Skip to content

Skip to table of contents

Bukiedika ti Yesu Wufuila mu Kibila Kiama?

Bukiedika ti Yesu Wufuila mu Kibila Kiama?

MU Kibibila, tuntanganga bifuani bi batu bakuikama badi ‘mabanza madedakana na mitu.’ (Yakobi 5:17) Dedi, tulenda fika visikisa mambu Polo kaba tomba kutuba mu Loma 7:21-24: ‘Mu thangu yintomba vanga mamboti, mambu mambi mawu madi mu khati’ami. . . . Minu yidi mutu wuphamba!’ Mabanza amomo makiedika, malenda tuvana nsika bo zinzimbala zitu zitukuizila mu kilunzi.

Polo wutubila mvandi matedi mabanza mankaka kaba. Mu Ngalatia 2:20, nandi wutuba: “Muana wu Nzambi . . . wunzola ayi wukiyekula [naveka mu kibila kiama].” Polo wuba lufiatu mu mawu. Mawu mabanza mvaku widi? Ḿba khumbu zinkaka ndamba.

Boti wunyindula ti wisi ko luvalu mu kibila ki masumu wuvola kumbusa, ḿba dilenda ba diambu diphasi kukikinina ti Yave wuku zolanga ayi wuku lemvukila, ayi wulenda mona phasi kutadila khudulu yi Yesu buka nkhayilu yi Nzambi kuidi ngiewu. Bukiedika ti Yesu wuntomba tutadila khudulu mu phila ayoyi? Boti ngete, mbi bilenda tusadisa kutadila khudulu buka nkhayilu yi Nzambi? Tuantubila mimvutu mi biuvu abiobi.

BUIDI YESU KANTADILANGA NKHAYILU KAVANA

Yesu wuntomba tutadila khudulu buka nkhayilu bavana kuidi kadika mutu. Buidi tulenda bela lufiatu mu mawu? Yindula kinongu kidi mu Luka 23:39-43. Dibakala dimueka widi va dikunzi didi va ndeku Yesu, wunkikinina ti widi foto mu mambu kavanga kumbusa. Ḿba diambu dimbi beni kavanga, diawu bambandila va dikunzi kibila mawu baba vangilanga kuidi bitongueni. Mu kibila ki kiunda kingolo kaba mu mambu kaba viokila, nandi wulomba kuidi Yesu: ‘Thebukila moyo mu luyalu lu Kintinu kiaku.’

Mvutu mbi Yesu kamvana? Yindula khienzo Yesu kamona bo kabalula ntu muingi kutala ditongueni beni. Kheti mu ziphasi kaba viokila mu thangu beni, Yesu wubomba dibakala beni. Nandi wutuba: ‘Bukiedika ndikukamba mu kilumbu akiki, ngie wala ba yama ku paladizu.’ Khanu Yesu wutebula to moyo dibakala beni ti ‘Muana mutu . . . wuyiza muingi kusadila bankaka ayi kuvana moyo’andi muingi kukula batu bawombo.’ (Matai 20:28) Vayi Yesu mu luzolo wumonisa kuidi dibakala beni ndandu yi nkhayilu’andi kuidi nandi. Nandi wummonisa mamboti mu kusadisa bikuma “minu” ayi “ngiewu.” Ayi wukamba dibakala beni ti nandi wala zinga ku paladizu va ntoto.

Bukiedika, Yesu waba tomba muingi dibakala adiodi kavisa ti nkhayilu yi khudulu kankuiza vana yilenda kuntuadisa ndandu. Boti Yesu waba tomba muingi ditongueni beni wukhambu baka luaku lu kusadila Nzambi kabaka ndandu yi khudulu, bukiedika ti mawu mvandi mayindu kadi kuidi kisadi ki Nzambi widi wubotama. Mbi bilenda tusadisa kukikinina ti nkhayilu yi Klisto yintuadisa ndandu kadika mutu mu befu kheti kumbusa tuvola masumu mangolo?

 MBI BISADISA POLO

Kisalu ki kusamuna Yesu kavana Polo, kinsadisa kavisa ti Yesu wufuila mu kibila kiandi. Mu phila mbi? Nandi wusudikisa: ‘Minu yimvutudila Yesu Klisto Mfumu’itu matondo, wuphana lulendu bo kamona ti yidi yikuikama, bo kaphana kiyeku ki kusamuna, kheti kumbusa minu yiba mvuezi, nyamikisi ayi mfingi.’ (1 Timoteo 1:12-14) Kiyeku Yesu kavana Polo kheti mu mambu moso mambi kavanga, mansadisa kuba lufiatu mu nlemvo ayi luzolo Yesu kadi mu nandi. Bobuawu mvandi, Yesu wufiatila kadika mutu mu befu kiyeku ki kusamuna zitsangu zimboti. (Matai 28:19, 20) Kiyeku beni kitu sadisanga mvandi kuvisa ti Yesu wufuila mu kibila ki kadika mutu mu befu.

Albert wuvanga nduka 34 di mimvu bo kavayikusu mu kimvuka, vayi bubu nandi wuvutukizi mu mioko mi Yave. Nandi wutuba: “Yizimbakananga ko masumu mami. Vayi bo yidi mu kisalu ki kusamuna, yikimonanga dedi Polo, mvami yitambula kuidi Yesu kiyeku ki kusamuna. Mawu ma kuphananga mayangi ayi ma kutsadisanga kuba mayindu mamboti mu minu, mu luzingu luami ayi kivuvu mu bilumbu binkuiza kuntuala.”—Minkunga 51:3.

Bo wunlonguka na mintindu mioso mi batu, wuba sadisa kuvisa nlemvo ayi luzolo Yesu kadi mu bawu

Allan, wuba luzingu lu buphunya ava kulonguka kiedika wutuba: “Minu yikhidi yindulanga mambi moso yivangila batu. Khumbu zinkaka ma kuthuadisanga kiunda. Kheti yidi mutu wusumuka, yimvutulanga matondo kuidi Yave mu kuphana luaku lu kuzabakisa bankaka zitsangu zimboti. Bo yimmonanga phila batu bantadilanga ziawu, yintebukanga moyo phila Yave kadidi mamboti ayi luzolo. Minu yimmonanga ti nandi wukutsadilanga muingi kusadisa bankaka badi mu kunuana nzingu minu yidi mu kunuana.”

Kisalu kitu ki kusamuna kitu sadisanga kutsikika mangolo ayi mayindu mitu mu mambu mamboti. Mawu matuvananga nsika mu nlemvu, luzolo ayi lufiatu Yesu kadi mu befu.

YAVE LUTIDI MINTIMA MITU

Nati nza yi Satana yela bungua, mintima mitu miela tatamana kutu fundisa mu kibila ki masumu tuvola kumbusa. Mbi biela tusadisa kununga mayindu amomo?

Jean wunnuana nzingu mu kibila ki luzingu lukhambu fuana voti lukabuka kaba natanga bo kaba ditoko wutuba: “Yinzolanga beni kuzaba ti ‘Nzambi lutidi na mintima mitu.’”(1 Yoane 3:19, 20) Dedi Jean, befu tulenda baka mbombolo kuzaba ti Yave ayi Yesu bazebi ti tuidi batu basumuka. Tebukanga moyo ti bawu bavana khudulu bakana ko muingi kukula batu bavedila vayi muingi kukula batu banyonganga masumu mawu.—1 Timoteo 1:15.

Befu tumbanga lufiatu ti khudulu yinsadisa kadika mutu mu befu bo tunyindula mu nsambu phila mambu Yesu kavangila batu basumuka ayi bo tumvanga mamoso tulenda nunga mu kisalu nandi katu vana. Mu kuvanga mawu, buka Polo, ngie wulenda tuba: Yesu “wunzola ayi wukiyekula [naveka mu kibila kiama].”