Skip to content

Skip to table of contents

 DILONGI 38

‘Yizanu Kuidi Minu, . . . ayi Minu Yala Kulukindisa’

‘Yizanu Kuidi Minu, . . . ayi Minu Yala Kulukindisa’

‘Yizanu kuidi minu, benu boso muidi bavonga ayi muidi mu kunata mimfuna, ayi minu yala kulukindisa.’MATAI 11:28.

NKUNGA 17 ‘Yitidi’

MAMBU TUANLONGUKA *

1. Dedi bummonisina Matai 11:28-30, lukanu mbi Yesu kavanga?

YESU wutuba: ‘Yizanu kuidi minu, ayi minu yala kulukindisa.’ Mambu amomo mawu Yesu kakanikisa kuidi batu baba kunkuwa (Tanga Matai 11:28-30.) Yesu kasa tubila ko to mawu va munu, vayi nandi wusadila mambu katuba. Yindula mambu kavangila nkieto wumueka wuba kimbevo kingolo mu mimvu miwombo.

2. Mbi Yesu kavangila nkieto wumueka wuba kubela?

2 Nkieto beni waba tomba lusalusu. Nandi wutomba mimfelimi miwombo muingi bambuka. Kheti mu 12 di mimvu katovukila, nandi kasa beluka ko. Dedi bumonisina Nsiku, batu baba kuntadilanga wusumuka. (Levitiku 15:25) Kilumbu kimueka nandi wuyuwa matedi Yesu ayi wuyuwa mvandi ti nandi kalenda belusa batu baba tovuka mu kibila ki bimbevo. Diawu kabakila makani ma kumbila. Bo kamona Yesu, nandi wusimba to mu minledi miandi, ayi wubeluka muna thangu! Kubika kuandi to kubelusa nkieto beni, Yesu mvandi wumonisa luzolo ayi lukinzu mu nandi. Dedi, Yesu wuntedila ‘muana’, kikuma kimmonisa luzolo ayi lukinzu. Wulenda yindula buidi nkieto awowo kabakila mbombolo ayi khindusulu?—Luka 8:43-48.

3. Biuvu mbi tunkuiza baka mimvutu mu dilongi adidi?

3 Dedi bo ngie bemuena, nkieto beni nandi wuvanga mangolo ma kukuenda nati kuidi Yesu. Momawu mvandi mafueti monika bubu. Befu tufueti vanga mangolo muingi kukuenda nati kuidi Yesu. Bukiedika ti bubu Yesu kabelusanga ko mu kinsuni  batu bankuendanga kuidi nandi. Vayi nandi wukhidi tutumisa: ‘Yizanu kuidi minu, ayi minu yala kulukindisa.’ Mu dilongi adidi, tunkuiza baka mimvutu mi biuvu bitanu: Buidi tulenda kuendila kuidi Yesu? Mbi Yesu kaba tomba kukoluka bo katuba bika lubonga vangu kiama? Mbi tulenda longuka mu kifuani ki Yesu? Kibila mbi kuvanga kisalu Yesu katu vana kutu kindisilanga? Ayi buidi tulenda tatamana kubaka khindusulu mu kuba mu vangu ki Yesu?

“YIZANU KUIDI MINU”

4-5. Mu ziphila mbi tulenda kuendila kuidi Yesu?

4 Phila yimueka tulenda kuendila kuidi Yesu yidi mu kulonguka beni matedi mambu katuba ayi kavanga. (Luka 1:1-4) Ni mutu wunkaka kalenda vanga mawu va mving’itu. Befu veka tuvuidi kiyeku ki kulonguka matedi luzingu lu Yesu. Mvandi tunkuendanga ti Yesu mu thangu tumbaka makani ma kubotama ayi kuba minlonguki miandi.

5 Phila yinkaka yi kukuendila kuidi Yesu yidi mu kudinda lusalusu kuidi bakulutu ba kimvuka. Yesu wusadila ‘makaba ma batu’ muingi kukieba mamemi mandi. (Efeso 4:7, 8, 11; Yoane 21:16; 1 Petelo 5:1-3) Befu tufueti tona kudinda lusalusu luawu. Tulendi tedimina ko ti bawu batesa mambu tuidi mu kuviokila voti tuntomba. Tala mambu mamonikina khomba yimueka bantedilanga Julian. Nandi wutuba: “Minu yibika kusadila ku Beteli mu kibila ki kimbevo. Nkundi’ami wumueka wukhamba ti yifueti dinda lusalusu kuidi bakulutu ba kimvuka. Va thononu yiyindula ti yisi ko tsatu. Vayi kuntuala yidinda. Ayi yilenda tuba ti luawu lusalusu lulutidi yima tambula.” Bakulutu ba kimvuka bakuikama, dedi bo bayenda kuetala Julian, balenda tukindisa kuzaba ‘mayindu ma Klisto’, kuvisa ayi kulandakana mabanza ayi kifuani ki Yesu. (1 Kolinto 2:16; 1 Petelo 2:21) Bukiedika, ayoyo yidi nkayilu yilutidi balenda tuvana!

“LUBONGA VANGU KIAMA”

6. Mbi Yesu kaba tomba kutuba mu bikuma “lubonga vangu kiama”?

6 Vangu voti nkamba widi nti mutu kankambikanga mu mavangiti muingi kunatina mimfuna voti nti bankanganga mu dinga di bibulu biodi muingi kunata mfuna voti kuvanga minkala. Diawu, bo Yesu katuba: “Lubonga vangu kiama,” ḿba nandi waba tomba kutuba “kikininanu lutumu luama”. Vayi ḿba mvandi waba tomba kutuba: “Kotanu mu vangu kiami va kimueka ayi minu ayi tusadilanu Yave va kimueka.” Vayi mamoso Yesu katuba madi kithuadi na kusala.

7. Dedi bummonisina Matai 28:18-20, kisalu mbi tutambula ayi lufiatu mbi tulenda ba?

7 Befu tumbanga mu vangu ki Yesu, bo tukivana kuidi Yave ayi tumbotama. Baboso balenda mavanga—Yesu kalendi manga ko batu batidi kusadila Nzambi. (Yoane 6:37, 38) Mvandi minlandikini mioso mi Yesu batambula kiyeku ki kusala va kimueka na Yesu mu kisalu Yave kamvana. Ayi tulenda ba lufiatu ti Yesu wala ba yitu mu kisalu akioki ayi wala tusadisa.—Tanga Matai 28:18-20.

“LULONGUKA KUIDI MINU”

Kindisa bankaka deli Yesu (Tala bitini bi matangu 8-11) *

8-9. Kibila mbi batu baba kikululanga baba zolanga kufikama Yesu, ayi biuvu mbi tufueti kuyivana?

8 Batu ba kikululanga baba tomba kufikama Yesu. (Matai 19:13, 14; Luka 7:37, 38) Kibila mbi? Kibila Yesu disuasana kaba na Bafalisi. Bakulutu abobo ba binganga babasa monisanga ko luzolo kuidi batu ayi baba beni lungundayi. (Matai 12:9-14) Vayi Yesu waba ku kikululanga ayi waba monisanga luzolo. Bafalisi baba tomba kuba bazabakana kuidi batu boso ayi baba kuyinyemisanga mu kuba batu bankinza. Yesu wulonga batu muingi babika  kuyitadila buka ti balutidi na bankaka, vayi kuba sadila. (Matai 23:2, 6-11) Bafalisi baba tomba batu baba tumukina mu boma. (Yoane 9:13, 22) Yesu waba kindisanga bankaka mu kuba monisa luzolo ayi mu kutuba mambu mamboti.

9 Amomo madi malongi mamfunu tulenda longuka mu Yesu. Tufueti kuyikuvusa: ‘Bukiedika ti batu ba kuthadilanga mutu wuvumbama ayi wu kikululanga? Yidi wukubama muingi kusadila bankaka? Yimmonisanga mamboti kuidi bankaka?’

10. Buidi bubela nkangulu wu Yesu na minlonguki miandi?

10 Yesu waba zolanga kukala mu ndembama na batu baba salanga yandi, ayi waba zolanga kuba kubika. (Luka 10:1, 19-21) Nandi waba kindisanga minlonguki miandi kuvananga biuvu ayi waba tombanga kuzaba mayindu mawu. (Matai 16:13-16) Dedi biuma bavatila kukhati luphangu, minlonguki mi Yesu bayonzuka buboti mu kiphevi. Bawu balunda mambu Yesu kaba longisa, ayi kuntuala bayiza kuna zikhadulu zimboti.

Ba nkundi ayi yoluka buboti na bankaka

Ba mangolo ayi kifuza

Wukikula ayi sala beni *

11. Biuvu mbi tufueti kuyivana?

11 Boti widi mua kimfumu kuidi bankaka, wukiyuvusa: ‘Mambu mbi yintuadisanga ku kisalu ayi ku nzo? Yidi mutu wuntuadisanga ndembama? Minu yinkindisanga bankaka kuvanga biuvu? Yidi wukubama muingi kukuwa mayindu ma bankaka?’ Bukiedika, ni mutu mu befu wutidi kuba buka Bafalisi baba fuemanga bo bankaka baba kuba vananga biuvu ayi baba thotanga batu baba mayindu maviakana na mawu.—Malako 3:1-6; Yoane 9:29-34.

“LUELA BAKA LUVUNDULU”

12-14. Kibila mbi kisalu Yesu katu vana kitu kindisilanga?

12 Kibila mbi tulenda tubila ti kisalu Yesu katu vana kitu kindisanga? Vadi bibila biwombo, vayi tuantubila to nkadu mu biawu.

13 Betu tuidi mintuadisi milutidi. Yave widi Ntuadis’itu wulutidi Zangama, kasi ko mfumu wu nganzi voti wukhambu tondanga. Nandi wumvuanga nkinza kisalu tumvanganga. (Ebeleo 6:10) Ayi nandi wu tuvananga mangolo tuntomba muingi kununga kukieba kiyeku kitu. (2 Kolinto 4:7; Ngalatia 6:5, tala matangu madi va wanda mu nwt-TPO.) Ntinu’itu Yesu, wu tuvana kifuani kimboti mu matedi kukieba bankaka. (Yoane 13:15) Ayi bakulutu ba kimvuka ba tukengidilanga banlandakananga kifuani ki Yesu, “Nsungi wunneni.” (Ebeleo 13:20; 1 Petelo 5:2) Muingi kutu tuadisa ayi kutu kieba, bawu bamvanganga mangolo ma kumonisa mamboti ayi kibakala.

14 Tuidi bakundi balutidi. Vasi ko dingumba di batu badi kisalu kiba tuadisanga beni mayangi dedi kio befu tuidi, ayi badi bakundi ba luzolo dedi bo befu tuidi. Yindula diambu adidi: Befu tuidi luaku lu kusala na zikhomba zitu badi zikhadulu zimboti, vayi bayindulanga ko ti balutidi kena bankaka. Bawu badi luzabu luwombo, vayi bayinangikanga ko. Bawu batutadilanga ko to buka batu bansalanga yawu, vayi buka bakundi. Ayi luzolo badi mu befu, lulenda kuba nata kufua mu kibila kitu!

15. Buidi tummonanga kisalu tutambula muingi kuvanga?

15 Befu tuidi kisalu kilut idi. Befu tunlongisanga batu kiedika matedi Yave ayi tuba monisanga mambu moso ma luvunu Satana kantubanga. (Yoane 8:44) Satana wuntovulanga batu mu mambu kaba vunanga. Dedi, nandi wuntomba tukikinina ti Yave kasinlemvukila ko masumu mitu ayi tusa fuana ko kutambula luzolo lu Tat’itu. Alolo luidi luvunu luntuadisanga beni phasi kuidi batu! Bo tunkuenda nati Klisto, Yave wunlemvukilanga masumu mitu. Nandi wutu zolanga beni. (Loma 8:32, 38, 39) Bukiedika, didi diambu dimboti  kusadisa batu kulonguka kufiatila Yave ayi kubaka luzingu lumboti!

TATAMANA KUBAKA KHINDUSULU MU VANGU KI YESU

16. Disuasana mbi didi mu mfuna Yesu katu dinda tunata ayi mimfuna minkaka tunnatanga?

16 Mfuna Yesu katu dinda tunata yidi disuasana na mimfuna tunatanga kadika kilumbu. Dedi, khumbu ziwombo mutu kalenda basika ku kisalu kubika to wuvonga vayi mvandi wudasuka. Vayi bo tunsadila Yave ayi Yesu, befu tumbanga beni mayangi. Kutsuka kilumbu bo tummana kusala, befu tumbanga beni bavonga vayi tufueti kubue vanga mangolo ma kukuenda mu lukutukunu mu builu beni. Vayi bo lukutukunu lummana, befu tunluta kindamanga ayi tunluta bakanga mangolo. Mawu mammonikanga bo tumvanganga mangolo ma kusamuna ayi kuvanga ndongukulu yi Kibibila yi befu veka. Ndandu tuntambulanga yilutidi na mangolo tumvanganga!

17. Mbi tufueti visa ayi diambu mbi tufueti ba keba keba?

17 Tufueti visa ti mangolo kadika mutu mu befu kadi madi ndilu. Diawu tufueti ba keba keba mu mambu tuntomba kuvanga. Dedi, tulenda bunga mangolo mitu mu kutomba kubaka kimvuama kiwombo. Khumbu yimueka, ditoko dimueka wuba busina wuyuvula Yesu: ‘Diambu mbi yifueti vanga muingi ndibaka luzingu lukalumani?’ Dibakala adiodi waba tumukinanga Nsiku. Ḿba nandi wuba mutu wumboti, kibila nsoniki yi buku yi Malaku wutuba ti Yesu ‘wumonisa luzolo mu nandi’. Diawu Yesu kankambila: ‘Yenda ayi sumbisa biuma bioso bidi yaku, ayi yiza muingi wuba nlandikini’ama.’ Nandi waba tomba kulandakana Yesu. Vayi kasa tomba ko kubika “kimvuama kiwombo” kaba. (Malako 10:17-22) Diawu kakhambu kikinina vangu Yesu kamvana ayi wutatamana kuba mvika wu ‘busina.’ (Matai 6:24) Boti ngiewu, khanu mbi wusola? 

18. Mbi tufueti vanganga kadika khumbu, ayi mu kibila mbi?

18 Kadika khumbu buboti beni kuyindulanga mambu tuidi mu kutula va theti mu luzingu luitu. Kibila mbi? Kibila mawu mala tusadisa kuzaba ti tuidi mu kusadila buboti mangolo mitu. Tala mambu mamonikina khomba mueka bantedilanga Mark. Nandi wutuba: “Mu mimvu miwombo, minu yaba yindulanga ti luzingu yinnata luisi ko kikhafi. Minu yiba ntuami ntuala, vayi yaba yindulanga beni matedi kuluta baka zimbongo ayi luzingu lumboti. Minu yaba yikuvusanga kibila mbi luzingu luama lubela beni phasi. Minu yiyiza visa ti yaba tsikikanga beni mayindu mami mu zitsatu ziama ayi yaba vananga to Yave thangu ayi mangolo maba sobilanga.” Mark wubalula phila yi kuyindudila ayi wubalula nzingulu’andi muingi kaluta baka thangu yi kusadila Yave. Mark wutuba: “Khumbu zinkaka minu yinkuazukanga, vayi mu mangolo ma Yave ayi lusalusu lu Yesu yidi mu kununga bikaku biami.”

19. Kibila mbi didi diambu dinkinza kutadila mambu mu phila yifuana?

19 Boti tutidi kutatamana kubaka khindusulu mu vangu ki Yesu, tufueti vanga mambu matatu. Diambu ditheti, kutadila mambu mu phila yimboti. Kisalu tumvanganga kidi ki Yave, diawu tufueti vangila kiawu mu phil’andi. Befu tuidi bisadi, ayi naveka Yave wumvananga zithuadusulu. (Luka 17:10) Kutomba kuvanga kisalu ki Yave mu phil’itu kuidi buka kutomba kunuanisa vangu ki Yesu. Yindula mambu malenda monikina ngombi, wummanga kuba ku tsi vangu ki mutu wumvuidi ayi wuntomba kutina. Kheti mangolo mawombo kadi, nandi kalenda vonga ayi kuyiluekisa naveka. Vayi bo tumvangila mambu mu  phila yi Yave, befu tumbakanga ndandu yiwombo. Tebuka moyo ti bo Yave kantomba kioso kiuma kisalama, vasi ko mutu wulenda kunkaka.—Loma 8:31; 1 Yoane 4:4.

20. Mbi bifueti kutu tuadisa kunata vangu ki Yesu?

20 Diambu dimuadi, kusadila mu kibila kimboti. Makani mitu ma kukembisa Tat’itu yi luzolo Yave, mawu mafueti kutu tuadisa. Batu bankaka mu thangu yi Yesu baba sadilanga mu khunya zimbongo ayi mu kibila ki tsatu zikhambu fuana, basa baka ko mayangi ayi bayiza yekula vangu ki Yesu. (Yoane 6:25-27, 51, 60, 66; Filipi 3:18, 19) Vayi baneni basala mu kibila ki luzolo lu kiedika mu Nzambi ayi kuidi bankaka, banata vangu ki Yesu mu luzingu luawu loso va ntoto ayi batambula kivuvu ki kusala na Klisto ku diyilu. Mawu malenda tumonikina. Befu kunata vangu ki Yesu mu kibila kimboti, tuala sala mu mayangi.

21. Dedi bummonisina Matai 6:31-33, lufiatu mbi tulenda ba mu Yave?

21 Diambu dintatu, ba mayindu mafuana. Bo tunkikinina vangu ki Yesu, befu tunsolanga kukimanga ayi kunata luzingu lu ziphasi. Yesu wutuba ti bala tuthota. Vayi tulenda ba lufiatu ti Yave wala tuvana mangolo tuntomba muingi tukuikama mu moso mambu malenda monika. Bo tumbuela kuikama, buawu mvandi tumbuela bakanga mangolo. (Yakobi 1:2-4) Mvandi tulenda ba lufiatu ti Yave wala kieba zitsatu zitu, Yesu wala tukengidila ayi zikhomba zitu bala tukindisa. (Tanga Matai 6:31-33; Yoane 10:14; 1 Tesalonika 5:11) Bukiedika, tuidi biabioso tuntomba muingi tukuikama!

22. Mu diambu mbi tufueti vutulanga matondo?

22 Nkieto wunani wuba kumbanga menga wubaka khindusulu muna kilumbu Yesu kambelusa. Vayi muingi katatamana kubaka khindusulu, vaba tombulu nandi kuba nlandikini wukuikama wu Klisto. Makani mbi wummuena nandi kabaka? Boti wukikinina vangu ki Klisto, yindula lusakumunu katambula—lu kusala na Yesu ku diyilu! Ni kiuma kabika muingi kulandakana Yesu kiluta luvalu kena lusakumunu alolo! Kheti kivuvu kitu ki kuzinga ku diyilu voti va ntoto, tulenda vutula matondo mu kukikinina lutumu Yesu kavanga: “Yizanu kuidi minu!”

NKUNGA 13 Klisto, Ntungulu’itu

^ Lut. 5 Yesu wu tutumisa: ‘Yizanu kuidi minu.’ Mbi tufueti vanga muingi kumonisa ti tuntumukinanga lutumu alolo? Dilongi adidi dinkuiza vana mvutu wu kiuvu akioki ayi kutu sadisa kutebuka moyo buidi tulenda bakila khindusulu mu kusala va kimueka na Yesu.

^ Lut. 60 MAMBU MADI MU ZIFIKULA: Yesu wubomba ayi wukindisa bankaka mu ziphila ziwombo.

^ Lut. 66 MAMBU MADI MU ZIFIKULA: Dedi nandi, khomba yimueka wummonisa mu ziphila ziviakana ti wumbombanga ayi wunkindisanga bankaka.