Skip to content

Skip to table of contents

 NONGU YI LUZINGU

Lusakumunu lu Yave Luvioka Biuma Bioso Yiba Yindula

Lusakumunu lu Yave Luvioka Biuma Bioso Yiba Yindula

‘MINU YIZEBI ti yifueti ba ntuami ntuala. Vayi bukiedika ti kiawu kidi kisalu kimboti?’ Kiawu kiuvu yaba kuyivananga. Minu yaba zolanga beni kisalu kiama ki kufila bidia mu zitsi zi África, dedi Dar es Salaam, Elisabethville ayi Asmara. Mu thangu beni, minu yabasa yindulanga ko ti yinkuiza sadila Yave mu kisalu ki thangu ka thangu mu bibuangu abiobi ayi bibuangu binkaka ku África!

Bo yinunga divuda yiba ayi yitona kisalu ki ntuami ntuala, luzingu luami lubaluka mu phila yikhambu yindudila. (Efeso 3:20) Buidi mamonikina? Ava kutona, ndoko tuvuka va thononu.

Minu yibutuka ku Berlim, Alemanha, mua zingonda zivioka bo Mvita Wumuadi wu Nza Yimvimba wutona mu mvu 1939. Mu mvu 1945 kutsuka mvita beni, mapulanu ma masodi maba kuiza dodulanga zitsoto zinneni ku divula di Berlim. Mawu mamonika beni ku kizunga tuaba kalanga. Diawu minu ayi dikanda diami tutinina ku kibuangu tubakila lukiebo. Bosi, tubaka makani ma kukuenda ku Erfurt, kibuangu mam’ami kabutukila.

Na matata mami ayi khomb’ami yinkieto ku Alemanha mu mvu 1950

Mam’ami waba tomba kubakula kiedika, diawu katangila zibuku ziwombo zisonika batu ba luzabu ayi wuviokila mu binganga biwombo, vayi kasa kuangalala ko mu mambu kamona. Bosi, mu mvu 1948, Zimbangi wadi zi Yave bakokuta nzo’itu. Mam’ami wuba tumisa bakota ayi wuba vana biuvu biwombo. Ava kuduka kilokulu kimueka, nandi wukhamba ayi wukamba khomb’ami: “Yima bakula kiedika!” Bosi mam’ami, khomb’ami ayi minu tutona kulandakana zikhutukunu ku Erfurt.

Mu mvu 1950, tubue vutuka ku Berlin ayi tuyenda mu kimvuka ki Berlin-Kreuzberg. Bosi tuyenda kuezingila ku nzo yinkaka ku Berlin ayi tuyenda mu kimvuka ki Berlin-Tempelhof. Buviokila thangu, mam’ami wubotama, vayi minu yaba yindulanga ti yisa ba ko wukubama. Kibila mbi?

YINUNGA ZITSONI AYI DIVUDA YIBA

Zitsoni ziaba kuthulanga nkaku muingi kubuela sadila Yave. Minu yaba basikanga mu kisalu ki kusamuna, vayi mu mimvu miodi yabasa nunganga ko kuvana batu kimbangi. Bosi yitona kukangala na zikhomba zi babakala ayi zi bakieto bamonisa kibakala ayi luzolo luawu mu Yave. Bawombo mu bawu bavuka mu zitsotolo baviokila ku buloku bungolo ku Alemanha Oriental. Bankaka batula kiphuanza kiawu va kingela muingi bilongulu bitu bikota ku Alemanha Oriental. Kifuani ki zikhomba aziozi kikhindisa beni. Minu yaba yindula: ‘Boti bawu batula luzingu  ayi kiphuanza kiawu va kingela mu kibila ki Yave ayi zikhomba, buna minu mvama yifueti vanga mangolo muingi kununga zitsoni yidi.’

Kisalu ki kusamuna mu mangumba kivangama mu mvu 1955, kiawu kiuma kitheti yivanga muingi kununga zitsoni yiba. Mu nkanda wubasika mu Informante, * Khomba Nathan Knorr wusonika ti kiawu kinkuiza ba kimueka mu kisalu kilutidi kima vangama mu mangumba mu kimvuka ki Yave. Nandi wutuba ti boti minsamuni mioso mibuela mioko, khanu yiyiza ba “ngonda yilutidi tuma vangila kisalu ki kusamuna.” Ayi mawu mayiza monika! Vasa vioka ko beni thangu, yikivana kuidi Yave ayi mu mvu 1956 yiyiza botama va kimueka na tat’ami ayi khomb’ami yinkieto. Vayi mu thangu yiluelu, vaba tombulu minu kubaka makani makinza.

Minu yizaba ti kisalu ki ntuami ntuala kiawu yifueti landakana, vayi kadika mvu yaba vunzikisanga diyindu adiodi. Theti, yibaka makani ma kulonguka kisalu ki kusumba ayi kusumbisa biuma kuidi zi empresa zidi mu zitsi zinkaka. Bosi, yitomba kusala mu mua thangu mu kisalu beni yilonguka muingi yibuela baka nzayilu. Diawu mu mvu 1961, yikikinina kisalu kimueka ku Hamburgo, divula dilutidi ku Alemanha mu matedi kusumba ayi kusumbisa biuma. Bo yaba luta zola kisalu kiama, buawu mvandi yaba luta vunzikisanga diyindu di kuba ntuami ntuala. Mbi yinkuiza vanga?

Minu yimvutulanga matondo kuidi Yave mu kusadila zikhomba zi luzolo muingi kutsadisa kutula mambu ma kipheve va theti mu luzingu. Bawombo mu bakundi bama bayiza ba mintuami ntuala ayi baba bifuani bimboti kuidi minu. Mvandi, khomba Erich Mundt, wuba mu buloku bungolo wukhindisa kufiatila Yave. Nandi wukhamba ti kuna buloku bungolo, zikhomba baba fiatilanga mu bawu veka, kuntuala bayiza vonga mu kipheve. Vayi bo baba fiatilanga mu Yave, batatamana bakuikama ayi bayiza ba lusalusu lunneni mu kimvuka ki Yave.

Bo yitona kisalu ki ntuami ntuala mu mvu 1963

Mambu yaya Martin Poetzinger wusadila mu Dingumba Dintuadisi katuba, mvandi matsadisa. Muingi kusadisa zikhomba, nandi waba tubanga: “Kibakala kiawu kiuma kilutidi luvalu mutu kalenda baka!” Bo yiyindula mu mawu, yiyiza baka makani ma kubika kisalu kiama ayi yitona kisalu ki ntuami ntuala mu ngonda yinsambanu, mvu 1963. Mawu makani malutidi nkinza yibaka mu luzingu luami! Bo vavioka zingonda ziwadi, ava kutona kubila kisalu kimona, bathumisa muingi kusala buka ntuami ntuala wufilu. Mu mimvu miyiza kuntuala, Yave wutsakumuna mu phila yikhambu yindudila. Bathumisa muingi yikota kikola 44 ki Ngiliadi.

DILONGI DI LUVALU YILONGUKA KU NGILIADI

Dimueka mu malongi makinza yilonguka mu kikola ki Ngiliadi kuidi zikhomba Nathan Knorr ayi Lyman Swingle didi: “Bika fika vonga mu kiyeku kiaku”. Bawu ba tukindisa tutatamana mu kiyeku kitu kheti tuaba viokila mu ziphasi. Yaya Knorr waba tubanga: “Mu mambu mbi luntsikika mayindu minu? Mu buphumbulu, mu tsodo, mu binono? Voti lunkuiza tsikika mayindu minu mu minti, mu biteka, ayi mu bizizi bi mayangi? Longukanu kuzola batu!” Kilumbu kimueka, yaya Swingle waba tusudikisa kibila mbi zikhomba ziwombo bavongila mu thinu. Vayi nandi kasa nunga ko kusueka mabanza mandi ayi meso mandi mawala matsuela. Nandi wubika kukoluka mu mua thangu nati kayiza vumbama. Mawu manyikuna ntim’ami ayi matsadisa kubaka makani ma kubika nyongisa Yesu ayi zikhomba ziandi.—Matai 25:40.

Minu, Claude, ayi Heinrich mu kisalu ki misioni ku Lubumbashi, Congo mu mvu 1967

Bo tutambula biyeku bitu, zibetelita zitatu bayiza tuyuvula tsi mbi tunkuenda. Bawu batuba mambu mamboti matedi kadika tsi. Vayi bo yivutudila: “República Democrática do Congo, bawu bakala nkadu sui ayi batuba to: Ahm, ku Congo! Bika Yave ka kusakumuna!” Mu thangu beni, zitsangu ziaba luta tubulu ku República Democrática do Congo, ziba zitedi batu bannuana ayi bayivondasana bawu na bawu. Vayi minu yitsikika mayindu mami mu malongi yilonguka ku Ngiliadi. Bo kikola kitu ki Ngiliadi kimana mu Ngonda Yivua, mvu 1967, minu, Heinrich Dehnbostel ayi Claude Lindsay tuyenda ku Kinshasa, República Democrática do Congo.

 KHUBUMUNU YIMBOTI YI KISALU KI MISIONI

Bo tutuka ku Kinshasa, tulonguka francês mu zingonda zitatu. Bosi tuyenda ku Lumbashi, baba tedilanga Elisabethville. Divula adiodo didi ku Sul yi Congo. Tuyenda kuezingila ku nzo yimueka yiba va khati tsika divula kuaba vitilanga zikhomba baba mu kisalu ki misioni.

Ni mutu kasa samuna ko ku kizingu ki Lubumbashi. Tuaba kuitukanga beni kibila tuba batu batheti mu kulonga zitsangu zimboti kuidi bawombo va kinzunga beni. Mu thangu yiluelu tutona kuvana ndongukulu yi Kibibila kuidi batu bawombo tuabasa nunganga ko kuvutukila. Mvandi tuaba longanga masodi ayi batu baba sadilanga ntinu. Bawombo baba lukinzu mu Diambu di Nzambi ayi kisalu kitu ki kusamuna. Bawombo mu bawu baba kolukanga suaíli. Diawu minu ayi Claude tubaka makani ma kulonguka mbembu beni. Vasa vioka ko beni thangu, batufila mu kimvuka kinkolukanga suaíli muingi kubuela mioko.

Kheti tumonikina mambu mamboti, mvandi tuviokila mu mambu ma phasi. Khumbu ziwombo tuaba dengananga masodi maba na mata ayi baba bakolu, voti mapolici maba makhema baba tuvuninanga mambu. Kilumbu kimueka tuaba landakana lukutukunu ku nzo kuaba vitilanga zikhomba baba mu kisalu ki minsioni. Mu kinzimbukila, dingumba di mapolici makota kuna ayi batunata ku buloku. Bawu batukuika tuba bakala nati kilokolu ki 22 bosi batubasisa.

Mu mvu 1969, yitambula kiyeku ki kuba nsungi wu divula. Savana africana kiba mvandi mu kizunga kitu, mawu maba sundula kudiata mu bilokulu biwombo mu zinzila zidi beni mayanga kukhati nsitu. Ku buala bumueka yaba ketalanga, kuba tsusu yimueka yinkieto yaba lekanga ku tsi kika kiama na bana bandi. Yilendi zimbakana ko phila kaba kukhotudilanga mu  kuvanga lusuku luwombo boti buisi buambelama kukia. Yinzolanga kuyindula builu tuaba viokisanga na zikhomba va ndeku mbazu muingi kukoluka matedi Kibibila.

Yimueka mu bikaku tuviokila yiba kukala va kimueka na batu baba tubanga ti badi Zimbangi zi Yave vayi mu bukiedika baba mu dingumba di política Kitawala. * Bawombo mu bawu bayiza botama ayi bayiza ba bakulutu ba kimvuka. Vayi zikhomba zitu zikuikama basa vunuka ko mu ‘matadi amomo masuama.’ (Yuda 12) Buviokila thangu, Yave wubotula batu abobo mu kimvuka ayi batu bawombo batona kukikinina kiedika.

Mu 1971, bamfila ku Beteli yi Kinshasa. Minu yiba vanganga bisalu biwombo: yaba kiebanga biuma Beteli kaba filanga, kudinda bilongulu ayi mambu matedi kisalu ki kusamuna. Beteli yindongisa phila yimboti yi kutudila kakika kisalu va kibuangu kiandi mu tsi yinneni, kuma bisalu biwombo bikhambu salamanga mu phila yisulama. Khumbu zinkaka, biuma Beteli kaba filanga mu mapulanu kuidi bimvuka biaba vanganga zingonda ziwombo muingi kutuka. Kibila mapulanu beni maba kululanga biuma beni mu makumbi, ayi makumbi maba kandananga zisabala ziwombo mu bititi biaba konzukanga mu nlangu. Kheti mu bikaku abiobi ayi binkaka, tununga kuvanga kisalu kioso.

Yaba kuitukanga beni kumona zikhomba kuvanga zikhutukunu zi mavula kheti basa ba ko zimbongo ziwombo. Bawu baba sadilanga mabubu ma ntoto muingi kubuongisa kibuangu bankuiza vangila masolo ma Kibibila, baba sadilanga mavesu ayi bititi bikula muingi kuvanga bibaka. Muingi kuvanga bikundu, bawu baba futikanga bititi muingi kuvanga phetu ayi baba vanganga biteva muingi kutula muanza voti kuvanga meza. Ayi bo bakhambu ba zitsiesi, bawu baba zenganga miti miluelu muingi kuvanga lusuadi luiti tsongi. Yiyituka beni kumona mayindu mamboti zikhomba basadila muingi kununga bikaku bioso bamonikina. Minu yaba zolanga beni kadika mutu mu bawu ayi yaba kuba balanga beni bo yiyenda mu kiyeku kimona yitambula.

BO YABA SADILA KU QUÊNIA

Mu mvu 1974, minu yiyenda ku Beteli yi Quênia, yidi ku Nairóbi. Tuba kisalu kiwombo ki kuvanga, kibila Beteli yi Quênia yaba kiebanga kisalu ki kusamuna mu kumi di zitsi, ayi mu mavula mankaka bakandimina kisalu kitu. Khumbu ziwombo bamfila muingi kuetala zitsi beni, vayi yaba luta kuendanga ku Etiópia, kibuangu zikhomba zitu baba viokila mu zithotolo ayi ziphasi ziwombo. Bawombo mu bawu baba kuba tovulanga voti kuba tula mu buloku. Bankaka baba vonda. Vayi zikhomba zitu batatamana bakuikama kibila baba kikundi kingolo na Yave ayi mu bawu na bawu.

Mu mvu 1980, diambu dimueka di kukuitukila dimonika mu luzingu luama: yiyiza kuelana ayi Gail Matheson. Gail widi muisi Canadá, ayi tukota va kimueka kikola ki Ngiliadi. Befu tuaba kolukanga mu nzila mikanda. Gail waba salanga buka misioni ku Bolívia. Bo vavioka 12 di mimvu, befu tubue monana ku Nova York. Vasa vioka ko beni thangu, tukuelana ku tsi yi Quênia. Minu yimvutulanga Gail matondo kibila nandi wunyindulanga mu phila Yave kanyindudilanga ayi wunkuangalalanga mu biuma kadi. Nandi wukhidi ba lusalusu lumboti kuidi minu ayi nkundi yinzolanga beni.

Mu mvu 1986, minu ayi Gail tutambula kiyeku ki kusala buka nsungi wu divula ayi minu mvami yaba salanga buka wumueka mu Dingumba di Filiali. Mu kisalu ki nsungi wu divula, befu tuyenda kuetala zitsi ziwombo ziba mu lukiebu lu Beteli yi Quênia.

Yidi mu kuvanga disolo mu lukutukunu lu mavula ku Asmara mu mvu 1992

Yintebuka moyo mu luzolo khubumunu yi lukutukunu lu mavula luvangimina mu mvu 1992 ku Asmara (ku Eritreia). Mu thangu yinani, basa kandimina ko kisalu kitu ku divula beni. Kiadi ayi kiunda kuzaba ti nzo yimueka baba suekilanga mbongo kiawu to kibuangu tubaka muingi kuvanga lukutukunu lu mavula. Nzo beni yiba yimbi kunganda vayi yiluta ba yimbi kukhati. Mu kilumbu ki lukutukunu, yiyituka beni kumona phila zikhomba babaludila kibuangu beni kukhati muingi tununga kubuongimina Yave. Makanda  mawombo matuala minledi mimboti ayi mu diela bafuka kioso kiuma kilenda monika kimbi va mesu ma batu. Luawu luba lukutukunu lu mayangi ayi lu zinyezi, ayi muba 1.279 di batu balandakana lukutukunu beni.

Kiyeku ki nsungi wu mavula kiba disuasana na biyeku binkaka tuba, kibila tuaba vingisanga zinzo mu kadika sabala. Khumbu yimueka tuvitila va nzo yimueka yimboti va ndeko ḿbu. Khumbu yinkaka tuvitila mu kibekisi ki nzo yi zi chapa ayi muingi kuvitila ku kikosi tufueti kudiata nduka 100 di zimetro. Vayi bibuangu tuaba vitilanga bisa ba ko biawu biluta nkinza mu befu. Biuma tuluta lunda mu mintima mitu biba bilumbu tuaba basikanga mu kisalu ki kusamuna na mintuami ntuala ayi minsamuni mi kimvuka. Bo tutambula kiyeku kimona, tubika bakundi bawombo ba luzolo.

LUSAKUMUNU TUTAMBULA KU ETIÓPIA

Ku tsuka mvu 1980 ayi va thononu mvu 1990, ntinu wuvana nsua zitsi ziwombo Beteli yi Quênia ziaba kiebanga muingi kubue vutuka kuvanga bisalu bitu kuidi Nzambi. Mu kibila beni, bikatalayi biwombo bizibuka mu bibuangu abiobi. Mu mvu 1993, bamfila muingi kuesala ku kikatalayi ki Etiópia kidi ku Adis-Abeba. Kheti tuaba buongiminanga Yave ku kinsueki mu mimvu miwombo, kuntuala zikhomba bayiza tambula nsua wu kubue vutuka kuvanga bisalu bitu kuidi Nzambi.

Mu kisalu ki nsungi wu divula ku khati Etiópia mu mvu 1996

Yave widi mu kusakumuna kisalu kiandi ku Etiópia. Zikhomba ziwombo zi babakala ayi zi bakieto bakota mu kisalu ki ntuami ntuala. Tona mu mvu 2012, kuvioka 20% di minsamuni bansalanga buka mintuami ntuala. Mvandi, zikhomba ziwombo baba kubika mu bikola bi Kintinu, ayi kimvuka ki Yave kitunga kuvioka 120 di Zinzo zi Kintinu. Mu mvu 2004, dikanda di Beteli bayenda ku kibuangu kimona. Ayi zikhomba bayangalala beni kumona kibuangu beni, kibila kuba mvandi kibuangu bamvangilanga zikhutukunu zinneni.

Buviokila mimvu, minu ayi Gail tuyiza ba bukundi na zikhomba zitu zi luzolo ku Etiópia. Befu tuba zolanga beni kibila badi batu bamboti ayi ba luzolo. Mu mua mimvu mima vioka nati bubu, tutona kuviokila mu mambu ma phasi matedi buvinya buitu, diawu batufidila ku Beteli yi Europa Central. Zikhomba akuku batukiebanga mu luzolo, vayi tukhidi yindulanga beni bakundi bitu ku Etiópia.

YAVE WUSAKUMUNA

Befu tumona phila Yave kayonzudila kisalu kiandi. (1 Kolinto 3:6, 9) Dedi, bo yivana kimbangi basi Ruanda baba tombanga mamanya ma thalu ku Congo, kusa ba ko ni nsamuni wumueka ku Ruanda. Bubu kueka kuvioka 30.000 di zikhomba ku tsi ayoyi. Mu mvu 1967, República Democrática do Congo yiba nduka 6.000 di minsamuni. Bubu kuidi nduka 230.000 di minsamuni, ayi kuvioka bivevi di bivevi bi batu balandakana lukutukunu lu mbambukulu moyo lufua lu Yesu mu mvu 2018. Thalu yi minsamuni yibuelama kuvioka 100.000 di minsamuni mu zitsi Beteli yi Quênia ziaba kiebanga.

Mu 50 di mimvu mima vioka, Yave wusadila zikhomba ziwombo muingi kutsadisa kukota mu kisalu ki thangu ka thangu. Kheti yikhidi monanga zitsoni, yilonguka kufiatila Yave mu mamoso. Mamoso yiviokila ku África, matsadisa kubuela ba mvibudulu ayi kukuangalala mu biuma yidi. Minu ayi Gail tunkuitukanga beni zikhomba zitu badi kifuani mu kukaba, kumonisa lukuikumunu ayi lufiatu mu Yave. Ayi minu yimvutulanga Nzambi matondo mu kumbonisa nlemvu’andi. Bukiedika, Yave wutsakumuna mu phila yikhambu yindudilanga!—Minkunga 37:4.

^ Lut. 11 Bayiza tedila Nosso Ministério do Reino ayi bubu bavingisa mu Nzingulu Ayi Kisalu Kitu ki Buklisto—Thuadusulu yi Zikhutukunu.

^ Lut. 23 “Kitawala” kidi kikuma kiyizila mu mbembu suaíli kinsundula “kuyala, kutuadisa voti kutuma”. Makani ma dingumba adiodi maba ma kuvanga Congo kubika bueba ku tsi luyalu lu basi Bélgica. Batu baba mu mangumba ma Kitawala baba tambulanga, kulonguka ayi kukabula bilongulu bi Zimbangi zi Yave. Bawu baba balulanga malongi ma Kibibila muingi kubuela mioko mayindu mawu ma política, bikhulu ayi luzingu luawu lu kitsuza.