Skip to content

Skip to table of contents

Zimbangi zi Yave

Select language Ibinda

Tsembolo​—Mbonosono yi Luzolo lu Nzambi

Tsembolo​—Mbonosono yi Luzolo lu Nzambi

Yave wunsembanga mutu wowo nandi kanzolanga.”​—EBELEO 12:6.

MINKUNGA: 123, 86

1. Mbi Kibibila kintuba mu matedi tsembolo?

MBI ngye wunyindulanga bo wunkuwa kikuma ‘tsembolo’? Bawombo bambadilanga ti tsembolo khuba voti kutovuka, vayi bakana buawu ko. Kibibila kintuba ti tsembolo dyambu dimbote beni mu befu, ayi khumbu zinkaka bamfwanikisa yawu dedi luzabu, ndwenga, luzolo ayi moyo. (Zingana 1:2-7; 4:11-13) Kibila tsembolo yi Nzambi, yidi mbonosono ti nandi wu tuzolanga ayi tidi befu tuzinga mvu ka mvu. (Ebeleo 12:6) Kheti khumbu zinkaka Yave wunsembilanga mutu mu kumbika kavyokila mu mambu maphasi, masi nsundula ko ti nandi nkwa mambi. Buboti beni kuzaba ti kikuma ‘tsembolo’ kinsundula mvandi kulonga, dedi phila tata kanlongilanga mwana kanzolanga.

2, 3. Bwidi kifwani ki João ki tumonisina ti kusemba mutu kunsundula kunlonga ayi kumbika theti katovuka mu mambi mandi? (Tala fikula yidi va thonono.)

2 Yindulabu kifwani akiki. Mwana wumweka bantedilanga João bo kaba ta bola ku nzo, mam’andi wunkamba: “João, bika kutela bola ku khati nzo mwingi wubika bula byuma.”  Vayi bo kamanga kuwila mam’andi, bola beni yibwila vaba kibasa ayi kiawu kibudika. Mbi mam’andi kavanga mwingi kunsemba? Nandi wunlonga mu kummonisa ti dyambu kavanga diba dimbi. Nandi waba tomba mwan’andi kavisa ti bubote beni kutumukinanga matata ayi kazaba ti minsiku miawu misi ko phasi vayi mifwana. Mwingi kulonga mwan’andi, nandi wubaka makani ma kusweka bola beni mu bilumbu biwombo. João kasa kwangalala ko, vayi tsembolo beni yinsadisa kutebukanga moyo ti na manga kutumukina matata mandi, nandi wunkwiza tovuka.

3 Befu Baklisto, twidi mvitu mu khati dikanda di Nzambi. (1 Timoteo 3:15) Tat’itu Yave, widi nswa wu kutusudikisa mambote na mambi ayi kutusemba bo tummanga kuntumukina. Kheti mambu tube vanga masundukidi bubi, tsembolo yi Yave yilenda tusadisa kutebuka moyo nkinza widi mu kuntumukina. (Ngalatia 6:7) Nzambi wutu zolanga beni ayi katyanga ko befu tutovuka.​—1 Petelo 5:6, 7.

4. (a) Bwidi Yave kantombila tukubikila bankaka? (b) Mbi tunkwiza longuka mu dilongi adidi?

4 Befu kusadila Kibibila mwingi kusemba mwana voti nlonguki wu Kibibila, phila yi kuba sadisila baba minlandikini mi Klisto. Yave wuntomba tusadilanga Kibibila mwingi kulonga minlonguki mitu mambu masulama mu kuba sadisa bavisikisa ayi ‘batumamana mambu moso Yesu katu kamba.’ (Matai 28:19, 20; 2 Timoteo 3:16) Yawu phila nandi kantombila befu tuba kubikila, mwingi bawu mvawu basadisa bankaka kulandakana Klisto. (Tanga Tito 2:11-14.) Twantubila byuvu bitatu binkinza: (1) Bwidi tsembolo yi Nzambi yimmonisina luzolo kadi mu befu? (2) Mbi tulenda longuka mu bifwani bi batu Nzambi kasemba? (3) Bwidi tulenda landikinina ntungulu wu Yave ayi Mwan’andi mu kuvana tsembolo?

YAVE WUNSEMBILANGA MU LUZOLO

5. Bwidi tsembolo yi Yave yimmonisina ti nandi wutu zolanga?

5 Yave wutu ludikanga, wutu longanga, ayi wutu kubikanga kibila nandi wutu zolanga. Nandi wuntomba tumfikama ayi tuzinga mvu ka mvu. (1 Yoane 4:16) Nandi ka tufinganga ko voti kutuvanga kuyindula ti twisi ko tsalulu va meso mandi. (Zingana 12:18) Vayi Yave wunluta talanga zikhadulu zimbote twidi ayi wutuvana lwaku lu kusola. Ngye wummona bwidi tsembolo yimfumina mu Kibibila, mu zilevista zitu, kwidi matata mitu, voti bakhulutu ba kimvuka yimmonisina ti Yave wu tuzolanga? Diawu, bo bakhulutu ba kimvuka ba tusemba mu luzolo, kheti mu dyambu tukhambu mona ti didi dimbi, tufweti tebuka  moyo ti bawu badi mu kulandakana ntungulu wu luzolo lu Yave kadi mu befu.​—Ngalatia 6:1.

6. Bwidi tsembolo ayi kuvayikusu mu kimvuka yidi mbonosono yi luzolo lu Nzambi?

6 Khumbu zinkaka tsembolo yisukilanga ko to mu malongi. Boti khomba bevola disumu dingolo, nandi kasi ko bu kubwe vangila biyeko binka mu kimvuka. Ma kumonika, tufweti tebuka moyo ti tsembolo beni yidi mbonosono yi luzolo lu Nzambi mu nandi. Yawu yilenda kunsadisa kumona nkinza widi mu kubwela longuka Kibibila, kuyindula phila yi kusadila mawu ayi kusambila. Kuvanga mawu kulenda nsadisa kukindisa kikundi kyandi na Yave. (Minkunga 19:7) Na kubalula mavanga kuntwala, kalenda bwe tambula biyeku kaba. Vayi na kukhambu balula mavanga ayi bamvayikisi mu kimvuka, bobuawu yidi mbonosono yi luzolo lu Yave, kibila yidi phila yi kukyebila bankaka mu kimvuka. (1 Kolinto 5:6, 7, 11) Ayi mu kibila ki tsembolo beni yisonga, mutu kalenda visa ti disumu dingolo kabe vola. Mawu malenda kunsadisa kunyongina masumu mandi.​—Mavanga 3:19.

TSEMBOLO YI YAVE YI TUSAKUMUNANGA

7. Sebena wuba nani, ayi khadulu mbi yimbi kakuna?

7 Mwingi kuzaba nkinza widi mu tsembolo, twantubila matedi batu bwadi Yave kasemba. Wutheti Sebena, dibakala dimweka mwisi Isaeli wuzingila mu thangu Ntinu Ezekiasi, ayi wunkaka Graham, khomba mweka mu bilumbu bitu. Sebena wuba mfumu yinneni waba ‘kyebanga nzo,’ yawu yilenda ba yi Ntinu Ezekiasi. (Yesaya 22:15) Vayi Sebena wuyiza ba lungundayi ayi waba tomba baboso bazaba ti nandi widi mutu wu nkinza. Nandi wutungisa dibumbi dithalu bafweti kunzikila na kufwa ayi waba dyatilanga mu ‘makalu manzitusu.’​—Yesaya 22:16-18.

Befu kuyikulula ayi kuba bakubama mwingi kubalula mavanga mitu, Nzambi wela ku tusakumuna (Tala bitini bi matangu 8-10)

8. Bwidi Yave kasembila Sebena, ayi bwidi mawu masadisila Sebena?

8 Bo Sebena kaba tomba kuyizitisa, Nzambi wuvana kiyeku kyandi kwidi dibakala  dimweka baba tedilanga Eliakimi. (Yesaya 22:19-21) Mawu mamonika bo Ntinu wu Asilia Senakelibi kaba kubama mwingi kunwanisa basi Yelusalemi. Kuntwala, Senakelibi wufila mwa dingumba di bisadi byandi ayi masodi mawombo mwingi kutula boma basi Yuda ayi kuvanga Ntinu Ezekiasi kuvana divula mu myoko mi basi Asilia. (2 Mintinu 18:17-25) Ezekiasi wufila Eliakimi ayi babakala bwadi mwingi kudengana masodi beni. Wumweka mu bawu wuba Sebena, wuba wuzabakana banga nsoniki. Diawu tulenda tubila ti Sebena, ḿba wulonguka kuyikulula ayi kubika fwema voti kuyimona kyadi. Nandi wuba wukubama mwingi kukikana kiyeku kinkaka kikhambu beni nkinza. Vadi malongi matatu tulenda longuka mu mambu Sebena kamonikina.

9-11. (a) Malongi mbi mamfunu tulenda longuka mu Sebena? (b) Bwidi ngye wummwena phila Yave katadila Sebena?

9 Ditheti, bo Sebena kazimbisa kiyeku kyandi, mawu ma tutebula moyo ti ‘mutu wambelama kubwa wumbanga lungundayi mu ntima.’ (Zingana 16:18) Ḿba kiyeku kimfunu twidi mu kimvuka, ayi banka balenda yindula ti nkinza twidi. Ma kumonika, twala tatamana kuyikulula? Twala tebuka moyo ti dyela dyoso twidi voti kyoso kwa kyuma tuzebi kuvanga mu mangolo ma Yave tumvangila kiawu? (1 Kolinto 4:7) Mvwala Polo wusonika: ‘Yinlomba kuidi kadika mutu mwingi kabika banga mayindu maviokidi tezo mu nandi veka vayi mboti kadika mutu kaba mayindu mafuana.’​—Loma 12:3.

10 Dimwadi, tsembolo Yave kavana Sebena, yaba monisa ti nandi wuba lufyatu ti Sebena kalenda balula mavanga mandi. (Zingana 3:11, 12) Adidi, didi dilongi dimbote kwidi batu babotula mu biyeku bi mfunu. Busa fwana ko bawu kufwema voti kunyungutanga mu kibila ki mambu beni, vayi bafweti tatamana kuvana mangolo mawu mu kisalu ki Yave. Bawu bafweti tala tsembolo beni, buka mbonosono yi luzolo lu Yave mu bawu. Tebuka moyo ti Tat’itu wala sakumuna batu bantatamananga kuyikulula. (Tanga 1 Petelo 5:6, 7.) Befu kuyikulula, tsembolo yi Yave yilenda tusadisa kubalula mavanga ayi kuba buka tuma voti tuphandu tulebakana va koko kwandi.

11 Dintatu, dilongi dimfunu tulenda longuka mu phila Yave kaba tadila Sebena. Phila Yave kansembila yimmonisa ti nandi wunlendanga disumu, bika kwandi mutu besumuka. Yave wummonanga mambote madi mu mutu. Boti ngyewu widi tata voti nkhulutu wu kimvuka, bwisi ko bubote kulandakana phila Yave kansembilanga?​—Yuda 22, 23.

12-14. (a) Bwidi bankaka bammwena tsembolo yi Yave? (b) Bwidi Dyambu di Nzambi disadisila Graham kubalula mavanga mandi, ayi lusakumu mbi kabaka?

12 Kyadi ayi kyunda kuzaba ti bawombo bamfwemanga bo baba semba ayi bantatukanga Nzambi ayi kimvuka kyandi. (Ebeleo 3:12, 13) Mansundula ti tulendi basadisa ko? Ndamba. Tala kifwani ki Graham, bavayikisa mu kimvuka. Kuntwala bo kavutuka mu kimvuka, nandi wubika kubwe samuna ayi kukwenda mu zikhutukunu. Nkhulutu wumweka wu kimvuka wuvanga mangolo ma kuba nkundi’andi, ayi Graham wudinda nkhulutu beni kabwe longuka yandi Kibibila.

13 Nkhulutu beni wu kimvuka wuntebuka  moyo: “Graham mboyi lungundayi kaba. Bo bamvayikisa mu kimvuka, nandi wufwemina bakhulutu ba kimvuka baba mu dingumba dimfundusa. Mu ndongukulu’itu yi Kibibila, tutubila ma Kibibila kantuba matedi lungundayi ayi tsundukulu’andi. Graham wutona kuyimona naveka mu lumwenu lu Dyambu di Nzambi, ayi kasa tya ko mambu kamona. Zebi mambu mbi mamonika? Bo kazaba ti lungundayi ayi mu mavanga mandi muawu muba ngudi nsamu, mu thinu nandi wutona kubaluka. Nandi wutona kubwe kwendanga mu zikhutukunu zi Baklisto, kulonguka Dyambu di Nzambi ayi kutatamana kusambila kadika kilumbu. Nandi wutona kubwe twama ntwala mu kutwadisa dikanda dyandi mu mambu ma Nzambi, ayi mawu mayangidika nkazi’andi ayi bana bandi.”​—Luka 6:41, 42; Yakobi 1:23-25.

14 Nkhulutu beni wubwe tuba: “Kilumbu kimweka, Graham wukhamba dyambu dinyikuna ntim’ami. ‘Mimvu miwombo yeka mu kimvuka ki Yave ayi kumbusa yima sala banga ntwami ntwala. Vayi, bosi yilenda tuba ti yinzolanga Yave.’” Mu zikhutukunu, Graham wutona kusadila mu zimicro ayi wuba wuyangalala mu kubaka kiyeku beni. Nkhulutu beni wu kimvuka wutuba: “Kifwani ki Graham kindongisa ti mutu na kuyikulula va meso ma Yave mu kukikinina tsembolo’andi, lusakumunu luwombo kalenda tambula.”

LANDAKANA NTUNGULU WU YAVE AYI KLISTO BO WUNSEMBA BANKAKA

15. Mbi tufweti vanga mwingi bankaka bavitika tsembolu’itu?

Bankaka bo bammona ti ngye wuyikululanga, bawu bala vitika malongi maku

15 Boti tutidi kuba minlongi mimbote, tufweti ba theti minlonguki mimbote. (1 Timoteo 4:15, 16) Diawu, boti Yave wu kusadilanga mwingi kusemba bankaka, ngye fweti tatamana kuyikulula ayi kubika Yave ka kutwadisa mu luzingu lwaku. Bankaka bo bammona ti ngye wuyikululanga, bawu bala kukinzika ayi vitika malongi maku. Befu tulenda longuka mu kifwani ki Yesu.

16. Mbi tulenda longuka mu phila Yesu kaba longilanga ayi sembilanga?

16 Yesu wutatamana kutumukina Tat’andi, kheti thangu zinka diba dyambu diphasi. (Matai 26:39) Nandi wulonga batu ti malongi ayi ndweng’andi yaba fumina kwidi Tat’andi. (Yoane 5:19, 30) Yesu waba yikululanga, ayi mawu mansadisa kumonisa kyadi mu kulonga bankaka. Batu baba zolanga kukala yandi. (Tanga Luka 4:22.) Malongi ma Yesu maba kindisanga batu baba mu kyunda ayi bavonga. (Matai 12:20) Nandi wusemba minlandikini myandi mu luzolo, ayi kasa batumbudila ko mu thangu bawu baba findasana ziphaka ti nani wuluta zangama mu bawu.​—Malako 9:33-37; Luka 22:24-27.

17. Zikhadulu mbi zyala sadisa bakhulutu ba kimvuka kukyeba bubote kimvuka?

17 Bakhulutu ba kimvuka bafweti landakana ntungulu wu Klisto bo bansadila minswa  mi Kibibila mwingi kusemba. Mu phila ayoyo, bawu bela monisa ti batidi thwadusulu yi Nzambi ayi mwan’andi. Mvwala Petelo wusonika: “Banga minsungi mi mamemi, ludikilanga bumboti nkangu wowo Nzambi kaluyekudila. Lusunganga wawu bumboti, bika sia ti mu kuiku vayi mu luzolo; bika sia ti mu diambu di tomba ndandu vayi mu luzolo lu ntima. Lubika monisa kimfumu kuidi batu bobo Nzambi kaluyekudila vayi banu kifuani kuidi nkangu wu mamemi.” (1 Petelo 5:2-4) Bakhulutu banlandakananga mu mayangi thwadusulu yi Yave ayi Klisto, bambakanga ndandu theti baveka, bosi banani bawu bankengidilanga.​—Yesaya 32:1, 2, 17, 18.

18. (a) Mbi Yave katidi matata bavanga? (b) Bwidi Yave kansadisilanga matata?

18 Mbi tulenda tuba matedi tsembolo ayi kukubika dikanda? Yave wukamba zimfumu zi makanda: ‘Diawu, beno matata lubika fwemisanga bana beno vayi luba yonzudila mu tsembolo ayi mu malongi ma Yave.’ (Efeso 6:4) Kusemba bana ayi kuba kubika nkinza beni kwidi? Tuntanga mu Zingana 19:18: ‘Semba mwan’aku bo vakhidi kivuvu, mwingi wubika ba foto mu lufwa lwandi.’ Yave wuvana matata kiyeko ki kusemba bana bawu. Ba kumanga vanga mawu, bala funduswa va meso ma Yave. (1 Samueli 3:12-14) Vayi Yave wumvana matata ndwenga ayi mangolo mafwana mu thangu bandinda lusalusu lwandi mu lusambulu, bamfyatila mu Dyambu dyandi ayi mu thwadusulu yi pheve’andi yinlongo.​—Tanga Yakobi 1:5.

LONGUKA BWIDI WULENDA ZINGILA MVU KA MVU MU NDEMBAMA

19, 20. (a) Lusakumunu mbi tumbaka befu kuvitika tsembolo yi Nzambi? (b) Mbi twala longuka mu dilongi dinlanda?

19 Befu kuvitika tsembolo yi Nzambi ayi kulandaka phila Yave ayi Yesu bansembilanga, twala baka lusakumunu luwombo. Makanda ayi bimvuka bitu byala ba ndembama, batu boso bala mona ti baba kinzikanga, baba zolanga ayi badi nsika. Ayiyi yidi mbonosono yi ndembama ayi mayangi twala baka mu nza yimona. (Minkunga 72:7) Tsembolo yi Yave yi tukubika tuzingila va kimweka mu ndembama ayi kithwadi na dikanda dyoso di Yave. (Tanga Yesaya 11:9.) Befu kuyindulanga bobo, twala mona ti tsembolo: Yidi phila yimbote Nzambi kammonisa ti wu tuzolanga beni.

20 Mu dilongi dinlanda, twala bwela longuka matedi tsembolo va dikanda ayi mu kimvuka. Twala tubila mvandi bwidi tulenda kuyisembila ayi mbi tufweti vanga mwingi kubika vanga dyoso dyambu dimbi dilutidi phasi kena tsembolo.