Skip to content

Skip to table of contents

Zimbangi zi Yave

Select language Ibinda

Nandi Khanu Wubaka Lunungu va Meso ma Nzambi

Nandi Khanu Wubaka Lunungu va Meso ma Nzambi

BEFU TUMBWONGIMINA Yave ayi tutidi kubaka lunungu va meso mandi ayi lusakumunu lwandi. Vayi bwidi tulenda bela batu ba lunungu va meso ma Nzambi? Mu thangu yikhulu, batu baba volanga masumu mangolo baba bwe banga luvalu va meso ma Nzambi voti kuba nkundi’andi. Bankaka badi zikhadulu zimbote vayi kutsuka bankwiza zimbisanga lunungu luawu va meso ma Nzambi. Diawu tulenda kuyikuvusa, “Bwidi Yave kankyebilanga kadika mutu mu befu?” Kifwani ki Lobowami, wuba ntinu ku Yuda, kilenda tusadisa kubakula mvutu.

THONONO YIMBI

Salomo wuba tata yi Lobowami, wuyala ku Isaeli mu 40 di mimvu. (1 Mintinu 11:42) Bo Salomo kafwa, Lobowami wubotuka ku Yelusalemi ayi wuyenda ku Sikeni mwingi kaba ntinu. (2 Lusansu 10:1) Boma nandi kaba mona kuvingana va luyalu? Salomo wuba wuzabakana mu kibila ki luzabu voti ndwenga yiwombo kaba. Kuntwala, Lobowami kaba tombila kumonisa mvandi ti widi ndwenga yifwana mwingi kudedikisa mambu maphasi.

Basi Isaeli baba tovuka beni diawu bafidila batu mwingi bakamba Lobowami mambu bawu baba tomba nandi kavanga: ‘Tat’aku wukitula vangu kitu kiphasi. Vayi ngye kulengisa bisalu bingolo twidi ayi kubwe lengisa mvandi vangu kingolo tat’aku ka tuvana, befu twala kusadila.’—2 Lusansu 10:3, 4.

Lobowami makani maphasi kaba mwingi kubaka. Na kuvanga mambu batu baba tomba khanu nandi, dikanda dyandi, ayi batu bankaka baba sadilanga ku nzo’andi babika nzingulu yimbote bawu bakolama. Vayi, boti nandi wumanga kuvanga mawu, khanu dikabu dyoso bambalukila. Mbi nandi kavanga? Nandi wuyoluka theti na bakulutu basadisa tat’andi. Bawu bankamba mwingi kayuwa mambu mantuba dikabu. Vayi Lobowami wuwilukila batu baba mu phung’andi ayi wubaka makani ma kutovula dikabu. Nandi wu bakamba: ‘Minu yinkwiza bwela kizitu mu vangu kinu. Tat’ami mu luswadi luphamba kaba ku lubudilanga, vayi minu mu luswadi lu bisengu.’—2 Lusansu 10:6-14.

Ngye mabakula dilongi tulenda longuka? Bubu, twidi va khat’itu bakulutu beka mimvu miwombo mu kisalu ki Yave ayi bawu balenda kutusadisa kubaka makani mamboti. Diawu tufweti ba ndwenga ayi kukuwanga malongi mawu.—Yobi 12:12.

‘BAWU BATUMAMANA DYAMBU DI YAVE’

Lobowami wukubika masodi mandi mwingi kunwanisa mimvila minneni mimbalukila. Diawu Yave kafidila mbikudi Semaya kankamba: ‘Ngye wulendi kwenda ko ayi kunwanisa zikhomba zyaku zi basi Isaeli. Kadika mutu mu beno kafweti vutuka ku nzo’andi, kibila minu yibikidila mawu mamonika.’ 1 Mintinu 12:21-24. *—Tala matangu madi va wanda.

Diba dyambu dilenga mwingi Lobowami katumukina Yave? Mbi dikabu balenda yindula mu matedi ntinu’awu wumona? Nandi wu bakamba ti wu kubatwadisila mu ‘luswadi lu bisengu,’ vayi nandi kasa vanga ko ni dyambu dimvela mwingi dikabu dibika kumbalukila! (Dedikisa na 2 Lusansu 13:7.) Mu khambu yindula mu phila dibaku bankwiza mwena, ntinu ayi masodi mandi moso ‘batumukina dyambu di Yave ayi bavutuka mu nzinzo ziawu, dedi bo Yave ka bakambila.’

Mbi tulenda longuka? Bubote beni kutumukinanga Yave kheti batu ba tuvweza mu mambu tumvanga. Nzambi wala ku tusakumunanga befu kuntumamana.—Deutelonomi 28:2.

Bukyedika ti Lobowami bansakumuna bo katumamana? Lobowami wutatamana kuba ntinu wu basi Yuda ayi Benyamini, nandi wubaka makani ma kutungisa mimvila mimona mu bibwangu beni. Nandi ‘wukindisa’ mvandi mavula mankaka. (2 Lusansu 11:5-12) Bilutidi nkinza, nandi wutumukina minsiku mi Yave. Bo kintinu ki kumi di mimvila kitona kubwongimina zinzambi zi luvunu, bawombo bayenda ku Yelusalemi mwingi kusadisa Lobowami ayi mbwongimini yi kyedika. (2 Lusansu 11:16, 17) Bo Lobowami katumamana Yave, kintinu kyandi kiyiza ba kingolo.

LOBOWAMI WUSUMUKA AYI WUBALULA MAVANGA MANDI

Bo kintinu ki Lobowami kiyiza ba kingolo, nandi wuvanga mambu ma kukwitukila. Nandi wubika kubwe tumukina minsiku mi Yave ayi wutona kubwongimina zinzambi zi luvunu. Vayi mu kibila mbi? Bukyedika ti mam’andi bo kaba musi Amoni, wumvukumuna mu makani mandi? (1 Mintinu 14:21) Befu tusa zaba ko, vayi dikabu dyoso baba landakananga kifwani kyandi kimbi. Diawu Yave kabikidila Sisaki Ntinu wu Ngipiti kabwila mavula mawombo mu kintinu ki Yuda. Kheti Lobowami wukindisa mavula beni, mambu beni mamonika!—1 Mintinu 14:22-24; 2 Lusansu 12:1-4.

Mambu mayiza bwelama mu thangu Sisaki ayi masodi mandi baba kwe nwanisa basi Yelusalemi, divula dyaba yadila Lobowami. Diawu mbikudi Semaya kavanina Lobowami ayi masodi mandi tsangu ayiyi yifumina kwidi Nzambi: ‘Beno mundyekula, diawu minu mvami yima ku lukwekudila mu myoko mi ntinu Sisaki.’ Mbi Lobowami kavanga bo kayuwa tsangu beni? Nandi kasa bangusa ko mambu bankamba! Kibibila kintuba ti: ‘Zimfumu zi Isaeli ayi ntinu ba kikulula ayi batuba: ‘Yave widi wusonga.’’ Bosi Yave wuvukisa ntinu Lobowami ayi divula di Yelusalemi mwingi dibika tuluka.—2 Lusansu 12:5-7, 12.

Bo mawu mavyoka, Lobowami wutatamana kuyadila kintinu ki basi Yuda. Ava kafwa, nandi wuvana bana bandi mikhayilu. Ḿba nandi waba tomba kuzaba ti bawu basi mbalukila ko khomb’awu Abia, wunkwiza ba ntinu va mvingi’andi. (2 Lusansu 11:21-23) Mu kuvanga mawu, Lobowami wuluta monisa ndwenga ke mu thangu kaba ditoko.

LOBOWAMI WUBA MUTU WUMBOTI VOTI WUMBI?

Kheti Lobowami wuvanga mambote, Kibibila kintuba matedi luyalu lwandi: ‘Nandi wuvanga mambu mambi.’ Kibila mbi? Bila ‘nandi kasa baka ko makani mu ntim’andi ma kutomba Yave.’ Diawu Yave kakhambu kwangalala mu mambu kavanga.—2 Lusansu 12:14.

Lobowami kasa ba ko kikundi kimboti na Yave buka Davidi

Mbi tulenda longuka mu luzingu lu Lobowami? Khumbu zinkaka nandi wutumamana Nzambi. Ayi wuvangila mambu mambote kwidi dikabu di Yave. Vayi kasa ba ko kikundi kimbote na Yave, ayi kasa tomba ko kunkwangidika mu ntim’andi woso. Diawu kabikila kuvanga mambu mambote ayi wutona kubwongimina zinzambi zi luvunu. Ngye wulenda yikuvusa: ‘Bo Lobowami kakikinina tsembolo yi Yave, bukyedika ti nandi wuvangila mawu kibila wunyonga mu ntim’andi woso zinzimbala zyandi ayi waba tomba kwangidika Nzambi? Voti mu kibila ki mambu batu bankaka bankamba mwingi kavanga?’ (2 Lusansu 11:3, 4; 12:6) Kuntwala nandi wubwela vanga mambu mambi. Diswasana beni kaba na khay’andi Ntinu Davidi. Bukyedika ti Davidi wuvola mvandi masumu. Vayi nandi wunyonda mu ntima woso masumu kavola. Ayi mu luzingu lwandi loso, nandi wuba zolanga Yave ayi mbwongimi yikyedika.—1 Mintinu 14:8; Minkunga 51:1, 17; 63:1.

 Malongi mawombo tulenda longuka mu nongu ayiyi yi Kibibila. Dyambu dimbote beni kutwadisa dikanda ayi kuvangila batu bankaka mambote. Vayi mwingi kubaka lunungu va meso ma Yave, tufweti kumbwongimina mu phila nandi kanzodilanga, ayi tufweti ba mvandi yandi kikundi kingolo.

Mwingi tudukisa makani amomo, tufweti ba beni luzolo mu Yave. Dedi bo tumbwedila biswadi ku mbazu mwingi yawu yibika zima, befu mvitu tuntatamana kukindisa luzolo lwitu kwidi Yave mu kulongukanga Kibibila kadika kilumbu, kufyongunina bu kusadila ma tunlonguka ayi kutatamana kusambila. (Minkunga 1:2; Loma 12:12) Ayi luzolo beni lwala tusadisa kukwangidika Yave mu mamoso tumvanga. Lwala tusadisa mvandi kunyonga masumu mitu boti tu bevola disumu ayi kudinda mwingi Yave ka tulemvukila. Befu kubela bobo, twinsi ba ko buka Lobowami vayi twala tatamana bakwikama mu mbwongimini yikyedika.—Yuda 20, 21.

^ Lut. 9 Mu kibila ki kukhambu ku lukwikumu ku Salomo, Nzambi wutuba ti wala vasa ntinu beni mu mintinu myodi.—1 Mintinu 11:31.