Skip to content

Skip to table of contents

Yave Wumvwanga Nkinza “Amen” Yaku

Yave Wumvwanga Nkinza “Amen” Yaku

YAVE wumvwanga nkinza mbwongimin’itu. Nandi ‘wunlekilanga dikutu ayi wunkuwanga’ bisadi byandi, ayi wumvwanga nkinza mambu moso tumvanganga mwingi kunkembisa, kheti madi malwelu voti ndamba. (Malaki 3:16) Buka, tulenda tubila kikuma kimweka ḿba befu tuma tuba khumbu ziwombo. Kikuma beni “amen.” Bukyedika kwandi ti Yave wumvwanga nkinza kikuma akyoki kilwelu? Ngete, nandi wumvwanga nkinza! Mwingi tuzaba kibila mbi, twentubila mbi kikuma akyoki kinsindula ayi bwidi bansadilanga kiawu mu Kibibila.

‘DIKABU DYOSO DYALA TUBA, “AMEN”’

Mu Kingelesu, kikuma “amen” kinsundula “mavangama abobo,” voti “makyedika.” Kiawu kifumina mu kikuma kimweka ki Kiebeleo kinsundula “maba makwikama,” “maba ma lufyatu.” Khumbu zinkaka baba sadilanga kiawu mu mambu ma lufundusu. Bo mutu kaba vanganga tsila, nandi waba tubanga “amen” kutsuka mwingi kumonisa ti mambu kabe tuba madi makyedika ayi mambu malenda monika kuntwala ma kumbwila mu ntu’andi. (Zintalu 5:22) Bo mutu kaba vanganga mawu, nandi waba bwela kindisanga mambu kantuba ayi kubika bwe balula mawu.—Nehemia 5:13.

Phila yimweka yimboti basadila kikuma “amen” yidi yisonama mu Deutelonomi kapu 27. Bo basi Isaeli bakota ku Ntoto Yave Kakanikisa, bawu bakutakana va khati tsika Mongo Ebali ayi Mongo Ngalizimi mwingi kukuwa bo baba tanga Nsiku wu Mose. Bawu baba vana bakana ko to mwingi kukuwa, vayi mwingi batuba ti bakikinina Nsiku. Bo batanga mambu malenda kuba monikina ba kukhambu tumukina, bawu bamonisa ti bakikinina Nsiku mu kutuba “Amen.” (Deutelonomi 27:15-26) Yindul’abu bivevi bi babakala, bakyeto ayi bana balezi bamvana mvutu mu mbembu yinangama! (Yosua 8:30-35) Bawu basa zimbakana ko mambu batuba mu kilumbu beni. Ayi bawu batatamana mu mambu batuba, bila Kibibila kintuba: “Basi Isaeli batatamana kusadila Yave mu bilumbu byoso bi Yosua ayi mu bilumbu byoso bi bakulutu baba bamoyo bo Yosua kafwa ayi bamona mambu moso Yave kavangila basi Isaeli.”—Yosua 24:31.

Yesu mvandi wusadila kikuma “amen” mwingi kumonisa ti mambu kaba tuba maba makyedika,  ayi nandi to wusadila kiawu mu phila ni mutu wunkaka kasadila. Yesu kasa tuba ko “amen” mwingi kukikinina mambu mutu wunkaka kantuba, vayi nandi wutuba “amen” ava kutuba dyoso dyambu mwingi kumonisa ti maba makyedika. Khumbu zinkaka, nandi waba vutukila kikuma beni mu kutubanga “amen amen.” (Matai 5:18; Yoane 1:51) Bo kavanga mawu, nandi wumonisa kwidi batu baba kunkuwa ti mambu kaba tuba maba makyedika. Yesu wuba bibila bimboti bi kukolukila mu lufyatu, kibila nandi to wuba nswa wu kudukisa zikhanu zyoso zi Yave.—2 Kolinto 1:20; Nzaikusu 3:14.

‘BATU BOSO BAVUTUDILA, “AMEN!’ AYI BAKEMBISA YAVE’

Basi Isaeli mvandi baba sadilanga kikuma“amen” bo baba kembisanga ayi kusambilanga Yave. (Nehemia 8:6; Minkunga 41:13) Mu kutuba kikuma “amen” kutsuka nsambu, batu baba kuwa bamonisa ti bankikinina mambu bantuba. Baboso baba vana baba lwaku lu kukoluka ayi kukwangalala mu kubwongimina Yave mu phila ayoyi. Mawu mamonika bo Ntinu Davidi kanata Kasu yi Luwawunu yi Yave ku Yelusalemi. Mu nkungi wulanda, nandi wuvanga nsambu vayi wuvangila wawu mu kuyola nkunga, ayi widi wusonama mu 1 Lusansu 16:8-36. Baboso bayangalala beni mu nsambu beni ayi ‘batu boso bavutudila, ‘Amen!’ ayi bakembisa Yave.’ Bukyedika, bawu bayangalala beni kubwongimina Yave va kimweka.

Baklisto mu sekulu yitheti basadila mvandi kikuma “amen” bo baba kembisa Yave. Minsoniki mi Kibibila basadila khumbu ziwombo kikuma beni mu zibuku basonika. (Loma 1:25; 16:27; 1 Petelo 4:11) Buku yi Nzaikusu yintubila matedi bivangu bi kiphevi binkembisa Yave ayi bintuba: ‘Amen! Lukembisa Yave!’ (Nzaikusu 19:1, 4) Baklisto batheti baba tubanga “amen” mu minsambu baba vanganga mu zikhutukunu. (1 Kolinto 14:16) Kisa ba ko kikuma baba vutukilanga to mu khambu yindula.

KIBILA MBI “AMEM” YAKU YIDIDI NKINZA?

Bo tuma longuka bwidi bisadi bi Yave baba sadilanga kikuma “amen” tulenda mona kibila mbi “amen” yididi phila yimboti yi kumanisina lusambulu.  Bo tuntuba “amen” kutsuka nsambu’itu, twidi mu kumonisa ti mambu tuma tuba madi makyedika. Ayi bo tuntuba “amen,” kheti ku tsi ntima, mu nsambu mutu wunkaka kabe vanga, befu tummonisanga ti tunkikinina mu mambu kabe tuba. Twentubila mvandi bibila binkaka “amen” yitu yididi nkinza.

Befu tumvwanga nkinza mbwongimin’itu. Befu tumbwongiminanga Yave bo tunsambila bika to mu mambu tuntuba, vayi na mu mavanga mitu. Kuzaba ti tutidi Yave kavwa nkinza “amen” yitu, kwala tusadisa kumonisa mavanga mamboti ayi kutsikika mayindu mitu mu nsambu.

Befu twidi kithwadi buka bisadi bi Yave. Nsambu bamvanganga mu kimvuka wu tusadisanga kutsikika mayindu mitu mu mambu baboso mu kimvuka badi mu kukuwa. (Mavanga 1:14; 12:5) Bo tuntubanga “amen” va kimweka na zikhomba zitu zi babakala ayi zi bakyeto, befu tumbwela banga yawu kithwadi. Bo tuntuba “amen” kuba mu mbembo yinangama voti ku tsi ntima, nsambu’itu wulenda nata Yave kutuvana byuma tube dinda.

“Amen” yitu yinsadisanga kubwela kembisa Yave

Befu tunkembisanga Yave. Yave wummonanga mamoso tumvanganga mwingi kumbwongimina. (Luka 21:2, 3) Nandi wummonanga kibila tu kumbwongiminanga ayi mambu madi mu ntim’itu. Kheti bo tunlandakana lukutukunu mu telefoni, tulenda ba lufyatu ti Yave wumvwanga nkinza “amen” yitu. Bo tuntuba “amen,” befu tumbanga kithwadi na zikhomba badi mu lukutukunu mwingi kukembisa Yave.

“Amen” yitu yilenda monikina buka ti yisi ko nkinza, vayi luvalu beni yidi. Buku mweka yintubila matedi Kibibila yituba: “Mu kusadila kikuma “amen,” bisadi bi Nzambi balenda monisa lufyatu ayi kivuvu kikyedika kidi mu mintima miawu.” Tubikanu Amem yoso tuntubanga yiyangidika Yave.—Minkunga 19:14.