Skip to content

Skip to table of contents

Tatamana Kuba Ndembama mu Ntima Kheti bo Mambu Mambaluka

Tatamana Kuba Ndembama mu Ntima Kheti bo Mambu Mambaluka

“Minu yivumbama ayi yivumbika mwel’ami.”​—MINKUNGA 131:2.

MINKUNGA: 128, 129

1, 2. (a) Bwidi mambu mambaluka mu nzimbukila malenda baludila luzingu lwitu? (Tala foto yidi va thononu.) (b) Dedi buntubila Minkunga 131, mbi bilenda tusadisa kubaka ndembama mu ntima?

YAYA Lloyd ayi Alexandra basadila ku Beteli kuvyoka 25 ma mvimvu, vayi kuntwala baba fila mwingi babwela myoko mu kisalu ki kusamuna. Va thononu, bawu baba kyunda. Yaya Lloyd wutuba: “Minu yimona ti Beteli ayi kisalu yaba vanga kuna, yiba buka nzingulu’ami. Yivisa kibila mbi mambu mabalukila, vayi mu zisabala ayi zingonda zilanda, minu yaba banga beni kyunda.” Vaba thangu Lloyd kaba mu mayangi mu kiyeku kimona vayi thangu zinkaka nandi waba banga mu kyunda.

2 Khumbu zinkaka, mambu mala baluka mu phila tukhambu vingila, ayi mawu malenda tutula dibamu ayi nganzi. (Zingana 12:25) Boti phasi kukikinina voti kukolama bo mambu mambaluka, mbi tulenda vanga mwingi tutatamana kuba bavumbama? (Tanga Minkunga 131:1-3.) Ndoko tumona bwidi  bisadi bi Yave, bi thangu yikhulu ayi bi thangu’itu, banungina kubaka ndembama mu ntima bo mambu mafika baluka mu luzingu luawu.

BWIDI “NDEMBAMA YI NZAMBI” YI TUSADISILANGA?

3. Bwidi luzingu lu Yosefi lubalukila mu nzimbukila?

3 Yindul’abu kifwani ki Yosefi. Mu bana boso Yakobi kaba, Yosefi nandi kaba luta zolanga. Mawu mavanga zikhomba zyandi bammona nsoki. Bo Yosefi kaba 17 di mimvu, bawu bansumbisa buka mvika. (Ngenesi 37:2-4, 23-28) Mu 13 di mimvu, nandi wutovuka ku Ngipiti, wuyiza ba theti mvika bosi bantula ku buloku. Yosefi kasa ba ko va kimweka na tat’andi wu kaba zolanga beni, vayi kinanu kaba zingila. Mambu kamonikina, khanu mantwadisa kyunda ayi nganzi, vayi masi ko mawu mamonika. Mbi binsadisa?

4. (a) Mbi Yosefi kavanga bo kaba ku buloku? (b) Bwidi Yave katambudila minsambu mi Yosefi?

4 Bo Yosefi kaba tovuka ku buloku, ḿba wusikika mayindu mandi mu kumona bwidi Yave kaba kunsadisila. (Ngenesi 39:21; Minkunga 105:17-19) Ḿba wuyindula mvandi zindosi kaba lotwanga bo kaba mwana ditoko ayi mawu mansadisa kufyatila ti Yave widi yandi. (Ngenesi 37:5-11) Ḿba nandi wusambila beni ayi wukamba Yave mamoso maba mu ntim’andi. (Minkunga 145:18) Yave wuvana mvutu mu minsambu mi Yosefi mu kumvana lufyatu ti Nandi “wuba yandi” mu moso kwa mambu mammonika.—Mavanga 7:9, 10. * (Tala matangu madi va wanda.)

5. Bwidi “ndembama yi Nzambi” yilenda tukindisila tubwela sadila Yave?

5 Kheti mambu maphasi tumvyokila mu luzingu, tulenda baka “ndembama yi Nzambi” yinkyebanga ‘mayindu mitu’ ayi yi tusadisa kuba bavumbama. (Tanga Filipi 4:6, 7.) Boti twidi dibamu ayi mu nganzi, “ndembama yi Nzambi” yilenda tukindisa tutatamana kusadila Yave ayi kubika vonga. Twanlonguka bifwani bi zikhomba zitu mu thangu ayiyi, bama vyokila mu phila mambu beni.

DINDA YAVE KA KUSADISA KUVUTULA NDEMBAMA WUBA

6, 7. Bwidi minsambu mitu milenda tusadisila kuvutula ndembama yi ntima? Vana kifwani.

6 Bo yaya Ryan ayi Juliette bazaba ti kiyeku kiawu ki mintwami ntwala mifilu kimana, baba beni mu kyunda. Ryan wutuba: “Befu tunata mawu mu nsambu kwidi Yave. Tuzaba ti lwaku lunneni tuba lu kumonisa lufyatu lwitu mu nandi. Bawombo mu kimvuka kitu baba bamona, diawu tusambidila kwidi Yave mwingi ka tusadisa tuba kifwani kimboti ki kiminu kwidi bawu.”

7 Bwidi Yave katambudila nsambu’awu? Ryan wutuba: “Bo tumana sambila, kyunda kyoso kiba yitu ayi mambu tuba mona dibamu, bizimbala. Ndembama yi Nzambi yikyeba mintima ayi mayindu mitu. Tuvisa ti Yave kalenda tatamana ku tusadila befu tadila mambu mu phila yimboti.”

8-10. (a) Bwidi pheve yi Nzambi yilenda ku tusadisila bo twidi dibamu? (b) Bwidi Yave kalenda tusadisila bo tunsikika mayindu mitu mu kisalu kyandi?

8 Pheve yi Nzambi yilenda tusadisa kuba bavumbama, yilenda tutwadisa mvandi mu bibuku bi Kibibila bilenda ku tusadisa kuvisa mbi bilutidi nkinza mu luzingu. (Tanga  Yoane 14:26, 27.) Tala mambu mamonikina Philip ayi Mary, bakwela bamweka basadila ku Beteli mu 25 ma mimvu. Mu ngonda zinna to, zingundi ziawu ayi wunkaka musi dikanda di Philip bafwa, ayi babika kisalu ki Beteli mwingi kukyeba tat’andi na Mary, wuba mbela ntu.

9 Philip wutuba: “Minu yimwena ti yiba nunga kukikinina mambu mabaluka, vayi dyambu diba khambu. Yiyiza tanga matangu madi mu Kolosai 1:11 mu Kibanga ki Nsungi tuba longuka mu kimvuka. Minu yiba vanga mangolo ma kukindama mu bukyedika, vayi yisa kindama ko mu mamoso. Yiba tombulu kukindama mu mvibudulu ayi mu mayangi.’ Lutangu beni, lutsadisa kutebuka moyo ti mayangi mami mu luzingu, mayizilanga ko mu mambu yimvyokila, vayi mu phila pheve yi Nzambi yinsadilanga mu luzingu lwami.”

10 Bo Philip ayi Mary basikika mayindu mu kisalu ki Yave, nandi wuba sakumuna mu ziphila ziwombo. Bo babotuka ku Beteli, babaka minlonguki miwombo mi Kibibila miba konzuka buboti mu kiphevi ayi baba zolanga kulonguka Kibibila khumbu ziwombo mu sabala. Mary wutuba: “Bawu ba tutwadisa beni mayangi, ayi yiba phila Yave kasadila mwingi ku tukamba ti wuba yitu ayi mamoso mankwiza kwendila buboti.”

VANGA DYAMBU YAVE KALENDA SAKUMUNA

Bwidi tulenda landikinina kifwani ki Yosefi mu moso mambu mammonika mu luzingu lwitu? (Tala bitini bi matangu 11-13)

11, 12. (a) Bwidi Yosefi kavangila dyambu Yave kalenda sakumuna? (b) Bwidi Yave kasakumunina Yosefi?

11 Bo mambu mambaluka mu luzingu, ḿba tulenda ba beni dibamu ayi kuyindulanga to ziphasi twidi mu kuvyokila. Khanu mawu mamonikina Yosefi. Vayi, nandi wusola kuvanga mambu kalenda nunga kuvanga mu ziphasi kaba vyokila. Dedi bo kasadila beni kwidi Potifali, nandi mvandi wusala beni ku buloku kaba mu bisalu byoso mfumu yi buloku kaba kumvana kavanga.—Ngenesi 39:21-23.

12 Kilumbu kimweka, Yosefi bamvana kiyeku ki kukyeba batu bwadi baba mu buloku basadila ku nzo Falawo. Yosefi wuba kyeba buboti, babakala beni bamona ti nandi wuba mutu wumboti diawu bakhambu mwena boma kunkamba mambu maba kuba tatisa ayi zindosi zimbi balota mu bwilu buvyoka. (Ngenesi 40:5-8) Yosefi kasa zaba ko ti disolo kaba ayi babakala beni, dyala kunsadisa kubotuka ku buloku. Mimvu myodi mivyoka, nandi wubotuka ku buloku ayi wuyiza ba mfumu ku Ngipiti. Mu divula dyoso di Ngipiti, Falawo to wuluta ba kimfumu na Yosefi!—Ngenesi 41:1, 14-16, 39-41.

13. Bwidi tulenda vangila mambu mu phila Yave kalenda tu sakumunina kheti mu zyoso kwa ziphasi tumvyokila?

 13 Dedi Yosefi, tulenda vyokila mu mambu tukhambu zaba ma kuvanga. Vayi befu ba mvibudulu ayi kuvanga mambu tulenda nunga kuvanga, Yave wala tusakumuna. (Minkunga 37:5) Kheti twidi divuda ayi dibamu, twalasa ‘Khambu ko mana’ voti kumwena ti tusyedi ko ma kuvanga. (2 Kolinto 4:8; tala matangu madi va wanda mu nwt-TPO) Yave wela ba yitu, ayi nandi wela luta vanga mawu befu tatamana kusikika mayindu mitu mu kisalu ki kusamuna.

SIKIKA MAYINDU MAKU MU KISALU KI KUSAMUNA

14-16. Bwidi nsamuni Filipi kasikikila mayindu mu kisalu ki kusamuna kheti bo mambu mabaluka mu luzingu lwandi?

14 Nsamuni Filipi, widi kifwani kimboti ki mutu wusikika mayindu mu kisalu ki kusamuna kheti bo mambu mabaluka mu luzingu lwandi. Thangu mweka nandi wuba mu mayangi mu kiyeku kimona katambula ku Yelusalemi. (Mavanga 6:1-6) Vayi mambu mayiza baluka. Bo bavonda Stefano, Baklisto mu mbandu beni batona kuba thota, ayi bawu batina ku Yelusalemi. Bo Filipi kaba tomba tatamana kusadila Yave, diawu kayendila ku divula di Samalia, kuba batu baba tomba kukuwa zitsangu zimboti.—Matai 10:5; Mavanga 8:1, 5.

15 Filipi wuba wukubama mwingi kukwenda koso kuma pheve yi Nzambi yi kuntwadisa. Diawu Yave kansadila mwingi kasamuna mu mavula maba batu bakhambu zaba zitsangu zimboti. Basi Yuda bawombo baba lenzanga basi Samalia ayi baba kuba vangilanga mambu mambi. Vayi Filipi kasa ba ko kithatu, ayi mu mayangi wuba longa zitsangu zimboti. Ayi basi Samalia banyuwila mu “kithuadi”!—Mavanga 8:6-8.

16 Bosi pheve yi Nzambi yitwadisa Filipi mwingi kasamuna mu mavula ma Azoti ayi Sezali, kuba batu bawombo bakhambu ba basi Yuda. (Mavanga 8:39, 40) Vayi luzingu lu Filipi lubwe baluka. Nandi wuyiza ba dikanda ayi nzo’andi. Vayi boso kwandi luzingu lu Filipi luba balukila, nandi wutatamana kusamuna, ayi Yave wutatamana  mvandi kunsakumuna ayi kusakumuna dikanda dyandi.—Mavanga 21:8, 9.

17, 18. Bo Luzingu lwitu lumbaluka mu phila tukhambu vingila, bwidi kusikika mayindu mu kisalu ki kusamuna kulenda tusadisila?

17 Zikhomba ziwombo badi mu kisalu ki thangu ka thangu, batuba ti kusikika mayindu mu kisalu ki kusamuna kuba sadisa kutatamana kuba mayangi kheti bo mambu mabaluka. Dedi, mu thangu bakwela bamweka ku África do Sul bantedilanga Osborne ayi Polite babotuka ku Beteli, bawu bamwena ti disa ba ko dyambu diphasi kubaka nzo ayi kisalu bakhambu sadila kilumbu kyoso. Vayi Osborne wutuba: “Tusa fika baka ko kisalu dedi bo twaba tomba.” Polite wutuba: “Tusa nunga ko kubaka kisalu mu ngonda zitatu, ayi tusa lunda ko zimbogo. Dyambu diphasi beni tuvyokila.”

18 Mbi bisadisa Osborne ayi Polite mu mambu maphasi baba vyokila? Osborne wutuba: “Kusamunanga ayi zikhomba mu kimvuka, ku tusadisa beni tubika ba kyunda ayi tuba mayindu mamboti.” Bawu basa kala ko ku nzo’awu mu kyunda, vayi babaka makani ma kutatamana kusamuna. Kuvanga mawu kuba twadisa beni mayangi! Osborne wubwe tuba: “Tutomba bisalu biwombo, bosi tuyiza baka kisalu.”

FYATILA MU YAVE MU MAMOSO

19-21. (a) Mbi byala tusadisa kutatamana kuba ndembama mu ntima? (b) Ndandu mbi tulenda baka bo tunkolama mu mambu mambaluka mu luzingu?

Phila tunkolama mu mambu mambaluka mu luzingu, kulenda kindisa kikundi kitu na Yave

19 Dedi bo tuma mwena, befu vanga mamoso tunnunga mu mambu tumvyokila ayi kufyatila mu Yave, twala ba bakubama mwingi kutatamana kuba ndembama mu ntima mu moso kwa mambu tundengana mu luzingu. (Tanga Mika 7:7.) Bumvyokila thangu, tulenda mona ti kukolama mu mambu mambaluka mu luzingu lwitu, kulenda kindisa kikundi kitu na Yave. Polite wutuba ti kubasika ku Beteli, kunsadisa kuvisa buboti mbi binsundula kufyatila  Yave kheti bo mambu mammonika ti phasi madi. Nandi wutuba: “Kikundi kyami ayi nandi kibwela kinda.”

20 Mary, tube tubila va thononu, wukhidi kyeba tat’andi weka kiboba ayi kusala buka ntwami ntwala. Nandi wutuba: “Boti dibamu yidi, yilonguka ti yifweti kala swi, kusambila ayi kuvumbika ntima. Kubika mamoso mu myoko mi Yave, didi dilongi dinneni beni yilonguka, ayi dyela tatamana kuba dyambu dinkinza.”

21 Lloyd ayi Alexandra batuba ti mambu mabaluka lu luzingu luawu mathota kiminu kiawu mu phila bakhambu yindudila. Vayi bamona mvandi ti mambu beni ma kuba sadisanga. Bubu, bawu bazebi ti kiminu kiawu kikinda mwingi kununga mambu balenda vyokila, ayi bankikinina ti baluta ba batu bamboti.

Mambu mambaluka mu luzingu malenda tutwadisa lusakumunu! (Tala bitini bi matangu 19-21)

22. Befu vanga ma tulenda nunga mu mambu tumvyokila, lufyatu mbi tulenda ba?

22 Mu nza ayiyi, luzingu lwitu lulenda baluka mu kinzimbukila. Tulenda tambula kiyeku kimona mu kisalu ki Yave, kuba kimbevu kingolu, voti kukyeba dikanda ditu mu phila yimona. Vayi moso kwa mambu wummonikina, ba lufyatu ti Yave wala kukyeba ayi kusadisa mu thangu yifwana. (Ebeleo 4:16; 1 Petelo 5:6, 7) Bubu, vanga ma wulenda nunga mu mambu wumvyokila. Sambila kwidi Tat’aku, Yave, ayi longuka bu kumfyatila mu mamoso. Mu phila ayoyi, boso kwandi mambu mambalukila mu luzingu, ngye wala tatamana kuba ndembama mu ntima, yimfumina kwidi Yave.

^ Lut. 4 Kuntwala, Yosefi wutedila mwan’andi wutheti Manase, bila nandi wutuba: ‘Nzambi wutsadisa kuzimbakana ziphasi zyami zyoso.’ Nandi wuvisa ti mwan’andi wuba khayilu yifumina kwidi Yave mwingi kumbomba.—Ngenesi 41:51, tala matangu madi va wanda mu nwt-TPO.