Skip to content

Skip to table of contents

Zimbangi zi Yave

Select language Ibinda

 DILONGI 5

Zikhadulu Zituvanga Kuzola Kwendanga mu Zikhutukunu

Zikhadulu Zituvanga Kuzola Kwendanga mu Zikhutukunu

“Luyamikisanga lufua lu Mfumu nate kela kuiza.”1 KOLINTO 11:26.

NKUNGA 18 Vutula Matondo mu Khudulu

MAMBU TWANLONGUKA *

1-2. a) Mbi Yave kammonanga bo biveve bi batu bankwenda mu lukutukunu lu Bidya Bimfumu va Masika ma Bwilu? (Tala foto yidi va busu bu levista.) (b) Mbi tunkwiza tubila mu dilongi adidi?

YINDUL’ABU mbi Yave kammonanga bo biveve na biveve bi batu mu nza yoso bankutakana mu lukutukunu lu Bidya Bimfumu va Masika ma Bwilu. Nandi katadilanga ko to thalu yi batu; vayi wuntadilanga kadika mutu widi mu lukutukunu beni. Buka, nandi wummonanga bisadi byandi bikwikama banlandakananga lukutukunu beni mimvu myoso. Mu bawu valenda ba batu bankwizanga mu lukutukunu beni kheti bamvyokila mu zithotolo ziwombo. Bankaka bayizanga ko thangu zyoso mu zikhutukunu zinkaka, vayi bawu bantadilanga Mbambukulu Moyo buka lukutukunu lunkinza beni bafweti landakana. Yave wummonanga mvandi batu bo bankwenda mu Mbambukulu Moyo mu khumbu yitheti, ḿba kibila bantomba kuzaba kwandi to bwindi bumvanginanga lukutukunu beni.

2 Bukyedika, Yave wunkwangalalanga beni kumona batu bawombo kukwenda mu lukutukunu lu Mbambukulu Moyo. (Luka 22:19) Vayi dyambu Yave kanlutanga kuvwa nkinza yisi ko thalu yi batu bankwendanga mu lukutukunu beni. Vayi Nandi wunluta vwa nkinza kibila batu beni bankwizilanga mu Mbambukulu Moyo. Mu dilongi adidi, tunkwiza tubila kyuvu kimweka kinkinza: Kibila mbi tufweti kwendila mvandi mu zikhutukunu zinkaka zi Baklisto, bika to mu lukutukunu lu Mbambukulu Moyo?

(Tala lutangu 1-2) *

KUKIKULULA KUTUVANGA KWENDANGA MU ZIKHUTUKUNU

3-4. (a) Kibila mbi tunkwendilanga mu zikhutukunu? (b) Mbi kukwenda mu zikhutukunu kummonisa matedi befu?(c) Mu kutadila mantuba 1 Kolinto 11:23-26, kibila mbi tufweti bika khambu kwendanga mu Lukutukunu lu Mbambukulu Moyo?

3 Befu tunkwendilanga beni mu zikhutukunu zi kimvuka bila  yidi phila yi kubwongimina Yave ayi muawu mvandi nandi katulongilanga. Batu badi lungundayi bakikininanga ko ti bafweti kubalonga. (3 Yoane 9) Vayi befu tunkwangalala kuzaba ti Yave wunsadilanga kimvuka kyandi mwingi kutulonga.—Yesaya 30:20; Yoane 6:45.

4 Bo tunkwendanga mu zikhutukunu tummonisanga ti twidi batu bakikululanga—ayi badi bakubama mwingi kulonguka. Va bwilu bu Mbambukulu Moyo lufwa lu Yesu, befu tunkwendanga mu lukutukunu beni lunkinza bika ti kukwika batukwikanga vayi mu kukikulula tunlandakananga lutumu lu Yesu lu: ‘Kutatamana kuvanganga mawu mwingi kumbambukilanga moyo.’ (Tanga 1 Kolinto 11:23-26.) Lukutukunu beni lunkindisanga kivuvu kitu mu mambu mankwiza ayi lututebula moyo luzolo Yave kadi mu befu. Vayi Yave zebi ti tufweti baka khindusulu bika to khumbu mweka mu mvu. Nandi wuntwadisanga zikhutukunu mu kadika sabala ayi wutukindisa mwingi tulandakana ziawu. Khadulu yi kukikulula, yala tusadisa kutumamana. Befu tumvyokisanga thangu yiwombo mu kukubama mu kadika sabala mwingi kukwenda mu zikhutukunu beni.

5. Kibila mbi batu bakikululanga bambikilanga Yave kabalonga?

5 Yave wuntumisa batu bawombo mwingi nandi kabalongisa, ayi batu bawombo bakikululanga bankikinanga. (Yesaya 50:4) Bawu bankwalalanga beni kulandakana lukutukunu lu Mbambukulu Moyo, ayi bantonanga kulandakana zikhutukunu zinkaka. (Zakalia 8:20-23) Va kimweka befu boso tunzolanga Yave katulonga ayi katutwadisa, bila nandi wutusadisanga ayi wutukyebanga. (Minkunga 40:17) Bukyedika, mbi bilenda luta tutwadisa mayangi—voti bilenda luta nkinza—ke kukikinina Yave ayi Mwan’andi kanzolanga batulonga?—Matai 17:5; 18:20; 28:20.

6. Bwidi khadulu yi kukikulula kusadisa dibakala dimweka kukwenda mu Lukutukunu lu Mbambukulu Moyo?

6 Kadika mvu, befu tumvanganga mangolo mwingi kutumisa batu bawombo tunnunga kutumisa mwingi baba mu Mbambukulu Moyo lufwa lu Yesu. Batu bawombo bakikululanga bambakanga ndandu bo bankikinina kwiza mu zikhutukunu zitu. Tala kifwani akiki. Mimvu miwombo kumbusa, dibakala dimweka wutambula nkanda wu kutumisa batu mu Mbambukulu Moyo, vayi nandi wukamba khomba wumvana nkanda beni ti kasinkwenda ko. Vayi, va bwilu bu lukutukunu lu Mbambukulu Moyo, khomba wuntumisa wuyituka bo kamona dibakala beni widi mu kudyata kuthati Nzo yi Kintinu. Dibakala beni wuzola phila zikhomba banyambila ayi nandi wutona kulandakanga zikhutukunu zyoso. Zikhutukunu zitatu to nandi kakhambu ba mu mvu woso wulanda. Mbi bimvanga kulandakana zikutukunu zyoso? Nandi wuba beni mutu wumboti, diawu kabaludila mayindu mandi. Khomba wuntumisa wutuba: “Nandi widi mutu wu kukikululanga beni.” Bukyedika, Yave wutumisa dibakala adyodi mwingi Kambwongimina, ayi bubu nandi widi khomba wubotama.—2 Samueli 22:28; Yoane 6:44.

7. Bwidi mambu tulongukanga ayi tutanganga mu Kibibila matusadisanga kuba batu bakikululanga?

7 Byuma tunlongukanga mu zikhutukunu ayi mu Kibibila bilenda tusadisa kuba batu ba kukikululanga. Mu zisabala zimbanga ava Mbambukulu Moyo, zikhutukunu zitu zintubilanga beni kifwani ki Yesu ayi khadulu yi kukikulula kamonisa bo kavana moyo’andi mwingi kutukula. Ayi mu bilumbu bimbanga ava Mbambukulu Moyo, batukindisa tutanga matangu ma Kibibila mantubila lufwa ayi luvulubukusu lu Yesu. Mambu tunlonguka mu zikhutukunu azyozi ayi mambu tuntanga mu Kibibila matukindisa tubwela vutula matondo mu nkhayilu Yesu kavana mu kibila kitu. Befu tunlandakananga kifwani kyandi ki kukikulula ayi kuvanga luzolo lu Yave, kheti  bo tumvyokila mu mambu maphasi.—Luka 22:41, 42.

KIBAKALA KITUSADISANGA KWENDA MU ZIKHUTUKUNU

8. Bwidi Yesu kamonisina kibakala?

8 Tumvanga mvandi mangolo ma kulandakana kifwani ki Yesu ki kumonisa kibakala. Yindul’abu kibakala nandi kamonisa ava lufwa lwandi. Nandi wuzabi ti mu thangu yikhufi zimbeni zyandi bela kumvangila mambu matsoni, kumbula ayi kumvonda. (Matai 20:17-19) Kheti bobo, nandi wukikana kufwa. Bo thangu yifwana, nandi wukamba bapostolo bandi bakwikama baba yandi ku Ngetesemani: “Telamanu, tuendanu, tala mutu wowo wukuphakusa fikimini.” (Matai 26:36, 46) Ayi bo dingumba diyiza kumbwila dituka, nandi wuba vantwala, wutuba ti nandi Yesu, ayi wukamba masodi babika bapostolo bandi. (Yoane 18:3-8) Bukyedika, kibakala kiwombo Yesu kamonisa! Bubu, Baklisto basolo ayi mameme mankaka bamvanganga mangolo ma kulandakana kifwani ki Yesu ki kumonisa kibakala. Bwidi?

Kibakala wummonisanga bo wunkwenda mu zikhutukunu zi Baklisto kinkindisanga bankaka (Tala lutangu 9) *

9. (a) Kibila mbi tuntombila kibakala mwingi kulandakana zikhutukunu zyoso? (b) Bwidi kifwani kitu kilenda sadisila zikhomba zitu badi mu buloku mu kibila ki kiminu kiawu?

9 Mwingi kulandakananga zikhutukunu zyoso, tufweti monisanga kibakala bo tumvyokila mu mambu maphasi. Zikhomba zinkaka zi babakala ayi zi bakyeto bankwendanga mu zikhutukunu kheti bamvyokila mu mambu maphasi, badi mu kyunda voti buvinya buawu bwisi ko bumboti. Bankaka bammonisanga kibakala mu kukwenda mu zikhutukunu kheti basi dikanda voti mintinu mi nza bakubathota. Yindul’abu bwidi kifwani kitu kinkindisilanga zikhomba zitu badi mu buloku mu kibila ki kiminu kiawu. (Ebeleo 13:3) Bo bankuwa ti tukhidi sadila Yave kheti bo tumvyokila mu zithotolo, bawu bambakanga khindusulu mwingi batatamana bakwikama ayi kumonisa kibakala. Mvwala Polo wuvyokila mvandi mu mambu amomo. Bo kaba ku buloku ku Loma, nandi wuyangalala beni bo kayuwa ti zikhomba zyandi bantatamana kusadila Nzambi mu lukwikumunu. (Filipi 1:3-5, 12-14) Ḿba ava kabasika ku buloku voti bo kabasika, Polo kasonika nkanda kwidi basi Ebeleo. Mu nkanda beni, nandi wukindisa Baklisto bakwikama babika “luzolo lu kikhomba [lutatamana]” ayi babika zimbakana kukutakana va kimweka.—Ebeleo 10:24, 25; 13:1.

10-11. (a) Banani tufweti tumisa mu Mbambukulu Moyo? (b) Bwidi matangu ma Efeso 1:7 mammonisina ti tufweti vanga mawu?

10 Tumonisanga mvandi kibakala bo tuntumisa basi dikanda, bansalanga yitu, ayi bankalanga yitu va nsengi mwingi baba mu Mbambukulu Moyo. Kibila mbi tuba tumisinanga? Mwingi kuvutula matondo mambu Yave ayi Yesu batuvangilanga. Diawu tuntumisanga batu beni mu Mbambukulu Moyo. Befu tuntomba bawu balonguka bwidi balenda bakila ndandu mu ‘nlemvu’ wu Yave mu nzila khudulu.—Tanga Efeso 1:7; Nzaikusu 22:17.

11 Bo tummonisa kibakala mu kukutakana va kimweka, befu tummonisanga khadulu yinkaka Nzambi ayi Mwan’andi bammonisanga mu phila yilutidi.

 LUZOLO LUTUVANGANGA KWENDA MU ZIKHUTUKUNU

12. (a) Bwidi zikhutukunu zimbwela kindisanga luzolo lwitu mu Yave ayi Yesu? (b) Mambu mbi matangu ma 2 Kolinto 5:14, 15 matukindisa tuvanga mwingi kulandakana kifwani ki Yesu?

12 Luzolo lwitu mu Yave ayi Yesu lutuvanganga kwenda mu zikhutukunu. Diawu, mambu tunlonguka mu zikhutukunu mambwelanga kindisa luzolo lwitu mu Yave ayi Mwan’andi. Zikhutukunu zitutebulanga moyo mambu bawu batuvangilanga. (Loma 5:8) Mbambukulu Moyo yitutebulanga moyo luzolo luwombo bawu badi, bika to mu bisadi biawu vayi kubunda mvandi bo bakhambu vwanga nkinza khudulu. Mu kibila ki mayangi mawombo twidi, befu tumvanganga mangolo ma kulandakana kifwani ki Yesu mu phila tunnatina luzingu lwitu kadika kilumbu. (Tanga 2 Kolinto 5:14, 15.) Mvandi luzolo lutuvanga kuzitisa Yave mu kutuvana khudulu. Phila yimweka tulenda kunzitisila yidi mu kuvananga mimvutu mikyedika mu zikhutukunu.

13. Bwidi tulenda monisina luzolo luwombo mu Yave ayi Mwan’andi? Sudikisa.

13 Tulenda monisa luzolo luwombo mu Yave ayi Mwan’andi mu kuba bakubama mwingi kubika kyoso kyuma mu kibila kiawu. Khumbu ziwombo tufweti bika byuma binkaka mwingi tuyenda mu zikhutukunu. Bimvuka biwombo bankutakananga kutsuka kilumbu, ayi batu bansalanga balenda ba bavonga. Ayi lukutukunu lunkaka kutsuka sabala bo batu bankaka bantomba kuvunda nkadu. Bukyedika ti Yave wummonanga bo tunkwendanga mu zikhutukunu kheti twidi bavonga? Ngete, nandi wummonanga ayi wumvwanga beni nkinza mangolo tumvanganga mwingi kukwenda mu zikhutukunu.—Malako 12:41-44.

14. Bwidi Yesu kabikila ntungulu wumboti mu kumonisa luzolo lu kuyimanga?

14 Yesu wutubikila ntungulu mu matedi kumonisa luzolo lu kuyimanga. Nandi kasa ba ko to wukubama mwingi kufwila mu kibila ki minlonguki myandi, vayi wutula mvandi zitsatu ziawu va theti mu luzingu lwandi bika kwandi zyandi. Dedi, bo kabalonganga minlandikini myandi kheti mu thangu kaba wuvonga. (Luka 22:39-46) Ayi wutsikika mayindu mu mambu kalenda kubavangila, bika ti mu byuma kalenda tambula kwidi bawu. (Matai 20:28) Boti luzolo twidi mu Yave ayi mu zikhomba zitu lwidi lungolo, befu twala vanga mangolo mwingi kuba mu lukutukunu lu Bidya Bimfumu va Masika ma  Bwilu, ayi mvandi mu zikhutukunu zyoso zi kimvuka.

15. Banani tutidi kuluta sadisanga?

15 Befu twidi mu dingumba di zikhomba zi Baklisto bakyedika mu nza yimvimba, ayi tunkwangalala beni kusadila thangu’itu mwingi kutumisa batu bamona babundana yitu. Diawu tutidi kuluta sadisanga ‘zikhomba zitu mu kiminu’ vayi bo babika kubwe samunanga voti kwenda mu zikhutukunu. (Ngalatia 6:10) Befu tummonisanga luzolo twidi mu bawu mu kubakindisa balandakana zikhutukunu zitu, ayi mvandi Mbambukulu Moyo. Dedi Yave ayi Yesu, befu tunkwalalanga beni kumona mutu wubika kimvuka kubwe vutuka kwidi Tat’andi yi luzolo, Yave.—Matai 18:14.

16. (a) Bwidi tulenda kuyikindasana befu na befu, ayi bwidi zikhutukunu zyala kutusadisila? (b) Kibila mbi ayiyi yidi thangu yimboti mu mvu mwingi kutebuka moyo mambu Yesu katuba madi mu Yoane 3:16?

16 Mu zisabala zinkwiza, tumisa batu wunnunga kutumisa mwingi baba mu Mbambulu Moyo mu Kintanu, kilumbu 19, Ngonda Yinna, mvu 2019. (Tala quadro “Ngye Wala Kubatumisa?”) Mu mvu woso, tulenda kuyikindasananga mwingi kulandakana zikhutukunu zyoso Yave katukubikilanga. Bo tsukulu yi nza ayiyi yidi mu kufikama, zikhutukunu zyala tusadisa tutatamana kukikulula, kuba kibakala ayi kumonisa luzolo. (1 Tesalonika 5:8-11) Mu ntim’itu woso, tumonisanu mabanza twidi mu Yave ayi Mwan’andi mu kibila ki luzolo luwombo badi mu befu!—Tanga Yoane 3:16.

NKUNGA 126 Kindama, Kotuka ayi Kala Kibakala

^ Lut. 5 Lukutukunu lu Mbambukulu Moyo lufwa lu Yesu lwala ba mu kintanu, mu kilumbu 19, Ngonda Yinna, mvu 2019, lwala ba lukutukunu lulutidi nkinza mu mvu. Mbi bituvanganga kulandakana lukutukunu beni? Bukyedika befu tuntomba kukwangidika Yave. Mu dilongi adidi, tunkwiza tubila zikhadulu mbi zituvanganga kuzola kwendanga mu zikhutukunu.

^ Lut. 50 MAMBU MADI MU ZIFIKULA: Biveve na biveve bi batu mu nza yoso bakubayambanga buboti mu lukutukunu lu Bidya Bimfumu va Masika ma Bwilu.

^ Lut. 52 MAMBU MADI MU ZIFIKULA: Khomba mweka widi mu buloku mu kibila ki kiminu kyandi, wumbaka khindusulu mu nkanda babemfila kwidi dikanda dyandi. Mu kuzaba ti banzimbakana ko, nandi wunkwangalala kutambula zitsangu zimboti zitedi dikanda dyandi badi mvandi bakwikama mu Yave kheti badi mu kuvyokila mu mambu matedi política va kizunga kiawu.