Skip to content

Skip to table of contents

Zimbangi zi Yave

Select language Ibinda

Sala na Yave Kadika Kilumbu

Sala na Yave Kadika Kilumbu

‘Befu twidi minsadisi minsalanga va kimweka ayi Nzambi.1 KOLINTO 3:9.

MINKUNGA: 64111

1. Bwidi tulenda sadila va kimweka ayi Yave?

BO Yave kavanga batu, nandi wuba tomba bawu basala yandi va kimweka. Kheti batu bubu badi basumuka, vadi batu bakwikama balenda sala ayi Yave kadika kilumbu. Befu twidi ‘minsadisi minsalanga va kimweka ayi Nzambi’ bo tunsamuna zitsangu zitedi Kintinu ayi tunsadisa batu baba minsamuni. (1 Kolinto 3:5-9) Mayangi beni kuzaba ti Mvangi wulutidi mangolo, wu tusola mwingi tuvanga kisalu ki nkinza! Kusamuna yisi ko yawu to phila tunsalanga na Yave. Diawu mu dilongi adidi, tunkwiza longuka mvandi bwidi tunsalanga na Yave bo tunsadisa dikanda ditu ayi bankaka mu kimvuka, bo tunyamba buboti zinzenza, bo tukivana mwingi kusadisa mu bisalu bi kutunga mu nza yimvimba, ayi bo tumbwela kukivana mu kisalu ki Yave.—Kolosai 3:23.

2. Kibila mbi tulendi dedikisila ko kisalu tumvanga kwidi Yave ayi ki bankaka bamvanga?

2 Bo tunlonguka dilongi adidi, nkinza beni kutebuka moyo ti befu boso diswasana twidi. Mimvu twidi, buvinya, mambu ma  luzingu ayi byuma tuzebi kuvanga bisi ko bidedakana. Diawu tulendi dedikisa ko kisalu tumvanga kwidi Yave ayi ki bankaka bamvanga. Mvwala Polo wutuba: ‘Vayi bika kadika mutu kafyongunina mavanga mandi, ayi nandi wala ba kibila ki kukwangalala mu naveka, vayi kabika kuyidedikisa na batu bankaka.’—Ngalatia 6:4.

SADISA DIKANDA DYAKU AYI BANKAKA MU KIMVUKA

3. Kibila mbi tulenda tubila ti woso mutu wunkyebanga dikanda dyandi widi mu kusala na Nzambi?

3 Yave kantomba befu tukyeba dikanda ditu. Ḿba ngye wuntomba bwela tambula zimbongo mwingi kukyeba zitsatu zi dikanda dyaku. Zingudi zinkaka, basalanga ko mwingi kukyeba bana bawu balezi. Boti matata mitu basi ko bu kuyikyebila, ḿba befu tufweti ku bakyeba. Mambu amomo nkinza madi. Kibibila kintuba: ‘Bukyedika, boti mutu kakyebanga ko zitsatu zi batu badi mu nsu’andi, dedi badi va dikanda dyandi, buna mutu beni widi mu kumanga kiminu kyandi ayi bulutidi kwandi buboti kutala mutu wukhambulu kiminu.’ (1 Timoteo 5:8) Boti ngye wunkyebanga dikanda, ḿba wisi ko beni lwaku lu kusadila Yave dedi bo wutidi kunsadila. Vayi bika kuyindula mawu! Yave wunkwangalalanga bo wunkyeba dikanda dyaku.—1 Kolinto 10:31.

4. Bwidi matata balenda tudila mambu ma Kintinu va theti mu luzingu luawu, ayi ndandu mbi bambakanga mu kuvanga mawu?

4 Matata badi Baklisto, balenda sala na Yave mu kusadisa bana bawu babaka makani mu kisalu ki Yave. Matata mankaka bamvanganga mawu. Diawu bana bawu bambakilanga makani ma kusadila Yave mu kisalu ki thangu ka thangu, kheti ku kinanu bamvangila mawu. Bankaka badi mu kisalu ki misyoni, bankaka badi mintwami ntwala mu bibwanga bidi beni tsatu yi minsamuni, ayi bankaka bansadilanga ku Beteli. Boti bana kinanu badi, matata bavyokisanga ko beni yawu thangu dedi bo bantombila. Vayi bankindisanga bana bawu batatamana kusadila Yave koso kuma badi. Kibila mbi? Bila bawu badi beni mayangi kumona bana bawu kutula Yave vatheti mu luzingu luawu. (3 Yoane 4) Bawombo mu matata amomo bammwenanga buka Hana wutuba ti nandi ‘wuvana’ mwan’andi Samueli kwidi Yave. Bawu bazebi ti lwidi luaku lunneni beni kusala na Yave mu phila ayiyi.—1 Samueli 1:28.

5. Bwidi wulenda sadisila zikhomba zi bakyeto ayi zi babakala mu kimvuka kyaku? (Tala foto yidi va thononu.)

5 Boti wisi ko zitsatu zinkinza zi dikanda mwingi wukyeba mu nswalu, wulenda sadisa zikhomba mu kimvuka bambela, voti biboba ayi bo badi zitsatu zinkaka? Voti, wulenda sadisa zikhomba bankyebanga biboba beni? Tomba kuzaba batu bantomba lusalusu mu kimvuka kyaku. Ḿba vadi khomba yinkyeto wunkyebanga tata voti ngudi wuma nuna. Wulenda sadila thangu’aku mwingi kunsadisa mo kabaka bu kuvangila mambu mankaka? Voti wulenda sadisa wumweka kukwenda mu zikhutukunu, ku zandu, voti kwe mona mutu wumbela ku nzo mbuku. Ngye vanga mawu, widi mu kusala na Yave, bila ḿba nandi widi mu kusadila mwingi kavana mvutu mu nsambu khomba ka bevanga.—Tanga 1 Kolinto 10:24.

YAMBANGA BUBOTI BANKAKA

6. Bwidi tulenda yambilanga buboti zinzenza?

Tufweti sadisanga bankaka boti twidi lwaku lu kuvanga mawu

6 Minsadisi minsalanga va kimweka ayi Nzambi badi bazabakana mvandi mu  kuyambanga buboti zinzenza. Mu Kibibila, kikuma basadila mwingi kutubila ‘kuyamba’ kinsundula ‘kumonisa mamboti kwidi batu wukhambu zaba.’ (Ebeleo 13:2; tala matangu madi va wanda mu nwt-TPO) Mu Dyambu di Nzambi, mwidi bifwani biwombo bitulonga bwidi tulenda monisina mamboti. (Ngenesi 18:1-5) Tufweti sadisanga bankaka boti twidi lwaku lu kuvanga mawu, kheti ‘zikhomba zitu mu kiminu’ voti ndamba.—Ngalatia 6:10.

7. Ndandu mbi wulenda baka ngye kuyamba buboti zikhomba badi mu kisalu ki thangu ka thangu?

7 Ngye wulenda sala na Yave mu kuyamba bisadi bi Nzambi badi mu kisalu ki thangu ka thangu bakhambu nzo yi kukala. (Tanga 3 Yoane 5, 8.) Befu vanga mawu, bawu bambaka ndandu ayi befu mvitu. Kibibila kitu kamba ‘tubombasana va kimweka.’ (Loma 1:11, 12) Tala kifwani ki Olaf. Bo kaba ditoko, nsungi mweka wu divula wukhambu nkazi wuyenda tala kimvuka kiawu ayi waba tomba nzo mwingi kakala, vayi ni mutu mu kimvuka wununga kunsadisa. Olaf wudinda matata mandi bakhambu ba Zimbangi zi Yave mwingi nsungi beni kakala ku nzo’awu. Bawu batuba ti vasa ba ko dyambu, vayi bakamba Olaf ti wunkwiza lalanga va kikundu kinneni kiba va sala mo nsungi beni kalala ku kivinga kyandi. Olaf wukikinina ayi kasa nyonga ko. Bila mu sabala yoso yi kinzenza baba, nandi wubaka ndandu yiwombo kuba va nzo mweka ayi nsungi wu divula. Kadika kilumbu va meni, bawu baba tubilanga mambu mawombo mamboti ma Kibibila mu thangu baba dyanga. Nsungi wu divula wukindisa beni Olaf, ayi mawu mamvanga katomba sadila Yave mu kisalu ki thangu ka thangu. Mu 40 ma mimvu mima vyoka, Olaf wusala buka misyoni mu zitsi ziwombo.

8. Kibila mbi tufweti monisa mamboti kheti va thononu batu basimvutula ko matondo? Vana kifwani.

8 Tulenda monisa luzolo kwidi batu tukhambu zaba mu phila ziwombo, kheti va thononu bawu basimvutula ko matondo. Tala kifwani. Khomba mweka yinkyeto ku Espanha wuba longukanga Kibibila ayi Yesica musi Equador. Kiba kilumbu, bo baba longuka, Yesica wutona kudila beni. Vayi nlongisi’andi wunyuvula kibila mbi kaba didila. Yesica wutuba ti ava nandi kenda zingila ku Espanha, wuba kiphumbulu. Kilumbu kimweka, kasa nunga ko kubaka ni mwa bidya mwingi kavana mwan’andi finkyeto. Vayi bo kaba nlekisa, nandi wusambila ayi wudinda lusalusu kwidi Nzambi. Vasa vyoka ko beni thangu, Mbangi wadi zi Yave bayenda ku nzo Yesica ayi bamvana levista. Vayi mu nganzi kaba, wukhakuna levista beni ayi wutuba: “Abibi biawu bidya lukuphana mwingi yivana mwan’ama kadya?” Zikhomba beni bayedika kunsadisa, vayi nandi wumanga. Va masika, zikhomba beni bayenda bika dibanga diba bidya va mwelu nzo’andi. Diawu mu kilumbu baba longuka, wutebuka mawu moyo ayi wuba dila, bila wuvisa ti wumanga mvutu Nzambi kamvana mu nsambu’andi. Bosi nandi wubaka  makani ma kusadila Yave. Tummona ti mambu beni mayiza sukila buboti mu kibila ki khadulu yimboti zikhomba beni bamonisa yi kukabila byuma biawu.—Mpovi 11:1, 6.

WUKIVANA MWINGI KUVANGA BISALU BI KINTINU

9, 10. (a) Lwaku mbi basi Isaeli baba mwingi kukivana mu kuvanga bisalu bi Kintinu? (b) Bwidi zikhomba bubu balenda sadisila mvawu kimvuka?

9 Mu thangu yikhulu, basi Isaeli baba lwaku luwombo mwingi kukivana mu kuvanga bisalu bi Yave. (Esodu 36:2; 1 Lusansu 29:5; Nehemia 11:2) Bubu, ngye mvaku widi lwaku lu kuvana thangu’aku, byuma byaku ayi mambu wuzebi kuvanga mwingi kusadisa zikhomba zyaku. Bo wumvanga mawu, wala baka mayangi ayi Yave wala kusakumuna.

10 Dyambu di Nzambi dinkindisa babakala basala va kimweka ayi Yave mu kusadila bankaka buka minsadisi mi bakulutu voti bakulutu ba kimvuka. (1 Timoteo 3:1, 8, 9; 1 Petelo 5:2, 3) Bo bamvanga mawu, batidi kusadisa bankaka mu phila zivyakana ayi mvandi mu mbwongimini’awu. (Mavanga 6:1-4) Bakulutu ba kimvuka bamana kudinda mwingi wuba sadisa mu bisalu bitedi kukyeba bilongulu, kukubika bizunga bi kusamuna, kuludika ayi kudyodisa nzo yi Kintinu voti kuvanga bisalu binkaka? Zikhomba bansadisanga mu ziphila azyozi, bantubanga ti bawu bambakanga mayangi mawombo.

Bo bakivananga mwingi kusadisa mu bisalu bi kutunga bambakanga bakundi bamona (Tala lutangu 11)

11. Bwidi khomba mweka yinkyeto kabakila ndandu mu kusala mu bisalu bi kutunga?

11 Batu ba kivananga mwingi kusadisa bisalu bi kutunga, bambakanga bakundi bawombo. Khomba mweka yinkyeto bantedilanga Margie wusala mu bisalu bi kutunga Zinzo zi Kintinu mu 18 di mimvu. Mu bisalu beni, nandi wuba vwanga nkinza zikhomba zi bakyeto ayi wuba kuba sadisanga kulonguka kuvanga bisalu beni. Nandi wutuba ti ayiyi yidi phila yimboti mwingi zikhomba bakivana bakindasana bawu yi bawu. (Loma  1:12) Bo nandi kaba vyokilanga mu mambu ma phasi mu luzingu lwandi, bakundi kabaka mu bisalu beni baba kunkindisanga. Ngye wumana kuyivana mwingi kusadisa mu kisalu ki kutunga? Ngye wulenda vanga bisalu beni kheti wisi ko wupisuka mu kuvanga mwa kyuma.

12. Bwidi wulenda sadisila zikhomba bo kivuka kimonikini?

12 Tulenda sala va kimweka ayi Yave mu kusadisa zikhomba zitu boti kivuka ki bemonika. Tulenda vana zimbongo zitu buka makaba. (Yoane 13:34, 35; Mavanga 11:27-30) Phila yinkaka tulenda sadisila yidi mu kudyodisa voti kuludika byuma bivavuka mu kibila ki kivuka kinneni. Gabriela, khomba mweka musi Polônia, nzo’andi yibwa mu khuka yi nlangu, wuyangalala bo kamona zikhomba ziba mu bimvuka bifikama bayenda mwingi kunsadisa. Bo kanyindula mambu kavyokila, nandi wuntubanga ti kanyonganga ko mu kibila ki byuma bilalakana mu khuka, vayi wunsikikanga mayindu mandi mu ndandu kabaka. Nandi wutuba: “Mambu amama, mambonisa ti lwidi lwaku lunneni beni kuba wumweka mu kimvuka ki Baklisto, ayi yidi phila yi kubakila mayangi mu luzingu.” Bawombo batambula lusalusu bo kivuka kimonika, bankwangalalanga mu lusalusu batambula. Ayi batu bansalanga va kimweka ayi Yave mwingi kusadisa zikhomba beni, bankwalalanga ayi bambakanga ndandu yiwombo.—Tanga Mavanga 20:35; 2 Kolinto 9:6, 7.

13. Vana kifwani kimmonisa bwidi luzolo lwitu mu Yave lunkindamanga befu kukivana mwingi kusadisa bankaka.

13 Khomba mweka yinkyeto widi dizina Stephanie ayi minsamuni minkaka va kizunga kyandi, basala na Yave mu kusadisa Zimbangi zi Yave babotuka ku Estados Unidos mu kibila ki mvita wuba ku tsi’awu. Bawu basadisa batu beni kubaka zinzo ayi byuma bi nzo. Nandi wutuba: “Befu tuzola beni kumona mayangi baba mu kumona luzolo zikhomba ziawu mu nza yimvimba badi. Makanda mawombo banyindulanga ti befu tu basadisa, vayi bawu baluta ku tusadisa. Tumona luzolo, kithwadi, kiminu ayi lufyatu zikhomba badi mu Yave, mawu makindisa mvandi luzolo lwitu mu Yave ayi ku tusadisa beni tuluta tonda byuma byoso tuntambulanga mu kimvuka kyandi.”

BWELA KUKIVANA MU KISALU KI YAVE

14, 15. (a) Bwidi Yesaya kamonisina ti wuba wukubama mwingi kuvanga kisalu ki Yave? (b) Bwidi Baklisto balenda landikinina kifwani ki Yesaya?

14 Ngye tidi kubwela sala va kimweka na Yave? Boti wutidi, wulenda kukivana mwingi kwe sadila mu bibwangu bidi tsatu yi minsamuni? Tuzebi ti befu boso tulendi  kwenda ko mu bibwangu binkaka mwingi kusadila Yave. Vayi vadi zikhomba zinkaka balenda nunga kuvanga mawu. Bawu badi mayindu mbikudi Yesaya kaba. Bo Yave kayuvula: ‘Nani yilenda fidisa, ayi nani wela kutu twamina ntwala?’ Yesaya wumvutudila: ‘Minu Kawu! Thuma!’ (Yesaya 6:8) Diawu, wulenda yikuvusa: Minu yidi wukubama mwingi kusadisa kimvuka ki Yave? Mu ziphila mbi yilenda vangila mawu?

15 Tala mambu Yesu katuba matedi kisalu ki kusamuna ayi kukitula minlonguki: ‘Lutala, mimbutu miyela mieka miwombo mu tsola vayi bisadi bidi bilwelu. Diawu lulomba kuidi Mfumu yi tsola muingi kafidisa bisadi mwingi bavela mimbutu.’ (Matai 9:37, 38) Wulenda kukivana mwingi kusala buka ntwami ntwala mu kibwangu kilutidi tsatu yi minsamuni? Voti, wulenda sadisa yoso kwa khomba kuvanga mawu? Zikhomba ziwombo bantubanga ti kusala buka ntwami ntwala kulutidi tsatu yi minsamuni, yawu phila yilutidi yi kumonisa luzolo luawu mu Yave ayi mu badi’awu. Wulenda yindula ziphila zinkaka wulenda bwedila kukivana mu kisalu kyaku kwidi Yave? Ngye vanga mawu, wela baka mayangi mu luzingu.

16, 17. Mu phila mbi zinkaka wulenda bwela kukivana mwingi wusadila Yave?

16 Wulenda kukivana mwingi kusadila ku Beteli, voti kusadisa mu bisalu bi kutunga, kheti mu thangu yilwelu kwandi dedi, kilumbu kimweka voti bilumbu biwombo mu sabala? Kimvuka ki Yave, kintomba batu badi bakubama mwingi kusala koso ba kuba fila, ayi kuvanga kyoso kisalu ba kuba dinda bavanga, kheti badi fisu mu kuvanga bisalu binkaka. Yave wummonisanga beni luvalu kwidi woso mutu wukivana mu ntima mwingi kusadila kwidi tsatu.—Minkunga 110:3.

17 Wuntomba kubwela kubama theti mwingi wuluta sadila Yave mu phila yilutidi? Ḿba wulenda kukivana mwingi kukwenda ku Kikola ki Minsamuni mi Kintinu. Kikola beni, kinkubikanga zikhomba zi babakala ayi zi bakyeto badi bayonzuka mu kiphevi bansadila Yave thangu ka thangu, mwingi kimvuka ki Yave kiluta kuba sadila mu phila yifweni. Zikhomba bantomba kukwenda mu kikola beni, bafweti ba batu bakubama mwingi kusadila koso kuma ba kuba fila. Wulenda kukivana mwingi wubwela sadila Yave mu phila ayiyi?—1 Kolinto 9:23.

18. Ndandu mbi yidi mu kusala na Yave kadika kilumbu?

18 Bo twidi dikabu di Yave, twidi koku kuyalubuka, tummonisa mamboti, ayi luzolo kwidi bankaka. Befu tuyivwanga nkinza befu na befu kadika kilumbu. Mawu matu twadisanga mayangi ayi ndembama. (Ngalatia 5:22, 23) Kheti moso kwa mambu wumvyokila mu luzingu, wala baka mayangi ngye kulandakana kifwani ki Yave ki kukabila bankaka ayi kuba wumweka mu bisadi byandi bi luvalu bansalanga yandi va kimweka.—Zingana 3:9, 10.