Skip to content

Skip to table of contents

Zimbangi zi Yave

Select language Ibinda

Nzila yi Kubakila Kiphwanza Kikyedika

Nzila yi Kubakila Kiphwanza Kikyedika

‘Diawu, boti mwana wulukudidi, buna lwela baka kiphwanza kikyedika.’YOANE 8:36.

MINKUNGA: 5436

1, 2. (a) Mbi batu bamvanga mwingi kubwela baka kiphwanza? (b) Vayi tsukuku mbi bambakanga?

BUBU, batu bawombo mu nza yimvimba bantubila matedi kuzingila mu kiphwanza ayi baboso batidi kuzingila mu minswa mimweka. Bawombo bantomba kubika nzingulu yi buphumbulu, yi kithatu ayi nzingulu yikhambu yisonga. Bankaka batidi baba bikila lwaku lu kutuba ma batidi kutuba, kusola ma batidi kusola ayi kuzingila mu phila batidi kuzingila. Batu mu bibwangu byoso batidi kuzingila mu kiphwanza.

2 Mwingi babwela kubaka kiphwanza, batu bankutakananga mwingi kubayisa ayi kubalukila zimfumu zi luyalu. Kheti bobo, bawu bambakanga kyuma bantomba? Mve. Kibila mambu bamvanganga, mambwelanga kutwadisa ziphasi ayi lufwa. Mambu Ntinu Salomo kasonika mu buku yi Mpovi 8:9 madi makyedika: ‘Mutu wunyalanga wunkaka mu tsukulu yimbi mu nafeka.’

3. Mbi tulenda vanga mwingi tubaka mayangi ayi kiphwanza kikyedika?

3 Kibibila kitukamba mbi tufweti vanga mwingi tubaka mayangi  ayi kiphwanza kikyedika. Mvwala Yakobi wusonika: ‘Woso mutu wunlandakananga bumboti minsiku mifwana myomi mimvananga kiphwanza ayi widi wukangama mu miawu . . . wela mona mayangi mu mambu moso kamvanga.’ (Yakobi 1:25) Minsiku misonga kwidi Yave mimfuminanga ayi nandi zebi bilutidi mu befu mwingi tubaka mayangi makyedika mu luzingu. Yave wuvana Adami ayi Eva kiphwanza kikyedika ayi byabyoso baba tomba mwingi baba mayangi.

THANGU BATU BABA KIPHWANZA KIKYEDIKA

4. Kiphwanza mbi Adami ayi Eva baba? (Tala fikula va thonono.)

4 Mu thangu tuntanga Ngenesi kapu 1 ayi 2, tulenda longuka ti Adami ayi Eva baba ntindu kiphwanza batu bubu banyindulanga kubaka. Kibila bawu baba bima byoso bawu baba tomba, basa ba ko boma bu ni kyuma kimvela, ayi ni mutu wuba kuba vangilanga mambu makhambu masonga. Bawu babasa kwazukilanga ko matedi bidya, kisalu, kubela ayi lufwa. (Ngenesi 1:27-29; 2:8, 9, 15) Mansundula ti bawu baba nswa wu kuvanga mamoso baba tomba? Ndoko tutala.

5. Kheti mu phila batu banyindudilanga, mbi bintombulu mwingi kubaka kiphwanza?

5 Batu bawombo banyindulanga ti kubaka kiphwanza kikyedika kunsundula ti bawu balenda vanga kyoso kyuma mu khambu tadila mambu mammonika kuntwala. Buku yimweka yizabakana yintuba ti kiphwanza kinsundula “dyela twidi di kusola ayi kuvanga mambu tubesola.” Kiawu kintumba mvandi ti batu bambakanga kiphwanza bo ntinu kakhambu tula ndilu yinkwiza ba yimbi, yiphamba ayi yikhambu yisonga. Mawu mansundula ti kutula ndilu nkinza kwidi mwingi kubaka kiphwanza. Vayi, nani widi nswa wu kutukamba ti ndilu beni yidi yimbote voti yifwana?

6. (a) Kibila mbi Yave nandi to widi kiphwanza kyoso? (b) Ntindu kiphwanza mbi batu balenda baka, ayi mu kibila mbi?

6 Nkinza beni tutebukanga moyo ti Yave Nzambi nandi to widi kiphwanza ki khambu tsukulu. Mu kibila mbi? Kibila nandi wuvanga byuma byoso ayi nandi lutidi zangama mu nza yimvimba. (1 Timoteo 1:17; Nzaikusu 4:11) Ntinu Davidi wusadila bikuma bifwana mwingi kumonisa buneni bu Yave. (Tanga 1 Lusansu 29:11, 12.) Vayi, kiphwanza ki bivangu byoso bidi ku diyilu ayi va ntoto, kidi kiphwanza kidi ndilu voti kidi tsukulu. Yave Nzambi wuntoba befu tuvisa ti nandi to widi nswa wu kutsikika mambu mambote ayi mafwana. Diawu tona vana thonono, Yave katudila minsiku bivangu byandi bafweti landakana.

7. Byuma mbi bi tuvananga mayangi befu tufweti kuvanga?

7 Kheti Adami ayi Eva baba kiphwanza, kiawu kiba na ndilu. Zindilu beni ziba zifwana mu bawu. Dedi mo batatamana kuzinga bawu baba tombila kuvumuka, kudya ayi kulala. Mawu mansundula ti bawu basa ba ko kiphwanza? Mve. Yave wutomba kuzaba ti byuma beni binkwiza bavana mayangi. (Minkunga 104:14, 15; Mpovi 3:12, 13) Befu boso tuntyanga kuvumukanga buboti, kudya byuma tulutidi zola ayi kuvyokisa bubote bwilu. Tumonanga ko phasi kuvanga mawu. Adami ayi Eva bamwena mvandi bobo.

8. Nsiku mbi Nzambi kavana Adami ayi Eva, ayi mu kibila mbi?

8 Yave wuvana nsiku wumweka kwidi Adami ayi Eva. Nandi wubakamba babuta bana,  bawesa ntoto, ayi ba wukyeba. (Ngenesi 1:28) Nsiku beni kaba vana waba sundula ti bawu basa ba ko kiphwanza? Mve! Angi nandi wubavana nsiku beni mwingi kubavana lwaku lu kubalula ntoto wuba paladizu, voti kibwangu mwingi bazingila mvu ka mvu na bana bawu. Mawu maba makani ma Yave. (Yesaya 45:18) Bubu, bo mutu kabakidi makani ma kukhambu kwela voti kubuta bana, nandi kasi nlevula ko nsiku wu Yave. Kheti mawu mantwadisanga mwa ziphasi, vadi batu bankwelanga ayi bambuta bana. (1 Kolinto 7:36-38) Mu kibila mbi? Kibila bazebi ti vadi mambu mankaka mamboti bamvingilanga kubaka va dikwela. (Minkunga 127:3) Boti Adami ayi Eva batumamana Yave, khanu babaka dikwela ayi dikanda di mayangi mu mvu ka mvu.

BWIDI BAZIMBISILA KIPHWANZA KIKYEDIKA?

9. Kibila mbi nsiku wu Nzambi widi mu Ngenesi 2:17 wukhambu bela wuphamba angi wufwana ayi wusonga?

9 Yave wuvana Adami ayi Eva nsiku wunkaka ayi wuba sudikisa mambu malenda kuba monikina ba kubayisa wawu. Nandi wutuba: ‘Vayi nti wu nzayilu wu mambu mamboti ayi mambi, wubika dya makundi ma nti beni; kibila kilumbu wala dya mawu bukyedika, ngyewu wala fwa.’ (Ngenesi 2:17) Nsiku beni wuba wuphamba voti wisa ba ko wufwana ayi wusonga? Nsiku beni wubotula kiphwanza Adami ayi Eva baba? Ndamba. Mimfyongunini miwombo mi Kibibila bantubanga ti nsiku Nzambi kaba vana wuba wu ndwenga ayi tsundu wuba. Wumweka mu bawu wutuba ti nsiku beni wutulonga “ti Nzambi to zebi malutidi mboti . . . mu batu ayi nandi to zebi mvandi makhambulu mamboti . . . mu bawu. Mwingi kuzingila mu phila ‘yimboti,’ batu bafweti fyatila Nzambi ayi kuntumamana. Ba manga kuntumamana, Nzambi wuba bikilanga baveka babaka makani mu mambu bammona ti madi mamboti . . . ayi mambi.” Vayi phasi beni batu kuvanga mawu baveka.

Lukanu Adami ayi Eva babaka lutwadisa ziphasi. (Tala bitini bi matangu 9-12)

10. Kusola dyambu tidi kuvanga, kunsundula mvandi kuba kiyeku ki kutsika mboti ayi mbi? Sudikisa.

10 Batu bankaka balenda yindula ti Yave kasa vana ko Adami ayi Eva kiphwanza bawu baba tomba kubaka. Vayi bawu basa zaba ko ti diswasana didi kusola dyambu tidi kuvanga ayi kuba kiyeku ki kutsikika mboti ayi mbi. Adami ayi Eva baba kiphwanza ki kusola kutumukina Nzambi voti ndamba. Vayi Yave, nandi to widi nswa wu kutsikika mambu mambote ayi mambi. Ayi ‘nti wu nzayilu wu mambu mamboti ayi mambi’ kiba kivisa ki nswa beni kwidi Adami ayi Eva. (Ngenesi 2:9) Befu twisi ko bu kuzabila mambu malenda monika kuntwala mu makani tumbaka, voti kuzaba ti makani mitu mamboti to mala tutwadisila. Diawu tumwenanga ti kheti batu badi makani mamboti mu mambu batidi kuvanga, kuntwala bankwiza monanga ziphasi mu kibila ki makani beni. (Zingana 14:12) Bukyedika, mambu moso batu balenda vanga, bawu badi ndilu. Bo kavana Adami ayi Eva nsiku wu kubika kudya makundi ma nti wunani, Yave wubalonga  ti bawu bafweti kuntumukina mwingi babaka kiphwanza kikyedika. Mbi Adami ayi Eva basola kuvanga?

11, 12. Kibila mbi makani Adami ayi Eva babaka maba twadisila ziphasi? Ayi bwidi tulenda fwanikisina mawu?

11 Kyadi ayi kyunda, Adami ayi Eva basola kulevula nsiku wu Yave. Eva wusola kuwilukila Satana bo kankanikisa: ‘Meso minu mela zibuka ayi mwala ba buka Nzambi, mu kuzaba mambote ayi mambi.’ (Ngenesi 3:5) Bukyedika kwandi ti Adami ayi Eva babaka kiphwanza mu mambu bavanga, dedi bo Satana ka bakambila? Ndamba, basa baka ko. Bawu babakula mawu mu ziphasi bamonikina bo bamanga kutumukina thwadusulu yi Yave. (Ngenesi 3:16-19) Mu kibila mbi? Kibila Yave kasa vana ko batu nswa wu kutsikika baveka mambu madi mamboti ayi mambi.—Tanga Zingana 20:24 ayi tala matangu va wanda (nwt-TPO); Yelemia 10:23.

12 Tulenda fwanikisa mawu buka mutu wunnata lupulanu. Mwingi kavitila bumboti ku kibwangu kankwenda, kafweti sadila mboti bisengu bidi mu khati lupulanu, kulandakana zithwadusulu ba kumvana kwidi dingumba di batu didi va tsi dintwadisanga zi lupulanu. Vayi na kuvangila mambu mu phil’andi, mambu mambi malenda kummonikina. Dedi mutu awowo wunnata lupulanu, Adami ayi Eva basola kubayisa Nzambi ayi kuvangila mambu mu phil’awu. Bwidi mawu masundukila? Makani mawu matwadisa disumu ayi lufwa mu baveka ayi nkunu’awu woso. (Loma 5:12) Adami ayi Eva basa baka ko kiphwanza baba tomba mu kukwedika kutsikika baveka mboti ayi mbi. Vayi bawu  bazimbisa na kiphwanza kifwana Yave kaba vana.

BWIDI BU KUBAKILA KIPHWANZA KIKYEDIKA?

13, 14. Bwidi tulenda bakila kiphwanza kikyedika?

13 Bawombo bambadilanga ti kuba kiphwanza kikhambu ndilu bulutidi. Mawu makyedika kwandi? Kheti kuba kiphwanza ndandu yiwombo kulenda kututwadisa, vayi yindula boti kadika mutu kalenda vanga kwandi moso mambu katidi, khanu bwidi nza ayiyi yimana bela? Buku yimweka yizabakana yintuba ti minsiku mi zitsi zyoso, phasi midi mu kuvisa, kibila minsiku beni mifweti kyeba batu ayi mvandi kutula ndilu mu mambu bakhambulu nswa. Kutumamana miawu disi ko dyambu dilwelo ayi kiawu kibila kwididi minsiku miwombo mintombulu batu bazebi miawu ayi mimfundusi mwingi kusudikisa miawu kwidi batu mu phila bafweti sadila miawu.

14 Yesu Klisto wusudikisa ma tufweti vanga mwingi tubaka kiphwanza kikyedika. Nandi wutuba: ‘Beno kusimbidila malongi mami, buna lwidi minlonguki miami mikyedika, beno lwela zaba kyedika ayi kyedika kyela kulukula.’ (Yoane 8:31, 32) Mwingi tubaka kiphwanza kikyedika, mambu mwadi tufweti vanga. Ditheti, tufweti kikinina mambu makyedika Yesu kalonga. Dimwadi, tufweti ba minlandikini myandi. Bukyedika, befu kuvanga mawu twala baka kiphwanza ki kyedika voti twala botuka va kivika. Va kivika ki mbi? Yesu wutuba: ‘Woso mutu wumvanganga masumu, buna nandi mvika wu masumu.’ Nandi wubwe tuba: ‘Diawu enati Mwana wulukudidi, buna mukyedika  lwala baka kiphwanza kikyedika.’—Yoane 8:34, 36.

15. Kibila mbi kiphwanza Yesu kakanikisa kilenda kutuvanina ‘kiphwanza kikyedika’?

15 Kiphwanza Yesu kakanikisa minlandikini myandi kilutidi mbote na kiphwanza batu bantombanga bubu. Bo Yesu katuba, ‘boti Mwana wulukudidi, buna mukyedika lwala baka kiphwanza kikyedika,’ nandi waba tubila matedi kubaka kiphwanza voti kukulwa va buvika bu disumu, buvika bulutidi phasi woso kwa mutu kalenda vyokila. Vayi, bwidi befu twididi mimvika mi disumu? Disumu dimvanganga befu kuvanga mambu mambi. Diawu dilenda tula nkaku mwingi tubika vanga mambu tuzebi ti madi mambote voti malutidi mu befu. Ayi diawu dintwadisanga ziphasi, kyunda, lufwa ayi malema. (Loma 6:23) Mvwala Polo wumona ti ziphasi zinneni kuba mvika wu disumu. (Tanga Loma 7:21-25.) Bo twala botuka va kivika ki disumu, bosi twala baka kiphwanza kikyedika ki Adami ayi Eva baba va thonono.

16. Bwidi tulenda bakila ‘kiphwanza kikyedika’?

16 Bo Yesu katuba ti ‘beno kusimbidila malongi mami’ mambu amomo mammonisa ti boti befu tutidi Yesu katukula, vadi mambu tufweti vanga. Mambu mbi? Bo twidi Baklisto ba kivana, befu tufweti kukimanga ayi kukikinina ndilu Yesu katsikika kwidi minlandikini myandi. (Matai 16:24) Dedi bo Yesu kakanikisila, befu twala baka kiphwanza kikyedika, bo twala baka ndandu yoso mu khayilu yi khudulu.

17. (a) Bwidi tulenda bakila mayangi makyedika? (b) Mbi tunkwiza longuka mu dilongi dinkwiza?

17 Mwingi tubaka mayangi makyedika, tufweti tumamana malongi ma Yesu banga minlandikini myandi. Befu kuvanga mawu, befu tulenda kulwa va kivika ki masumu ayi lufwa. (Tanga Loma 8:1, 2, 20, 21.) Mu dilongi dinlanda, twala longuka bwidi tulenda sadila mu dyela mwa kiphwanza twidi bubu mwingi mvu ka mvu tuzitisa Yave, Nzambi yi kiphwanza kikyedika.

Yave, nandi to widi nswa wu kutsikika mambu mambote ayi mambi