Skip to content

Skip to table of contents

Zimbangi zi Yave

Select language Ibinda

Lukindasana Beno na Beno mu ‘Kuzaba ti Kilumbu ki Mfumu Kima Fikama’

Lukindasana Beno na Beno mu ‘Kuzaba ti Kilumbu ki Mfumu Kima Fikama’

‘Tumonasananu nkinza befu na befu. . . , vayi tukikindasananga befu na befu mu kuzaba ti kilumbu ki Mfumu kima fikama.’EBELEO 10:24, 25.

MINKUNGA: 9087

1. Kibila mbi mvwala Polo kakambila basi Ebeleo bakindasananga bawu na bawu?

MU MBANDU yitheti, mvwala Polo wuvana basi Ebeleo dilongi adidi: ‘Tumonasananu nkinza befu na befu mwingi tuyikindasana mu luzolo ayi mavanga mambote, tubika tinanga zikhutukunu dedi bumvangila batu bankaka, vayi tukikindasananga befu na befu mu kuzaba ti kilumbu ki Mfumu kima fikama.’ (Ebeleo 10:24, 25) Zikhomba ḿba bayiyuvusa kibila mbi mvwala Polo kabakambila mwingi babwela kuyikindasana bawu yi bawu. Bo vavyoka mimvu mitanu, bosi bayiza zaba kibila mvwala Polo kaba sonikina mawu. Mu thangu beni, bawu bayiza zaba ti kilumbu ki lufundusu lu Yave kwidi divula di Yelusalemi kiba fikama. Babakula ti mwingi bavuka, baba tombila kubika divula di Yelusalemi dedi bo Yesu kaba kambila. (Luka 21:20-22; Mavanga 2:19, 20) Kilumbu ki lufundusu lu Yave kiyiza mu mvu 70, mu thangu basi Loma batulula divula di Yelusalemi.

2. Kibila mbi tufweti luta tomba kukindisana befu na befu bubu?

 2 Bubu, befu mvitu twidi mu kuvyokila mu mambu ma phila ayoyo. Kilumbu ki nganzi yi Yave kima fikama. (Yoeli 2:11) Mambu mbikudi Sefania kabikula madi mvandi ndandu mu thangu’itu: ‘Kilumbu kinnene ki Yave kima fikama, kiawu kima fikama ayi kiawu kidi mu kwiza mu nswalu!’ (Sefania 1:14) Diawu, tufweti ‘monasananu nkinza befu na befu mwingi tuyikindasana mu luzolo ayi mavanga mambote.’ (Ebeleo 10:24, tala matangu madi va wanda mu nwt-TPO) Befu tufweti luta vwa zikhomba zitu nkinza mwingi kuba kindisa mu thangu bawu bantomba khindusulu.

NANI WUNTOMBA KHINDUSULU?

3. Mbi mwala Polo katuba mu matedi kukindasananga? (Tala fikula yidi va thonono dilongi.)

3 ‘Mabanza mawombo mamfyetikisanga ntima wu mutu, vayi dyambu dimbote dinkwangidikanga ntima.’ (Zingana 12:25) Yoso kwa thangu befu boso tuntombanga khindusulu. Polo wumonisa ti batu badi kiyeku ki kukindisa bankaka, mvawu bafweti bakanga khindusulu. Nandi wusonika kwidi zikhomba ziba ku Loma: ‘Phwila yiwombo yidi yama yi kulumona mwingi yilutudisila dikaba di kipheve mu dyambu luba bakinda; voti mwingi tubombasana va kimweka mu kiminu twidi, beno ayi minu.’ (Loma 1:11, 12) Tulenda tuba mvandi ti khumbu zinkaka mvwala Polo waba tomba khindusulu.—Tanga Loma 15:30-32.

4, 5. Banani tulenda kindisa bubu ayi mu kibila mbi?

4 Bubu, tulenda kindisa bo badi mu kisalu ki thangu ka thangu, ayi mintwami ntwala. Kibila bawombo mu bawu babika bima biwombo baba zolanga mwingi kukota mu kisalu ki ntwami ntwala. Tulenda kindisa mvandi ba misyoni, minsungi mi mavula ayi bakazi bawu, bansadilanga ku Beteli ayi mu bibwangu bansekudilanga bilongulu bitu (RTO). Zikhomba beni babika bisalu biwombo mwingi babwela kukivana mu kisalu ki Yave. Diawu tufweti bakindisilanga. Vadi mvandi bankaka batidi kuba mu kisalu ki thangu ka thangu, vayi basi ko bu kubwe bela muawu. Zikhomba beni mvawu bamvutulanga matondo ba kubaka khindusulu yimfumina kwidi zikhomba zinkaka.

5 Nani wunkaka wuntomba khindusulu’itu? Tulenda kindisa zikhomba ziwombo zi babakala ayi zi bakyeto basola kukadila bobo mu khambu kwela mwingi kutumamana nsiku wu Yave wu ‘kukwedila to mu Mfumu.’ (1 Kolinto 7:39) Bakazi bankinduswanga beni bo banuni bawu ba kubakambanga ti baba zolanga ayi bantondanga mamoso bamvanganga. (Zingana 31:28, 31) Baklisto bankindama mu kimbevo ki ngolo ayi mu zithotolo mu kibila ki kiminu kiawu, mvawu tufweti kuba kindisa. (2 Tesalonika 1:3-5) Yave ayi Yesu bankindisanga baboso bakwikama.—Tanga 2 Tesalonika 2:16, 17.

BAKHULUTU BA KIMVUKA BALENDA KUTUKINDISA

6. Mbi matangu ma Yesaya 32:1, 2 matulonga matedi kiyeku ki bakhulutu ba kimvuka?

6 Tanga Yesaya 32:1, 2Befu twidi mu kuzingila mu bilumbu bi phasi ayi yosokwa thangu mutu kalenda ba mu nganzi voti mu kyunda ayi kuvonga. Yesu Klisto wunsadilanga Baklisto basolwa ayi ‘bana ba ntinu’ voti bakhulutu ba kimvuka bakwikama mwingi kutukindisa. Bakhulutu beni, basi ko “zimfumu” zi kiminu kitu vayi ‘batidi sala yitu va kimweka’  mu kibila ki mamboti mitu. Bawu batidi kutusadisa tuba mayangi ayi bakindama mu kiminu.—2 Kolinto 1:24.

7, 8. Bwidi bakhulutu ba kimvuka balenda kindisila bankaka mu mambu bankoluka ayi bamvanga?

7 Mu thangu bankindisa zikhomba, bakhulutu ba kimvuka balenda landakana ntungulu wu mvwala Polo. Nandi wusonika kwidi Baklisto basi Tesalonika mu thangu baba vyokila mu zithotolo: ‘Mu kibila ki luzolo luwombo twidi mu beno, tubaka makani bika to ma kuluzabikisa zitsangu zimbote zi Nzambi, vayi mwingi kuluyekudila luzingu lwitu, kibila tuluzolanga beni.’—1 Tesalonika 2:8.

8 Bakhulutu ba kimvuka balenda vana khindusulu yiwombo mu mambu bantuba. Buna mawu to balenda vanga? Mvwala Polo wukamba bakhulutu ba kimvuka ki Efeso: ‘Minu yimumonisinanga mu mambu moso ti mufweti sala ngolo; mwingi kusadisa batu badi mu tsatu ayi mutebukanga moyo mambu Mfumu Yesu katuba: ‘Mayangi ma kuvana, malutidi mayangi madi mu kutambula.’’ (Mavanga 20:35) Mvwala Polo wuba wukubama mwingi ‘kukivana ayi kukivana nandi woso’ mu kibila ki zikhomba zyandi. Nandi wumonisa mu mavanga mandi ti nandi wuba wukubama mwingi kuvanga mamoso mu kibila kiawu. (2 Kolinto 12:15) Bobuawu mvandi, bakhulutu ba kimvuka bafweti kukindisa ayi kubomba bankaka kubika to mu mambu bankoluka vayi mu mambu bamvanga. Mawu malenda monisa ti bawu ba kutukyebanga.—1 Kolinto 14:3.

9. Bwidi bakhulutu ba kimvuka balenda vanina malongi mankindisa zikhomba?

9 Mwingi kukindisa zikhomba, bakhulutu khumbu zinkaka bamvananga malongi. Bawu balenda longuka mu Kibibila bwidi balenda vangila mawu mwingi kukindisa zikhomba. Bo Yesu kavulubuka, wuvana kifwani kimboti mu phila yi kuvanina malongi mu zitsangu voti zithumu kafila kwidi bimvuka biba ku Asia Menor. Nandi wuvana malongi mangolo kwidi bimvuka bi Efeso, Pelingami ayi Tiatila. Vayi ava kavana malongi beni, nandi wutonda theti bimvuka byoso mu mambu mamboti bawu baba vanganga. (Nzaikusu 2:1-5, 12, 13, 18, 19) Yesu wukamba kimvuka ki Lawodise: ‘Minu yintumbudilanga ayi yinsembanga baboso yinzolanga. Diawu, monisa kifuza ayi balula mavanga.’ (Nzaikusu 3:19) Bakhulutu ba kimvuka banlandakananga ntungulu wu Yesu mu phila yi kuvanina malongi.

BASI KO TO BAKHULUTU BA KIMVUKA BAFWETI KINDISA BANKAKA

Matata, mwidi mukubika bana binu mwingi bakindisa bankaka? (Tala kitini ki matangu lu 10)

10. Bwidi befu boso tulenda kindisila bankaka?

10 Basi ko to bakhulutu ba kimvuka bafweti kindisa bankaka. Mvwala Polo wukamba Baklisto boso batubanga to ‘mambu madi mambote mankindisa bankaka, boso bwididi zitsatu ziawu mwingi maba ndandu kwidi batu bankuwa mawu.’ (Efeso 4:29) Kadika mutu mu befu kafweti zaba ti bankaka batidi kubaka lusalusu lwitu. Mvwala Polo wusonikina basi Ebeleo: ‘Kindisanu myoko mivonga ayi makungulu malebakana, ayi tatamananu kuludika nzila mu kibila ki malu minu, mwingi mutu widi kulu kubela, kabika luta kufumbuka vayi kabeluka.’ (Ebeleo 12:12, 13) Befu boso tulenda kindisa bankaka mu mambu tunkoluka, kheti twidi matoko.

11. Mbi bisadisa Malata mu thangu kaba mu kyunda?

11 Khomba yimweka bantedilanga Malata waba banga beni mu kyunda. * (Tala matangu  madi va wanda.) Nandi wusonika: “Kilumbi kimweka bo yimana kusambila mwingi Yave kabwela kukhindisa, yizaba khomba yimweka weka kiboba wumbonisina mambote yaba tomba kutambula mu thangu beni. Nandi wukhamba mambu mammonikina ayi mawu maba madedakana na mambu yaba vyokila ayi kyunda kitona kumana.” Khomba beni ḿba kasa zaba ko ti mambu katuba makindisa Malata!

12, 13. Bwidi tulenda sadila dilongi didi mu Filipi 2:1-4?

12 Mvwala Polo wusonikina basi Filipi: ‘Boti vadi khindusulu mu nzila Klisto, boti vadi mbombolo yi luzolo, boti vadi nkangulu mu pheve, mbonosono yi luzolo ayi yi kyadi, buna ludukisa mayangi mami mu kuba mayindu mamweka ayi luzolo lumweka, mu kuba kithwadi, ayi mayindu minu maba madedakana. Lubika vangila mambu mu ziphaka voti mu kutomba nkembo wuphamba; vayi mu kukikulula, luyindula ti bankaka ba mulutidi, mwingi kadika mutu kabika tomba mamboti ma nafeka vayi ma batu bankaka.’—Filipi 2:1-4.

13 Befu boso tufweti tomba ziphila zi kusadisila bankaka. Tulenda kubavana ‘mbombolo yi luzolo,’ ‘nkangulu mu pheve’ ayi ‘mbonosono yi luzolo ayi yi kyadi’ mwingi kukindisa zikhomba zitu zi babakala ayi zi bakyeto.

ZIPHILA ZI KUKINDISILA BANKAKA

14. Mu phila mbi tulenda kindisila bankaka?

14 Tunkwangalalanga beni kuzaba ti batu tusadisa kumbusa, bantatamana kusadila Nzambi. Diawu mvwala Yoane kasonikina ti: ‘Ndisi ko kibila kilutidi buka akiki: Kukuwa ti  bana bami bantatamana kudyatila mu kyedika.’ (3 Yoane 4) Mintwami ntwala miwombo bankwangalalanga beni bo bankwiza bakulanga ti batu basadisa kulonguka kyedika bantatamana kusadila Yave, voti bawu mvawu badi mu kisalu ki ntwami ntwala. Diawu boti ntwami ntwala tummona ti matona kulebakana, tulenda kuntebula moyo mamboti moso kamvanganga mwingi kusadisa bankaka.

15. Mbi tulenda vanga mwingi kukindisa batu badi bakwikama mu kusadila Yave?

15 Misungi miwombo mi mavula ayi bakazi bawu, bantubanga ti bambakanga khindusulu mu thangu bantambulanga minkanda zikhomba bamfilanga mwingi kuba tonda mu kisalu kiawu. Mawu mvandi bakhulutu ba kimvuka, ba misyoni, mintwami ntwala, Zibetelita, ayi baboso bantatamana kusadila Yave bantubanga. Bo tubatebukila moyo, tulenda kubakindisa mu phila yilutidi.

BWIDI BEFU BOSO TULENDA KINDISILA BANKAKA?

16. Mambu mbi malwelo tulenda vanga mwingi kukindisa bankaka?

16 Mbi wulenda vanga boti phasi wummonanga kukindisa bankaka? Bubu didi dyambu diphasi kukindisa bankaka. Monisa disevu dimbote. Boti nandi mengi kuseva, malenda sundula ti mu mambu maphasi kadi mu kuvyokila ayi mutu kantomba kayoluka yandi mwingi kabasisa madi mu ntim’andi. Ngye wulenda kumbomba mu kukuwa mambu kankoluka.—Yakobi 1:19.

17. Bwidi Henrique kabakila khindusulu?

17 Khomba yimweka bantanguninanga Henrique wuba beni mu kyunda bo tat’andi wuba nkulutu wu kimvuka ayi batu bankaka  va dikanda dyandi babika kusadila Yave. Bo nsungi wumweka wu divula kamona phila Henrique kabela mu kyunda, wunnata kuma banwinanga kafi mwingi bayoluka. Nandi wuyuwa bo Henrique kaba kunkamba mambu maba ku tsi ntim’andi ayi wunkindisa mu kuntangila madi mu Minkunga 46, Sefania 3:17, ayi Malako 10:29, 30.

Befu boso tulenda kindisa ayi kubomba bankaka (Tala kitini ki matangu 18)

18. (a) Mbi Ntinu Salomo kasonika matedi kukindisa bankaka? (b) Diyindu mbi dimboti mvwala Polo kavana mu phila yi kukindisila bankaka?

18 Mbi tulenda longuka mu phila Malata ayi Henrique babakila khindusulu? Woso kwa mutu mu befu kalenda bomba ayi kukindisa khomba wuntomba khindusulu. Ntinu Salomo wusonika: ‘Dyambu mu thangu yifwana—dimbanga dimbote beni! Meso manlezama [thalu yi mayangi] mankwangidikanga ntima; tsangu yimbote yinkindisanga mimvesi.’ (Zingana 15:23, 30, tala matangu madi va wanda mu nwt-TPO.) Ngye zebi khomba widi mu kyunda ayi wuntomba khindusulu? Kibila mbi wukhambu kumvangila mwa dyambu dikhambulu phasi, buka kuntagila mwa kilongulu voti mwa dilongi mu khondi mayo? Mvwala Polo mvandi wutuba ti kukuwa minkunga mi Kintinu va kimweka na zikhomba kulenda kutukindisa. Nandi wusonika: ‘Lutatamana kukilonga ayi kukindasana beno na beno mu minkunga ayi kuzitisa Nzambi mu minkunga mi kipheve bankwimbidila mu matondo. Lutatamana kukwimbidila Yave mu ntima woso.’—Kolosai 3:16; Mavanga 16:25.

19. Kibila mbi khindusulu yala bela beni nkinza, ayi mbi tufweti vanga?

19 Bo kilumbu ki Yave kidi mu kufikama, nkinza beni kuyikindasana befu boso. (Ebeleo 10:25) Twala kwangalala befu kuvanga mambu mwala Polo katuba: ‘Lutatamana kukindasana ayi kubombasana beno na beno, dedi bo lweti vangila’ (1 Tesalonika 5:11).

^ Lut. 11 Mazina bavingisa.