Skip to content

Skip to table of contents

Zimbangi zi Yave

Select language Ibinda

Yave Wunzolanga Baboso ‘Bambutanga Mimbutu mu Kuvibidila’

Yave Wunzolanga Baboso ‘Bambutanga Mimbutu mu Kuvibidila’

‘Bosi mbongo yibwa va ntoto wumboti, yidi batu bobo . . . bambutanga mimbutu mu kuvibidila.’​LUKA 8:15.

MINKUNGA: 68, 72

1, 2. (a) Mu kibila mbi tumbakilanga khindusulu mu bifwani bi zikhomba bansamunanga mu mavula batu bakhambu zola kuwa mambu ma Nzambi? (Tala foto yidi va thonono.) (b) Mbi Yesu katuba matedi kulonga va ‘kibwangu kabutukila’? (Tala matangu madi va wanda.)

SERGIO ayi OLINDA, badi mintwami ntwala ku Estados Unidos. Bawu badi 80 di mimvu. Mu bilumbu abibi, mu kibila ki malu, basyala benunga ko kusamuna mu bibwangu bi kinanu. Vayi tona mu thama ti bubu, bawu basa bika ko kifu ki kukwendanga va meni ku dizandu dimweka difikama. Bawu bankalanga va ndeku kibwangu bambakilanga makalu ayi bantambikanga bilongulu bitu kwidi batu bamvyokilanga vana. Batu bawombo baba yuwilanga ko, vayi Sergio ayi Olinda bambanga va kibwangu kiawu kadika kilumbu mu kilokulu sambwadi va meni na disevu va munu. Va masika, bawu bamvutukanga ku nzo mu malu. Bawu bansamunanga bilumbu bisambanu mu kadika sabala, ayi mu mimvu myoso.

 2 Vadi zikhomba ziwombo mu nza yimvima badi buka Sergio ayi Olinda, beka mimvu mu kusamuna va kizunga batambula, kheti batu ba bavwanga ko nkinza. Ḿba ngye mvaku kizunga kyaku buawu kididi. Boti buawu, tu kutonda mu lukwikumunu lwaku kheti mu mambu beni ma phasi wumvyokila. * (Tala matangu madi va wanda.) Vayi tebukanga moyo ti kifwani kyaku, kinkindisanga zikhomba ziwombo kheti bo beka mimvu miwombo mu kisalu ki Yave. Minsungi miwombo mi Mavula batuba ti: “Bo yinsalanga na zikhomba beni, yimbwelanga kukinda mu kibila ki ntungulu’awu wumbote.” “Lukwikumunu luawu lu kutsadisanga kuba wukindama ayi kumonisa kibakala mu kisalu ki kusamuna.” “Kifwani kiawu kimbombanga beni ntim’ami.”

3. Byuvu mbi bitatu tunkwiza longuka, ayi mu kibila mbi?

3 Mu dilongi adidi, tunkwiza baka mimvutu mi byuvu bitatu: Kibila mbi khumbu zinkaka tulenda bela mu kyunda? Mbi binsundula kubuta mimbutu? Mbi byala tusadisa tutatamana kubuta mimbutu mu mvibudulu? Kuzaba mimvutu mi byuvu abyobyo, kwala tusadisa tukwikama kuvanga kisalu Yesu ka tuvana.

KIBILA MBI KHUMBU ZINKAKA TULENDA BELA MU KYUNDA?

4. (a) Bwidi mvwala Polo kayiza bela mu ntima bo batu bankaka bamanga kunkuwila? (b) Kibila mbi Polo kaba mwena phasi mu ntima?

4 Ngye widi mu kyunda kibila batu va kibwangu kinu batyanga ko kuwa zitsangu zitedi Kintinu? Boti buawu, ngye wala visa mabanza mvwala Polo kaba. Nandi wusamuna mu 30 di mimvu, ayi wusadisa batu bawombo baba Baklisto. (Mavanga 14:21; 2 Kolinto 3:2, 3) Kheti bobo, nandi kasa nunga ko kusadisa basi Yuda bankaka kuba Baklisto. Bawombo mu bawu, bamanga kuwa mambu mvwala Polo kalonga ayi bankaka batomba kumvonda. (Mavanga 14:19; 17:1, 4, 5, 13) Bwidi ntim’andi wiyiza bela mu kibila ki mambu beni? Nandi wutuba: ‘Kyunda kingolo kidi yama ayi phasi yidi yama mu ntima yilendi suka ko.’ (Loma 9:1-3) Kibila mbi nandi kaba mwena phasi mu ntima? Kibila nandi waba zolanga batu ayi kisalu ki kusamuna. Mvwala Polo waba vwanga beni nkinza basi Yuda ayi wuba beni kyunda bo bawu bamanga malongi ma Yave.

5. (a) Mbi bi tuvanganga kusamuna? (b) Kibila mbi khumbu zinkaka disi ko dyambu dimbi kuba mu kyunda?

5 Dedi Polo, befu mvitu tunlonganga batu kibila tuba vwanga nkinza ayi tutidi kuba sadisa. (Matai 22:39; 1 Kolinto 11:1) Tuzebi ayi tummonanga mu luzingu lwitu ti kusadila Yave yawu phila yilutidi yi kunatina luzingu lwitu. Ayi tutidi kusadisa bankaka kumona bwidi luzingu luawu lulenda bela lumbote! Diawu befu tubakindisilanga mwingi batatamana kulonguka kyedika kitedi Yave ayi lukanu kadi mu batu. Buka befu tumvana mutu khayilu mu kunkamba: ‘Lemvuka yaya, tambula, kikinina khayilu yikuvana.’ Diawu, disi ko dyambu dimbi ‘kuba mu kyunda’ dedi mvwala Polo mu thangu batu bammanga khayilu beni. Tumbelanga mu kyunda, bakana ko mu kukhambu ku mana vayi mu luzolo lukyedika twidi mu batu. Vayi, kheti khumbu zinkaka tulenda ba mu kyunda, befu tuntatamananga kusamuna. Tulenda kikinina mambu Elena katuba, nandi  widi ntwami ntwala mu 25 di mimvu ayi wutuba: “Kisalu ki kusamuna phasi yiwombo yimonanga kiawu, vayi bo buawu vasi ko kisalu kinkaka kilutidi yinzolanga kuvanga buka akiki.”

MBI BINSUNDULA KUBUTA MIMBUTU?

6. Kyuvu mbi ki nkinza twambaka mvutu?

6 Kibila mbi tulenda bela lufyatu ti twala nunga kusamuna voso kwa vama? Mwingi tubaka mvutu wu kyuvu akyokyo ki nkinza, twantubila nongu wadi Yesu kata bo katuba matedi nkinza wu ‘kubuta mimbutu.’ (Matai 13:23) Nongu yitheti yintubila matedi nti wu vinu.

7. (a) Mu nongu Yesu kata, nani bamfwanikisa banga ‘mvati,’ ‘nti wu vinu,’ ayi ‘matafi’? (b) Kyuvu mbi tufweti baka mvutu?

7 Tanga Yoane 15:1-5, 8Mu nongu ayiyi, Yesu wusudikisa ti Yave nandi ‘mvati,’ naveka Yesu nandi ‘nti wu vinu,’ ayi minlandikini myandi badi ‘matafi.’ * (Tala matangu madi va wanda.) Diawu Yesu kakambila bapostolo bandi: ‘Adidi, diawu Dyambu dimvananga nkembo Tat’ama: lutatamana kubuta mimbutu miwombo ayi lumonisa ti mwidi minlandikini myami.’ Vayi, mbi binsudula kubuta mimbutu? Mu nongu ayiyi, Yesu kasa sudikisa ko buboti mbi binsundula kubuta mimbutu, angi nandi wu tuvana mwa lusalusu mwingi tubakula mvutu wu kyuvu akyokyo.

8. (a) Mu nongu Yesu kata, kibila mbi ‘kubuta mimbutu’ kwisi nsundula ko kuvanga milonguki mimona? (b) Kyedika mbi kidi mu mambu moso Yave katudinda tuvanga?

8 Yesu wutuba matedi Tat’andi: ‘Nandi wumbotulanga dyoso ditafi didi mu minu dikhambu butanga makundi.’ Mawu mansundula ti befu tulenda ba to bisadi bi Yave befu kubuta mimbutu. (Matai 13:23; 21:43) Diawu mu nongu ayiyi, kubuta mimbutu kwisi nsundula ko kuvanga minlonguki mimona. (Matai 28:19) Boti buawu, khanu woso kwa nsamuni wukhambu sadisa ni mutu wumweka kuba nlandikini wu Yesu, widi buka ditafi dikhambu butanga mimbutu. Vayi mawu masi ko makyedika! Mu kibila mbi? Kibila befu tukwikanga ko batu baba minlandikini mi Yesu. Ayi Yave, nandi luzolo, kalendi tudinda ko tuvanga dyambu kazebi ti tulendi nunga ko kuvanga. Nandi wu tudinda tuvanganga to mambu tulenda nunga.​—Deutelonomi 30:11-14.

9. (a) Bwidi befu tulenda butila mimbutu? (b) Nongu mbi yinkaka twantubila?

9 Buna mbi binsundula kubuta mimbutu? Diawu dilenda ba dyambu befu boso tulenda vanga. Kisalu mbi Yave kavana bisadi byandi byoso? Kisalu ki kusamuna zitsangu zitedi Kintinu ki Nzambi. * (Tala matangu madi va wanda.) (Matai 24:14) Nongu Yesu kata yitedi mvanti yinsudikisa mawu buboti. Twantubilanu mawu mu nongu yinlanda.

10. (a) Mu nongu Yesu kata, mbi binsundula lutete ayi ntoto? (b) Mimbutu mbi mimbutanga bitafi bimbote?

10 Tanga Luka 8:5-8, 11-15. Mu nongu yi mvati, Yesu wusudikisa ti lutete lunsundula ‘dyambu di Nzambi,’ voti zitsangu zitedi Kintinu ki Nzambi. Ayi ntoto, wunsundula mintima mi batu. Lutete lubwa mu ntoto wumboti lumena zinganzi ayi luyiza ba nti. Bosi ‘nti beni, wubuta kuvyoka khama di mimbutu.’ Boti nti beni widi bitafi bimbote,  buna ntindu mimbutu mbi wunkwiza buta? Mimbutu Milwelo? Mve, wunkwiza buta mimbutu miwombo mumbasikila zithete zinkaka. Mu nongu ayiyi, lutete lumweka lulenda buta khama di zithete. Mbi mawu ma tulonga mu matedi kisalu kitu ki kusamuna?

Bwidi befu tulenda ‘butila mimbutu mu mvibudulu’? 11)

11. (a) Mbi nongu yintubila matedi mvati yi tulonga matedi kisalu kitu ki kusamuna? (b) Bwidi bu kubutila lutete lumona?

11 Khumbu yitheti matata mitu voti Mbangi yinkaka yi Yave ba tulonga matedi Kintinu ki Nzambi, buka bawu bavata lutete mu ntoto wumboti. Bawu bayangalala beni bo bamona ti befu tukikana mambu ba tulonga. Lutete beni luyonzuka ti mu thangu luyiza tona kubuta mimbutu. Dedi lutete tu betubila yimbwela bwe buta lutete lunkaka, befu mvitu tubutanga ko minlonguki mimona vayi lutete lumona. * (Tala matangu madi va wanda.) Bwidi tumvangilanga mawu? Khumbu ziwombo tunkolukanga na bankaka matedi Kintinu ki Nzambi, kuvanga mawu kwidi buka befu twidi mu kubwela butisa ayi kutyamuna lutete bavata mu ntim’itu. (Luka 6:45; 8:1) Bo tukhidi samuna zitsangu zitedi Kintinu ki Nzambi, tufweti tatamana ‘kubuta mimbutu mu mvibudulu.’

12. (a) Mbi tunlonguka mu nongu Yesu kata yitedi nti wu vinu ayi mvati? (b) Bwidi zinongu beni zinyikunina mabanza maku?

12 Mbi tunlonguka mu nongu Yesu kata yitedi nti wu vinu ayi mvati? Tunlonguka ti kubuta mimbutu kwisi nsundula ko ti batu bafweti kuwa mambu tunsamuna. Vayi kunsundula ti befu, tufweti tatamana kusamuna. Mvwala Polo wutuba mvandi mawu bo kasudikisa: ‘Mutu wumvata ayi wunlemba dedi mweka badi, vayi kadika mutu wela tambula wandi mfutu boso bwididi kisalu kyandi.’ (1 Kolinto 3:8) Yave wala tusakumuna mu kibila ki kisalu tumvanganga, bakana ko mu ndandu tumbakanga mu kisalu beni. Matilda, wuba ntwami ntwala mu 20 di mimvu wutuba, “Mayangi beni kuzaba ti Yave wunsakumunanga mangolo mami.”

BWIDI TULENDA VIBIDILA MU KUBUTA MIMBUTU?

13, 14. Mu kulandakana madi mu Loma 10:1, 2, mu bibila mbi mvwala Polo kakhambu vongila kusamuna?

13 Mbi byala tusadisa ‘kubuta mimbutu mu mvibudulu’? Tubwe fyongunina buboti kifwani ki mvwala Polo. Befu tuzebi ti Polo,  wuba mu kyunda mu kibila ki basi Yuda bamanga kuwa zitsangu zitedi Kintinu. Kheti bobo, mvwalo Polo kasa bika ko kubalonga. Nandi wusudikisa mabanza mandi bo katuba: ‘Lukanu lu ntim’ami ayi yinlomba kwidi Nzambi mu kibila kiawu mwingi bavuka. Kibila yilenda ku batelimina kimbangi ti bawu badi kifuzi mu Nzambi, vayi bika boso bwididi nzayilu yikyedika.’ (Loma 10:1, 2) Vayi, mu kibila mbi mvwala Polo katatamana kusamuna?

14 Kitheti, Polo wutuba ti nandi wuba wukubama mwingi kulonga basi Yuda mu kibila ki ‘makani ma ntim’andi.’ Nandi waba tomba bawu bavuka. (Loma 11:13, 14) Kimwadi, nandi wutuba ti ‘wunlombanga kwidi Nzambi mu kibila kiawu.’ Polo wulomba kwidi Yave mwingi kasadisa kadika mutu mwisi Yuda kukikinina zitsangu zi Kintinu. Kintatu, Polo wutuba: ‘Bawu badi kifuzi mu Nzambi.’ Mvwala Polo wumona mambote mu basi Yuda ayi mangolo badi mwingi kusadila Yave. Nandi wuzaba ti basi Yuda balenda ba mvandi minlandikini mimbote mi Klisto, dedi bo nandi kabela.

15. Bwidi tulenda landikinina kifwani ki mvwala Polo? Vana bifwani.

15 Bwidi tulenda landikinina kifwani ki mvwala Polo? Ditheti, befu tufweti vanga mangolo mwingi kutomba batu ‘badi mintima mikubama mwingi kubaka luzingu lukalumani.’ Dimwadi, befu tunlombanga kwidi Yave mwingi kasadisa batu batidi kuzaba kyedika bakikana bo tuba longa. (Mavanga  13:48; 16:14) Mawu Silvana, widi ntwami ntwala mu 30 di mimvu kamvanganga. Nandi wutuba, “Ava kukwenda ku kizunga kyama ki kusamuna, minu yinsambilanga kwidi Yave mwingi katsadisa kumonisa zikhadulu zimbote.” Befu mvitu tunsambilanga mwingi zimbasi zi tusadisa kubakula batu batidi kuzaba kyedika. (Matai 10:11-13; Nzaikusu 14:6) Robert, widi ntwami ntwala mu 30 di mimvu wutuba, “Mayangi beni kusala kithwadi na zimbasi bazebi mambu mammonikinanga mu luzingu lu batu tunlonganga.” Dintatu, befu tuntsikikanga mayindu mitu mu kutadila mambote batu badi ayi mangolo bawu badi mwingi kusadila Yave. Carl, nkulutu wumweka wu kimvuka widi wubotama mu 50 di mimvu kumbusa, wutuba, “Yintombanga kidimbu mu mutu kilenda kutsadisa kuzaba ti nandi wutidi kulonguka, kiawu kilenda ba ki mwa disevu, mwa thalu voti kyuvu katidi kuzaba mvutu.” Befu kuvanga mambu amomo, tulenda ‘buta mimbutu mu mvibudulu,’ dedi mvwala Polo.

‘BIKA KUVUNDISA MYOKO MYAKU’

16, 17. (a) Mambu mbi tulenda longuka mu Mpovi 11:6? (b) Kifwani mbi kimmonisa ti batu bamvwanga nkinza kifuza kitu mu kisalu ki kusamuna?

16 Tubika kuzimbakana phila kisalu kitu ki kusamuna kididi nkinza mu luzingu lu batu, kheti tulenda mona ti bamengi kukuwa. (Tanga Mpovi 11:6.) Batu ba tumonanga, bammonanga ti phwatulu’itu yidi yifwana, twidi zikhadulu zimboti ayi bakundi bakyedika. Mawu malenda ku bavanga kukwituka, ayi mu phila thangu yimvyokila, kheti batu baba tumwenanga mu phila yikhambu fwana bawu balenda tona kubotula mayindu beni ayi ku tutadila bumboti.

17 Sergio wutuba: “Bo vavyoka mwa bilumbu mu khambu bwe kwenda va kibwangu tube vaninanga kimbangi mu kibila ki kimbevo, bawombo bamvyokilanga vana baba tukuvulanga. ‘Mambu mbi mamonikini yinu? Twaba tomba beni kulumona!’ Batu bannatanga makalu baba tuvananga mboti ayi baba tukambanga, “kisalu kimbote.” Bawu, badinda mvandi bilongulu bitu.” Sergio ayi Olinda bayituka beni bo dibakala dimweka kafikama va baba ayi wubavana biteka, ayi nandi wu batonda mu kisalu bamvanganga.

18. Kibila mbi tufweti tatamana ‘kubuta mimbutu mu mvibudulu’?

18 Bika ‘kuvongisa koko kwaku’ mu khambu bwe longa zitsangu zi Kintinu ki Nzambi, kiyeku kinkinza beni kidi yaku ki kuvana ‘kimbangi kwidi batu ba makanda ma zitsi zyoso.’ (Matai 24:14) Mu mamoso, ngye wulenda baka mayangi mawombo, kibila ngye wuzebi ti widi mu kukwangidika Yave. Nandi wunzolanga batu boso ‘bambutanga mimbutu mu mvibudulu’!

^ Lut. 2 Yesu wutuba ti diba dyambu diphasi kusamuna ku ‘kibwangu ka butukila.’ Mawu madi masonama mu zibuku zinna zintubila matedi kisalu kyandi ki kusamuna.​—Matai 13:57; Malako 6:4; Luka 4:24; Yoane 4:44.

^ Lut. 7 Kheti matafi bantubila mu nongu ayiyi badi Baklisto badi kivuvu ki kwenda ku diyilu, nongu beni yidi mvandi ndandu kwidi bisadi byoso bi Nzambi.

^ Lut. 9 Kikuma ‘kubuta mimbutu’ kilenda sundula mvandi kubuta ‘mbutu wu pheve.’ Diawu mu dilongi adidi ayi dinkwiza, tunkwiza tubila beni matedi kusamuna zitsangu zi Kintinu ki Nzambi.​—Ngalatia 5:22, 23; Ebeleo 13:15.

^ Lut. 11 Khumbu zinkaka, Yesu wusadila nongu yi kuvata lutete ayi kuvaka mwingi kutubila matedi kisalu ki kusadisa batu baba minlandikini myandi.​—Matai 9:37; Yoane 4:35-38.