Skip to content

Skip to table of contents

Zimbangi zi Yave

Select language Ibinda

Ndembama—Bwidi Wulenda Bakila Yawu?

Ndembama—Bwidi Wulenda Bakila Yawu?

BEFU TUNZINGILA mu nza yiwedi makhema, diawu kulenda bela mwa phasi kubaka ndembama. Kheti bo twidi mwa ndembama, tulenda zimbisa mvandi yawu. Mambu mbi Kibibila kintuba malenda tusadisa kubaka ndembama yikyedika ayi yikayimani? Ayi bwidi tulenda sadisila bankaka kuvanga mvandi mawu?

MBI TUFWETI VANGA?

Mwingi kubaka ndembama yikyedika, tufweti baka theti luvovomu ayi lukyebu mu luzingu. Tufweti baka bakundi bambote, ayi bilutidi nkinza, tufweti ba kikundi kimbote na Nzambi. Bwidi tulenda vangila mawu?

Zituhumu ayi minswa mi Yave mamboti to ma tutwadisilanga. Befu kutumamana miawu, tummonisa ti twidi lufyatu mu Yave ayi tutidi kuba kikundi kimbote ayi nandi. (Yelemia 17:7, 8; Yakobi 2:22, 23) Bosi Yave wala tufikama ayi wala tuvana ndembana yi ntima. Buku yi Yesaya 32:17 yintuba: ‘Lunungu lukyedika luntwadisanga ndembama, ayi mbutu wu lunungu lukyedika wala ba luvovomu ayi nsika yikayimani.’ Tulenda baka ndembama yikyedika mu luzingu, mu kutumamana Yave mu khambu kukwiku.—Yesaya 48:18, 19.

Mambu mawombo ma luzingu mambotulanga ndembam’itu

Yave wutuvana mvandi khayilu mweka yimbote yilenda ku tusadisa kubaka ndembama yikayimani. Khayilu beni yidi phevi’andi yinlongo.—Mavanga 9:31.

PHEVE YI NZAMBI YI TUSADISANGA KUBAKA NDEMBAMA

Mvwala Polo wutuba ti ndembama yidi “mbutu wu kipheve.” (Ngalatia 5:22, 23) Mu kuzaba ti pheve yi Nzambi yimvananga ndembama, tufweti bika yawu yi tudyatisa boti tutidi kubaka ndembama. Bwidi tulenda vangila mawu?

Ditheti, tufweti tanganga Dyambu di Nzambi kadika kilumbu. (Minkunga 1:2, 3) Bo tunyindulanga phila tulenda sadila mambu tuntanga, pheve yinlongo yi tusadisanga kuvisa phila Yave kanyindudilanga. Dedi, tulonguka bwidi nandi kadidi wukwikama mu ndembam’andi ayi kibila  mbi ndembama yididi nkinza kwidi nandi. Befu kusadila mambu tunlonguka mu Kibibila, twala bwela baka ndembama mu luzingu.—Zingana 3:1, 2.

Dimwadi, tufweti lombanga mu nsambu pheve yinlongo yi Nzambi. (Luka 11:13) Yave wukanikisa baboso bandinda lusalusu lwandi: ‘Buna ndembama yi Nzambi, yoyi yivyokidi dyela dyoso, yela kyeba mintima minu ayi mayindu minu mu Klisto Yesu.’ (Filipi 4:6, 7) Befu kufikama Yave ayi kufyatila mu pheve’andi, nandi wala tuvana ndembama yikyedika mu mayindu mitu.—Loma 15:13.

Kibibila kima sadisanga batu bawombo kubalula nzingulu’awu ayi bawu bubu badi mu kuzingila mu ndembama na Yave, ndembama mu mayindu mawu, ayi ndembama kwidi bankaka. Bwidi bawu banungina kuvangila mawu?

BWIDI BANKAKA BABAKILA NDEMBAMA YIKYEDIKA?

Ava kulonguka kyedika, zikhomba zitu ziwombo baba beni makhema ayi nganzi. Vayi bawu bavanga mangolo mwingi kubaluka, ayi bubu bawu badi bavumbama, badi mvibudulu, ayi banzingila mu ndembama na bankaka. * (Tala matangu madi va wanda.) (Zingana 29:22) Tala bwidi khomba mweka bantedilanga Davidi ayi wunkaka Rachel, bavangila mangolo mwingi kubalula zikhadulu ziawu.

Tulenda baka ndembama mu thangu tunlandakana minswa mi Kibibila ayi tundinda mu nsambu pheve yi Nzambi

Ava Davidi kutona kulonguka kyedika, nandi wuba beni kimbeni na batu bankaka ayi kabasa kolukanga ko mu phila yifwana na dikanda dyandi. Vayi nandi wuvisa ti kafweti balula mavanga mandi. Bwidi nandi kabakila ndembama? Davidi wutuba, “Minu yitona kusadila minswa mi Kibibila mu luzingu lwama, bo yivanga mawu, lukinzu mu minu ayi dikanka dyama lubwelama.”

Rachel wuyiza ba zikhadulu batu baba zinganga yandi baba. Nandi wutuba, “Ti bubu, minu yikhidi nwana mwingi kubika ba mayindu  ma makhema kibila yiyonzukila va dikanda diba beni makhema.” Mbi bisadisa Rachel kubakula ndembama? Nandi wutuba, “Kusambila kwidi Yave mu lufyatu.”

Davidi ayi Rachel badi batu tulenda tubila babaka ndembama kibila bawu basadila minswa mi Kibibila ayi bafyatila pheve yinlongo. Kheti tunzingila mu nza yiwedi batu badi nganzi, tulenda baka ndembama mu ntima. Tulenda nunga kuvanga mawu befu kubundana na batu ba dikanda ditu ayi zikhomba zitu zyoso mu kimvuka. Vayi Yave wu tukamba ‘tuzingila mu dembama ayi batu boso.’ (Loma 12:18) Bukyedika ti mawu malenda monika? Ayi kibila mbi tufweti zingila mu ndembama ayi batu bankaka?

VANGA MANGOLO MWINGI WUZINGILA MU NDEMBAMA NA BANKAKA

Mu kisalu kitu ki kusamuna, tunlonganga tsangu yi ndembama yitedi Kintinu ki Nzambi. (Yesaya 9:6, 7; Matai 24:14) Bawombo banzolanga kukuwa ayi bankikininanga zitsangu beni. Ayi ziawu ziba sadisanga babika ba beni mu kyunda voti kuba mu nganzi mu kibila ki mambu mammonika mu nza. Bubu bawu badi kivuvu kikyedika mu bilumbu binkwiza, ayi mawu mamvanganga bawu ‘batomba ndembama.’—Minkunga 34:14.

Va thonono, bankaka bazolanga ko tsangu tunlonganga. (Yoane 3:19) Kheti batu bankuwa voti ndamba, Yave wutuvananga pheve’andi. Yawu yi tusadisanga tuba ndembama ayi lukinzu mu thangu tunsamuna. Mu phila ayoyi, befu twidi mu kulandakana dilongi di Yesu: ‘Thangu lukotidi mu nzo, luvana basi nzo beni mboti. Ba kuluyamba mbote ku nzo beni, buna bika ndembam’inu yisyala yawu. Vayi boti basa kuluyamba ko mbote, buna bika ndembam’inu yivutuka yinu.’ (Matai 10:11-13) Befu kuba zikhadulu azyozyo, tulenda tatamana kubaka ndembama kheti mu mambu mambi bankaka bantuba voti bamvanga. Ayi tufweti tebukanga moyo ti tulenda baka lwaku lu kuba sadisa mu bilumbu binkwiza.

Befu tuntwadisanga mvandi ndembama bo tummonisa lukinzu mu thangu tunkoluka na mintinu mi nza, kheti bawu bankandimina kisalu kitu. Buka mambu mamonika ku tsi mweka yi África, mintinu basa tubika ko tutunga Zinzo zi Kintinu. Zikhomba zitu bazaba ti bawu balenda zonzila mambu beni mu ndembama. Bawu bafidisa khomba mweka wusala buka misyoni ku tsi beni mwingi kukoluka na Mfumu Yinangama wuba mvwala yi luyalu lu Londres, Inglatenra ku tsi beni, ayi kunzabikisa kisalu ki ndembama Zimbangi zi Yave bamvanganga.

Khomba beni wutuba: “Bo yituka va kibwangu bantambudilanga batu, mu kibila ki phwatulu, minu yivisa ti nkyeto waba sadila vana, wuba musi mvila mweka yizaba mu mimvu yilongila ku tsi beni, ayi minu yilonguka mbembu’awu. Diawu yimvanina mbote mu mbembo’andi. Nandi wundyuvula, ‘Mambu mbi mabe kutwadisa akuku?’ Mu lukinzu minu yinkamba ti yaba tomba kumona Mfumu Yinangama wuba mvwala yi luyalu lu Londres. Nandi wutela Mfumu beni mu nsinga mayo. Bo kabasika, wuphana mbote mu mbembo yi bwala. Bosi nandi, wuyuwa bo minu yaba sudikisa kisalu ki ndembama Zimbangi zi Yave bamvanganga.”

Bo Mfumu beni kayuwa mbote mambu khomba katuba, nandi wuyiza visa mbote kisalu kitu ayi wubalula mayindu mambi kaba mu befu. Bosi kuntwala, zimfumu beni babalula makani bawu baba ayi babika mwingi Zimbangi zi Yave batunga Zinzo zi Kintinu. Zikhomba bayangalala beni! Diawu, befu kumonisa bankaka lukinzu, twala bwela twadisa ndembama.

ZINGILA MU NDEMBAMA THANGU ZYOSO

Bubu, dikanda di Yave bankwangalala beni mu paladizu yi kipheve, bo bambwongimina Yave mu ndembama. Kadika mutu mu befu kalenda bwedila ndembama beni, mu kubwela vanga mangolo mwingi kubaka ndembama mu luzingu lwitu. Mu phila ayoyi, tulenda ba lufyatu ti Yave, wunkwalalanga beni mu ndembama twidi. Ayi mu nza yimona nandi wala tuvana ndembama yikayimani.—2 Petelo 3:13, 14.

^ Lut. 13 Befu twala longuka matedi kuba mutu wuvumbama mu dilongi dinkwiza mu kikhuku akiki kintubila matedi mimbutu mi pheve yinlongo yi Nzambi.