʼan k-profetizariʼ; 10  baʼaleʼ ken kʼuchuk le baʼax chúukaʼanoʼ, le baʼax maʼ chúukaʼanoʼ yaan u xuʼulul. 11  Tin paalil kaʼacheʼ, kin tʼaan bey paaleʼ, kin tuukul bey paaleʼ yéetel u naʼat paal yaanten; baʼaleʼ beora tsʼoʼok in nojoch máaktalaʼ, tsʼoʼok u xuʼulul in beetik baʼaloʼob jeʼex mejen paalaleʼ. 12  Tumen beoraaʼ butsʼuknak k-ilik le baʼaloʼoboʼ, jeʼex u paktaʼaloʼob tiʼ junpʼéel néen de hierroeʼ, baʼaleʼ yaan u kʼuchul u kʼiinil k-ilik tuláakal baʼal jach jeʼex yaniloʼoboʼ. Bejlaʼeʼ maʼ chúukaʼan baʼax in wojel tiʼ Diosiʼ, baʼaleʼ yaan u kʼuchul u kʼiinil in kʼaj óoltik Dios tubeel jach jeʼex u kʼaj óoltmileneʼ. 13  Beora túunaʼ, ku pʼáatal le óoxpʼéel baʼaloʼobaʼ: fe, esperanza yéetel yaabilaj; baʼaleʼ u maas nojchil tiʼ leloʼobaʼ letiʼe yaabilajoʼ.

Tsolajiloʼob

Lelaʼ junpʼéel u nuʼukulil paax bey jeʼex le platillos ku meyaj bejlaʼa utiaʼal u yúuchul paaxoʼ.
Wa: «maʼ celosoiʼ».
Wa: «mix bikʼin kun pʼáatal minaʼan».