Skip to content

Skip to table of contents

Zimbangi zi Yave

Select language Ibinda

Matata, Mwidi mu Kusadisa Mwan’inu Kubaka Makani ma Kubotama?

Matata, Mwidi mu Kusadisa Mwan’inu Kubaka Makani ma Kubotama?

‘Vayi buabu mbi wukhidi vingila? Telama, Yenda botama.’MAVANGA 22:16.

MINKUNGA: 51, 135

1. Mbi matata badi Baklisto mantombanga kuzaba ava bana bawu kubotama?

“MU zingonda ziwombo yaba kambanga tat’ami ayi mam’ami ti yitidi kubotama, ayi bawu baba yolukanga beni yama matedi mambu beni. Bawu baba tomba kuzaba ti minu yaba visa mbote mfunu widi mu makani yibaka. Mu kilumbu 31, ngonda Kumi Yimwadi mu mvu 1934, kiawu kilumbu minu yibotama.” Buawu Blossom Brandt katubila mayangi kamona bo kabaka makani ma kubotama. Bubu mvandi, matata batidi kusadisa bana bawu kubaka makani mambote. Boti mwana wumvuzikisa mayindu ma kubotama mu khambu ba kibila kimbote, mawu malenda vava kikundi kyandi na Yave. (Yakobi 4:17) Ava mwana kabotama, matata madi ndwenga mantombanga kuzaba theti ti bukyedika mwan’awu widi wukubama mwingi kuba nlandikini wu Klisto.

2. (a) Mambu mbi minsungi miwombo mi mavula bammonanga? (b) Mbi tunkwiza tubila mu dilongi adidi?

 2 Minsungi miwombo mi mavula bammonanga ti matoko mawombo badi 10 ti 22 di mimvu, basi ko babotama, kheti bayonzukila mu dikanda dinsadilanga Yave. Khumbu ziwombo, bo matoko beni mankwendanga mu zikhutukunu, mu kisalu ki kusamuna, bawu banyindulanga ti badi Zimbangi zi Yave. Vayi, vadi mambu mankaka maku bavanganga babika kukivana kwidi Yave ayi kubotama. Khumbu zinkaka, mawu mammonikanga bila matata mawu manyindulanga ti bana bawu basi ko bakubama mwingi kubotama. Mu dilongi adidi, tunkwiza tubila mambu manna mamvanganga matata mankaka kubika kindisa bana bawu kubotama.

MWAN’AMI WEKA PHUNGA YIFWANA MWINGI KUBOTAMA?

3. Mambu mbi maba vanga matata ma Blossom kuba dibamu?

3 Matata ma Blossom, tube tubila mu lutangu lutheti, baba beni dibamu bo baba yindulanga ti mwan’awu wuba phunga yifwana mwingi kuvisa tsundu yi kubotama ayi mfunu widi mu kuvanga mawu. Bwidi matata balenda zabila ti mwan’awu widi wukubama mwingi kukivana kwidi Yave?

4. Bwidi lutumu lu Yesu mu Matai 28:19, 20 lulenda sadisila matata bubu?

4 Tanga Matai 28:19, 20. Kibibila kisa tsikika ko phunga mutu kafweti ba mwingi kubotama. Vayi bubote beni matata kuyindula mbote mbi binsundula kukitula batu minlonguki. Mu mbembu yi Kingeleko, kikuma “kukitula batu minlonguki” basadila mu Matai 28:19 kinsundula kulonga mutu na makani ma kunsadisa kuba nlonguki. Nlonguki widi mutu wunlonguka, wumvisa mambu Yesu kalonga ayi wutidi kutumukina mawu. Diawu, tona mu thangu bana bambutuka, matata bafweti kuba longa na makani ma kuba sadisa kukivana kwidi Yave ayi kuba minlandikini mi Klisto. Tuzebi ti bana batsombi basa fwana ko mu kubotama. Vayi Kibibila kimmonisa ti bana balezi balenda visa ayi kuzola kyedika ki Kibibila.

5, 6. (a) Mbi mambu Kibibila kintuba matedi Timoteo ma tuvisikisa matedi mbotimini’andi? (b) Phila mbi yilutidi matata badi ndwenga balenda sadisila bana bawu?

5 Timoteo wuba nlonguki wubaka makani ma kusadila Yave mu butoko bwandi. Mvwala Polo wutuba ti Timoteo wutona kulonguka kyedika ki mambu ma Nzambi ‘mu bulezi.’ Tat’andi na Timoteo kasa ba ko kisadi ki Yave, vayi mamandi ayi khay’andi wu nkyeto bansadisa kuzola dyambu di Nzambi. Mu kibila beni, nandi wuyiza ba kiminu kingolo. (2 Timoteo 1:5; 3:14, 15) Nandi wuba mwana ditoko voti 20 di mimvu, bo kakubama mwingi kutambula biyeku bimfunu mu kimvuka​—Mavanga 16:1-3.

6 Bana boso diswasana badi. Bayonzukanga ko phila yimweka mu mayindu. Bana bankaka bamvisanga kyedika, bambakanga makani mambote ayi bantombanga kubotama bo badi matoko. Bankaka bambanga to bakubama mwingi kubotama ba kubwela konzuka. Matata badi ndwenga bakwikanga ko bana bawu kubotama. Vayi, bansadisanga kadika mwana kubaka makani ma kubotama ti thangu’andi yala fwana. Matata bambanga beni mayangi mu thangu  mwan’awu kanlandakana madi mu Zingana 27:11. (Tanga.) Vayi bafweti tebuka moyo ti makani mawu mafweti ba ma kusadisa bana kuba minlonguki. Na diyindu adyodyo, bawu balenda yikuvusa, ‘Mwan’ama widi nzayilu yifwana mwingi kukivana kwidi Nzambi ayi kubotama?’

MWAN’AMA WIDI NZAYILU YIFWANA?

7. Mwingi mutu kabotama kafweti zaba theti malongi moso ma Kibibila? Sudikisa.

Minlonguki myoso mi Klisto bafweti tatamana kulonguka kheti beka babotama

7 Matata bo badi minlongi mi bana bawu, baku basadisanga kuzaba bubote kyedika. Luzabu alolo lwela vanga bana bawu kukivana kwidi Nzambi. Mawu masi nsundula ko ti mwana kafweti zaba mambu moso Kibibila kinlonga ava nandi kubaka makani ma kukivana ayi kubotama. Minlonguki myoso mi Klisto bafweti tatamana kulonguka, kheti beka babotama. (Tanga Kolosai 1: 9, 10.) Vayi, ti kiteso mbi mutu kafweti zabila mambu ma Nzambi ava kubotama?

8, 9. Mambu mbi mamonikina dibakala waba nkengidila buloko ku Filipi, ayi mbi tulenda longuka mu mambu kamonikina?

8 Kifwani ki dikanda dimweka mu thangu yikhulu, kilenda sadisa matata bubu. (Mavanga 16:25-33) Mu mvu 50, Polo waba kubama mwingi kwenda ku divula di Filipi mu khumbu yimwadi mu kisalu ki misioni. Bo kaba kuna, nandi ayi Sila baba vunina mambu, baba bwila ayi kuba tula mu buloko. Mu bwilu beni, kivuka kinneni kimonika ayi myelo myoso mi buloko mizibuka. Bo nkengidi wu buloko kazaba ti batu boso baba mu buloko batina, nandi wutomba kuyivonda. Vayi Polo wunkamba kabika kuvanga mawu. Bosi Polo ayi Sila balonga nkengidi beni ayi dikanda dyandi kyedika kitedi Yesu. Bawu bakikinina mu mambu balonguka matedi Yesu ayi bavisa mfunu widi mu kuntumukina. Ayi bawu babotama muna thangu beni. Mbi tulenda longuka mu kifwani kiawu?

9 Nkengidi wu buloko mba wuba disodi mwisi Loma bavundisa mu kisalu. Ayi kasa ba ko luzabu lu Mambu ma Nzambi. Mwingi kaba wumweka mu Baklisto, nandi kafweti longuka kyedika kidi mu Kibibila, kuvisa ma Yave kantomba bisadi byandi bavanga ayi kuntomba tumukina malongi ma Yesu. Mambu kalonguka mu thangu yikhufi mansadisa kutomba kubotama. Diawu, nandi kafweti bwe longuka kheti na kuba wubotama. Diawu, bo mwan’aku ka kukamba ti nandi wutidi kubotama mu kibila ki luzolo lwandi mu Yave ayi wutidi kuntumukina, mbi ngye wulenda vanga? Ngye wulenda bika nandi kayoluka na bakhulutu ba kimvuka, ayi bawu bela zaba ti nandi weka wukubama mwingi kubotama. * (Tala matangu madi va wanda.) Dedi Baklisto boso babotama, nandi wunkwiza tatamana kulonguka  matedi Yave mu luzingu lwandi loso, ayi mvu ka mvu.​—Loma 11:33, 34.

NDONGUKULU MBI YILUTIDI NKINZA KWIDI MWAN’AMI?

10, 11. (a) Mbi matata manka banyindulanga? (b) Mbi byala vana mwana lukyebo lumbote?

10 Matata mankaka bambalanga ti bulutidi mbote mwan’awu kubotama bo kala manisa kikola kinangama ayi kubaka kisalu kimbote. Matata beni tulenda tuba ti makani mambote badi, vayi bawu bafweti kuyikuvusa: ‘Mawu mela sadisa mwan’ami kubaka mayangi mu luzingu? Mawu madi madedakana na mambu tunlongukanga mu Kibibila? Bwidi Yave kantombila tusadila luzingu lwitu?’​—Tanga Mpovi 12:1.

11 Bubote beni kutebukanga moyo ti nza ayiyi ayi byuma bidi muawu bisi ko kithwadi na mambu Yave katidi ayi kanyindulanga. (Yakobi 4:7, 8; 1 Yoane 2:15-17; 5:19) Kuba kikundi kifikama na Yave yidi phila yimbote mwana kalenda bakila lukyebo lumbote, kutatuka Satana, nza ayiyi ayi mayindu mambi ma nza. Matata baku tula kikola ayi kisalu va theti mu luzingu lwawu, mwana kalenda kikinina ti byuma bi nza bilutidi nkinza na kikundi kifikama na Yave. Diawu didi dyambu di kubela keba keba. Buka matata ma luzolo, benu mutidi nza ayiyi yilonga bana binu ti mambu amomo mela mvana mayangi makyedika? Phila yilutidi yi kubakila mayangi makyedika yidi mu kutula Yave va theti mu luzingu lwitu.​—Tanga Minkunga 1:2, 3.

BOTI MWAN’AMA VODIDI DISUMU DINGOLO?

12. Kibila mbi matata manka bambadila ti bulutidi bubote mwan’andi kuvingila nkadu mwingi kubotama?

12 Ngudi yimweka wutuba kibila kakhambu bikila mwan’andi wunkyeto kubotama. Nandi wutuba, “Minu yidi zitsonya mu kutuba ti mu kibila ki diyindu di kuvayikisa batu mu kimvuka.” Dedi khomba ayiyi, matata mankaka bambadila ti bulutidi bubote mwan’andi kuvingila nkadu mwingi kabotama bo kamba nkhulutu mwingi kubika vola  disumu dingolo. (Ngenesi 8:21; Zingana 22:15) Matata amomo bambadila ti mwan’awu na kukhambu botama, kasi nkwiza vayikusu ko mu kimvuka. Vayi kibila mbi diyindu adyo didi dimbi?​—Yakobi 1:22.

13. Boti mutu kasi ko wubotama, mawu mansundula ti nandi kasi mfunduswa ko va meso ma Yave? Sudikisa.

13 Bukyedika ti matata bamengi mwan’awu kubotama ava nandi kuba wukubama mwingi kuyivana kwidi Yave. Vayi dilenda ba dyambu dimbi kuyindula ti mwana kasi mfunduswa ko va meso ma Yave ava nandi kubotama. Mwana wela funduswa va meso ma Nzambi boti nandi wuzebi ma Yave kantuba mu matedi mambote ayi mambi. (Tanga Yakobi 4:17.) Matata ma ndwenga bavongisanga ko bana bawu mu matedi kubotama. Kheti mu thangu mwana kadi ditoko, bawu ba kunlongisa kuzola mambu Yave kantuba, mambote ayi mo kalendanga, dedi bo bawu bavangila. (Luka 6:40) Luzolo mwan’aku kadi mu Yave lwela nsadisa kubika vola disumu dingolo, kibila nandi wunkwiza tomba kuvanga ma Yave kantuba ti mambote.​—Yesaya 35:8.

BANKAKA BALENDA SADISA

14. Bwidi bakulutu ba kimvuka balenda sadisila matata mu mambu bamvanganga?

14 Bakulutu ba kimvuka balenda sadisa matata mu mambu bamvanganga mu kukoluka mu phila yimbote matedi kubaka makani mu kisalu ki Yave. Khomba wumweka wunkyeto wuntebuka moyo mambu Ya Russell kankamba bo kaba mimvu minsambanu. Nandi wutuba, “Mu 15 di minutu, nandi wuyolukila yama matedi makani mami ma kipheve.” Mambu mbi mayiza monika? Kuntwala, khomba beni wuyiza ba ntwami ntwala, ayi wusadila kuvyoka 70 di mimvu! Bukyedika, malongi mambote ayi khindusulu yilenda sadisa mutu mu luzingu lwandi loso. (Zingana 25:11) Bakulutu ba kimvuka balenda tumisa matata ayi bana mwingi kusadisa mu kisalu ku Nzo yi Kintinu. Balenda kuba vana bisalu bifweni mu phung’awu ayi bi bazebi mwingi bavanga.

15. Bwidi bankaka mu kimvuka balenda sadisila matoko?

 15 Bwidi bankaka mu kimvuka balenda sadisila? Mu kumonisa ti bamvwanga nkinza kadika ditoko. Dedi, ngye wulenda tomba bidimbu bimmonisa ti bawu badi mu kufikama Yave. Mwana wumweka veni mvutu wumbote mu lukutukunu, voti kiyeku kavengi mu lukutukunu lumvangamanga va khati sabala? Nandi wumvananga kimbangi mu kikola, voti wuvanga dyambu dimbote mu thangu banthota kavanga mambi? Ti buawu, buna bika kala kisina mu kunkamba ti dyambu dimbote kavengi! Tulenda ba makani ma kukoluka na matoko ava lukutukunu luntona ayi bo lummana. Bo tumvanga mawu, bana bela mona ti bawu mvawu badi mu khati ‘kimvuka kinneni.’​—Minkunga 35:18.

SADISA MWAN’AKU KUBAKA MAKANI MA KUBOTAMA

16, 17. (a) Kibila mbi kwididi nkinza bana kubotama? (b) Mayangi mbi matata ma Baklisto balenda baka? (Tala fikula yidi va thonono.)

16 Kiyeku kimbote beni matata badi ki kulonganga bana bawu kuzola Yave. (Minkunga 127:3; Efeso 6:4) Mu thangu basi Isaeli, bo bana baba butukanga bawu baba kubavananga kwidi Yave mwingi kunsadila. Vayi bubu basyala bwe vanga ko mawu. Kheti matata manzola Yave ayi kyedika, mawu masi nsundula ko ti bana bawu bela vanga mvandi mawu. Tona kilumbu mwana kambutuka, matata bafweti baka makani ma kunsadisa kuba nlonguki, kukivana kwidi Nzambi ayi kubotama. Mbi bilenda luta ba nkinza? Kuba mutu wukivana kwidi Nzambi, wubotama, ayi wukwikama mu kisalu ki Yave, kunkwiza nsadisa kuvuka mu thangu yi ziphasi zinneni.​—Matai 24:13.

Matata bafweti baka makani ma kusadisa bana bawu kuba nlonguki (Tala matangu 16, 17)

17 Bo Blossom Brandt katomba kubotama, matata mandi baba tomba kuzaba ti nandi wuba wukubama. Bo bazaba ti nandi wuba wukubama, bawu bansadisa mu makani kabaka. Blossom wutuba mambu tat’andi kavanga va bwilu ava nandi kubotama: “Nandi wutu kamba befu boso tufukama, ayi wutona kusambila. Nandi wukamba Yave ti wuba wuyangalala beni mu makani mwan’andi kabeki lu kukivana kwidi nandi.” Bo vavyoka 60 di mimvu, Blossom wutuba: “Bukyedika, mu mimvu myoso minkwiza kuntwala, yalasa zimbakana ko bwilu bunani!” Matata, beno mvinu mulenda baka mayangi bo mummona bana binu ba kukivana ayi kubotama mwingi kusadila Yave.

^ Lut. 9 Matata balenda sadisa mwan’awu mu kusadila malongi madi mu buku Os Jovens Perguntam​Respostas Práticas, Volume 2, zitsyelo 304-310. Tala mvandi “Perguntas Respondidas” mu Nosso Ministério do Reino, Ngonda Yinna mvu 2011, tsyelo 2.