Skip to content

Skip to table of contents

Zimbangi zi Yave

Select language Ibinda

Sadila Yave, Nzambi yi Kiphwanza Kikyedika

Sadila Yave, Nzambi yi Kiphwanza Kikyedika

‘Koso kwidi pheve yi Yave, kwidi mvandi kiphwanza.’2 KOLINTO 3:17.

MINKUNGA: 4973

1, 2. (a) Kibila mbi buvika ayi kiphwanza maba mambu mankinza mu bilumbu bi mvwala Polo? (b) Nani tho yi kiphwanza kikyedika mvwala Polo katubila?

MU Baklisto baba zingilanga mu thangu yi Lutumu lu Loma, muba batu bawombo baba lungundayi mu minsiku ayi kiphwanza bawu baba. Bukyedika, lutumu aluneni luba beni bisalu bingolo ayi bawombo baba vanganga bisalu beni baba mimvika. Mu thangu beni ku Loma, mu dingumba di batu 3 kheti 1 mu bawu wuba mvika. Buvika ayi kiphwanza maba mambu batu baba kolukilanga beni, ayi Baklisto mvandi.

2 Mvwala Polo mvandi wusonika matedi kiphwanza. Vayi nandi kabasa tomba ko kudedikisa mambu maba monika mu thangu beni, dedi bo batu bawombo baba yindudilanga. Angi Polo ayi Baklisto bankaka, basala beni mwingi kulonga batu zitsangu zimbote zi Kintinu ki Nzambi mu kubasadisa kuvisa nkinza widi khayilu Yesu Klisto kavana. Polo wukamba zikhomba zyandi zi Baklisto nani tho yi kiphwanza kikyedika. Nandi wusonika: ‘Yave nandi Pheve, ayi koso kwidi pheve yi Yave kwidi  mvandi kiphwanza.’—2 Kolinto 3:17.

3, 4. (a) Mambu mbi mvwala Polo katubila mu 2 Kolinto 3:17? (b) Mbi tufweti vanga mwingi tubaka kiphwanza kimfuminanga kwidi Yave?

3 Mu nkanda wumwadi kasonikina basi Kolinto, mvwala Polo wutubila mambu mamonika bo Mose kakuluka ku Mongo Sinai bo kamana kuba va ntwala mbasi yimweka yi Yave. Kizizi ki Mose kyaba lezama beni. Bo basi Isaeli bamona Mose, bawu bayiza ba beni boma, diawu nandi kafukila kizizi kyandi mu nledi. (Esodu 34:29, 30, 33; 2 Kolinto 3:7, 13) Polo wusudikisa: ‘Vayi mutu na kuvutuka kwidi Yave, buna bosi nledi beni wubotukidi.’ (2 Kolinto 3:16) Mbi mvwala Polo kaba tomba kutuba?

4 Mu dilongi di sabala yibedi, tulongukidi ti Yave, mvangi wu byuma byoso nandi to mutu widi kiphwanza mu phila yiduka. Mawu tsundu madi kibila, vama vadi ‘pheve yi Yave vadi mvandi kiphwanza kikyedika.’ Vayi Polo wutuba ti befu tutidi kubaka kiphwanza kikyedika, tufweti vutuka kwidi Yave. Mawu mansundula ti tufweti ba kikundi kimboti na Nzambi. Basi Isaeli bo baba mu thandu, babika kutadila mambu mu phila Yave kaba matadilanga vayi mu phil’awu. Bawu baba buka batu bafuka nledi mu mayindu ayi mu mintima miawu. Bawu baba tomba mvandi kusadila mwa kiphwanza kiba yawu mwingi kukwangidika zitsatu ziawu.—Ebeleo 3:8-10.

5. (a) Phila kiphwanza mbi pheve yi Yave yimvananga? (b) Bwidi tuzabidi ti kheti mutu widi mvika voti ku buloku kalenda baka kiphwanza Yave kamvananga? (c) Byuvu mbi tunkwiza baka mimvutu?

5 Pheve yi Nzambi yituvananga kiphwanza kilutidi na kubotuka va kikhole voti mu kivika. Pheve beni yinlutanga kutukula mu mambu mawombo mutu wunsuni kalenda lembakana kuvanga. Yawu yitukulanga mu buvika bu disumu ayi bu lufwa, mu buvika bu binganga bi luvunu ayi buvika bu bikhulu. (Loma 6:23; 8:2) Bukyedika, akiki kidi kiphwanza ki luvalu! Kheti mutu widi mvika voti mu buloku kadi nandi kalenda baka kipwanza beni. (Ngenesi 39:20-23) Zikhomba ziwadi bantedilanga Nancy Yuen ayi Harold King baba mimvu miwombo mu buloku mu kibila ki kiminu kiawu, kheti bobo bawu baba kiphwanza beni kikyedika. Ngye wulenda mona dilongi dintubila luzingu luawu mu JW Broadcasting. (Tala vantuba ENTREVISTAS E EXPERIENCIA > DE NOSSOS ARQUIVOS.) Twantambudila mimvutu mi byuvu byodi. Bwidi tulenda monisina ti tumvwanga nkinza kiphwanza kitu? Ayi bwidi tulenda sadila kiawu mu ndwenga?

KIPHWANZA NZAMBI KATUVANA NKINZA BENI KIDI

6. Bwidi basi Isaeli bamonisina ti basa kwangalala ko mu kiphwanza Yave kabavana?

6 Boti khayilu batuveni, befu tumvutudilanga matondo kwidi mutu wutuveni yawu. Vayi bana ba Isaeli basa vutudila ko matondo kwidi Yave wuba kula va kivika voti wuba vana kiphwanza. Mwa zingonda to zivyoka tona Yave kaba kula va kivika ku Ngipiti, bawu batona kuyindula bidya baba dyanga  kuna. Batona kutubila bubi bidya Yave kaba dikila bo baba mu thandu. Bana ba Isaeli baba tomba nkutu kuvutuka ku Ngipiti! Kwidi bawu ‘zifu, Pepinu, melancia, alyu ayi cebola’ biluta nkinza na kiphwanza Yave kaba vana mwingi bambwongimina. Kiawu kibila Yave kadasukila. (Zintalu 11:5, 6, 10; 14:3, 4) Malongi mankinza tulenda longuka mu mawu.

7. Bwidi mvwala Polo kasadila dilongi didi mu 2 Kolinto 6:1, ayi bwidi befu mvitu tulenda sadila diawu?

7 Mvwala Polo wulubula Baklisto boso mwingi babika ba kifu ki kukhambu zaba kuvutula matondo mu kiphwanza Yave katuvana bo kafila Mwan’andi Yesu Klisto. (Tanga 2 Kolinto 6:1.) Polo wuba nkwa masumu, nandi wuba buka mvika wu disumu ayi lufwa. Mawu mavanga nandi kuyimona khenene voti bubi naveka. Diawu katubila: ‘Matondo kwidi Nzambi mu Mfumu’itu Yesu Klisto!’ Kibila mbi nandi katubila mawu? Mvwala Polo wusudikisa kwidi Baklisto: ‘Bila nsiku wu pheve wumvananga luzingu mu nzila Klisto Yesu wu kukula mu nsiku wu disumu ayi lufwa.’ (Loma 7:24, 25; 8:2) Dedi mvwala Polo, tubikanu kuzimbakana ti Yave wutuvukisa mu buvika bu disumu ayi lufwa. Khudulu yituzibudila phwasa yi kubwongimina Yave ayi yituvana mayangi makyedika.—Minkunga 40:8.

Ngyewu, widi mu kusadila kiphwanza widi mwingi kuvanga ma Yave kantomba voti mwingi kuvanga ma wutidi mu luzingu lwaku? (Tala bitini bi matangu 8-10)

8, 9. (a) Ndubu mbi mvwala Petelo kavana mu matedi phila tufweti sadila kiphwanza kitu? (b) Bwidi mutu kalenda sadila mu phila yimbi kiphwanza kadi?

8 Tubika to kutubila va munu ti tumvutudilanga Yave matondo, vayi tufweti vanga mangolo mwingi tubika sadila mu phila yimbi kiphwanza twidi. Dedi bo mvwala Petelo ka tulubudila, befu tulendi sadila ko kiphwanza kitu mwingi kiba kibila voti lwaku lu kuvangila mambu mambi. (Tanga 1 Petelo 2:16.) Ndubu ayoyi yi tutebula moyo mamonikina bana ba Isaeli bo baba mu thandu. Bubu tufweti luta tebukila moyo ndubu beni, kibila Satana ayi nza kanyadila, bantwadisanga mintindu mi phwatulu, ndiwulu,  malavu ayi mambu ma kuvuvisila mu kiteso ki khambu fwana. Ayi basandilanga batu bazabakana, badi zinyitu ayi bizizi bimboti mwingi befu tuvukumuka mu kusumba byuma beni. Bukyedika ti befu khambu keba, tulenda vukumuka mu mambu beni mu kusadila phila yimbi kiphwanza Nzambi ka tuvana.

9 Dilongi Petelo kavana nkinza beni didi mu mambu mankaka ma luzingu, buka mu matedi kikola, kisalu ayi mambu mankaka tutidi kuvanga mu luzingu. Buka matoko mawombo bubu baba kwikanga kusala beni voti kukikinina kubwela kwenda mu bikola binangama. Batu bawombo baba kambanga ti ba kulonguka beni, bala baka kisalu kimboti, zimbongo ziwombo ayi bala kuba kinzika beni. Batu beni bamvananga matoko malongi malenda kubavanga kukikinina ti bo bavyokila mu bikola binangama, bawu to bantambulanga zimbongo ziwombo kuvyoka bankaka. Kubaka ndongukulu yi kikola kingama, dilenda monikina buka diyindu dimboti kwidi matoko mu thangu bambaka makani mankwiza balula luzingu luawu loso. Vayi mbi matoko ayi matata bafweti tebukilanga moyo?

10. Mbi tufweti tebukanga moyo bo tumbaka makani?

10 Bawombo banyindulanga ti kadika mutu kafweti baka makani mandi ayi badi lwaku lu kusola vanga moso kwa batidi, mu khambu yindula bunkwiza bela bilunzi bi bankaka. Bawu balenda yindula mambu masonika mvwala Polo: ‘Kibila mbi kiphwanza kiama kifweti fundusu mu mayindu ma ntima wu mutu wunkaka?’ (1 Kolinto 10:29) Kheti twidi kiphwanza ki kusola kikola tutidi kukota voti bi tutidi kuvanga mu luzingu, tubika zimbakana ti kiphwanza kitu kidi na ndilu ayi zinzengulu zitu zyoso zidi tsundukulu. Kibila mwala Polo wutuba: ‘Mambu moso tulenda kumavanga, vayi mambu moso masi ko ndandu. Mambu moso tulenda kumavanga, vayi mambu moso matunganga ko.’ (1 Kolinto 10:23; tala matangu madi va wanda nwt-TPO) Kheti befu twidi lwaku lu kusola mambu tutidi kuvanga, tufweti tebukanga moyo ti khumbu zinkaka mambu tutidi kuvanga masi ko mawu malutidi nkinza.

BEFU TUNSADILA KIPHWANZA KITU MU NDWENGABO TUNSADILA YAVE.

11. Kibila mbi Yave katukudila?

11 Bo mvwala Petelo ka tulubula mwingi tubika kusadila bubi kiphwanza kitu, nandi wutuba ti phila yilutidi yi kuyisadila yidi mu kuba ‘mvika wu Yave.’ Kibila Yave wusadila Yesu mwingi kutukula va kivika ki disumu ayi ki lufwa, mwingi tusola kunsadila mu luzingu lwitu loso.

12. Ntungulu mbi Nowa katubikila?

12 Phila yilutidi yi kusadila kiphwanza kitu, yidi mu kusadila thangu ayi mangolo mitu mu kisalu ki Yave. Kuvanga mawu kwala kutukyeba tubika bikila mambu mankaka ma nza voti zitsatu zitu ziluta nkinza mu luzingu lwitu. (Ngalatia 5:16) Yindula kisalu Nowa ayi dikanda dyandi bavanga. Kheti bawu baba zingilanga mu nza yiba makhema ayi kitsuza, bawu babasa tulanga ko zitsatu ziawu va theti dedi batu bankaka baba zinganga yawu. Vayi bawu batatamana kuvanga kisalu Yave kabavana, batunga nzaza, bavaka bidya mwingi bawu ayi bibulu badya, ayi mvandi balubula batu matedi khuka yi minlangu yaba fikama. ‘Ayi Nowa wuvanga  mamoso Nzambi kankamba. Nandi wuvanga bo Yave kankambila.’ (Ngenesi 6:22) Mu kibila akyokyo, Nowa ayi dikanda dyandi bavuka mu thangu beni.—Ebeleo 11:7.

13. Kiyeku mbi Yave katuvana mwingi tuvanga?

13 Mbi Yave kantomba befu tuvanga bubu? Bo twidi minlandikini mi Yesu, befu tuzebi ti Nzambi wuntomba befu tulonga zitsangu zyandi. (Tanga Luka 4:18, 19.) Bubu, Satana wufuka dyela di batu bawombo buka kitendi mu meso, ayi bawu bamonanga ko ti badi mimvika mu binganga bi luvunu, byuma bi nza ayi mambu ma pulitika. (2 Kolinto 4:4) Buka Yesu, befu twidi lwaku lu kusadisa bankaka bazaba ayi basadila Yave, Nzambi yi kiphwanza. (Matai 28:19, 20) Tuzebi ti kisi ko kisalu kilwelo kulonga bankaka. Mu bibwangu binkaka, batu bawombo bammanganga kulonguka matedi Nzambi, ayi bankaka bankwiza fwemanga voti kudasuka bo tubalonga. Angi bo Yave katuvana kiyeku ki kusamuna, befu tufweti kuyikuvusa, ‘minu yilenda sadila kiphwanza yidi mwingi kubwela myoko mu kisalu ki Yave?’

14, 15. Makani mbi Zimbangi ziwombo zi Yave babaka? (Tala foto yidi va thonono.)

14 Buboti beni kuzaba ti bawombo mu dikabu di Yave bama visa ti tsukulu yi nza ayiyi yima fikama ayi babaka makani ma kudekula phila yi nzingulu’awu mwingi kukota mu kisalu ki ntwami ntwala. (1 Kolinto 9:19, 23) Bankaka bansadilanga mu kimvuka kiawu, angi bankaka bankwendanga mu bimvuka bidi tsatu. Mu mimvu mitanu kumbusa, balenda ba 250.000 di zikhomba batona kusala banga mintwami ntwala, ayi bubu bama vyoka 1.100.000 di zikhomba badi mu kisalu ki ntwami ntwala. Mayangi beni kumona ti bawombo bansadila kiphwanza kiawu mwingi kubwela sadila Yave mu kisalu ki ntwami ntwala.—Minkunga 110:3.

15 Mbi biba sadisa kusadila mu ndwenga kiphwanza? Tala kifwani ki John ayi Judith, basadila mu zitsi ziwombo mu 30 di mimvu. Bawu batuba ti bo kikola ki mintwami ntwala kitona mu mvu 1977, minlonguki baba kindisa beni mwingi bakivana mu kisalu ki kulonga mu bibwangu biba tsatu. Kiawu kibila John katombila kisalu kinkaka ayi balengisa nzingulu’awu. Bawu ba kivana mwingi kulonga ku tsi yinkaka. Mbi biba sadisa kununga mambu maphasi badengana, buka kulonguka mbembo yinkaka ayi kukolama kikhulu, nzingulu ayi mambu mankaka mamona? Bawu basambila kwidi Yave mwingi kaba sadisa. Bwidi bawu bamwena kusadila Yave mu mimvu myoso amyomyo? John wutuba: “Minu yimmonanga ti yikivana mu kisalu kilutidi nkinza yilenda vanga mu luzingu lwami. Yave wubwela kuba mutu wukyedika mu luzingu lwami. Bubu minu yimana visa mboti masonama mu Yakobi 4:8: ‘Lufikama Nzambi ayi nandi wela kulufikama.’ Minu yibakula kyuma yiba tombanga ayi luzingu lwami luyiza ba tsundu yiwombo.”

16. Bwidi zikhomba ziwombo basadila mu ndwenga kiphwanza kiawu?

 16 Bawombo buka John ayi Judith, bansalanga buka mintwami ntwala mu mimvu miwombo. Vayi bankaka basi ko bu kuvangila mawu mu thangu yiwombo. Kheti buawu, zikhomba ziwombo bakivananga mu kisalu ki kutunga zinzo zi kintinu mu nza yimvimba. Buka bo baba tunga bibanga bimona ku kikulutu kitu ku Warwick, Nova Iorque, 27.000 di zikhomba, babakala ayi bakyeto bafumina mu zitsi ziwombo bakivana mwingi kubwela myoko. Bankaka basadila kuna zisabala wadi, bankaka zingonda ayi vadi bankaka badukisa mimvu. Bawombo mu zikhomba beni, babika bima biwombo kumbusa mwingi kubwela myoko mu kisalu ku Warwick. Bawu badi bifwani bimboti bi batu bansadilanga kiphwanza badi mwingi kuzitisa ayi kukembisa Yave, Nzambi yi kiphwanza kikyedika.

17. Lusakumu mbi twala tambula befu kusadila mu ndwenga kiphwanza twidi?

17 Tumvutula beni matondo mu kuzaba Yave ayi kubaka kiphwanza voti lwaku twidi bubu mwingi kumbwongimina. Bika tumonisa mu makani tumbaka ti kiphwanza nkinza beni kidi mu befu. Tubika sadila kiawu mwingi kuvanga mambu mambi, angi mu kusadila Yave mu luzingu lwitu loso. Bosi twala baka lusakumunu Yave kakanikisa bo mbikudulu ayiyi yala salama: ‘Bila bivangu byabyoso byela kulwa va kivika ki mbivusu yi masumu ayi byela baka kiphwanza ki nkembo wu bana ba Nzambi.’—Loma 8:21.

Kheti mutu widi mu buloku kalenda baka kipwanza

Phila yilutidi yi kusadila kiphwanza kitu, yidi mu kusadila thangu ayi mangolo mitu mu kisalu ki Yave