Skip to content

Skip to table of contents

Zimbangi zi Yave

Select language Ibinda

Landakana Ntungulu wu Yave—Nzambi Wumvananga Khindusulu

Landakana Ntungulu wu Yave—Nzambi Wumvananga Khindusulu

Bika Nzambi kazitusu . . . nandi wukutubombanga mu ziphasi zitu zyoso.’2 KOLINTO 1:3, 4, tala matangu madi va wanda mu nwt-TPO.

MINKUNGA: 73

1. Bo Adami ayi Eva basumuka, bwidi Yave kavanina khindusulu ayi kivuvu kwidi batu boso?

YAVE widi Nzambi wumvananga khindusulu. Nandi wumvangaga mawu tona mu thangu batu bayiza sumuka. Bo Adami ayi Eva basumuka, muna thangu Yave wuvana mbikudulu yimweka ayi bo batu bala yivisikisa, bala baka khindusulu ayi yala vana kivuvu kwidi batu boso bala butuka kuntwala. Mbikudulu beni yidi mu Ngenesi 3:15 yawu yintuba ti Satana Nkadi’apemba ayi nza kantwadisanga yela tuluka.—1 Yoane 3:8; Nzaikusu 12:9.

YAVE WUKINDISA BISADI BYANDI MU THANGU YIKHULU

2. Bwidi Yave kakindisila Nowa?

2 Yindulabu phila Yave kakindisila kisadi kyandi Nowa. Batu baba zingila mu thangu beni, baba buphunya ayi butsuza vayi Nowa to ayi dikanda dyandi batatamana kubwongimina Yave. Ḿba mambu beni mabina vongisa Nowa. (Ngenesi 6:4, 5, 11; Yuda 6) Vayi Yave wukindisa Nowa mwingi katatamana  kumbwongimina ayi kuvanga mamboti. (Ngenesi 6:9) Yave wukamba Nowa ti yaba fikama thangu mwingi kabunga bankwa mambi ayi Nandi wunsudikisa ma kafweti vanga ayi dikanda dyandi mwingi bavuka. (Ngenesi 6:13-18) Bukyedika, Yave wuba tho yi khindusulu kwidi Nowa.

3. Bwidi Yave kakindisila Yosua? (Tala fikula yidi va thonono.)

3 Kuntwala Yave wuyiza kindisa Yosua kisadi kyandi, ayi wumvana kiyeku ki kutwama ntwala va khati dikabu di Isaeli mwingi kuba kotisa ku Ntoto Kakanikisa dikabu dyandi, ayi kununga masodi ma mimvila baba kalanga kuna. Yave wuzaba ti bakana phamba ko Yosua kaba mwena boma, diawu kakambila Mose: ‘Sola Yosua mwingi katwama ntwala mu dikabu dyami, nkindisa ayi ḿbomba, kibila nandi wunkwiza twadisa nkangu ayi sabuka mwila wu Yolidani ayi kuvana bana ba Isaeli tsi wunkwiza mona.’ (Deutelonomi 3:28) Bosi Yave nafeka wubwe kindisa Yosua ayi wunkamba: ‘Ka wuzimbakana ma yi kukembi: Kindama ayi ba kibakala. Bika kutitubuka ayi kumona boma, kibila Yave Nzambi’aku widi yaku koso ko wunkwenda.’ (Yosua 1:1, 9) Mu mbwenu’aku, bwidi Yosua kamwena bo kayuwa mambu amomo?

4, 5. (a) Bwidi Yave kakindisila bisadi byandi mu thangu yikhulu? (b) Bwidi Yave kakindisila Mwan’andi?

4 Yave mvandi wukindisa dikabu dyandi mu thangu yikhulu. Buka mu thangu dikabu di basi Yuda baba va kivika ku Babiloni, nandi wuzaba ti bawu khindusulu baba tomba, diawu kavanina mbikudulu yiba kindisa, nandi wuba kamba: ‘Bika kumona boma, bila minu yidi yaku. Bika kumona dibamu, bila minu yidi Nzambi’aku, yela kukindisa, ngete yela kusadisa, yela kusimba mu koko kwami ku lubakala ku lunungu.’ (Yesaya 41:10) Bosi Yave wukindisa Baklisto batheti ayi bubu nandi mvandi wutukindisanga.—Tanga 2 Kolinto 1:3, 4.

5 Yave wukindisa mvandi Mwan’andi. Bo Yesu kamana kubotama, bosi mbembo yiba ku diyilu yiyuwakana ayi yituba: ‘Awuwu, Mwan’ami wu luzolo, nyenze yiwombo ka kumbonisanga.’ (Matai 3:17) Wulenda yindula bwidi mambu amomo makindisila Yesu mwingi kuvanga kisalu kyandi ki kusamuna va ntoto?

YESU WUKINDISA BANKAKA

6. Bwidi nongo Yesu kata yilenda kutukindisila?

6 Yesu wulandakana ntungulu wu Tat’andi mu kukindisa bankaka bakindama mu kiminu. Nandi kavangila mawu bo kata nongo yi bitalanta (nongo beni yintubila mfumu yimweka wuvana kisadi kyandi thalu yi zimbongo zi bisengo.) Mfumu’andi wumvutudila: ‘Widi kisadi kimbote ayi kikwikama! Ngyewu wubedi wukwikama mu bima bilwelo. Diawu ndyeka kuvana minswa mu byuma biwombo. Yiza mona mayangi va kimweka yi mfumu’aku.’ (Matai 25:21, 23) Mambu amomo makindisa minlandikini myandi batatamana kusadila Yave mu kiminu!

7. Bwidi Yesu kakindisila bapostolo bandi ayi Petelo?

7 Kheti bapostolo baba sombulanga voti kwambila matedi nani wuluta ba nkinza mu bawu, vayi Yesu wumonisa mvibudulu. Nandi wutatamana kuba kamba ba kikulula ayi kusadila bankaka, mu khambu vingila bawu ba basadila. (Luka 22:24-26) Khumbu ziwombo Petelo mvandi wuvanga mambu manyongisa Yesu. (Matai 16:21-23; 26:31-35, 75) Yesu kasa bika ko Petelo va khonzo.  Vayi nandi wunkindisa ayi wumvana kiyeko ki kukindisa bankaka.—Yoane 21:16.

KHINDUSULU MU THANGU YIKHULU

8. Bwidi Ezekiasi kakindisila zifumu zi masodi ayi batu bankaka ku Yelusalemi?

8 Tona mu thama ava Yesu kiza va ntoto ayi kutuvana kifwani, bisadi bi Yave bazaba mboti ti bafweti kindisanga bankaka. Yindul’abu matedi Ezekiasi. Mu thangu basi Asilia baba tomba kunwanisa basi Yelusalemi, nandi wukutikisa zifumu zi masodi ayi batu bankaka mwingi kuba kindisa, ayi bawu ‘babaka khindusulu mu mambu kabakamba.’—Tanga 2 Lusansu 32:6-8.

9. Mbi tulenda longuka kwidi Yobi mu matedi kukindisa bankaka?

9 Befu mvitu tulenda longuka matedi kukindisa bankaka mu kutala kifwani ki Yobi. Kheti nandi waba tomba kubaka khindusulu, nandi wulonga bankaka matedi bwidi balenda vanina kindusula yimbote. Yobi wukamba babakala bayiza kunkindisa ti boti bawu baba vyokila mu mambu beni khanu nandi wubakamba mambu ma bakindisa, kubika kwandi mambu ma kubatula mu kyunda. (Yobi 16:1-5) Vayi Yobi wubaka khindusulu kaba tomba kwidi Elihu ayi kwidi naveka Yave.—Yobi 33:24, 25; 36:1, 11; 42:7, 10.

10, 11. (a) Kibila mbi mwana Yefeta kaba tombulu khindusulu? (b) Banani tufweti kindisanga bubu?

10 Mwana wu Yefeta mvandi waba tomba khindusulu. Tat’andi, Yefeta wuba mfundusi ayi kinwani kingolo. Bo kaba kwenda kenwana ayi basi Amoni, nandi wukanikisa Yave ti na kunsadisa kununga mvita beni, mutu wutheti wala kundengana bo kala vutuka mu mvita, wala kumvana mwingi kasadila Yave mu luzingu lwandi loso ku tempelo. Basi Isaeli banunga mvita beni, ayi mutu wutheti wudengana Yefeta bo kavutuka, wuba mwan’andi wumweka to. Ntima wu Yefeta wutwasuka. Vayi nandi kasa balula ko mayindu mandi ayi wufila mwan’andi mwingi kasadila ku tempelo mu luzingu lwandi loso.—Nkongudidi 11:30-35.

11 Kheti mawu maba phasi kwidi Yefeta, angi mwan’andi wuluta kumamwena phasi. Vayi, nandi wukikinina kuvanga mambu tat’andi kakanikisa. (Nkongudidi 11:36, 37) Mawu maba sundula ti nandi kalendi ko kukwela ayi kubuta. Maba sundula mvandi ti nkunu wu Yefeta wuba vitila kutsuka. Bukyedika mwan’andi mbombolo ayi khindusulu yiwombo kaba tomba. Kibibila kintuba ti: ‘Bana ba bakyeto ba Isaeli bayiza ba kifu: Ki kukwendanga khumbu zinna mu mvu ku tempelo mwingi kukindisa mwana wu Yafeta, mwisi Ngiladi.’ (Nkongudidi 11:39, 40) Kifwani ki mwana wu Yefeta, ki tutebula moyo zikhomba ziwombo bubu babaka makani ma manga kukwela mwingi kubwela sadila Yave mu phila yifweni. Disi ko diyindu dimbote kuba tonda ayi kuba kindisanga?—1 Kolinto 7:32-35.

BAPOSTOLO BAKINDISA BAKLISTO BANKAKA

12, 13. Bwidi Petelo kakindisila ‘Baklisto bankaka’?

12 Mu bwilu ava Yesu kufwa, nandi wukamba  mvwala Petelo: ‘A Simoni, A Simoni, yuwa! Satana be dinda mwingi ka musosa banga bu beti sosila manya. Vayi minu yimvanganga minsambu mu kibila kyaku, mwingi kiminu kyaku kibika vonga. Diawu bo wunkwiza vutuka, buna kindisa zikhomba ziaku.’—Luka 22:31, 32.

Minkanda mi Bapostolo mikindisa Baklisto mu mbandu yitheti, ayi miawu mi tukindisanga ti bubu (Tala bitini bi matangu 12-17)

13 Petelo wuba wumweka mu zikhomba baba twamanga ntwala mu kimvuka ki Baklisto. (Ngalatia 2:9) Nandi wukindisa Baklisto bankaka mu kubatonda mu phila bamonisina kibakala mu nkungi wu Pantekoti ayi mu mambu mankaka bavyokila kuntwala. Bo kavyokisa mimvu miwombo mu kisalu ki Nzambi, nandi wubwe sonikina Baklisto: ‘Yima kulusonikina nkanda awuwu mu bukhufi, mwingi kulukindisa ayi kulumonisa mu bukyedika ti nlemvo widi mu beno widi nlemvo wukyedika wu Nzambi. Lukindama mu mawu.’ (1 Petelo 5:12) Nkanda wu Petelo wukindisa Baklisto mu thangu’andi. Ayi mvandi wutukindisa bubu, mu thangu tumvingila zikhanu zyoso zi Yave zisalama!—2 Petelo 3:13.

14, 15. Bwidi zibuku mvwala Yoane kasonika zi tukindisilanga?

14 Mvwala Yoane mvandi wuba wumweka mu batu batambula kiyeko mwingi kutwadisa kimvuka ki Klisto. Nandi wusonika buku yintubila kisalu ki kusamuna Yesu kavanga. Buku beni yi Kibibila yima kindisa Baklisto ayi yikhidi ku tukindisa bubu. Dedi mambu Yesu katuba ti luzolo yawu khadulu yinzabikisa Baklisto bakyedika, mu buku yi Yowani  to madi masonama.—Tanga Yoane 13:34, 35.

15 Minkanda mitatu mvwala Yoane kasonika, mwidi mvandi mambu mankinza beni. Mu thangu twidi mu kyunda mu kibila ki disumu tube vanga, tulenda baka mbombolo mu kutanga ti khudulu yi khayilu yi Yesu, ‘yitusukula mu masumu mitu moso.’ (1 Yoane 1:7) Ayi befu tatamana kuba kyunda mu ntima, twala baka mbombolo mu kutanga ti ‘Nzambi lutidi mintima mitu mu buneni.’ (1 Yoane 3:20) Mvwala Yoane nandi to nsoniki wu Kibibila wusonika ti ‘Nzambi nandi luzolo.’ (1 Yoane 4:8, 16) Mu nkanda wumwadi ayi wuntatu kasonika, wukindisa Baklisto ‘batatamana kudyatila mu kyedika.’—2 Yoane 4; 3 Yoane 3, 4.

16, 17. Bwidi mvwala Polo kakindisila Baklisto batheti?

16 Mvwala Polo wuba mvandi kifwani kimboti mu kukindisa zikhomba. Vasa vyoka ko bilumbu biwombo bo Yesu kafwa, bapostolo bawombo basyala ku Yelusalemi, kuba dingumba dintwadisi. (Mavanga 8:14; 15:2) Baklisto baba ku Yuda, baba samunanga matedi Klisto kwidi batu baba kikininanga mu Nzambi. Vayi pheve yinlongo yitwadisa mvwala Polo mwingi kalonga basi Ngeleko, Loma ayi mavula mankaka baba sambilanga zinzambi zi luvunu.—Ngalatia 2:7-9; 1 Timoteo 2:7.

17 Polo wuyenda mu zitsi ziwombo, buka Turkia, ku Grécia ayi Itália. Nandi wulonga batu bakhambu ba basi Yuda baba  zingilanga mu zitsi beni ayi wuzibula bimvuka biwombo bi Baklisto. Luzingu phasi beni luba kwidi Baklisto batheti. Bawu khindusulu yiwombo baba tomba, kibila batu baba zinganga yawu baba kuba thotanga mu ziphila zivyakana.(1 Tesalonika 2:14) Bo vavyoka 50 di mimvu, Polo wusonika nkanda mwingi kukindisa kimvuka kimona kiba ku Tesalonika. Nandi wutuba: ‘Befu tumvutudilanga Nzambi matondo mu kibila kinu ayi tukulutebukilanga moyo mu minsambu mitu, bo tumbanga va meso ma Nzambi ayi Tat’itu, tuntebukanga moyo kiminu kinu kingolo, kisalu kinu ki luzolo ayi mvibudulu’inu mu kibila ki kivuvu twidi mu Yesu Klisto.’ (1 Tesalonika 1:2, 3) Nandi wuba kamba bakindasananga ayi wusonika: ‘Lutatamana kukindasana ayi kubombasana beno na beno, dedi bo lweti vangila.’—1 Tesalonika 5:11.

KHINDUSULU YIMFUMINANGA KWIDI DINGUMBA DINTWADISI

18. Bwidi dingumba dintwadisi mu mbandu yitheti bakindisila Filipi?

18 Mu mbandu yitheti, Yave wusadila dingumba dintwadisi mwingi kukindisa Baklisto boso, kumbunda mvandi bo baba twamanga ntwala mu bimvuka beni. Bo Filipi kalonga matedi Klisto kwidi basi Samali, dingumba dintwadisi dimbwela myoko. Bawu bafila Petelo ayi Yowani, mwingi basambidila Baklisto bamona batambula pheve yinlongo. ( Mavanga 8:5, 14-17) Filipi ayi zikhomba zyoso zimona zi babakala ayi zibakyeto babaka khindusulu yiwombo mu lusalusu batambula lufumina kwidi dingumba dintwadisi.

19. Bwidi Baklisto bamwena bo batambula nkanda wufumina kwidi dingumba dintwadisi?

19 Kuntwala, dingumba dintwadisi baba tomba kubaka makani mu dyambu dimweka dinkinza. Kyuvu kiba vawu, Baklisto bakhambu ba basi Yuda mvawu bafweti zengoso nyitu yi bubakala dedi buntubila Nsiku wu Mose? (Mavanga 15:1, 2) Bo dingumba dintwadisi badinda pheve yinlongo ayi bafyongunina masonoko manlongo, bawu bamona ti kuzenga nyitu yi babakala disa ba ko dyambu dimfunu mutu kafweti vanga theti mwingi kaba nlandikini wu Yesu. Bosi bawu basonika makani beni ayi bafila zikhomba mwingi kuzabikisa mawu mu bimvuka. Bo Baklisto batanga nkanda beni, ‘bawu bayangalala ayi babaka khindusulu.’—Mavanga 15:27-32.

20. (a) Bwidi Dingumba Dintwadisi di tukindisilanga bubu? (b) Kyuvu mbi twala baka mvutu mu dinlongi dinkwiza?

20 Bubu, Dinguba Dintwadisi di Zimbangi zi Yave bamvananga khindusulu kwidi zikhomba zinsadilanga ku Beteli, zikhomba badi mu kisalu ki kusamuna thangu ka thangu ayi befu baboso. Dedi zikhomba mu mbandu yitheti, befu mvitu tunkwangalalanga bo tuntambulanga khindusulu. Diawu mwingi kukindisa bo babika kimvuka bavutuka, mu mvu 2015 Dingumba Dintwadisi babasisa buku yintuba Volte para Jeová. Bukyedika ti zikhomba bantwadisanga kimvuka bawu to bafweti kindisa bankaka? Befu twala baka mvutu mu dilongi dinkwiza.

Yesu wukindisa Petelo ayi wumvana kiyeku ki kukindisa bankaka