Skip to content

Skip to table of contents

Zimbangi zi Yave

Select language Ibinda

Kuvanga Mamboti—Bwidi Wulenda Kunina Khadulu Ayoyi?

Kuvanga Mamboti—Bwidi Wulenda Kunina Khadulu Ayoyi?

BEFU boso tuntomba batu ba tutadila banga batu bamboti. Vayi didi dyambu diphasi kuba mutu wumboti mu bilumbu abibi. Batu bawombo badi ‘zimbeni zi mamboti.’ (2 Timoteo 3:3) Bawu bambayisanga minsiku mi Yave. Mambu kantuba ti madi mamboti, bawu bantubanga ti ‘madi mambi’ ayi mambu kantuba ti madi mambi, bawu bantubanga ti ‘madi mamboti.’ (Yesaya 5:20) Mvandi phasi beni kuba mutu wumboti mu kibila ki mambu ma tumonikina, ḿba ma tutwadisa beni ziphasi ayi mvandi kibila twidi batu basumuka. Diawu tulenda ba mayindu dedi ma Anne, * khomba mweka yinkyeto wunsadilanga Yave mu mimvu miwombo. Nandi wutuba: “Minu yimvanganga beni mangolo mwingi kukikinina ti yilenda ba mutu wumboti.”

Mayangi kuzaba ti befu boso tulenda monisa khadulu yi kuvanga mamboti! Kibila yawu yidi khadulu yi mbutu yi phevi yilongo yi Nzambi, ayi phevi’andi yilutidi na bikaku nza yi Satana ayi masumu mitu malenda ku tutwadisa. Twanlonguka mbi binsundula kuvanga mamboti ayi bwidi tulenda monisina khadulu ayoyi mu phila yifwana.

MBI BINSUNDULA KUVANGA MAMBOTI?

Kuvanga mamboti kunsundula kuba mutu wumboti. Kunsundula mvandi kubika ba mutu wumbi ayi kubika vanga mambu mambi. Mutu wumvanganga mamboti wumvanganga mangolo ma kusadisa bankaka ayi wu kubavangilanga mambu mamboti.

Ḿba ngye mana mona batu bankaka kuvanga mambu mamboti kwidi basi dikanda ayi bakundi, vayi kwidi bawu to mamboti mafweti sukila? Bukyedika, ni mutu mu befu kalendi nunga ko kuvanga mamboti thangu zyoso, bila Kibibila kintuba ti ‘vasi ko ni mutu wusonga va ntoto wumvanganga to mamboti thangu zyoso ayi wukhambu volanga masumu.’ (Mpovi 7:20) Mvwala Polo wutuba: ‘Bila yizebi ti kwisi ko dyambu dimboti mu minu; voti mu nyitu’ami.’ (Loma 7:18) Mambu amomo mammonisa ti tufweti longuka matedi Yave mwingi tukuna khadulu beni.

‘YAVE NKWA MAMBOTI’

Yave Nzambi nandi to fweni tsikika zithumu mu matedi mamboti. Diawu Kibibila kintubila matedi Yave: ‘Ngiewu to nkwa mamboti ayi byabyoso wuvanga bidi bimboti. Ndongisa zithumu ziaku.’ (Minkunga 119:68) Twentubila mambu mwadi mu lutangu alulu mansudikisa mamboti ma Yave.

Yave nkwa mamboti. Mawu mansundula ti phasi beni Yave kukhambu vanga mamboti. Tala mambu Mose kamona bo Yave kayoluka yandi: ‘Yinkwiza monisa mamboti mami moso vantwal’aku.’ Yave wumonisa nkembo ayi mamboti mandi kwidi Mose. Ayi Mose wuyuwa mambu amama: ‘Yave, Yave, Nzambi nkwa kyadi, nkwa mvibudulu, nlembami, widi luzolo lukwikama ayi nkwa kyedika, wummonisanga luzolo lukwikama kwidi bivevi di bivevi bi batu, wunlemvukilanga zinzimbala, masumu, batu banlevulanga nsiku. Vayi kabikilanga ko bobo mutu widi foto.’ (Esodu 33:19; 34:6, 7) Mawu mammonisa ti Yave nkwa mamboti mu ziphiila zyoso. Yesu nandi kifwani ki mutu wuluta ba mamboti mu batu boso va ntoto, vayi nandi wutuba: “Kuisi ko mutu wumboti botula kaka, Nzambi.”—Luka 18:19.

Befu tummonanga bivisa bi mamboti ma Yave mu byuma kavanga

Byabyoso Yave kavanga bidi bimboti. Byuma byoso Nzambi kavanga bimmonisa ti nandi nkwa  mamboti. ‘Yave nkwa mamboti kwidi batu boso, ayi kiadi kiandi kidi mu bivangu byandi byoso.’ (Minkunga 145:9) Yave kasi ko luvasanu mu matedi kumonisa mamboti, nandi wumvananga batu boso moyo ayi byuma bintombulu mwingi batatamana kuzinga. (Mavanga 14:17) Nandi mvandi wummonisanga ti nkwa mamboti bo katulemvukilanga. Davidi wusonika: ‘Bila ngieyo, A Yave, widi wumboti ayi widi wukubama mwingi kulemvukila; ayi luzolo luaku lukwikama lwidi luwombo kwidi batu boso ba kutelanga.’ (Minkunga 86:5) Tulenda ba lufyatu ti ‘Yave kalendi yimina ko ni kyuma kimweka kimboti kwidi batu bandiatilanga mu lukwikumunu.’—Minkunga 84:11.

‘LONGUKANU KUVANGA MAMBOTI’

Yave wutuvanga mu kifwani kyandi. Mawu mansundula ti befu mvitu tulenda ba batu bamboti ayi kuvanga mamboti. (Ngenesi 1:27) Vayi, mawu mamonikanga ko mu nzimbukulu, diawu Dyambu di Nzambi ditukamba: ‘Longukanu kuvanga mamboti.’ (Yesaya 1:17) Vayi bwidi tulenda longukila kuvanga mamboti? Mona ziphila zitatu tulenda vangila mawu.

Yitheti, tulenda dinda kwidi Yave phevi yinlongo, yawu yilenda sadisa Baklisto kuba batu bamboti va mesu ma Yave. (Ngalatia 5:22) Bukyedika, phevi yi Nzambi yilenda tusadisa kuzola mambu mamboti ayi kulenda mambu mambi. (Loma 12:9) Kibibila kintuba ti Yave kalenda “[kutukindisa] mu mavanga moso mamboti ayi mu thubulu yoso yimboti.”—2 Tesalonika 2:16, 17.

Yimwadi, befu tufweti tanga Dyambu di Nzambi. Bo tuntanga Kibibila, Yave wu kutulonga ‘nzila yoso yi mamboti’ ayi wu tukubika ‘mu vanga mavanga moso mamboti.’ (Zingana 2:9; 2 Timoteo 3:17) Ntim’itu widi buka kasu banlundanga byuma bi luvalu. Bo tuntanga Kibibila ayi tunyindula mu mambu tuntanga, tunlundanga mambu mamboti mu ntim’itu, kuvanga mawu kwidi buka kuwesa kasu mu byuma bi luvalu byala tusadisa kuntwala.—Luka 6:45; Efeso 5:9.

Yintatu, befu tumvanganga mangolo mwingi ‘kulandakana mamboti.’ (3 Yoane 11) Mu Kibibila mwidi bifwani biwombo tulenda landakana. Vayi bifwani bilutidi bidi bi Yave ayi Yesu. Twentubila mvandi batu bankaka baba bazabakana mu mamboti mawu. Mu bawu, tulenda tubila batu bwadi: Tabita ayi Balinabasi. (Mavanga 9:36; 11:22-24) Ngye wulenda baka ndandu mu bifwani biawu ngye kulonguka mambu Kibibila kintuba matedi bawu. Mu thangu wunlonguka, tala mambu mbi bawu bavanga mwingi kusadisa bankaka. Yindula mbi wulenda vanga mwingi kusadisa mutu wu dikanda dyaku voti mu kimvuka. Yindula mvandi mambu mbi Tabita ayi Balinabasi bamonikina bo bavangila bankaka mambu mamboti. Ngye mvaku wulenda baka ndandu bawu babaka.

 Tulenda yindula mvandi bifwani bi zikhomba zitu mu bilumbu bitu bamvanganga mamboti. Buka, yindul’abu bakulutu ba kimvuka bamvanganga mangolo mwingi ‘kuzolanga mamboti.’ Bika kuzimbakana zikhomba zi bakyeto bakwikama, bila mu mambu bankolukanga ayi kifwani kiawu bawu badi ‘minlongisi mi mambu mamboti.’ (Tito 1:8; 2:3) Khomba mweka bantedilanga Roslyn wutuba: “Nkundi’ama wumvanganga mangolo mwingi kusadisa ayi kukindisa bankaka mu kimvuka. Nandi wunyindulanga mambu bawu bamvyokilanga ayi khumbu ziwombo wu kubavananga mwa minkhayilu mwingi kubasadisa. Minu yikuntadilanga buka mutu wumboti.”

Yave wukindisa dikabu dyandi ‘batomba mamboti.’ (Amosi 5:14) Kuvanga mambu beni, kwala tusadisa kuzola mambu Yave kantuba ti madi mamboti ayi kutusadisa kutomba kuvanga mamboti.

Befu tumvanganga mangolo mwingi kuba batu bamboti ayi kuvanga mamboti

Kuba mutu wumboti kwisinsundula ko kuvangila bankaka mambu bansimina voti kuba vana minkhayilu midi bukalu voti thalu yiwombo. Yindula kifwani akiki: Mutu wumvanganga zifikula kasadilanga ko to ndimba yimweka voti ziwadi mwingi kufikula. Vayi nandi wunsadilanga zindimba ziwombo mwingi kuvanga fikula. Buawu mvandi, befu kuvangila bankaka mambu malwelu khumbu ziwombo, mawu mala monisa ti twidi batu bamboti.

Kibibila kitukindisa mwingi tubanga ‘bakubama’ mu kuvanga mamboti. (2 Timoteo 2:21; Tito 3:1) Befu kuvwa nkinza bankaka mu kuzaba mambu bamvyokila, tulenda mona ziphila zi kubasadisila. (Loma 15:2) Kuvanga mawu kulenda sundula kukabila mwa kyuma twidi. (Zingana 3:27) Tulenda tumisa mutu ku nzo’itu voti kuntumisa mu nkungi tumvanga. Befu kuzaba ti mutu wumbela, tulenda kumfila nkanda, tulenda kwemmona voti kuntela mu telefoni. Tulenda bakula ziphila ziwombo mwingi kutuba, ‘mambu madi mamboti mankindisa bankaka, boso bwididi zitsatu ziawu mwingi maba ndandu kwidi batu bankuwa mawu.’—Efeso 4:29.

Dedi Yave, befu tuntombanga kuvanga mamboti kwidi batu boso. Diawu tukhambu monisanga luvasanu. Phila yilutidi tulenda vangila mawu yidi mu kusamuna zitsangu zi Kintinu kwidi baboso. Dedi bo Yesu katumina, befu tuntombanga kuvanga mamboti kheti kwidi batu ba tulendanga. (Luka 6:27) Disi ko dyambu dimbi kuvanga mamboti kwidi bankaka, kibila ‘minsiku misi ko kithatu na mambu amomo.’ (Ngalatia 5:22, 23) Bo tumvanga mamboti kheti bo batu batuvangila mambu mambi voti bo tumvyokila mu ziphasi, tulenda sadisa bankaka bazaba kyedika ayi kukembisa Yave.—1 Petelo 3:16, 17.

TUMBAKANGA NDANDU BO TUMVANGA MAMBOTI

‘Nkwa mamboti wala tambula lusakumunu mu mavanga mandi.’ (Zingana 14:14) Lusakumunu mbi kala tambula? Bo tumvangila bankaka mamboti, bawu mvawu balenda kutuvangila mamboti. (Zingana 14:22) Kheti bankaka basi tuvangila ko mambu mamboti, befu tufweti tatamana kubavangila mamboti. Kibila kuntwala bawu balenda balula mayindu mawu ayi kutuvangila mamboti.—Loma 12:20, tala matangu madi va wanda mu nwt-TPO.

Bawombo balenda tuba phila babakila ndandu mu kuvanga mamboti ayi kubika vanga mambu mambi. Tala kifwani ki khomba Nancy. Nandi wutuba: “Bo yaba konzuka, minu yisa ba ko lukinzu, yaba zolanga kitsuza ayi yiba beni nganzi. Vayi, bo yilonguka mambu Yave kantuba ti madi mamboti ayi yisadila mawu, minu yitona kubaka mayangi makyedika. Bubu minu yidi luzolo ayi lukinzu mu minu veka.”

Kibila kilutidi nkinza tufweti vangila mamboti kidi mu kuzaba ti tunkwangikanga Yave. Kheti batu bawombo basimmona ko mambu tumvanga, Yave wummonanga. Nandi zabizi khumbu zyoso tumvanganga mambu mamboti ayi bo twidi mayindu mamboti. (Efeso 6:7, 8) Bwidi nandi ka tusakumuninanga? ‘Mutu wumboti wumbakanga lunungu va meso ma Yave.’ (Zingana 12:2) Diawu tutatamananu kukuna khadulu yi kuvanga mamboti. Yave wunkanikisa ti “woso mutu wumvanga mamboti [nandi] wela kumvana nkembo, nzitusu ayi ndembama.”—Loma 2:10.

^ Lut. 2 Bavingisa mazina mankaka.