Skip to content

Skip to table of contents

Zimbangi zi Yave

Select language Ibinda

Mvibudulu—Kivuvu ti Mambu Mala Baluka

Mvibudulu—Kivuvu ti Mambu Mala Baluka

THANGU ayiyi, yawu tufweti luta monisa mvibudulu bila luzingu lumana ba phasi mu ‘bilumbu bitsuka’ tunzingila. (2 Timoteo 3:1-5) Batu bawombo bankalanga yitu, basi ko mvibudulu. Bawu badi bwimi, banzolanga kukwambila ayi basa zaba ko kukiyala. Diawu nkinza beni kuyikuvusa: ‘Minu yisiedi ko mvibudulu dedi batu badi yama va nsengi? Mbi binsundula kuba mvibudulu wukyedika? Mbi yifweti vanga mwingi mvibudulu yiba khadulu mu luzingu lwama?’

MVIBUDULU BUNA MBI?

Kikuma basadila mu Kibibila mwingi kutubila ‘mvimbudulu,’ mbi kinsundula? Kwisinsundula ko to kubika mambu beni mabela bobo. Vayi mutu widi mvibudulu, wunkindamanga mu makani mandi, voti widi kivuvu ti mambu mala baluka mwingi kuba mamboti. Nandi kayindulanga ko to naveka, vayi wumvwanga mvandi nkinza mabanza ma bankaka, kheti mu batu bamfwemisa voti bamvangila dyambu dimbi. Nandi wuntatamana kuba kivuvu ti bukundi buawu bwala ba bumboti. Diawu tulendi kwitukila ko bo Kibibila kintuba ti mvibudulu wunkwizilanga mu luzolo. * (Tala matangu madi va wanda.) (1 Kolinto 13:4) Mvibudulu mvandi widi “mbutu wu pheve.” (Ngalatia 5:22, 23) Diawu, mbi tufweti vanga mwingi tuba mvibudulu wukyedika?

BWIDI TULENDA BELA MVIBUDULU?

Mwingi tuba mvibudulu, tufweti sambila ayi kudinda pheve yi Nzambi, bila nandi wumvananga yawu kwidi batu ba kumfyatilanga. (Luka 11:13) Pheve beni yidi mangolo, vayi tufweti tatamana kuzingila mu mambu tunlomba mu minsambu mitu. (Minkunga 86:10, 11) Mansundula ti tufweti vanga mangolo mitu moso mwingi kumonisa mvibudulu kadika kilumbu, mo yawu yiba khadulu mu luzingu lwitu. Khumbu zinkaka tulendi nunga ko. Vayi mbi bilenda kutu sadisa?

Tufweti longuka ayi landakana kifwani kimboti Yesu katu vana. Bo mvwala Polo katubila matedi ‘kimutu kimona,’ kyo kitedi mvandi mbivudulu, nandi wutu kindisa: ‘Lubika ndembama yi Klisto yiyadila mintima minu.’ (Kolosai 3:10, 12, 15, tala matangu madi va wanda) Mwingi tununga kuvanga mawu, tufweti landakana kifwani ki Yesu ayi kufyatila ti Nzambi wela ludika mambu mu thangu yifwana. Boti twidi lufyatu beni, twalasa zimbisa ko mvibudulu’itu, kheti mu moso kwa mambu malenda monika va nza tunzingila.—Yoane 14:27; 16:33.

Befu boso tuntomba nza yimona yifika kwiza mu thinu. Vayi tunlongukanga kumonisa mvibudulu bo tunyindulanga phila Yave mvandi ka tuvibidilanga. Kibibila kitu kamba: ‘Yave kasi ko malembe mu matedi kudukisa lukanu lwandi, dedi bunyindudilanga bankaka, vayi nandi benu kamvibidila, bila kasintomba ko ni wumweka kabungu, vayi wuntomba baboso babalula mavanga.’ (2 Petelo 3:9) Diawu, befu yindulanga phila Yave ka tuvibidilanga, mvitu twala luta monisa mvibudulu kwidi bankaka. (Loma 2:4) Mu mambu mbi tufweti monisina mvibudulu?

 MU MAMBU MBI TULENDA MONISINA MVIBUDULU?

Vadi mambu mawombo mammonikanga mu luzingu lwitu kadika kilumbu tufweti tombila kumonisa mvibudulu. Dedi bo mutu kankoluka, tufweti ba mvibudulu mwingi tubika kunzenga mambu kantuba. (Yakobi 1:19) Mvandi tuntombanga kumonisa mvibudulu boti mutu wube kutu dasula voti kutu fwemisa. Mwingi tubika fika dasukanga, buboti beni kutebukanga moyo phila Yave ayi Yesu bantadilanga zinzimbala zitu. Bawu batalanga ko kadika dyambu dimbi tumvanga. Vayi, bammonanga zikhadulu zimboti twidi ayi mu mvibudulu ba tuvananga thangu mwingi tubalula mavanga.—1 Timoteo 1:16; 1 Petelo 3:12.

Mvandi tuntombanga kuba mvibudulu boti mutu wutu kembi voti wutu vengi dyambu dimbi. Ḿba muna thangu tulenda fwema ayi kutomba kuyikakidila. Vayi Kibibila kitu kamba mbi tufweti vanga. Kiawu kintuba: ‘Bulutidi buboti kuba mvibudulu na kuba mayindu ma lungundayi. Bika fika dasukanga, bila ntima wu bivulu wawu wufika dasukanga.’ (Mpovi 7:8, 9, tala matangu madi va wanda mu nwt-TPO) Kheti mambu babe tuvunina, tufweti ba mvibudulu ayi mu malembi kuyindula theti buboti ava kuvanga dyoso kwa dyambu. Mawu Yesu kavanga bo batu bamvunina mambu.—Matai 11:19.

Matata mvandi bafweti luta tomba kuba mvibudulu bo bansadisa bana bawu kubalula mavanga voti kubika zinzinunu zimbi. Tala kifwani ki Mattias khomba mweka widi ku Beteli yi Escandinávia. Bo Mattias kaba ditoko, batu baba kotanga yandi kikola, baba kunsakininanga mu kibila ki mambu kaba kikininanga. Matata mandi basa zaba ko ti mawu kaba vyokila mu kikola. Vayi bawu batona kumona ti mwan’awu kabasa bwe kikinina ko mu malongi ma Kibibila. Gillis tata Mattias, wutuba ti nandi ayi nkazi’andi baba tomba kumonisa beni mvibudulu mu mambu amama. Mattias wutona kuyuvula byuvu dedi: “Nani Nzambi? Bwidi tuzabidi mu bukyedika ti Kibibila buku yi Nzambi? Bwidi tuzabidi ti Nzambi nandi wuntomba tulandakana madi mu Kibibila?” Mvandi wuyuvula matata mandi: “Kibila mbi batu bafweni kumfundisila mi khambu kikinina mambu benu lunkikininanga?”

Gillis wusudikisa: “Khumbu zinkaka mwan’itu waba vananga byuvu mu nganzi, bakana ko  mu befu, vayi mu kibila ki mambu madi mu Kibibila, phila mayindu kaba, maba kuntwadisanga ziphasi mu luzingu.” Bwidi Gillis kasadisila mwan’andi? Nandi wutuba: “Minu ayi mwan’ami, tuba kolukanga mu bilokulu biwombo.” Bo mwan’andi kaba kolukanga yandi ayi kumvana byuvu, Gillis wuba kuwanga to mwingi kazaba mabanza mandi ayi bwidi kaba mwena mambu beni. Gillis wutuba ti khumbu zinkaka wuba sudikisanga dyambu kwidi mwan’andi ayi kumvananga thangu mwingi kayindula mawu ti khumbu bala bwe koluka matedi mambu beni. Khumbu zinkaka, Gillis mvandi wuba botulanga bilumbu byodi voti bitatu mwingi naveka kayindula mambu beni. Mu kibila ki masolo beni, Mattias wutona kuvisa ti Yave wutu zolanga beni, wuvisa tsundu yi khudulu ayi wuvisa mvandi ti Yave widi nswa wu kutu yala. Tat’andi wutuba: “Yibotula thangu, disa ba ko dyambu dilwelu, vayi mu malembe, luzolo lu mwan’itu mu Yave lutona kuyonzuka. Minu ayi nkazi’ami, twidi beni mayangi kumona ti mvibudulu’itu ayi mangolo tuvanga mwingi kusadisa mwan’itu, masa ba ko ma bobo ayi tununga kotisa mambu ma Nzambi mu ntim’andi.”

Bo Gillis ayi nkazi’andi baba sadisa mwan’awu mu mvibudulu, bawu bafyatila ti Yave wala basadisa. Gillis wutuba: “Khumbu ziwombo yikamba Mattias ti luzolo lukyedika twidi mu nandi, lwaba vanganga mam’andi ayi minu kusambila beni mwingi Yave kansadisa kuvisa mambu.” Bukyedika, matata amama, badi beni mayangi mu mvibudulu bamonisa ayi bo bakhambu fika vonga.

Befu mvitu tufweti ba mvibudulu bo tunkyeba mutu wu dikanda voti nkundi widi kimbevu kingolu. Tala kifwani ki Ellen * (tala matangu madi va wanda), nandi mvandi ku Escandinávia kankalanga.

Nana di mimvu kumbusa, nnuni Ellen wumonikina mambu mamvunzula ntu. Mu kibila akyoki, nandi kamonanga ko mayangi, kyunda voti kyadi. Mambu amomo matwadisa beni ziphasi kwidi Ellen. Nandi wutuba: “Mawu maba tombolu kumonisa beni mvibudulu ayi kusambila beni. Matangu yinzolanga beni ayi ma kukhindisanga, madi mu Filipi 4:13 mantuba: “Minu [yilenda] vanga mambu [moso] mu dyambu di mutu wowo wukukhindisanga.”” Mu mangolo ayi lusalusu lu Yave, Ellen wunnunganga kuvibidila mu mambu kamvyokila.—Minkunga 62:5, 6.

LANDAKANA KIFWANI KI MVIBUDULU WU YAVE

Yave, nandi kifwani kilutidi tufweti landakana mu matedi kumonisa mvibudulu. (2 Petelo 3:15) Khumbu ziwombo tuntanganga mu Kibibila matedi mvibudulu wunneni Yave kadi. (Nehemia 9:30; Yesaya 30:18) Wuntebuka moyo bwidi Yave kamwena bo Abalami kamvana byuvu bitedi makani kabaka ma kutulula Sodoma? Yave kasa dasuka ko. Vayi mu mvibudulu, nandi wuyuwa byuvu byoso Abalami kavanga ayi bo kaba tuba mambu maba kuntula dibamu. Bosi Yave wumonisa Abalami ti nandi wuyuwa mamoso maba kuntula dibamu ayi wunkamba ti kalasa tulula ko divula di Sodoma na kumona kuna 10 di batu badi basonga. (Ngenesi 18:22-33) Yave khumbu zyoso wunkuwanga mu mvibudulu, ayi nandi kafika dasukanga ko.

Mvibudulu yidi khadulu yi nkinza mu kimutu kimona Baklisto boso bafweti ba. Befu vanga mangolo mitu moso mwingi tuba mvibudulu wukyedika, tunkwiza zitisa Tat’itu Yave, ayi twela ba va kimweka na “batu bobo beti vingila kiuka kioki bavanina tsila mu minu ayi mu mvibudulu.”—Ebeleo 6:10-12.

^ Lut. 4 Khadulu yi luzolo, yawu tutubila theti mu kikhuku akiki ki malongi kintubila vwa di malongi matedi “mbutu wu pheve” yinlongo yi Nzambi.

^ Lut. 15 Bavingisa mazina ma batu mu dilongi adidi.