Skip to content

Skip to table of contents

Zimbangi zi Yave

Select language Ibinda

Yonzuka Banga Mutu mu Kipheve!

Yonzuka Banga Mutu mu Kipheve!

‘Mutatamana dyatila mu pheve.’—NGALATIA 5:16.

MINKUNGA: 22, 75

1, 2. Mbi khomba yimweka kabakula mu naveka, ayi mbi kavanga?

ROBERT wubotama thangu kaba mwana ditoko, vayi kyedika kisa ba ko kyuma kilutidi nkinza mu luzingu lwandi. Diawu katubila: “Minu yisa vanga ko ni dyambu dimbi, yiba mutu wumweka wuba landakananga bunkwendila bankaka. Yiba vanganga mangolo mwingi kukindisa kipheve kyami, yaba kwendanga mu zikhutukunu zyoso, mvandi yaba salanga zikhumbu ziwombo mu mvu banga nsadisi wu mintwami ntwala. Vayi bo buawu yaba mona buka kyuma kiba kambu mu luzingu lwani.”

2 Roberto kasa zabanga ko mbi biba kambu mu nandi, ti kayiza kwela. Khumbu ziwombo bo baba tanga kisavu ki kuvanasana byuvu mu mambu ma Kibibila, wuyiza bakula ti nkazi’andi wuluta zaba bumboti mambu ma Kibibila kuvyoka naveka. Roberto wumona beni zitsoni kibila ayi byuvu bikhambu phasi kasa nunga ko kuvutula. Nandi wutuba: “Yiba buka mutu wukhambu zaba ni dyambu dimvela mu luzingu. Ayi yitona kuyindula minu veka, ‘boti yifweti ba ntu wu nkazi’ami mu matedi mambu ma Nzambi, muna yifweni vanga dyoso kwa dyambu. Ayi mawu kavanga! Nandi wutuba: “Minu yitona kulonguka Kibibila, kulonguka  ayi kulonguka beni, ti yimona buka mambu moso make bwelamanga tsundu. Bubu nandi wumana visa mbote mambu ma Nzambi ayi kithwadi kyandi na Yave kimana kinda.”

3. (a) Mbi tulenda longuka mu nongo yi Roberto? (b) Ayi mambu mbi mankinza tunkwiza tubila?

3 Tulenda longuka malongi mankinza mu mambu mamonikina Roberto. Tulenda baka kwitu mwa nkadu luzabu lu Kibibila, ayi mawu malenda kutu vana mangolo ma kukwendanga mu zikhutukunu ayi mu kisalu ki kusamuna. Vayi mwa luzabu beni lulendi kutu vanga ko kuba kinzambi kikinda. Diawu tufweti fyongunina mbote befu veka mwingi kubakula vama mbi tufweti bwela vangila mangolo mu ndongukulu’itu yi Kibibila mwingi tubwela konzuka mu kinzambi. ( Filipi 3:16) Mu dilongi adidi, tunkwiza baka mimvutu mi byuvu bitatu bi nkinza: (1) Mbi bilenda kutusadisa kubakula ti twidi batu badi mayindu ma Nzambi? (2) Bwidi tulenda kindisila kipheve kitu? (3) Bwidi kuba kipheve kikinda kilenda kutusadisila lumbu ka lumbu?

BWIDI TULENDA ZABILA TI TWIDI BATU BADI MAYINDUMA NZAMBI?

4. Nani wulenda baka ndandu mu dilongi didi mu Efeso 4:23, 24?

4 Thangu tutona kusadila Nzambi, befu tubaka makani ma kubalula mambu mawombo mu luzingu lwitu. Kheti tuma botama, tufweti tatamana kuvanga mawu. Kibibila ki tukamba: “Lukituka bamona mu pheve yi diela dino.” (Efeso 4:23, 24.) Befu twisi ko batu basonga, diawu tufweti tatamana kubalula kimutu kitu ayi nzingulu’itu. Kheti mimvu miwombo tweka mu kisalu ki Yave, tufweti vanga mangolo mwingi kukindisa kikundi kitu ayi nandi.—Filipi 3:12, 13.

5. Byuvu mbi bilenda kutusadisa kuzaba ti twidi batu badi mayindu ma Nzambi?

5 Kheti twidi matoko voti bakhulutu, tufweti ku yifyongunina mu bukyedika. Tulenda ku yikuvusa: ‘Yimmonisa ti yidi mu kubwela kuba mayindu ma Nzambi? Yidi mu kufwanakana na Klisto mu phila yi kuyindudila? Yimbanga nsika mu zikhutukunu? Mbi mambu yintubanga mammonisa mu minu ayi byuma yintomba mu luzingu? Mbi ndongukulu’ami yi Kibibila, mimvyatu myami ayi phila yimbelanga bo ba kutsemba mammonisa mu minu? Bwidi yimbelanga bo ba kukhwika yivanga mambu mambi? Minu yidi mutu wuyonzuka mu kipheve?’ (Filipi 3:12, 13) Byuvu abyobyo, bilenda kutusadisa ku yifyongunina ti tweka batu bayonzuka mu kipheve.

6. Mbi binkaka bilenda kutusadisa kuzaba ti twidi batu badi mayindu ma Nzambi?

6 Thangu zinkaka vantombulwanga lusadusu lu bankaka mwingi tuvisa ti tweka batu badi mayindu ma Nzambi voti ndamba. Mvwala Polo wusudikisa ti mutu widi mayindu ma kinsunya kasazaba ko ti phila kannantina luzingu lwandi yisi kwangidika ko Yave. Vayi mutu widi mayindu ma Nzambi, nandi zebi bwidi Yave kamwenanga ayi kanyindudilanga. Nandi zebi ti Yave katyanga ko mutu  widi mayindu ma kinsunya. (1 Kolinto 2:14-16; 3:1-3) Bakhulutu badi mayindu ma Klisto, bawu bafika monanga thangu khomba mu kimvuka kantona kumonisa mayindu ma kinsunya, ayi bamvananga lusalusu. Enati bakhulutu bantomba kutusadisa, tunkikininanga lusadusu luawu ayi tumvanganga mangolo mwingi kubalula mavanga mitu? Befu kuvanga mawu twala monisa ti tutidi kuba batu badi kipheve kingolo.—Mpovi 7:5, 9.

KINDISA KIPHEVE KYAKU

7. Bwidi tuzabidi ti nzayilu yi Kibibila, bakana yawu to yintombulu mwingi tuba batu bakinda mu kipheve?

7 Kuzaba mambu ma Kibibila, bakana mawu to mantombulu mwingi tuba mayindu ma Nzambi. Kibila ntinu Salomo wuzaba mambu mawombo matedi Yave, ayi bikuma voti zingana ziwombo katuba zisonama mu Kibibila. Vayi buvyokila thangu, kikundi kyandi na Yave kitona kudekuka ayi kasa bwe kwikama ko mu kiminu. (1 Mintinu 4:29, 30; 11:4-6) Kubotula kwandi luzabu lu Kibibila, mbi binkaka tufweti vanga? Tufweti bwela kindisa kiminu kitu. (Kolosai 2:6, 7) Bwidi tulenda vangila mawu?

8, 9. (a) Mbi byala tusadisa kukindisa kiminu kitu? (b)  Ndandu mbi twala baka mu kuyindula ayi kusadila mambu tuntanga mu Kibibila? (Tala foto yidi va thonono.)

8 Mu mbandu yitheti, Polo wukindisa Baklisto ‘bayonzuka mu kipheve.’ (Ebeleo 6:1) Bwidi yilenda sadila dilongi adyodyo bubu? Tulenda vangila mawu mu kumanisa kulonguka buku Mantenha-se no Amor de Deus. Yawu yala kusadisa wuvisa bwidi wulenda sadila minswa mi Kibibila mu luzingu lwaku. Enati ngye mamana kulonguka buku beni, vadi mvandi bilongulu binkaka bilenda kusadisa kukindisa kimimu kyaku. (Kolosai 1:23) Mvandi tufweni botulanga thangu mwingi kuyindula mambu tunlonguka ayi kulindanga Yave mwingi katusadisa kuzingila mu mambu beni.

9 Thangu tunyindula mambu tuntanga ayi tunsadila mawu mu luzingu lwitu, buawu twala bwedila phwila yi kukwangidika ayi kutumamana Yave. (Minkunga 40:8; 119:97) Mvandi mala tusadisa kutina mambu moso malenda kutuvongisa mu kipheve.—Tito 2:11, 12.

10. Mbi matoko balenda vanga mwingi bakinda mu kipheve?

 10 Enati widi ditoko, makani mbi madi yaku mu bilumbu binkwiza mu kisalu ki Nzambi? Khomba mweka wunsadilanga ku Beteli, wuntyanga kukuvula matoko bambelama kubotama mu zikhutukunu zinneni, makani mbi make yawu mu kisalu ki Nzambi mu bilumbu binkwiza. Nandi wummonanga ti bawombo mu bawu, banyindulanga bumboti ziphila bankwiza sadila Yave. Matoko mawombo bantubanga ti bankwiza kota mu kisalu ki kulonga thangu ka thangu, ayi bankaka bantubanga ti batidi kukwenda mu mala madi tsatu yi minsamuni. Angi matoko mankaka bazabanga ko bu kuvutudila kyuvu beni. Mansundula ti bawu basi ko makani mu kisalu ki Nzambi? Enati ngye widi ditoko, wu yiyuvusa: ‘Minu yinkwendilanga mu zikhutukunu ayi mu kisalu ki kusamuna mu kibila ki matata mami? Minu yidi na kikundi kyami Nzambi?’ Bukyedika ti befu boso, tuba kwandi biboba voti matoko, tufweti ba makani mu kisalu ki Nzambi. Makani beni mala tusadisa kuba batu bakinda mu kipheve.—Mpovi 12:1, 13.

11. (a) Mbi tufweti vanga mwingi tuba mayindu ma Nzambi? (b) Kifwani kinani mu Kibibila tulenda landakana?

11 Befu kukifyongunina ayi kumona vama tufweti vangila mangolo, tufweti vanga mawu mwingi tubalula kimutu kitu. Kuvanga ayi kumanga vanga mawu, kulenda sundula luzingu voti lufwa lwitu. (Loma 8:6-8) Yave zebi ti twidi bankwa masumu, diawu katuvaninanga phevi’andi yinlongo mwingi kutusadisa. Vayi befu mvitu tufweti vanga mangolo. Khomb’itu  John Barr, wusala mu Dingumba Dintwadisi, bo kaba tubila Luka 13:24 nandi wutuba: “Bawombo bamvekukilanga kibila bavanganga ko mangolo mwingi kukonzuka mu kipheve.” Diawu tufweti ba banga Yakobi, wunwana ayi mbasi bwilu boso mwingi katambula lusakumu. (Ngenesi 32:26-28) Tuzebi ti Kibibila nyenze beni kikala mu kutanga. Vayi mwingi tumona kiawu lweki, tufweti vanga mangolo mwingi kubakula kyuka kidi kiswama muna voti mambu malenda kutusadisa.

12, 13. (a) Mbi byala tusadisa kusadila madi mu Loma 15:5? (b) Bwidi kifwani ki Petelo kilenda kutusadisila? (c) Mbi wulenda vanga mwingi kukindisa kipheve kyaku? (Tala quadro yintuba,“  “Mbi Wulenda Vanga Mwingi Wuyonzuka mu Kipheve.”)

12 Thangu tumvanga mangolo mwingi kukonzuka mu kipheve, pheve yinlongo yala tusadisa kubalula phil’itu yi kuyindudila. Nkadu nkadu twala yindudila mu phila Yesu kaba yindudilanga. (Loma 15:5) Pheve yinlongo yilenda kutusadisa kununga zinzinunu zitu zimbi ayi kukuna zikhadulu zimbote zinkwangidika Nzambi. (Ngalatia 5:16, 22, 23) Tubika kuvonga befu kumona ti mayindu mitu madi beni mu mambu ma kinsunya, vayi tufweti tatamana kudinda pheve yinlongo yi Nzambi mwingi yi tusadisa kutsikika mayindu mitu mu mambu ma sulama. (Luka 11:13) Tebuka monyo kifwani ki mvwala Petelo. Va theti nandi kasa yindudilanga ko banga Klisto. (Matai 16:22, 23; Luka 22:34, 54-62; Ngalatia 2:11-14) Vayi nandi kasa vonga ko, ayi Yave wunsadisa. Buvyokila thangu, nandi wuyiza tona kuyindudilanga banga Klisto. Mawu befu mvitu tulenda vanga.

13 Petelo kuntwala wuyiza sonika zikhadulu zilenda kutusadisa. (Tanga 2 Petelo 1:5-8.) Tufweti vanga beni mangolo mwingi kukuna zikhadulu buka kukiyala, kukindama, kuba nkwa kyadi ayi zikhadulu zinkaka zimbote. Diawu kadika kilumbu buboti tu yikuvusanga. ‘Khadulu mbi yilenda vangila mangolo mu kukuna yala kutsadisa kukindisa kipheve kyami?’

SADILA MINSWA MI KIBIBILA BILUMBU BYOSO

14. Bwidi kuba mayindu ma Nzambi malenda kutusadisila?

14 Befu kuyindula banga Klisto, twala baka makani mambote matedi kisalu, matedi kikola ayi mu phila tunkolukila na bankaka. Makani moso tumbaka mala monisa ti befu twidi mu kulandakana ntungulu wu Klisto. Bo twidi batu badi mayindu ma Nzambi, diawu tukhambu bikilanga ni kyuma kitulula kikundi kitu na Yave. Bo tumvyokila mu zithotolo, kipheve kitu kilenda kutusadisa kununga thotolo beni. Ava tubaka moso kwa makani, tufweti ku yikuvusanga: ‘Nswa mbi wu Kibibila wulenda kutsadisa? Boti yesu nandi wumvyokila mu thotolo ayiyi khanu makani ma kabaka? Mbi bilenda kwangidika Yave? Bubote beni kuyivananga byuvu bi phila ayoyo. Diawu twentubila mambu mavyakana tulenda sadila minswa beni. Mu kadika dyambu, tunkwiza mona nswa wu Kibibila wulenda kutusadisa kubaka makani mambote.

15, 16. Bwidi kuba mayindu ma Klisto malenda kutusadisila kubaka makani mu matedi (a) kusola mbote mutu wutidi kukwela? (b) kusola bakundi?

15 Mu kusola mutu wu kukwela. Nswa wu Kibibila wudi 2  Kolinto 6:14, 15. (Tanga) Mvwala Polo wusudikisa ti mutu widi mayindu ma Nzambi, katadilanga ko mambu mu phila yimweka na mutu widi mayindu ma kinsuni. Bwidi nswa awowo wulenda kusadisila kusola mbote mutu ngye fweti kwela?

16 Mu kusola bakundi bitu. Tulenda tubila nswa widi mu 1 Kolinto 15:33. (Tanga.) Mutu widi mayindu ma Nzambi, kalendi vanga  ko kikundi na batu balenda bifisa kiminu kyandi. Yindula bwidi wulenda sadila madi mu matangu beni mu mambu mavyakana. Buka, Bwidi matangu amama malenda kusadisila kubaka makani mu phila yi kusadila internet voti kusola makundi mu internet? Bwidi mawu malenda kusadisila kusola vama ayi batu banta yaku bisavu mu internet?

Makani mami, ma kutsadisanga kubwela ba mutu widi mayindu ma Nzambi? (Tala bitini bi matangu 17)

17-19. Bwidi kuba mayindu ma Nzambi mala kusadisila(a) Kusola kisalu kifweni? (b) Kubaka makani mambote? (c) kudedikisa mambu widi na zikhomba?

17 Bisalu bilenda tulula kinzambi kitu. Tala ndubu yimboti yidi mu Ebeleo 6:1. (Tanga.) Mbi binsundula ‘bisalu binnatanga ku lufwa” tufweti tina kantubila mu matangu amama? Bisalu bilenda ku tukwiba beni thangu, voti bisalu bimanga kutusadisa kuba mayindu voti kipheve kikinda. Nswa beni, wulenda kutusadisa kuvutula byuvu buka: ‘Kisalu akyokyo, ndandu kyala kuthwadisila voti ndamba? Yilenda kwama kota mu lungosu alulu? Kibila mbi yifweti manga kotila mu mangumba ma batu banzola balula nza ayiyi?’

Makani mami, ma kutsadisanga kubwela kutomba ziphila zinkaka zi kusadila Yave? (Tala bitini bi matangu 18)

18 Makani mu kisalu ki Nzambi. Yesu mu disolo kavangila va mbata mongo, wuvana malongi mambote mu matedi phila yi kubakila makani. (Matai 6:33) Mutu widi mayindu ma Nzambi wuntulanga Kintinu ki Yave va ntwala mu luzingu lwandi. Nswa awowo, wela tusadisa kuvutula byuvu buka: ‘Minu kumani kikola, yifweti bwe kota mu kikola kinangama? Yifweti kikinina kyoso kwa kisalu?’

Makani mami, ma kutsadisanga kuzingila mu ndembama na bankaka? (Tala bitini bi matangu 19)

19 Thangu twidi dyambu na khomba. Dilongi Polo kasonikina baklisto ku Loma dilenda kutusadisa mu thangu twidi mu mambu na khomba. (Loma 12:18.) Befu kulandakana kifwani ki Yesu, twala tomba kuzingila mu “ndembama na batu boso.” Mbi tumvanganga bo twidi mu mambu na bankaka? Tutyanga ko kukikinina diyindu di bankaka? Voti twidi tuzabakana buka batu banzolanga kutula ndembama?—Yakobi 3:18.

20. Kibila mbi wufweti vangila mangolo mwingi kukonzuka mu kinzambi?

20 Bifwani abyobyo bimmonisa bwidi minswa mi Kibibila milenda kutusadisila kubaka makani mambote mammonisa ti pheve yinlongo yi Nzambi yi kutudyatisa. Befu kuba kipheve kimbote, luzingu lwitu lwala ba mayangi. Khombi’tu Roberto tube tubila va thonono wutuba: “Thangu yiyiza kindisa kikundi kyami na Yave, yiyiza ba nnuni wumbote ayi yiluta zaba bu kutwadisila bana bami. Yiyiza ba mvandi mayangi mawombo mu luzingu.” Diawu befu kuvanga mangolo mwingi kukonzuka banga mutu wu kipheve, twala baka ndandu yiwombo. Twala zingila mu mayangi tona mu thangu ayiyi, bosi mu bilumbu binkwiza “luzingu lukyedika.”—1 Timoteo 6:19.