Skip to content

Skip to table of contents

Zimbangi zi Yave

Select language Ibinda

“Yuwa Tsembolo ayi Ba Ndwenga”

“Yuwa Tsembolo ayi Ba Ndwenga”

Bana bami . . . Yuwanu tsembolo ayi banu ndwenga.”​—ZINGANA 8:32, 33.

MINKUNGA: 56, 89

1. Bwidi tulenda bakila ndwenga, ayi bwidi yawu yala tusadisila?

NDWENGA, kwidi Yave yimfuminanga, ayi nandi wunkabilanga yawu bankaka. Buka mu nkanda Yakobi 1:5 yintuba: ‘Enati vadi mutu mu beno khambulu ndwenga buna bika kalomba kwidi Nzambi wumvananga mu luzolo kwidi batu boso ayi nandi wumvananga mu khambu tsembolo.’ Kukikinina tsembolo yi Nzambi yidi phila tulenda bakila ndwenga. Kuvanga mawu malenda kutu kyeba mu mambu mambi, mvandi mala tusadisa kufikama Yave. (Zingana 2:10-12) Ayi malutidi nkinza, befu twala baka luzingu lu mvu ka mvu.​—Yuda 21.

2. Bwidi tulenda longukila kuzola tsembolo yi Nzambi?

2 Bo twidi batu ba masumu ayi tuyonzukila mu phila yivyakana, tulenda mona mwa phasi kukikinina tsembolo voti kutadila yawu mu phila yimboti. Vayi befu kukikinina ayi kumona ndandu tsembolo yi Nzambi yidi mu luzingu lwitu, bosi tulenda visa phila Yave katuzodilanga. Zingana 3:11, 12 yi tukamba: ‘Mwan’ami, ka wumanga tsembolo yi Yave.’ Bosi wubwe tuba: ‘Mutu Yave kanzolanga nandi kansembanga.’ Tulenda ba lufyatu ti Yave mamboti mitu to kantombanga. (Tanga Ebeleo 12:5-11.) Yave bo ka tuzebi bumboti, diawu tsembolo’andi yikadila yifwana mu befu. Mu dilongi adidi, tunkwiza tubila mambu ma nna matedi tsembolo: (1) Kuyisemba (2) tsembolo matata bafweti vana bana bawu,  (3) tsembolo tuntambulanga mu kimvuka, ayi (4) dyambu dilutidi phasi kena tsembolo.

KIBILA MBI YIDI MBONOSONO YI NDWENGA KUYISEMBA?

3. Bwidi mwana kalenda kunina khadulu yi kuyisemba? Vana kifwani.

3 Befu kuba kifu ki kuyisemba, twala zaba mvandi kuyadila nzigulu’itu ayi mabanza mitu. Befu twisa butuka ko ayi khadulu beni vayi tufweti ku yikuna. Tulenda fwanikisa mawu buka mwana banlonga kwidi tat’andi kudyatisa mvelo. Mwingi mwana kasikama mu mvelo, tata kafweti simbanga mvelo mu bilumbu bitheti. Vayi bumvyokila thangu, tata na kumona ti mwan’andi matona kutsikika naveka mvelo ayi kudyatisa wawu, kalenda kumbikila. Buawu bwididi mvandi mu thangu matata bankonzudilanga bana bawu ‘mu tsembolo ayi mu malongi ma Yave’ ayi bansadisanga bana bawu bazaba kuyisemba ayi baba ndwenga.​—Efeso 6:4.

4, 5. (a) Kibila mbi kuyisemba kwididi nkinza mu ‘kimutu kitu kimona’? (b) Kibila mbi tufweti bika bela mu kyunda kheti tubwidi mu nzimbala?

4 Mawu mvandi mammonikanga kwidi batu bankwiza zabilanga Yave mu bukhulutu. Bawu balenda kuawu kuyisemba, angi bawu babedya ko Baklisto bayela mu kipheve. Vayi ba kutona kuvwata ‘kimutu kimona’ ayi kutona kulandakana Yesu, bawu bankwiza konzukanga mu kipheve. (Efeso 4:23, 24) Kuyisemba kutusadisanga ‘mwingi tubika lenzanga Nzambi, tubika zinzinunu zi nza. Vayi tuzingila mu thangu ayiyi, mu khambu phulu yidya ayi yinwa. Tuzingila mu busonga, mu khinzukulu yi Nzambi.’​—Tito 2:12.

5 Bubu mvandi twidi befu boso batu ba masumu. (Mpovi 7:20) Befu kubwa mu nzimbala, mansundula ti twisi ko kifu ki kuyisemba? Mve. Kibila Zingana 24:16 yi tulonga ti: ‘Mutu wusonga kalenda bwa sambwadi di zikhumbu, vayi nandi wala bwe telama.’ Mbi byala tusadisa ‘kubwe telama’? Zisi ko zingolo zitu veka, vayi pheve yi Nzambi. (Tanga Filipi 4:13.) Mu mbutu wu pheve, kukiyala yidi mvandi momo ayi yawu yidi khadulu yidedakana na kuyisemba.

6. Bwidi wulenda bela nlonguki wumboti wu Dyambu di Nzambi? (Tala fikula yidi va thonono.)

6 Lusambulu, ndongukulu yi Kibibila ayi kufyongunina mambu tuntanga, mala tusadisa kubwela zaba kukiyala. Mbi wulenda vanga boti phasi wummona kulonguka Kibibila voti wuzolanga ko kulonguka yawu? Bika kuvonga. Ngye kutya, Yave wala kusadisa kuba “phuila” mu kulonguka Dyambu dyandi. (1 Petelo 2:2) Diawu, dinda Yave ka kusadisa wuzaba kukiyala mwingi wubaka thangu yi kulonguka Kibibila. Ngye wulenda tona kulonguka mu thangu yikhufi. Malembe malembe, wala bwela mona nyenze mu kulonguka ayi ngyewu wala zola thangu wumvyokisanga mu kufyongunina mayindu ma Yave masonama mu Kibibila.​—1 Timoteo 4:15.

7. Bwidi kuyisemba kulenda ku tusadisila kununga makani twidi mu kisalu ki Yave?

7 Kuyisemba ku tusadisanga kununga makani twidi mu kisalu ki Yave. Dedi tata wumweka bo kamona kifuzi kyandi kudekuka, nandi wubaka makani ma kuba ntwami ntwala. Bwidi kuyisemba kunsadisila? Nandi wutanga zilevista zitu zintubila matedi kisalu ki ntwami ntwala ayi wunata mawu  mu lusambulu. Kuvanga mawu kusadisa kikundi kyandi na Yave kiba kikinda. Nandi wutona kusala buka nsadisi wu mintwami ntwala ayi kasa bika ko ni kyuma kivungikisa makani mandi. Bosi wuyiza ba ntwami ntwala.

YONZUDILA BANA BAKU MU TSEMBOLO YI YAVE

Bana bo bambutukanga bazabanga ko kuswasisa mambote ayi mambi, diawu bafweti kuba kubika (Tala lutangu 8)

8-10. Mbi bilenda sadisa matata kukonzula mboti bana bawu mwingi basadila Yave? Vana kifwani.

8 Yave wuvana matata kiyeku ki kukonzula bana bawu ‘mu tsembolo ayi mu malongi ma Yave.’ (Efeso 6:4) Bukyedika ti phasi beni kuvanga mawu mu thangu ayiyi tunzingila. (2 Timoteo 3:1-5) Bo bana bambutukanga, bazabanga ko diswasana didi mu mamboti ayi mambi, ayi mayindu mawu mayonzukidya ko. Diawu matata bafweti kubasemba mwingi kuba kubika. (Loma 2:14, 15) Mutu wumweka wumfyonguninanga mambu ma Kibibila wutuba ti kikuma ‘kusemba’ mu Kingeleko kilenda sundula ‘ndyonzukulu yi mwana,’ voti ‘kukonzula mwana mwingi kaba mayindu ma bukhulutu.’

9 Matata ba kusembila bana bawu mu luzolo, bana bambanga nsika. Banlongukanga ti kiphwanza kidi na ndilu ayi makani moso bambaka mu luzingu luawu madi tsundukulu yimbi voti yimboti. Nkinza beni  kwidi matata badi Baklisto kufyatila mu ndwenga yi Yave mwingi kukonzula mboti bana bawu. Phila yi kukonzudila bana yivyakana mu kadika tsi, ayi mayindu amomo makhidi baluka. Vayi matata bankuwilanga Nzambi, balendi tesa ko phila bafweti konzudila bana bawu, mvandi balendi fyatila ko mu dyela diawu voti mu ndwenga yi batu ba nza.

10 Befu tulenda longuka mu kifwani ki Nowa. Bo Yave kankamba katunga nzaza, Nowa kasa zaba ko phila kafweti tungila yawu. Vayi nandi wufyatila mu thwadusulu yi Yave, ayi Kibibila kintuba ti Nowa wuvanga ‘bo Yave kankambila.’ (Ngenesi 6:22) Bwidi masundukila? Nzaza yivukisa luzingu lu Nowa ayi dikanda dyandi. Nowa mvandi wuba tata yimboti. Mu kibila mbi? Kibila nandi wufyatila mu ndwenga yi Nzambi. Nandi wulonga bana bandi bumboti ayi wuba ntungulu wumboti mu bawu. Disa ba ko dyambu dilwelo kukyeba dikanda ava khuka minlangu.​—Ngenesi 6:5.

11. Bwidi matata balenda kubikila bana bawu?

11 Boti ngyewu widi tata, bwidi ngye wulenda landikinina ntungulu wu Nowa? Mu kukuwilanga Yave ayi mu kubikila nandi ka kusadisa kukonzula bana baku. Wulenda vangila mawu mu kusadilanga malongi mamfumina mu Dyambu dyandi ayi mu kimvuka kyandi. Kuntwala, bana baku balenda kutonda mu mangolo wumvanganga mu kubalonga. Khomba mweka wutuba: “Yintonda beni mu phila yimboti matata mami bandyonzudila. Bawu bavanga mamoso mwingi kukuna kyedika mu ntim’ama.” Nandi wutuba mvandi ti matata mandi bansadisa kabwela kufikama Yave. Bukyedika ti khumbu zinkaka matata balenda vanga mangolo moso mwingi kulonga mwana, angi mwana kalenda banda Yave mbusa. Vayi boti bawu bavanga mamoso mwingi kunlonga, bawu balenda ba mayindu makuluka ayi kuba lufyatu ti mwan’awu wala vutuka mu myoko mi Yave yosokwa thangu.

12, 13. (a) Boti mwana bamvayikisi mu kimvuka, bwidi matata bafweti monisina ti bantumukina Nzambi? (b) Bwidi dikanda dimweka babakila ndandu bo matata mawu batumukina Yave?

12 Matata mankaka, dyambu dinlutanga kuthota kiminu kiawu bo mwana kavengi disumu dingolo ayi bamvayikisidi mu kimvuka. Khomba wumweka wu nkyeto widi mwana bavayikisa mu kimvuka wutuba: “Minu yaba tombanga phwasa mu bilongulu bitu mwingi kubaka bu kuvyokisila thangu na mwan’ama ayi ntekulu’ama.” Vayi nnuni’andi wunsadisa kumona ti bawu basa ba ko fotu mu mambu mamonikina mwan’awu ayi baba tombila kuba bakwikama kwidi Yave.

13 Kuntwala, mwan’awu wuvutuka mu kimvuka. Mam’andi wutuba: “Bubu nandi wu kuthelanga ayi wu kutsonikinanga bilumbu byoso. Ayi nandi wunkinzikanga beni nnuni’ama ayi minu veka, kibila nandi zebi ti befu tutumamana Nzambi. Befu twidi kikundi kimbote.” Boti mwan’aku nandi bavayikisi mu kimvuka, bukyedika kwandi ti ngye wela ‘fyatila Yave mu ntim’aku woso’? Wala kummonisa ti ‘wisi ko lufyatu mu luzabu lwaku’? (Zingana 3:5, 6) Tebuka moyo ti tsembolo yi Yave yi tumonisa ndweng’andi ayi luzolo lwandi mu befu. Bika kuzimbakana ti nandi wuvana Mwan’andi mu kibila ki batu boso, kubunda mvandi mwan’aku.  Nzambi tidi batu boso babaka luzingu lu mvu ka mvu. (Tanga 2 Petelo 3:9.) Diawu matata, tatamananu kufyatila ti tsembolo yi Yave ayi thwadusulu’andi yidi yisonga, kheti khumbu zinka phasi kutumukina yawu. Yuwa tsembolo yi Nzambi ayi bika kuyibanda mbusa.

MU KIMVUKA

14. Bwidi tumbakilanga ndandu mu thwadusulu Yave ka tuvananga mu nzila ‘nnanga wukwikama’?

14 Yave wukanikisa kutwadisa, kukeba ayi kulonga kimvuka ki Baklisto. Nandi wumvangilanga mawu mu ziphila ziwombo. Buka, nandi wusola Mwan’andi mwingi kukeba kimvuka, ayi Yesu wusola ‘nnanga wukwikama’ mwingi kuvana bidya bi kipheve mwingi ku tusadisa kuba kiminu kikinda. (Luka 12:42) ‘Nnanga’ beni, wutuvananga thwadusulu voti tsembolo. Ngye ḿba wuntebuka moyo mu thangu wuyuwa dilongi di Kibibila voti wutanga dilongi mu zilevista zitu, ḿba mambu beni ma kusadisa kubalula phila wunyindudilanga voti wumvangilanga mambu. Ngye wulenda kwangalala bo wununga kubalula nzingulu’aku, kibila mawu mansundula ti ngyewu widi mu kubikila Yave ka kusemba.​—Zingana 2:1-5.

15, 16. (a) Bwidi tulenda bakila ndandu mu kisalu ki bakhulutu ba kimvuka? (b) Bwidi tulenda sadisila bakhulutu ba kimvuka kuvanga kisalu kiawu mu mayangi?

15 Klisto wutuvana mvandi bakhulutu bankyebanga kimvuka mu luzolo. Kibibila kintedila zikhomba beni ‘makaba ma batu.’ (Efeso 4:8, 11-13) Bwidi tulenda bakila ndandu mu kisalu ki bakhulutu ba kimvuka? Tulenda landakana kiminu kiawu ayi ntungulu’awu wumboti, ayi tulenda landakana mvandi malongi batuvananga mabongulu mu Kibibila. (Tanga Ebeleo 13:7, 17.) Bakhulutu ba kimvuka batuzolanga beni ayi batidi tufikama Nzambi. Boti bawu bamweni ti twisi nkwendanga ko mu zikhutukunu voti tusyedi ko kifuza mu kisalu ki kusamuna, mu thinu bawu batusadisanga. Bawu bala tukuwa ayi bala tukindisa mu malongi madi mu Kibibila. Ngye wisimmona ko ti lusalusu luawu yidi mbonosono yi luzolo lu Yave mu befu?

16 Tebuka moyo ti disi ko dyambu dilwelo kwidi bakhulutu ba kimvuka kukuvana dilongi. Mu mbwenu’aku, bwidi mbikudi Natani kamwena bo Yave kankamba kayoluka na Ntinu Davidi mu thangu kaba tomba kusweka disumu dyandi dingolo? (2 Samueli 12:1-14) Bwidi mvwala Polo kamwena bo kabaka makani ma kusemba Petelo, bo kaba tula luvasu mu phila yi kutadila basi Yuda ayi bakhambu ba basi Yuda? Polo wumonisa kibakala bo kavanga mawu. (Ngalatia 2:11-14) Bwidi wulenda sadisila bakhulutu ba kimvuka bo ba kuvana dilongi? Wuyikulula, vutulanga matondo ayi yoluka yawu bumbote. Tadila lusalusu luawu banga mbonosono yi luzolo lu Nzambi. Ngyewu wala baka ndandu yiwombo, ayi bakhulutu ba kimvuka bela kwangalala mu kuvanga kisalu kiawu.

17. Bwidi bakhulutu ba kimvuka basadisila khomba mweka yinkyeto?

17 Khomba mweka yinkyeto wutuba ti mambu kamonikina kumbusa mantula nkaku mu kuzola Yave ayi nandi wuyiza ba beni mu kyunda. Nandi wutuba: “Minu yizaba ti yifweti koluka na bakhulutu ba kimvuka. Bawu basa phana ko foto, vayi bakhindisa. Kutsuka kadika lukutukunu, kheti kisalu  kiwombo badi wumweka mu bawu wunkwizanga mwingi kuzaba ti minu yidi bumbote. Mu kibila ki mambu yivanga kumbusa, yaba mwena ti yisi ko wufwana mwingi kutambula luzolo lu Nzambi. Thangu ka thangu, Yave wunsadilanga kimvuka kyandi ayi bakhulutu ba kimvuka mwingi kumonisa luzolo kadi mu minu. Yinsambilanga beni mwingi yibika kuntatuka.”

DYAMBU MBI DILUTIDI PHASI KENA TSEMBOLO?

18, 19. Dyambu mbi dilutidi phasi kena tsembolo? Vana kifwani.

18 Tulenda mona mwa phasi kutumukina tsembolo, vayi kubayisa tsembolo yi Nzambi kunlutanga twadisa ziphasi. (Ebeleo 12:11) Tulenda longuka mu bifwani bimbi bi Kaini ayi ki Ntinu Sedekia. Bo Nzambi kamona ti Kaini wuyiza ba kimbeni mu khomb’andi ayi waba tomba kumvonda, nandi wulubula Kaini: ‘Mu kibila mbi wididi mu nganzi ayi mu kyunda? Ngye kuvanga mambu mambote, wisi nkwiza baka ko lunungu va meso mami? Vayi ngye kukhambu vanga mambote, disumu didi va mwelo’aku, ayi diawu didi mangolo mwingi kukuyadila; ngye ma wununga kuyala diawu?’ (Ngenesi 4:6, 7) Kaini wubayisa tsembolo yi Yave, wuvonda khomb’andi ayi wumona ziphasi zingolo mu luzingu lwandi loso mu kibila ki mambu kavanga. (Ngenesi 4:11, 12) Boti Kaini wuyuwila Nzambi khanu kasa vyokila ko mu ziphasi beni.

19 Sedekia wuba ntinu wuba mavanga mambi. Mu thangu nandi kaba yala, dikabu di Yelusalemi mu mambu maphasi baba vyokila. Khumbu ziwombo mbikudi Yelemia kalubudila Sedekia kabalula mavanga mandi. Vayi nandi wubayisa tsembolo yi Yave, ayi wuyiza monikina mambu mambi. (Yelemia 52:8-11) Yave kasi ntomba ko tutovuka mu mambu nandi katulubudila.​—Tanga Yesaya 48:17, 18.

20. Mbi byala monikina kwidi batu boso bankikininanga tsembolo yi Nzambi ayi kwidi bo bakhambu kikininanga yawu?

20 Bubu, batu bawombo mu nza bambayisanga tsembolo yi Nzambi. Vayi baboso bambayisanga yawu, bambelama kuvyokila mu mambu maphasi. (Zingana 1:24-31) Diawu, tuvanganu mangolo mwingi ‘kutumamana tsembolo yi Nzambi ayi tuba ndwenga.’ Dedi buntubila Zingana 4:13, ‘simbidila tsembolo, ka wubikidila yawu. Sweka yawu mbote, bila yawu yinsundula moyo’aku.’