Skip to content

Skip to table of contents

Zimbangi zi Yave

Select language Ibinda

Ntindu Mbi Luzolo Luntwalanga Mayangi Makyedika?

Ntindu Mbi Luzolo Luntwalanga Mayangi Makyedika?

‘Lusakumunu kwidi batu bobo Yave kadidi Nzambi.’​—MINKUNGA 144:15.

MINKUNGA: 111, 109

1. Kibila mbi thangu ayiyi yididi diswasana na thangu zinkaka zi mavyoka?

BEFU twidi mu kuzingila mu thangu yidi beni diswasana na zithangu zinkaka zima vyoka. Yave widi mu kukhupika nkangu wu ‘batu wu zitsi, mimvila ayi zimbembo zyoso’ dedi bo Kibibila kibikudila. Bawu badi ‘dikabu di ngolo’ mwidi mafunda na mafunda ma batu ba mayangi ‘bansadilanga [Nzambi] bwilu ayi mwinyi.’ (Nzaikusu 7:9, 15; Yesaya 60:22) Kwisi ko thangu batu bama luta zola Nzambi ayi kuzola batu bankaka buka mu thangu ayiyi.

2. Ntindu mbi luzolo tummonanga kwidi batu bakhambulu bakundi ba Yave? (Tala foto yidi va thonono)

2 Vayi, Kibibila mvandi kibikula ti mu bilumbu bitu, batu bakhambu ba bakundi ba Yave, bala monisa ntindu wunkaka wu luzolo. Ntindu luzolo beni lutedi kukizola to ngye veka. Mvwala Polo wusonika ti mu bilumbu bitsuka, batu bala ‘kuyizola beni bawu veka, bala luta zola zimbongo, ayi ‘bela luta zola zinyenze zi nza kuvyoka kuzola Nzambi.’ (2 Timoteo 3:1-4) Ntindu luzolo beni, diswasana lwidi ayi luzolo twidi mu  Nzambi. Kutomba to mamboti miti, kutwadisanga ko mayangi. Kheti batu bankaka banyindudilanga buawu, vayi baveka bambwelanga ziphasi mu luzingu luawu ayi lu bankaka.

3. Mbi tunkwiza longuka mu dilongi adidi, ayi mu kibila mbi?

3 Mvwala Polo wuzaba ti batu beni bala ba buka ntambu kwidi baklisto. Diawu kalubudila zikhomba “batatuka” batu bammonisanga ntindu luzolo beni. (2 Timoteo 3:5) Vayi befu twisi ko bu kubatatukila mu ziphila zyoso. Bwabu, mbi tulenda vanga mwingi tu kikeba mu batu badi zikhadulu beni ayi kukwangidika ntima wu Yave, Nzambi yi luzolo? Ndoko tumona diswasana didi mu luzolo Yave kantomba befu tuba ayi luzolo bantubila mu nkanda wu 2 Timoteo 3:2-4. Bosi tulenda kukifyongunina ayi kubila bwidi tulenda monisina ntindu luzolo lwela tuvana mayangi ma kyedika.

LUZOLO MU NZAMBI VOTI MU BEFU VEKA?

4. Kibila mbi disi ko dyambu dimbi kuba luzolo mu befu veka?

4 Polo wusonika: ‘Batu bala kuyizola beni bawu veka.’ Mansundula ti tulendi kukizola ko befu veka? Mve, kukizola befu veka buboti beni ayi dyambu dinkinza, kibila naveka Yave wutuvangila buawu. Yesu wutuba: ‘Zola wadi yaku banga bu weti kukizodila ngye veka’ (Malako 12:31) Bukyedika, befu tulendi ko zola bankaka befu manga kukizola befu veka. Kibibila mvandi kitukamba: ‘Babakala bafueti zola bakyetu bawu banga bo beta zodila zinyitu ziawu. Bila bakala dyeta zola nkyeto’andi, buna weti kukizola naveka. Bila kwisi ko mutu weta lenda nyitu’andi. Vayi wukuyidikilanga ayi wukuyikebanga.’ (Efeso 5:28, 29) Diawu tulenda tubila ti disi ko dyambu dimbi kuba luzolo mu befu veka.

5. Bwidi wulenda fwanikisila batu bakizolanga beni?

5 Luzolo lu ngye veka bantubila mu 2 Timoteo 3:2, lwisi ko luzolo lu kyedika. Vayi luzolo lu kukizola beni befu veka, lumvanganga mutu kayindula to matedi naveka ayi zitsatu zyandi to zibanga va ntwala. (Tanga Loma 12:3.) Mutu wuphila ayoyo mvandi kavwanga ko nkinza zitsatu zi batu bankaka. Boti mambu mansi nkwenda ko buboti nandi wutombanga kuvana fotu bankaka bika kwandi naveka. Ntangi wumweka wu Kibibila wufwanikisa mutu wuphila ayoyo, buka ngumbi wunkotalalanga naveka mwingi kabaka mbazu, vayi bankaka wubamonisinanga to mintobo myandi. Batu ba phila ayoyo basi ko mayangi mu luzingu.

Ntindu luzolo Yave kantomba mu befu, luzolo lumbutanga zikhadulu zimbote

6. Ndandu mbi tulenda baka befu zola Nzambi?

6 Minsoniki minkaka mi Kibibila bankikininanga ti mvwala Polo katubila khadulu beni va theti, kibila yawu yintwadisanga zikhadulu zinkaka zimbi katubila. Vayi ntindu luzolo Nzambi kantomba befu tukuna, luntwadisanga zikhadulu zinkaka zimbote. Buka mayangi, ndembama, mvibudulu, mambote, kiminu ayi kukiyala. (Ngalatia 5:22, 23) Diawu Nsoniki wu minkunga wusonikina: “Lusakumunu kuidi batu bobo Yave  kadidi Nzambi.” (Minkunga 144:15) Yave widi Nzambi yi mayangi ayi dikabu dyandi mvandi bafweti ba mayangi. Bafweti ba diswasana na batu bakizolanga beni baveka voti banyindulanga to balenda tambula. Vayi bisadi bi Yave badi mayangi kibila bansadisanga bankaka.—Mavanga 20:35.

Bwidi tulenda bela keba keba mwingi manga ba luzolo mu befu veka, mu zimbongo ayi zinyenze zi nza? (Tala matangu 7)

7. Byuvu mbi bilenda kutusadisa kufyongunina luzolo twidi kwidi Yave?

7 Bwidi tulenda zabila ti luzolo twidi mu befu veka luma vyoka luzolo twidi mu Nzambi? Yindulabu diyindu dituba nsoniki wumweka: ‘Kadi diambu dimosi lulendi vangila mu ziphaka ko voti mu diambu di tomba nkembo wuphamba ko vayi mu kukikulula, bika kadika mutu kayindula ti niandi kasi mfunu ko; wunkaka wunlutidi. Kadika mutu kabika tomba mambote mandi veka vayi kabanzila mamboti ma batu bankaka.’ (Filipi 2:3, 4) Tulenda kuyikuvusa: ‘Minu yinkuwanga dilongi adyodyo? Yimvanganga mambu Yave katidi yivanga? Yimbilanga phila yi kusadisilanga zikhomba mu kimvuka voti mu kisalu ki kusamuna?’ Bukyedika disi ko diambu dilwelu kuvanga mawu. Malenda sundula kubotula beni thangu ayi kuzimbankana mambu mavyokidi nkinza voti tunzolanga. Vayi vasi ko kima kilenda kutuvana mayangi malutidi na kuzaba ti tunkwangidika ntima Yave.

8. Mbi baklisto bankaka bavanga mu kibila ki luzolo badi mu Yave?

8 Mu kibila ki luzolo badi mu Yave ayi mu kutomba kunsadila mu ntima woso, baklisto bawombo bambikanga bisalu mwingi bwela kukivana mu kisalu ki Yave. Mawu khomb’itu Ericka kavanga. Nandi widi Dotora, vayi wubika kisalu kyandi mwingi kaba ntwami ntwala. Nandi ayi nnuni’andi babaka beni lwaku lu kusadisa batu bawombo mu zitsi  zinkaka. Nandi wutuba: “Mambu mawombo tuyiza zaba mu kusadila mu kimvuka ki mbembo yinkaka yiba beni tsatu ayi tuvanga kikundi na zikhomba ziwombo, mawu mabwela mayangi mu luzingu lwitu.” Ericka wukhidi sala buka Dotora, vayi wunlutanga sadila mangolo ayi thangu’andi mu kulonga batu matedi Yave ayi kusadisa zikhomba mu kimvuka. Nandi wuntubanga ti mawu “ma kuntwadisanga mayangi makyedika mu luzingu.”

NGYE TIDI KUBA KISINA KU DIYILU VOTI VA NTOTO?

9. Kibila mbi batu banzolanga beni zimbongo bakhambulu mayangi?

9 Polo wusonika ti batu “bala luta zola zimbongo.”Mu mimvu mima vyoka kumbusa khomba mweka widi ntwami ntwala ku Irlandia, wuvana dibakala dimweka kimbangi matedi dyambu di Nzambi. Dibakala beni wuzibula mwa pasta yiba yandi, wiza titika minkanda mi zimbongo ayi wunkamba: “Ayiyi yawu nzambi’ama!” Bawombo balenda manga kukikinina diyindu adyodyo, vayi yawu phila batu bawombo banyindudilanga. Banluta zolanga zimbongo ayi byuma bansumba. Vayi Kibibila ki tulubula ti ‘mutu wunzolanga palata kavongana ko kutomba palata, ayi wunzolanga busina kavonganga kubaka ndandu.’ (Mpovi 5:10) Mutu wuzolanga beni zimbongo kamonanga ko ti zima fwana. Vayi wuntombanga thangu zyoso kubwe baka zilutidi ayi makuntwadisanga “ziphasi ziwombo.”—1 Timoteo 6:9, 10.

10. Mbi Kibibila kintuba matedi buphumbulu ayi busina?

10 Bukyedika ti befu boso tuntombanga zimbongo. Kibila zitusadisanga kukeba mambu mankaka. (Mpovi 7:12) Vayi tulenda ba mayangi enati twisi ko zimbongo ziwombo? Ngete! (Tanga Mpovi 5:12.) Anguli mwana Yake wutuba mu lusambulu: ‘Ka wubika yiba buphumbulu voti yiba busina. Vayi phana bidya bifwana.’ Kibila mbi Anguli kamangina kuba buphumbulu? Nandi wutuba ti mwingi kabika kwiba, ayi kufingisa dizina di Nzambi. Vayi kibila mbi kamangina kubela busina? Nandi wusonika: ‘Mwingi yibika kuyifyatila ayi kuzimbakana Nzambi, voti yituba ‘nani Yave?’’ (Zingana 30:8, 9) Bukyedika vadi batu bawombo bamfyatilanga beni busina kubika kwandi Nzambi.

11. Mbi Yesu katuba matedi zimbongo?

11 Mutu wuntyanga beni zimbongo kalendi kwangidika ko Nzambi. Yesu wutuba: ‘Kwisi ko mutu wulenda sadila zimfumu wadi mu khumbu yimweka bila wela lenda wumweka ayi zola wunkaka; voti wela singimina wumweka ayi wela lenda wunkaka. Mulendi sadila ko Nzambi ayi zimbongo.’ Nandi mvandi wutuba: ‘Lubika yidika kimvwama va ntoto bila tselele ayi khazu-khazu bilenda bivisa ayi mivi balenda kwiba. Vayi yidikanu kimvwama beni ku diyilu, kuna tselele ayi khazu-khazu yilendi bivisa ko ayi mivi milendi kwiba ko.’—Matai 6:19, 20, 24.

12. Bwidi kudekula nzingulu’itu kulenda tusadisa kusadila buboti Yave? Vana kifwani kimweka.

12 Bisadi biwombo bi Yave bantombanga kudekula nzingulu’awu. Bawu bazabizi ti kuzingila mu phila ayoyo, yi kubavana thangu yi kusadila Yave ayi kuba mayangi. Jack wunzingilanga ku Estados Unidos wusumbisa nzo’andi yinneni ayi bima byandi kaba sumbisanga mwingi kabaka bu kukotila mu kisalu ki ntwami ntwala ayi nkazi’andi. Nandi wutuba: “Disa ba ko dyambu dilwelu kusumbisa nzo’itu yimboti ayi byuma bi luvalu biba yitu ku bwala.” Khomb’itu kabakila  makani amomo, kibila mimvu miwombo kaba vutukanga ku nzo mu nganzi mu kibila ki mambu mawombo maba monikanga ku kisalu kyandi. Nandi wutuba: “Nkazi’ama bo kadi mu kisalu ki ntwami ntwala wukadidila mu mayangi. Nandi wu kukhambanga, ‘minu yidi mfumu yilutidi mbote!’ Bubu minu mvama yeka mu kisalu ki ntwami ntwala ayi befu babwadi tunsadilanga to mfumu yimweka, Yave.”

‘Nzingul’ami yimmonisanga ti yinkikininanga ma Kibibila kantuba matedi zimbongo?’

Bwidi tulenda bela keba keba mwingi manga ba luzolo mu befu veka, mu zimbongo ayi zinyenze zi nza? (Tala matangu 13)

13. Mbi bilenda kutusadisa kukifyongunina phila tummwenanga zimbongo?

13 Bo tumfyongunina phila tummwenanga zimbongo, befu tufweti visa mayindu mitu mu kuyikuvusa: ‘Mu luzingu lwama, yimmonisanga ti yidi mana mu mambu Kibibila kintuba mu matedi zimbongo? Zimbongo zyawu yintulanga va theti mu luzingu lwama? Minu yinlutanga vwa nkinza byuma bi nza kuvyoka kikundi kyama na Yave ayi batu? Yidi lufyatu ti Yave wunkwiza tsadisa mu mambu moso ma luzingu?’ Befu tulenda ba lufyatu ti Yave wala sadisa baboso ba kumfyatilanga!—Matai 6:33.

BEFU YAVE TUNZOLANGA VOTI ZINYENZE ZI NZA?

14. Didi dyambu dimbi kutadila zinyenze zi nza mu phila yifwana?

14 Kibibila mvandi kibikula ti mu bilumbu bi tsuka batu bala luta ‘zola zinyenze zi nza.’ Dedi bo befu tuzabidi disi ko dyambu dimbi kubaka zimbongo ayi kuzingila mu phila yifwana. Batu bankaka bankikininanga ti dyambu dimbi kuvyokisa nkadu thangu yi manyenzi, vayi masi ko mawu Yave kantomba mu befu. Kibibila kintuba: ‘Yenda, ayi dya mapha maku mu nyenze, ayi nwa vinu’aku mu ntima wuyangalala.’​—Mpovi 9:7.

15. Mbi binsundula kuba ‘mutu wunzolanga beni zinyenze zi nza?

15 Mu 2 Timoteo 3:4 yintubila batu banzolanga zinyenze zi nza ayi bambikanga Nzambi va ndambu mu luzingu luawu. Wummona ti matangu beni masintuba ko ti batu bala zola zinyenze zi nza kuvyokila Nzambi. Vayi mantuba ti bawu bala zola zinyenze zi nza “kubika kwandi” Nzambi. Nsoniki wumweka wutuba mu matedi matangu amomo: “Batu matangu amama kantubila, basi ko kheti mwa nkadu luzolo mu Nzambi, vayi bazolanga ko Nzambi mu luzingu luawu loso.” Dyawu ayiyi, yidi ndubu yimboti kwidi batu banzolanga beni zinyenze zi nza. Kibibila kimfwanikisa batu bobo buka bawu ‘bandyatuswanga mu zinyenze zi nza.’—Luka 8:14.

16, 17. Kifwani mbi kimbote Yesu kavana mu matedi zinyenze zi nza?

16 Yesu wumonisa kifwani kimboti mu matedi phila yifwana yi kutadila zinyenze zi nza. Nandi wuyenda mu minkungi myodi, ‘wu dikwela’ ayi ‘nkungi wunkaka wunneni.’(Yoane 2:1-10; Luka 5:29) Mu nkungi beni wutheti bo vinu yimana, Yesu wuvanga mangitukulu ayi wukitula nlangu vinu yimboti yi kunwa. Kilumbu kinkaka bo batu baba seva Yesu bo kaba dya ayi nwa va meso ma batu boso, nandi wubamonisina ti bawu babasa tadilanga ko zinyenze zi nza mu phila yifwana. —Luka 7:33-36.

 17 Vayi bobuawu, Yesu kasa bika ko zinyenze zi nza ziluta nkinza mu luzingu lwandi. Nandi wutula luzolo lu Yave va ntwala ayi wuvanga mamoso mwingi kusadisa bankaka. Nandi wukikinina bambanda va dikunzi mwingi kuvukisa batu ba masumu. Diawu Yesu kakambila baboso batidi kunlandakana: “Khini kwidi benu enati ba kulufinganga, enati bakulu landakana ayi enati bakuluvuninanga mambu mambimbi maphila mu phila mu diambu diami. Lumona kwinu khini lusakalala bila mfutu wunneni wukuluvingila ku diyilu. Luzaba mboti ti mimbikudi mi lutwamina bawu mvawu batovuka.—Matai 5:11, 12.

18. Byuvu mbi bilenda kutusadisa kuyifyongunina matedi mambu ma nza?

18 Mbi bilenda kutusadisa kuyifyongunina matedi mambu ma nza?

Bwidi tulenda bela keba keba mwingi manga ba luzolo mu befu veka, mu zimbongo ayi zinyenze zi nza? (Tala matangu 18)

Tulenda kuyikuvusa: ‘Bisavu bivyokidi nkinza mu luzingu lwami na zikhutukunu voti kukwenda mu kisalu ki kusamuna? Minu yidi wukubama mu kubika byuma yinzolanga mwingi kusadila Nzambi? Thangu yinsola bisavu, yi kuyikuvusanga bwidi Yave kammwenanga biawu? Befu kuzola Nzambi, twala vanga mangolo mwingi kukwangidika ntim’andi ayi twala vanga bika to mambu tuzebi nandi kanlendanga vayi kheti mambu malenda kumbika mu kyunda.—Tanga Matai 22:37, 38.

BWIDI BU KUBAKILA MAYANGI MAKYEDIKA?

19. Ntindu mbi batu balendi ba ko mayangi makyedika?

19 Nza Satana yimvanganga batu kutovuka mu 6.000 di mimvu. Ayi Bubu tummona ti batu bawombo mu nza bantulanga mayindu mawu mu zimbongo ayi mambu ma nza. Bawu bantombanga to kubaka ayi zitsatu zyawu to bantulanga va ntwala mu luzingu luawu. Vayi batu ba phila ayoyi, basi ko mayangi makyedika. Kibila Kibibila kintuba: “Lusakumunu kuidi mutu wowo widi ti Nzambi yi Yakobi niandi nsandisi’andi, wuntulanga diana diandi mu Yave, Nzambi’andi.”—Minkunga 146:5.

20. Bwidi luzolo lwaku mu Yave lukutwadisilanga mayangi?

20 Bisadi bi Yave badi luzolo lukyedika mu nandi. Ayi mu kadika mvu bawombo badi mu kuvanga mangolo mwingi kuzaba Yave ayi kunzola. Mambu moso amomo, mammonisa ti Kintinu ki Yave kidi mu kuyala , ayi thangu yilwelu yima syala mwingi kutwala mambote va ntoto. Befu vanga mambu Yave kantomba, twala yangidika ntim’andi ayi mawu mala tuvana mayangi makyedika. Ayi baboso banzolanga Yave bala zingila mu mayangi mvu ka mvu! Mu dilongi dinkwiza twala tubila zikhadulu zimbi ayi bwidi zididi diswasana na zikhadulu zimbote bisadi bi Yave badi.